مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں زمانہ جاہلیت کے ہر شعر ( کو سنانے یا سننے ) کی اجازت دی تھی ، البتہ دو قصیدوں کی اجازت نہیں دی تھی جو اعشی کے ہیں ، راوی کا یہ کہنا ہے کہ ان دونوں قصائد میں اس شخص نے شرک کیا ہے ۔

ایک روایت میں یہ الفاظ ہیں : نبی اکرم صلی اللہ علیہ وسلم نے زمانہ جاہلیت کی شاعری کی اجازت دی تھی البتہ اعشی کے دو قصیدوں کا معاملہ مختلف ہے ، ان میں سے ایک اہل بدر کے بارے میں ہے ، اور دوسرا عامر اور علقمہ کے بارے میں ہے ۔ یہ تمام روایات امام بزار نے نقل کی ہیں ، اور امام ابویعلیٰ نے اختصار کے ساتھ نقل کی ہیں ، ان دونوں کی سند میں ایسے راوی ہیں ، جن کے ذریعے حجت قائم نہیں ہو سکتی ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اسلام کی ہجو کرتا ہے ، اس کی زبان کاٹ دو ۔ “ عبداللہ بن أحمد بن حنبل کہتے ہیں : اس کا مطلب یہ ہے کہ جو شخص اسلام کی ہجو کرے ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابوفروہ ہے اور وہ متروک ہے ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے اسلام کے بارے میں کوئی فحش شعر کہا: اس کی زبان رائیگاں جائے گی ۔ “
یہ روایت امام بزار نے نقل کی ہے اور اس کے رجال ثقہ ہیں ، البتہ بعض راویوں کے بارے میں اختلاف پایا جاتا ہے ۔

سیدنا غضیف بن ابوغضیف رضی اللہ عنہ جو نبی اکرم صلی اللہ علیہ وسلم کے صحابی ہیں وہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اسلام کے بارے میں ہجو کرے اس کی زبان کاٹ دو ۔ “
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابوفروہ ہے اور وہ متروک ہے ۔