مجمع الزوائد ومنبع الفوائد

ابونوفل بن ابوعقرب بیان کرتے ہیں : سیدہ عائشہ رضی اللہ عنہا سے دریافت کیا گیا : کیا نبی اکرم صلی اللہ علیہ وسلم کے سامنے شعر سنے جاتے تھے ؟ تو انہوں نے جواب دیا : وہ نبی اکرم صلی اللہ علیہ وسلم کے نزدیک سب سے زیادہ ناپسندیدہ کلام ہوتے تھے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب ابلیس کو زمین کی طرف اتارا گیا تو اس نے عرض کی : اے میرے پروردگار تو نے مجھے زمین کی طرف اتار دیا ہے ، اور تو نے مجھے مردود بنا دیا ہے ، تو میرے لئے کوئی گھر بنا دے ! پرودگار نے فرمایا : تمہارا گھر حمام ہو گا ، اس نے کہا: تو میرے لئے کوئی مجلس بنا دے ، پروردگار نے فرمایا : وہ بازار اور راستے ہوں گے ، اس نے کہا: تو میرے لئے کھانا مقرر کر دے ، پروردگار نے فرمایا : تمہارا کھانا وہ ہو گا جس پر اللہ کا نام ذکر نہیں کیا گیا ہو گا ، اس نے کہا: تو میرے لئے مشروب مقرر کر دے ، پروردگار نے فرمایا : ہر نشہ آور چیز اس نے کہا: تو میرے لئے اعلان کرنے والا مقرر کر دے ، پروردگار نے فرمایا : آلات موسیقی ، اس نے کہا: تو میرے لئے پڑھی جانے والی چیز مقرر کر دے ، پروردگار نے فرمایا : شاعری ، اس نے کہا: تو میرے لے تحریر مقرر کر دے ، پروردگار نے فرمایا : داغ لگانا ، اس نے کہا: تو میرے لئے بات مقرر کر دے ، پروردگار نے فرمایا : جھوٹ ، اس نے کہا: تو میرے لے پھانسنے کے آلات مقرر کر دے ، پروردگار نے فرمایا : عورتیں ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ ضعیف ہے ۔ اس سے پہلے کتاب الایمان میں اس کے مختلف طرق گزر چکے ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” امرءالقیس جہنم کی طرف جانے والوں شاعروں کا علم بردار ہو گا ۔ “
یہ روایت امام أحمد اور امام بزار نے نقل کی ہے ۔ اس کی سند میں ایک راوی ابوجہیم ہے جو ہشیم بن بشیر کا استاد ہے ، اور میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب بھی کوئی شخص گانے کے لیے آواز بلند کرتا ہے ، تو اللہ تعالیٰ دو شیطانوں کو بھیجتا ہے ، جو اس کے دونوں کندھوں پر بیٹھ جاتے ہیں اور اپنی ایڑیوں کے ذریعے اس کے سینے پر ضرب لگاتے رہتے ہیں ، اور اس وقت تک لگاتے رہتے ہیں جب تک وہ خاموش نہیں ہو جاتا خواہ وہ جب بھی خاموش ہو ۔ “
یہ روایت امام طبرانی نے مختلف اسانید کے ساتھ نقل کی ہے ، جن میں سے ایک کے رجال کی توثیق کی گئی ہے اور بعض کو ضعیف قرار دیا گیا ہے ۔

سیدنا معاویہ رضی اللہ عنہ کے غلام کیسان بیان کرتے ہیں : سیدنا معاویہ رضی اللہ عنہ نے ہمیں خطبہ دیتے ہوئے فرمایا : ” بے شک اللہ کے رسول نے سات چیزوں سے منع فرمایا ہے اور میں بھی تمہیں ان چیزوں سے منع کرتا ہوں ، خبردار ! ان چیزوں میں نوحہ ، گانا بجانا ، تصویر بنانا ، شاعری کرنا ، سونا ، خز ، زین اور ریشم شامل ہیں ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام نسائی رحمہ اللہ نے اختصار کے ساتھ نقل کی ہے ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال ثقہ ہیں ۔

سیدنا عمر بن خطاب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں سے کسی ایک شخص کا پیٹ پیپ سے بھر جائے ، یہ اس کے لئے اس سے زیادہ بہتر ہے کہ وہ شاعری سے بھرے ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ، وہ فرماتے ہیں : ہمارے علم کے مطابق خلاد بن یحیی کے علاوہ اور کسی نے اس کو مسند روایت کے طور پر نقل نہیں کیا ہے ۔

سیدنا مالک بن عمیر رضی اللہ عنہ بیان کرتے ہیں : انہوں نبی اکرم صلی اللہ علیہ وسلم کے ساتھ غزوہ فتح مکہ ، غزوہ حنین اور غزوہ طائف میں شرکت کی ہے ۔ وہ ایک شاعر شخص تھے ، وہ بیان کرتے ہیں : انہوں نے عرض کی : یا رسول اللہ ! آپ مجھے شعر کے بارے میں حکم بیان کیجئے ، نبی اکرم صلی اللہ علیہ وسلم نے فرمایا : تمہاری گردن سے لے کے تمہاری ناف کے نچلے حصے تک کی جگہ پیپ سے بھر جائے ، یہ اس سے زیادہ بہتر ہے کہ وہ شاعری سے بھری ہو ، میں نے عرض کی : یا رسول اللہ ! آپ میرے سر پر ہاتھ پھیریے ، تو نبی اکرم صلی اللہ علیہ وسلم نے اپنا دست مبارک میرے سر پر رکھا ، راوی کہتے ہیں : اس کے بعد میں نے کبھی شعر کا ایک مصرعہ بھی نہیں کہا: ، راوی بیان کرتے ہیں : سیدنا مالک بن عمیر رضی اللہ عنہ کی عمر طویل ہوئی تھی ، یہاں تک کہ ان کے سر کے اور داڑھی کے تمام بال سفید ہو گئے تھے ، لیکن وہ مقام سفید نہیں ہوا تھا جہاں نبی اکرم صلی اللہ علیہ وسلم نے اپنا دست مبارک رکھا تھا ۔
یہ روایت امام طبرانی نے معجم کبیر میں نقل کی ہے اور معجم اوسط میں اختصار کے ساتھ نقل کی ہے ، اور انہوں نے یہ الفاظ نقل کئے ہیں : ” پیپ اور خون آلود پیپ ۔ “ اس روایت کی سند میں ایسے راوی ہیں جن سے میں واقف نہیں ہوں ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کسی ایک شخص کا پیٹ پیپ سے بھر جائے ، یہاں تک کہ اسے سیر کر دے وہ اس کے لئے اس سے زیادہ بہتر ہو گا کہ وہ شاعری سے بھر جائے ۔ “
یہ روایت امام طبرانی نے نقل کی ہے ۔ اس کی سند میں ایک راوی یزید بن سفیان ہے اور وہ ضعیف ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کسی ایک شخص کا پیٹ پیپ یا خون سے بھر جائے ، یہ اس کے لئے اس سے زیادہ بہتر ہو گا کہ وہ ایسے اشعار سے بھرا ہو جن کے ذریعے ہجو کی گئی ہو ۔ “
یہ روایت امام ابویعلیٰ نے نقل کی ہے ۔ اس روایت کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تم میں سے کسی ایک شخص کا پیٹ پیپ سے بھر جائے ، یہاں تک کہ وہ مکمل بھر جائے ، یہ اس سے زیادہ بہتر ہے کہ وہ شاعری سے بھرے ۔ “
یہ روایت امام طبرانی نے نقل کی ہے ۔ اس کی سند میں ایک راوی ابوعبیدہ بن عبداللہ بن عبیداللہ بن عمرو ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا ابودرداء رضی اللہ عنہ اور سیدنا عتبہ بن عبد رضی اللہ عنہ یہ دونوں بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کسی ایک شخص کے پیٹ کا پیپ سے بھر جانا ، اس سے زیادہ بہتر ہے کہ وہ شاعری سے بھر جائے ۔ “
یہ روایت امام طبرانی نے نقل کی ہے ۔ اس کی سند میں ایک راوی بشر بن عمارہ ہے اور وہ ضعیف ہے ۔

سیدنا عوف بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم میں سے کسی ایک شخص کے پیٹ کا ، پیٹ کے زیریں حصے سے لے کر گردن تک پیپ سے بھر جانا ، جو اچھی طرح سے بھرا ہوا ہو ، یہ اس کے حق میں اس سے زیادہ بہتر ہے کہ وہ شاعری سے بھر جائے ۔ “
یہ روایت امام طبرانی نے نقل کی ہے ، اور اس کی سند حسن ہے ۔

ابوزعراء بیان کرتے ہیں : سیدنا عبداللہ بن مسعود رضی اللہ عنہ نے فرمایا : آدمی کے پیٹ کا پیپ سے بھر جانا اس کے لئے اس سے زیادہ بہتر ہے کہ وہ شاعری سے بھر جائے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف ابوزعراء کا معاملہ مختلف ہے ۔ اس کا نام عبداللہ بن ہانی ہے ، عجلی اور ابن حبان نے اسے ثقہ قرار دیا ہے اور اس میں ضعف پایا جاتا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص شعر موزوں کرتا ہے ، تو اللہ تعالیٰ کی بارگاہ میں اس کا کوئی حصہ نہیں ہو گا ۔ “
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حجاج بن نصیر ہے ، جسے جمہور نے ضعیف قرار دیا ہے ، اور ابن حبان نے اسے ثقہ کہا: ہے ، وہ کہتے ہیں : یہ غلطی کر جاتا ہے ۔ اس روایت کے بقیہ رجال ثقہ ہیں ۔

سیدنا ابوبرزہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ سفر کر رہے تھے آپ نے دو افراد کو سنا وہ دونوں گنگنا رہے تھے ، ان میں سے ایک دوسرے کو جواب دے رہا تھا اور یہ کہہ رہا تھا : ” میرا ساتھی ایسا رہا ، کہ اس کی ہڈیاں چمک رہی تھیں ، جب جنگ اُس سے ہٹی ، تو اس کا یہ عالم ہوا کہ اس کو قبر میں چھپا دیا گیا ۔ “ نبی اکرم صلی اللہ علیہ وسلم نے دریافت کیا : تم لوگ جائزہ لو ! کہ یہ دونوں کون ہیں ؟ لوگوں نے بتایا : یہ فلاں ہے اور فلاں ہے ، راوی بیان کرتے ہیں : تو نبی اکرم صلی اللہ علیہ وسلم نے فرمایا : اے اللہ ! تو ان دونوں کو اوندھا کر دے اور انہیں جہنم کی طرف لے جا ۔ “
یہ روایت امام أحمد اور امام بزار نے نقل کی ہے ۔ انہوں نے یہ الفاظ نقل کیے ہیں : نبی اکرم صلی اللہ علیہ وسلم نے غزوہ احد کے دن دو افراد کی طرف دیکھا جو ایک حجرے میں یہ شعر ایک دوسرے کو سنا رہے تھے ۔ امام ابویعلیٰ نے بھی اس کی مانند روایت نقل کی ہے ۔ اس کی سند میں ایک راوی یزید بن ابوزیاد ہے ، زیادہ تر حضرات نے اسے ضعیف قرار دیا ہے ۔

سیدنا مطلب بن ربیعہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم سفر کر رہے تھے اسی دوران آپ نے کسی کے گانے کی آواز سنی ، آپ نے دریافت کیا : یہ کیا ہے ؟ لوگوں نے دیکھا تو ایک شخص دوسرے شخص کو گا کر یہ سنا رہا تھا : ” میرا ساتھی ایسا رہا ، کہ اس کی ہڈیاں چمک رہی تھیں ، جب جنگ اُس سے ہٹی ، تو اس کا یہ عالم ہوا کہ اس کو قبر میں چھپا دیا گیا ۔ “ نبی اکرم صلی اللہ علیہ وسلم نے فرمایا : اے اللہ ! تو ان دونوں کو آگ میں ، فتنے میں اوندھا کر دے ، اور انہیں جہنم کی آگ کی طرف لے جا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے دو افرد کی آواز سنی وہ دونوں گا رہے تھے اور وہ دونوں یہ گا رہے تھے : ” میرا ساتھی ایسا رہا ، کہ اس کی ہڈیاں چمک رہی تھیں ، جب جنگ اُس سے ہٹی ، تو اس کا یہ عالم ہوا کہ اس کو قبر میں چھپا دیا گیا ۔ “ نبی اکرم صلی اللہ علیہ وسلم نے ان دونوں کے بارے میں دریافت کیا ، تو بتایا گیا : معاویہ اور عمرو بن ابوالعاص ہیں ، تو نبی اکرم صلی اللہ علیہ وسلم نے فرمایا : اے اللہ ! تو ان دونوں کو اوندھا کر دے اور انہیں جہنم کی طرف لے جا ۔ “
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن سوادہ نخعی ہے اور وہ کذاب ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گانے والی عورتوں کو فروخت کرنا اور انہیں خریدنا حلال نہیں ہے ، ان کی تجارت حلال نہیں ہے ، ان کی قیمت حرام ہے ، اور ان کو سننا فتنہ ہے ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے نقل کی ہے ، تاہم اس میں یہ الفاظ نہیں ہیں : ان کو سننا ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ ضعیف ہے ۔

سیدنا سباع بن ثابت رضی اللہ عنہ بیان کرتے ہیں : میں نے زمانہ جاہلیت میں لوگوں کو سنا ہے کہ وہ طواف کرتے ہوئے یہ شعر پڑھ رہے ہوتے تھے : آج کے دن وہ کھلے عام فرار ہو جائے گا اور ہمارے مروہ کو کھٹکھٹائے گا ۔
یہ روایت امام أحمد نے نقل کی ہے اور اس کے رجال ثقہ ہیں ۔