مجمع الزوائد ومنبع الفوائد

عبدالرحمن بن ابوامیہ بیان کرتے ہیں : حبیب بن مسلمہ ، سیدنا قیس بن سعد بن عبادہ رضی اللہ عنہ کے پاس پہلے فتنے کے زمانے میں آئے ، وہ اپنے گھوڑے پر سوار تھے ۔ وہ زین سے پیچھے ہوئے اور بولے : آپ سوار ہو جائیں ، تو انہوں نے انکار کر دیا ، سیدنا قیس بن سعد رضی اللہ عنہ نے ان سے کہا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جانور کا مالک اس کے اگلے حصے کا زیادہ حق دار ہوتا ہے ۔ “ تو حبیب نے کہا: نبی اکرم صلی اللہ علیہ وسلم نے جو بات ارشاد فرمائی ہے م میں اس سے ناواقف نہیں ہوں لیکن مجھے آپ کے بارے میں اندیشہ ہے ۔
یہ روایت امام أحمد نے نقل کی ہے اور امام طبرانی نے معجم اوسط اور معجم کبیر میں نقل کی ہے امام أحمد کے رجال ثقہ ہیں ۔

سیدنا قیس بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ہم نے آپ کے لئے پانی رکھا ، آپ نے غسل کیا ، ہم آپ کے پاس ورس لگا ہوا لحاف لے کر آئے ، وہ آپ نے اوڑھ لیا ، میں گویا اس وقت بھی آپ کے پیٹ پر ورس کا نشان دیکھ رہا ہوں ، پھر ہم آپ کے پاس گدھا لے کر آئے تاکہ آپ اس پر سوار ہوں ، تو آپ نے فرمایا : گدھے کا مالک اس کے اگلے حصے کا زیادہ حق رکھتا ہے ، تو ہم نے عرض کی : یا رسول اللہ ! یہ گدھا آپ کا ہوا ۔
( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس روایت میں سے صرف «عُكنِه» تک کا حصہ نقل کیا ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن ابولیلی ہے اور وہ خراب حافظے کا مالک ہے ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ فیصلہ دیا ہے کہ جانور کا مالک اس کے اگلے حصے کا زیادہ حق دار ہوتا ہے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عروہ بن معتب انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ فیصلہ دیا ہے کہ جانور کا مالک اس کے اگلے حصے کا زیادہ حق دار ہو گا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عصمہ بن مالک خطمی رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے ملنے کے لئے قباء تشریف لائے ، جب آپ واپس جانے لگے ، تو ہم آپ کی خدمت میں ایک گدھا لے کے آئے جو چھوٹے قدم اٹھاتا تھا ، نبی اکرم صلی اللہ علیہ وسلم اس پر سوار ہوئے ، ہم نے عرض کی : یا رسول اللہ ! یہ لڑکا آپ کے ساتھ جائے گا ، اور جانور کو واپس لے آئے گا ۔ نبی اکرم صلی اللہ علیہ وسلم نے ارشاد فرمایا : جانور کا مالک اس کے اگلے حصے کا زیادہ حق دار ہوتا ہے ، ہم نے عرض کی : یا رسول اللہ ! آپ ہی اس پر سوار ہو جائیں اور آپ ہی ہمیں واپس بھجوا دیجئے گا ، تو نبی اکرم صلی اللہ علیہ وسلم اس پر تشریف لے گئے اور پھر آپ نے وہ ہمیں واپس بھجوا دیا ، جب وہ آیا تو وہ تیز تیز قدم اٹھا رہا تھا ، یہاں تک کہ اس کا مقابلہ نہیں کیا جا سکتا تھا ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے اور وہ ضعیف ہے ۔

امام محمد بن علی بن حسین بیان کرتے ہیں : سیدنا امام حسین رضی اللہ عنہ حرہ کے ظاہری حصے پر موجود اپنی زمین کی طرف جانے کے لئے نکلے ، راوی بیان کرتے ہیں : ہم پیدل چلتے ہوئے جا رہے تھے ، راستے میں ہماری ملاقات سیدنا نعمان بن بشیر رضی اللہ عنہ سے ہوئی جو ایک خچر پر سوار تھے ، وہ اس خچر سے نیچے اتر آئے ۔ انہوں نے وہ خچر امام حسین رضی اللہ عنہ کے قریب کیا اور بولے : ابوعبداللہ آپ اس پر سوار ہو جائیں ، امام حسین نے اس بات کو ناپسند کیا ، یہ تکرار چلتی رہی ، یہاں تک کہ سیدنا نعمان رضی اللہ عنہ نے سیدنا امام حسین رضی اللہ عنہ کو قسم دی تو امام حسین نے سوار ہونے کے بارے میں ان کی بات مان لی اور بولے : تم نے قسم دے کر مجھے ایک ایسی چیز کا پابند کر دیا ہے ، جسے میں ناپسند کرتا ہوں ، اب تم جانور کے اگلے حصے پر سوار ہو جاؤ ، میں تمہارے پیچھے بیٹھ جاؤں گا ، کیونکہ میں نے نبی اکرم صلی اللہ علیہ وسلم کی صاحبزادی سیدہ فاطمہ رضی اللہ عنہا کو یہ بیان کرتے ہوئے سنا ہے ۔ نبی اکرم صلی اللہ علیہ وسلم نے ارشاد فرمایا ہے : ” آدمی اپنے جانور کے اگلے حصے اور اپنے بچھونے کے نمایاں حصے کا زیادہ حق رکھتا ہے ، اور اپنے گھر میں نماز ( پڑھانے کا ) زیادہ حق رکھتا ہے البتہ اس صورت میں حکم مختلف ہو گا ، جبکہ وہ ایسا امام ہو گا کہ لوگ اس پر اکٹھے ہوں ۔ “ تو سیدنا نعمان رضی اللہ عنہ نے کہا: اللہ کے رسول کی صاحبزادی نے ٹھیک بیان کیا ہے ، میں نے اپنے والد سیدنا بشیر رضی اللہ عنہ کو وہی بات بیان کرتے ہوئے سنا ہے ، جو سیدہ فاطمہ رضی اللہ عنہا نے بیان کی ہے ، تاہم میرے والد نے ( یہ الفاظ نقل کے ہیں : ) نبی اکرم صلی اللہ علیہ وسلم نے ارشاد فرمایا : ” البتہ اجازت کے ساتھ ایسا کیا جا سکتا ہے ۔ “ تو سیدنا امام حسین رضی اللہ عنہ سوار ہو گئے ۔
یہ روایت امام طبرانی نے نقل کی ہے ۔ اس کی سند میں ایک راوی حکم بن عبداللہ ایلی ہے اور وہ متروک ہے ۔

امام محمد بن علی بن حسین بیان کرتے ہیں : میں اپنے دادا سیدنا امام حسین بن علی رضی اللہ عنہما کے ساتھ زرانیق میں موجود ان کی زمین کی طرف جانے کے لیے نکلا جو بیداء میں تھی ، سیدنا نعمان بن بشیر رضی اللہ عنہ کے صاحبزادے ہمیں ملے ، جو ایک خچر پر سوار تھے ، وہ اپنے خچر سے نیچے اترے اور انہوں نے امام حسین رضی اللہ عنہ سے کہا: اے ابوعبداللہ آپ سوار ہو جائیے ۔ امام حسین نے یہ بات نہیں مانی ، وہ صاحب امام حسین کو مسلسل قسم دیتے رہے ، یہاں تک کہ امام حسین نے فرمایا : تم نے مجھے ایک ایسی بات کا پابند کیا ہے جسے میں ناپسند کرتا ہوں ، میں تمہیں ایک حدیث بیان کرتا ہوں جو سیدہ فاطمہ رضی اللہ عنہا نے مجھے بیان کی تھی کہ نبی اکرم صلی اللہ علیہ وسلم نے ارشاد فرمایا : ” آدمی اپنے جانور کے اگلے حصے ، اپنے بچھونے کے نمایاں حصے اور اپنے گھر میں نماز ( پڑھانے ) کا زیادہ حق رکھتا ہے ۔ “ تو سیدنا نعمان رضی اللہ عنہ کے صاحبزادے نے کہا: سیدہ فاطمہ رضی اللہ عنہا نے سچ کہا: ہے ، میرے والد نے مجھے یہ بات بیان کی ہے کہ نبی اکرم صلی اللہ علیہ وسلم نے ارشاد فرمایا ہے : اس کے بعد راوی نے حسب سابق حدیث ذکر کی ہے ، جس میں یہ الفاظ ہیں : نبی اکرم صلی اللہ علیہ وسلم نے یہ فرمایا تھا : ” البتہ اگر وہ ( مالک ) اجازت دیدے تو حکم مختلف ہو گا ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا ابوتمیمہ ہجیمی رضی اللہ عنہ بیان کرتے ہیں : ایک مرتبہ میں اپنے گدھے پر موجود تھا میری نبی اکرم صلی اللہ علیہ وسلم سے ملاقات ہوئی ، میں پیچھے ہٹ کر گدھے کی دم والے حصے پر آ گیا ، میں نے کہا: یا رسول اللہ ! میرے ماں باپ آپ پر قربان ہوں آپ سوار ہو جائیے ، نبی اکرم صلی اللہ علیہ وسلم نے فرمایا : تم اپنے گدھے کے اگلے حصے کے زیادہ حق دار ہو ، میں نے عرض کی : یا رسول اللہ ! یہ گدھا آپ کا ہوا ، تو نبی اکرم صلی اللہ علیہ وسلم اس کے اگلے حصے پر سوار ہوئے اور میں گدھے کے پچھلے حصے پر سوار ہو گیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ہشام بن لاحق ہے ، جسے امام أحمد نے متروک قرار دیا ہے اور دیگر حضرات نے بھی اسے ضعیف کہا: ہے ، امام نسائی رحمہ اللہ نے اسے قوی کہا: ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ہشام بن لاحق ہے ، جسے امام أحمد نے متروک قرار دیا ہے اور دیگر حضرات نے بھی اسے ضعیف کہا: ہے ، جبکہ امام نسائی رحمہ اللہ نے اسے قوی قرار دیا ہے اور اس کی سند میں ایسے راوی ہیں جن سے میں واقف نہیں ہوں ۔

مہاجر جو آل زیاد کے غلام ہیں وہ بیان کرتے ہیں : ایک مرتبہ میں اپنے گدھے پر سوار تھا ، اور اس کے چھوٹے ہونے کی وجہ سے میرے پاؤں زمین کے قریب پہنچ رہے تھے ، اسی دوران میرے سامنے امیرالمؤمنین سیدنا علی بن ابوطالب رضی اللہ عنہ آ گئے جو چاند کو دیکھ رہے تھے ، میں نے کہا: اے امیرالمؤمنین ! آپ کہاں جانے کا ارادہ رکھتے ہیں ۔ انہوں نے کہا: اپنے ایک کام کے سلسلے میں ، میں نے عرض کی : کیا آپ سوار نہیں ہوں گے ، انہوں نے کہا: ٹھیک ہے میں پیچھے ہٹ کر گدھے کے پچھلے حصے پر ہو گیا اور میں نے عرض کی : اے امیرالمؤمنین ! آپ سوار ہو جائیں ۔ انہوں نے فرمایا : میں ایسا نہیں کروں گا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جانور کا مالک اس کے اگلے حصے کا زیادہ حق دار ہوتا ہے ، اور بچھونے کا مالک بچھونے کے نمایاں حصے کا زیادہ حق دار ہوتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یحیی بن کثیر ابونضر ہے اور وہ ضعیف ہے ۔