مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” وہ شخص رسوائی کا شکار نہیں ہوتا جو استخارہ کرتا ہے ، وہ شخص ندامت کا شکار نہیں ہوتا ہے جو مشورہ کرتا ، ہے اور وہ شخص غریب نہیں ہوتا جو میانہ روی اختیار کرتا ہے ۔ “
یہ روایت امام طبرانی نے معجم اوسط میں نقل کی ہے اور معجم صغیر میں نقل کی ہے ، جو عبدالسلام بن عبدالقدوس کے حوالے سے منقول ہے اور یہ دونوں انتہائی ضعیف ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی کام کا ارادہ کرے اور پھر اس کے بارے میں کسی مسلمان سے مشورہ لے ، تو اللہ تعالیٰ کاموں میں سے سب سے زیادہ بہتر کام کے بارے میں اس کی رہنمائی کر دے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن حصین عقیلی ہے اور وہ متروک ہے ۔

سیدنا علی بن ابوطالب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص سے مشورہ لیا جائے وہ امین ہوتا ہے ، جب اس سے مشورہ لیا جائے ، تو وہ اس نوعیت کا مشورہ دے جو اس نے اپنے آپ کے حوالے سے کرنا تھا ۔ “
یہ روایت امام طبرانی نے معجم اوسط میں اپنے استاد أحمد بن زہیر کے حوالے سے عبدالرحمن بن عنبسہ بصری سے نقل کی ہے ، اور میں ان دونوں سے واقف نہیں ہوں ۔ اس روایت کے بقیہ رجال ثقہ ہیں ۔

سیدہ اُم مسلمہ رضی اللہ عنہا بیان کرتی ہیں : ابوالہیثم بن تیہان انصاری نبی اکرم صلی اللہ علیہ وسلم کی خدمت میں حاضر ہوئے اور آپ سے خدمت گزار مانگا ۔ نبی اکرم صلی اللہ علیہ وسلم نے ان سے یہ وعدہ کیا کہ جب آپ کو قیدی ملیں گے ، تو آپ انہیں دیدیں گے ، ان کی ملاقات سیدنا عمر رضی اللہ عنہ سے ہوئی تو انہوں نے کہا: اے ابوالہیثم ! نبی اکرم صلی اللہ علیہ وسلم کو قیدی ملے ہیں ، تم نبی اکرم صلی اللہ علیہ وسلم کے پاس جاؤ اور نبی اکرم صلی اللہ علیہ وسلم سے اپنا وعدہ پورا کروا لو ، سیدنا ابوالہیثم رضی اللہ عنہ اور سیدنا عمر رضی اللہ عنہ دونوں نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : یا رسول اللہ ! ابوالہیثم آپ کے پاس اس لئے آیا ہے تاکہ وہ اپنا وعدہ پورا کروا لے ، تو نبی اکرم صلی اللہ علیہ وسلم نے ان سے فرمایا : ہمیں دو سیاہ فام غلام ملے ہیں ، تم ان دونوں میں سے جس کو چاہو اختیار کر لو ، انہوں نے عرض کی : میں آپ سے مشورہ مانگتا ہوں ، نبی اکرم صلی اللہ علیہ وسلم نے فرمایا : جس سے مشورہ مانگا جاتا ہے وہ امین ہوتا ہے ، تم اس کو لے لو کیونکہ یہ ہمارے ہاں نماز پڑھتا ہے ، تم اسے نہ مارنا کیونکہ ہمیں نمازیوں کو مارنے سے منع کیا گیا ہے ۔ “ ( علامہ ہیثمی فرماتے ہیں : ) میں یہ کہتا ہوں امام ترمذی نے اس روایت میں سے صرف یہ والا حصہ نقل کیا ہے : ” جس سے مشورہ لیا جائے وہ امین ہوتا ہے ۔ “
یہ روایت امام ابویعلیٰ نے اپنے استاد سفیان بن وکیع کے حوالے سے نقل کی ہے اور وہ ضعیف ہے ۔

سیدنا جابر بن سمرہ رضی اللہ عنہ اور دیگر حضرات بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس شخص سے مشورہ لیا جائے وہ امین ہوتا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص سے مشورہ لیا جائے اسے امین بنایا جاتا ہے اگر وہ چاہے تو مشورہ دیدے اور اگر وہ چاہے تو مشورہ نہ دے ۔ “
یہ روایت امام طبرانی نے دو حوالوں سے نقل کی ہے جن میں سے ایک میں ایک راوی اسماعیل بن مسلم ہے اور وہ ضعیف ہے ، اور دوسرے میں ایک راوی عبدالرحمن بن عمرو بن جبلہ ہے اور وہ متروک ہے ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس سے مشورہ لیا جاتا ہے اسے امین بنایا جاتا ہے ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ،
یہ روایت امام بزار نے بھی نقل کی ہے ۔

سیدنا ابوالہیثم بن تیہان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس سے مشورہ لیا جائے اسے امین بنایا جاتا ہے ۔ “
یہ روایت امام طبرانی نے اپنے دادا عبدالرحمن بن محمد بن زید کے حوالے سے نقل کی ہے اور میں ان دونوں سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا نعمان بن بشیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس سے مشورہ لیا جائے اسے امین بنایا جاتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی حفص بن سلیمان اسدی ہے اور وہ متروک ہے ۔