مجمع الزوائد ومنبع الفوائد

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تمہارے یہ نسب اس لائق نہیں ہیں کہ تم ان کی وجہ سے کسی کو برا کہو ، تم لوگ سیدنا آدم علیہ السلام کی اولاد ہو ، صاع میں ایسی کمی جس ک تم بھر نہیں سکتے ( یعنی ہر انسان میں کوئی کمی کوتاہی ہوتی ہے ) کسی شخص کو کسی دوسرے پر کوئی فضیلت حاصل نہیں ہے ، البتہ دین یا نیک عمل کے حوالے سے فضیلت کا معاملہ مختلف ہے ، اور آدمی کے لئے ( برا ہونے کے لئے ) اتنا ہی کافی ہے کہ وہ فحش کلام کرنے والا ، بدزبان ، کنجوس یا بزدل ہو ۔ “

ایک روایت میں یہ الفاظ ہیں : ” تمہارے یہ نسب کسی کو برا کہنے کا سبب نہیں ( بن سکتے ) ہیں ۔ “
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے ، جس میں کمزور ہونا پایا جاتا ہے ۔ اس روایت کے بقیہ رجال کی توثیق کی گئی ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ان سے فرمایا : ” تم اس بات کا جائزہ لو ! کیونکہ تم کسی سرخ فام ( یعنی سفید فام ) یا سیاہ فام سے زیادہ بہتر نہیں ہو ، البتہ تم تقویٰ کے حوالے سے اس پر فضیلت رکھتے ہو گے ۔ “
یہ روایت امام أحمد نے نقل کی ہے ، اور اس کے رجال ثقہ ہیں ، البتہ بکر بن عبداللہ مزنی نے سیدنا ابوذر غفاری رضی اللہ عنہ سے سماع نہیں کیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارا پروردگار ایک ہے ، تمہارے جدامجد ایک ہیں ، کسی عربی کو کسی عجمی پر فضیلت حاصل نہیں ہے اور کسی سرخ ( یعنی سفید فام ) کو کسی سیاہ فام پر برتری حاصل نہیں ہے ، البتہ تقویٰ کے حوالے سے ( برتری ہونے کا ) معاملہ مختلف ہے ۔ “
یہ روایت امام طبرانی نے معجم اوسط میں نقل کی ہے ، اور امام بزار نے اس کی مانند نقل کی ہے ، تاہم انہوں نے یہ الفاظ نقل کئے ہیں : ” تمہارے جدامجد ایک ہیں اور تمہارا دین ایک ہے ، تمہارے جدامجد سیدنا آدم علیہ السلام ہیں اور سیدنا آدم علیہ السلام کو مٹی سے پیدا کیا گیا ۔ “ امام بزار کے رجال صحیح کے رجال ہیں ۔

سیدنا حبیب بن خراش عصری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مسلمان بھائی بھائی ہیں ، کسی کو کسی دوسرے پر فضیلت حاصل نہیں ہے ، البتہ تقویٰ ( کے حوالے سے فضیلت حاصل ہونے ) کا معاملہ مختلف ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالحمید بن عمرو بن جبلہ ہے ، اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کو کوئی بھی چیز پسند نہیں تھی اور نہ ہی دنیا کی کوئی چیز آپ کو اچھی لگتی تھی البتہ اگر اس میں پرہیزگاری کا پہلو ہو تو حکم مختلف ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اور وہ کمزور ہے ۔ اس روایت کے بقیہ رجال صحیح کے رجال ہیں ۔

حمید بن عبدالرحمن بن عوف بیان کرتے ہیں : سیدنا عبدالرحمن بن عوف رضی اللہ عنہ نے ایک شخص کو یہ کہتے ہوئے سنا کہ میں نبی اکرم صلی اللہ علیہ وسلم کا زیادہ قریبی ہوں ، تو سیدنا عبدالرحمن بن عوف رضی اللہ عنہ نے فرمایا : تمہارے علاوہ دوسرے ( لوگ ) نبی اکرم صلی اللہ علیہ وسلم سے تم سے زیادہ قریب ہیں ، البتہ تمہیں آپ صلی اللہ علیہ وسلم کے ساتھ نسبی تعلق کا شرف حاصل ہے ۔
یہ روایت امام طبرانی نے اپنے استاد مقدام بن داؤد کے حوالے سے نقل کی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب قیامت کا دن ہو گا تو اللہ تعالیٰ ایک منادی کو حکم دے گا ، جو یہ اعلان کرے گا ، خبردار ! ایک نسب میں نے بنایا تھا ، اور ایک نسب تم لوگوں نے بنایا ، میں نے تم میں سے سب سے زیادہ معزز اس شخص کو بنایا جو تم میں سب سے زیادہ پرہیزگار ہو ، لیکن تم لوگوں نے یہ بات نہیں مانی اور یہ کہا: کہ فلاں بن فلاں جو ہے ۔ وہ فلاں بن فلاں سے بہتر ہے ، آج میں اپنے نسب کو سربلندی عطا کروں گا اور تمہارے نسب کو پست کر دوں گا ، پرہیزگار لوگ کہاں ہیں ؟ “
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی طلحہ بن عمرو ہے اور وہ متروک ہے ۔

سیدنا معاویہ رضی اللہ عنہ کے دربان ، قنبر بیان کرتے ہیں : سیدنا ابوذر غفاری رضی اللہ عنہ سیدنا معاویہ رضی اللہ عنہ پر تنقید کرتے تھے ، سیدنا معاویہ رضی اللہ عنہ نے اس کی شکایت سیدنا عبادہ بن صامت ، سیدنا ابودرداء اور سیدنا عمرو بن العاص اور سیدہ ام حرام رضی اللہ عنہم سے کی اور یہ کہا: کہ آپ لوگ بھی اسی طرح صحابی ہیں ، جس طرح وہ صحابی ہیں ، اور آپ لوگ بھی ایک رائے رکھتے ہیں جس طرح ان کی ایک رائے ہے ، اگر آپ مناسب سمجھیں تو ان کے ساتھ بات چیت کریں ، پھر انہوں نے سیدنا ابوذر غفاری رضی اللہ عنہ کو پیغام بھیجا ، وہ تشریف لائے ، ان حضرات نے ان کے ساتھ بات چیت کی تو سیدنا ابوذر غفاری رضی اللہ عنہ نے فرمایا : اے سیدنا ابوولید ! آپ نے مجھ سے پہلے اسلام قبول کیا تھا آپ کو عمر میں برتری کا شرف بھی حاصل ہے اور مجھ پر فضیلت بھی حاصل ہے اور میں اس طرح کی محفل میں آپ کے ساتھ میں رغبت رکھتا ہوں ، اسے سیدنا ابودرداء ! جہاں تک آپ کا تعلق ہے ، تو قریب تھا کہ نبی اکرم صلی اللہ علیہ وسلم کی وفات کی وجہ سے آپ ( صحابی ہونے ) سے رہ جاتے ، لیکن پھر بھی آپ نے اسلام قبول کیا ، پھر بھی آپ صحابہ میں سے ہیں ، اے سیدنا عمرو ! جہاں تک آپ کا تعلق ہے ، تو آپ نے اللہ کے رسول کے ساتھ جہاد کیا ، اے ام حرام ! جہاں تک آپ کا تعلق ہے ، تو آپ ایک خاتون ہیں اور آپ کی عقل ایک خاتون کی عقل ہے ، تو پھر آپ کا اس کے ساتھ کیا واسطہ ہے ، تو سیدنا عبادہ رضی اللہ عنہ نے کہا: یہ ضروری ہے کہ میں اس طرح کی محفل میں کبھی نہ بیٹھوں ۔
یہ روایت امام أحمد نے نقل کی ہے ۔ اس کی سند میں ایک راوی قنبر ہے ، جو سیدنا معاویہ رضی اللہ عنہ کا دربان ہے ، ابن ابوحاتم نے اس کا ذکر کیا ہے ۔ انہوں نے اس کی توثیق نہیں کی اور اس پر جرح بھی نہیں کی ، اس روایت کے بقیہ رجال ثقہ ہیں ۔