مجمع الزوائد ومنبع الفوائد

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے مجھ سے ارشاد فرمایا : ” اے ابوایوب ! کیا میں تمہاری رہنمائی ایسے صدقہ کی طرف نہ کروں جسے اللہ اور اس کا رسول پسند کرتے ہیں ، آدمی لوگوں کے درمیان اس وقت صلح کروائے جب وہ ایک دوسرے کے ساتھ بغض رکھتے ہوں اور ایک دوسرے سے خراب تعلق رکھتے ہوں ۔ “
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن عبیدہ ہے اور وہ متروک ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا ابوایوب رضی اللہ عنہ سے فرمایا : ” کیا میں تمہاری رہنمائی تجارت کی طرف نہ کروں ؟ انہوں نے عرض کی : جی ہاں نبی اکرم صلی اللہ علیہ وسلم نے فرمایا : لوگوں کے درمیان تعلق قائم کرواؤ ، جب وہ ایک دوسرے کے خلاف ہو چکے ہوں اور ان کے درمیان قربت پیدا کرو ، جب وہ ایک دوسرے سے دور ہو چکے ہوں ۔ “
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن عبداللہ عمری ہے اور وہ متروک ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا ابوایوب بن زید رضی اللہ عنہ سے فرمایا : ” اے ابوایوب ! کیا تمہاری رہنمائی ایسے عمل کی طرف نہ کروں جس سے اللہ اور اس کا رسول راضی ہوتے ہیں ؟ انہوں نے عرض کی : جی ہاں نبی اکرم صلی اللہ علیہ وسلم نے فرمایا : تم لوگوں کے درمیان صلح کرواؤ جب وہ آپس میں ناچاقی کا شکار ہوں اور تم ان کے درمیان قربت پیدا کرو ، جب وہ ایک دوسرے سے دور ہو چکے ہوں ۔ “
یہ روایت امام طبرانی نے نقل کی ہے ، اور سیدنا ابوامامہ رضی اللہ عنہ کا شاگرد عبداللہ بن حفص ہے ۔ میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : انصار کے اوس اور خزرج قبیلوں کے درمیان زمانہ جاہلیت سے دشمنی چلی آ رہی تھی جب نبی اکرم صلی اللہ علیہ وسلم تشریف لائے ، تو ان کی یہ دشمنی ختم ہو گئی اور اللہ تعالیٰ نے ان لوگوں کے دلوں کے درمیان الفت پیدا کر دی ایک مرتبہ وہ لوگ ایک محفل میں بیٹھے ہوئے تھے ، اسی دوران اوس قبیلے سے تعلق رکھنے والے ایک شخص نے شعر سنایا جس میں خزرج قبیلے کی ہجو بیان کی گئی تھی ، پھر خزرج قبیلے کے ایک شخص نے ایک شعر سنایا جس میں اوس قبیلے کی ہجو بیان کی گئی تھی تو وہ لوگ مسلسل اس طرح کے اشعار سنانے لگے ، یہاں تک کہ وہ ایک دوسرے کے خلاف لڑنے کے لئے تیار ہو گئے ، انہوں نے ہتھیار اٹھا لئے اور لڑائی کے لئے چل پڑے ، جب نبی اکرم صلی اللہ علیہ وسلم کو اس بات کی اطلاع ملی تو آپ پر وحی نازل ہوئی ، آپ تیزی سے چلتے ہوئے آئے ، آپ نے اپنی پنڈلیوں سے کپڑا ہٹایا ہوا تھا ، جب آپ نے ان لوگوں کو ملاحظہ کیا تو انہیں پکار کر یہ آیت پڑھی : ” اے ایمان والو ! اللہ تعالیٰ سے یوں ڈرو جو اس سے ڈرنے کا حق ہے ، اور جب تم مرو تو تم مسلمان ہی ہونا ۔ “ یہاں تک کہ آپ یہ آیات تلاوت کر کے فارغ ہوئے تو ان لوگوں نے اپنا اسلحہ پکڑ کے ایک طرف کر دیا اور ایک دوسرے کو گلے لگا کر رونے لگے ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی غسان بن ربیع ہے اور وہ ضعیف ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سب سے زیادہ فضیلت والا صدقہ آپس میں صلح کروانا ہے ۔ “
یہ روایت امام طبرانی نے اور امام بزار نے نقل کی ہے ۔ اس کی سند میں ایک راوی عبدالرحمن بن زیاد بن انعم ہے اور وہ ضعیف ہے ۔

سیدنا ابوکاہل رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب میں سے دو افراد کے درمیان تلخ کلامی ہوئی اور وہ ایک دوسرے سے ناراض ہو گئے ، میری ان دو میں سے ایک سے ملاقات ہوئی تو میں نے کہا: کیا وجہ ہے تم فلاں سے کیوں ناراض ہو جبکہ میں نے تو اسے تمہاری تعریف کرتے ہوئے سنا ہے ، اور وہ تمہارے لئے بکثرت دعا کر رہا تھا ، پھر میری دوسرے شخص سے ملاقات ہوئی تو میں نے اس سے بھی اس کی مانند بات کہی ، میں مسلسل ان دونوں کے درمیان آتا جاتا رہا ، یہاں تک کہ ان دونوں کے درمیان صلح ہو گئی ، پھر میں نے سوچا کہ یہ میں نے کیا کیا ہے ؟ میں نے اپنے آپ کو ہلاکت کا شکار کر لیا ہے ، اور ان دونوں کے درمیان صلح کروا دی ہے ، میں نبی اکرم صلی اللہ علیہ وسلم کے پاس آیا اور میں نے آپ کو اس بارے میں بتایا ، میں نے عرض کی : یا رسول اللہ ! اس ذات کی قسم ! جس نے آپ کو حق کے ہمراہ مبعوث کیا ہے ، نہ میں نے اس سے کچھ سنا ہے اور نہ میں نے دوسرے سے کچھ سنا ہے ۔ نبی اکرم صلی اللہ علیہ وسلم نے ارشاد فرمایا : اے ابوکاہل ! لوگوں کے درمیان صلح کرواؤ ، خواہ اس اس کے عوض میں اسی طرح کرواؤ ، راوی کہتے ہیں : اس کی مانند کوئی کلمہ تھا ، جسے میں سمجھ سکا ، میں نے دریافت کیا : اس کے ذریعے آپ کی مراد کیا تھی ، تو انہوں نے فرمایا : اس سے مراد غلط بیانی کرنا ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابوداؤد نابینا ہے اور وہ کذاب ہے ۔

سیدنا شداد بن اوس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” وہ شخص جھوٹا نہیں ہوتا جو بھلائی کی بات کہتا ہے یا بھلائی کو بڑھاتا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی یحیی بن جرجہ ہے ، جسے ابن حبان اور دیگر حضرات نے ثقہ قرار دیا ہے اور ایک راوی قزعہ بن سوید ہے ، جس نے اس سے روایت نقل کی ہے اسے بھی یحیی بن معین اور دیگر حضرات نے ثقہ قرار دیا ہے دو طریقوں میں سے ایک کے بقیہ رجال ثقہ ہیں ۔

سیدنا ثوبان رضی اللہ عنہ جو نبی اکرم صلی اللہ علیہ وسلم کے غلام ہیں ، ان کے بارے میں میرا یہ گمان ہے کہ انہوں نے اس کو مرفوع حدیث کے طور پر نقل کیا ہے ( نبی اکرم صلی اللہ علیہ وسلم نے ارشاد فرمایا ہے : ) ” جھوٹ لکھا جاتا ہے البتہ اس کا معاملہ مختلف ہے ، جس کے ذریعے کسی مسلمان کو نفع پہنچایا جائے یا اس کے ذریعے کوئی ناگوار ( چیز ) کو پرے کیا جائے ۔ “
یہ روایت امام بزار نے نقل کی ہے ۔ اس کی سند میں رشدین اور دیگر ضعیف راوی ہیں ۔

سیدنا نواس بن سمعان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر جھوٹ انسان کے خلاف نوٹ کیا جاتا ہے البتہ تین قسموں کا معاملہ مختلف ہے ، آدمی جنگ کے دوران غلط بیانی کرے کیونکہ جنگ دھوکے کا نام ہے ، آدمی عورت ( یعنی بیوی ) کے ساتھ جھوٹ بولے : اور اسے راضی کرے ، آدمی دو آدمیوں کے درمیان صلح کروانے کے لئے جھوٹ بولے : ۔ “
یہ روایت امام طبرانی نے نقل کی ہے ۔ اس کی سند میں ایک راوی محمد بن جامع عطار ہے ، اور وہ ضعیف ہے ۔ اس سے پہلے احکام سے متعلق کتاب میں صلح کرنے سے متعلق باب میں احادیث گزر چکی ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے دو غلام تھے ایک حبشی تھا اور ایک قبطی تھا ، ایک دن ان دونوں کے درمیان تکرار ہو گئی تو ان دونوں میں سے ایک نے کہا: اے حبشی ، دوسرے نے کہا: اے قبطی ، تو نبی اکرم صلی اللہ علیہ وسلم نے ارشاد فرمایا : تم دونوں اس طرح نہ کہو ! تم دونوں آل محمد سے تعلق رکھنے والے دو افراد ہو ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی یزید بن ابوزیاد ہے اور وہ کمزور ہے ۔ اس روایت کے بقیہ رجال ثقہ ہیں ۔
یہ روایت امام ابویعلیٰ نے اس کی مانند اسی طرح نقل کی ہے ۔