مجمع الزوائد ومنبع الفوائد

سیدنا جرموز ہجیمی رضی اللہ عنہ بیان کرتے ہیں : میں نے عرض کی : یا رسول اللہ ! آپ مجھے کوئی تلقین کیجئے ، آپ نے ارشاد فرمایا : میں تمہیں یہ تلقین کرتا ہوں کہ تم لعنت کرنے والے نہ ہونا ۔
یہ روایت امام أحمد اور امام طبرانی نے عبیداللہ بن ہوزہ کے حوالے سے ایک شخص کے حوالے سے سیدنا جرموز میسور سے نقل کی ہے ۔
یہ روایت امام طبرانی نے ایک اور سند کے حوالے سے عبیداللہ بن ہوزہ کے حوالے سے سیدنا جرموز سے نقل کی ہے ، اور اس طریق کے رجال ثقہ ہیں ، ابن ابوحاتم نے سیدنا جرموز رضی اللہ عنہ کا ذکر کیا ہے ، اور یہ بات بیان کی ہے کہ انہیں صحابی ہونے کا شرف حاصل ہے عبیداللہ بن ہوزہ نے ان سے روایات نقل کی ہیں ۔

سیدنا ابوتمیمہ ہجیمی رضی اللہ عنہ اپنی قوم کے ایک فرد کے حوالے سے یہ بات نقل کرتے ہیں : وہ کہتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، راوی کو شک ہے شاید یہ الفاظ ہیں : وہ کہتے ہیں : میں نبی اکرم صلی اللہ علیہ وسلم کے پاس موجود تھا ایک شخص آپ کے پاس آیا ، اس نے دریافت کیا : کیا آپ اللہ کے رسول ہیں ؟ راوی کو شک ہے شاید یہ الفاظ ہیں : کیا آپ سیدنا محمد ( صلی اللہ علیہ وسلم ) ہیں ؟ نبی اکرم صلی اللہ علیہ وسلم نے جواب دیا : جی ہاں ۔ اس نے دریافت کیا : آپ کس بات کی دعوت دیتے ہیں ؟ نبی اکرم صلی اللہ علیہ وسلم نے ارشاد فرمایا : میں اللہ تعالیٰ کی وحدانیت ( کا اقرار کرنے ) کی دعوت دیتا ہوں جو ایسا ہے کہ جب تمہیں کوئی تکلیف لاحق ہو ، اور تم اس سے دعا کرو ، تو وہ تم سے اس تکلیف کو دور کر دے گا ، اور جب تمہیں قحط سالی لاحق ہو اور تم اس سے دعا کرو ، تو وہ تمہارے لئے چیزیں اگا دے گا ، اور جب تم کسی ویرانے میں موجود ہو ، اور تمہاری سواری گم ہو جائے اور تم اس سے دعا کرو ، تو وہ تمہاری سواری واپس کر دے گا ، اس شخص نے اسلام قبول کر لیا ، پھر اس نے عرض کی : یا رسول اللہ ! آپ مجھے کوئی یہ تلقین کیجئے ، نبی اکرم صلی اللہ علیہ وسلم نے ارشاد فرمایا : تم کسی چیز کو ( راوی کو شک ہے شاید یہ الفاظ ہیں : ) کسی فرد کو برا ہرگز نہ کہنا ، یہ شک حکم نامی راوی کو ہے وہ صاحب بیان کرتے ہیں : جب سے نبی اکرم صلی اللہ علیہ وسلم نے مجھے تلقین کی ہے ۔ اس کے بعد میں نے کبھی کسی اونٹ اور بکری کو بھی برا نہیں کہا: ۔
یہ روایت امام أحمد نے نقل کی ہے ۔ اس کی سند میں ایک راوی حکم بن فضیل ہے ، جسے امام ابوداؤد اور دیگر حضرات نے ثقہ قرار دیا ہے ۔ ابوزرعہ اور دیگر حضرات نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” یہ مناسب نہیں ہے کہ لعنت کرنے والے لوگ صدیقین ہوں ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن اسحاق صیبی ہے اور وہ متروک ہے ۔

سیدنا عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن طعنہ دینے والا لعنت کرنے والا فحش کلامی کرنے والا بدزبانی کرنے والا نہیں ہوتا ۔ “
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن مغراء ہے جسے ابوزرعہ اور ایک جماعت نے ثقہ قرار دیا ہے اور اس میں ضعف پایا جاتا ہے ۔

سیدنا عبداللہ بن عمر رضی اللہ عنہما فرماتے ہیں : مومن طعنہ دینے والا یا لعنت کرنے والا نہیں ہوتا ہے ۔ راوی بیان کرتے ہیں : میں نے سیدنا عبداللہ بن عمر رضی اللہ عنہما کو کبھی کسی پر لعنت کرتے ہوئے نہیں سنا ، البتہ ایک شخص کا معاملہ مختلف ہے ۔
یہ روایت امام طبرانی نے نقل کی ہے ۔ اس کی سند میں ایک راوی کثیر بن زید ہے ، جسے ایک جماعت نے ثقہ قرار دیا ہے ۔ اس میں کمزوری پائی جاتی ہے ۔ اس روایت کے بقیہ رجال صحیح کے رجال ہیں ۔

سیدنا کریز بن اسامہ رضی اللہ عنہ جو نبی اکرم صلی اللہ علیہ وسلم کی خدمت میں وفد کے ساتھ حاضر ہوئے تھے وہ بیان کرتے ہیں : عرض کی گئی : یا رسول اللہ ! آپ بنو عامر کے خلاف دعائے ضرر کریں تو آپ نے ارشاد فرمایا : مجھے لعنت کرنے والے کے طور پر مبعوث نہیں کیا گیا ہے ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا ابودرداء رضی اللہ عنہ کے بارے میں یہ بات منقول ہے انہوں نے ایک شخص کو دوسرے شخص کو بلند آواز میں برا کہتے ہوئے سنا ، تو یہ بات بیان کی ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بدزبانی قابل ملامت چیز ہے اور برا مالک ہونا قابل ملامت چیز ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن عرادہ ہے ، جسے امام ابوداؤد نے ثقہ قرار دیا ہے ، اور یحیی بن معین نے اسے ثقہ کہا: ہے ۔