مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کے نزدیک سب سے زیادہ پسندیدہ نام عبداللہ ، عبدالرحمن اور حارث ہیں ۔ “
یہ روایت امام ابویعلیٰ نے نقل کی ہے ۔ اس کی سند میں ایک راوی اسماعیل بن مسلم مکی ہے ، اور وہ ضعیف ہے ۔

خیثمہ بن عبدالرحمن بن سبرہ بیان کرتے ہیں : ان کے والد سیدنا عبدالرحمن رضی اللہ عنہ کے دادا کے ساتھ نبی اکرم صلی اللہ علیہ وسلم کے پاس گئے ، نبی اکرم صلی اللہ علیہ وسلم نے ان سے دریافت کیا : تمہارے بیٹے کا کیا نام ہے ؟ انہوں نے جواب دیا : عزیز ۔ نبی اکرم صلی اللہ علیہ وسلم نے فرمایا : تم اسے عزیز نام نہ دو ، بلکہ تم اس کا نام عبدالرحمن رکھو ، پھر آپ نے ارشاد فرمایا : سب سے بہتر نام عبداللہ ، عبدالرحمن اور حارث ہیں ۔

خیثمہ کے حوالے سے منقول ایک روایت میں یہ الفاظ ہیں : وہ بیان کرتے ہیں : میرے دادا کے ہاں بیٹا پیدا ہوا ، انہوں نے اس کا نام عزیز رکھا ، وہ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : میرے ہاں بیٹا ہوا ہے ۔ نبی اکرم صلی اللہ علیہ وسلم نے دریافت کیا : تم نے اس کا کیا نام رکھا ہے ؟ انہوں نے عرض کی : عزیز ۔ نبی اکرم صلی اللہ علیہ وسلم نے ارشاد فرمایا : جی نہیں ! بلکہ وہ عبدالرحمن ہے ۔

ایک روایت میں یہ الفاظ ہیں : خیثمہ اپنے والد کے بارے میں یہ بات نقل کرتے ہیں : زمانہ جاہلیت میں میرے والد کا نام عزیز تھا ، تو نبی اکرم صلی اللہ علیہ وسلم نے ان کا نام عبدالرحمن رکھا ۔
یہ روایت امام أحمد نے مختلف اسانید کے ساتھ نقل کی ہے ، جن کے رجال صحیح کے رجال ہیں ، لیکن دونوں پہلے والی روایتوں سے بظاہر یہ لگتا ہے کہ یہ مرسل ہیں ۔

خیثمہ بن عبدالرحمن اپنے والد کا یہ بیان نقل کرتے ہیں : میں اپنے والد کے ساتھ نبی اکرم صلی اللہ علیہ وسلم کی خدمت میں حاضر ہوا میں بچہ تھا ، نبی اکرم صلی اللہ علیہ وسلم نے ان سے دریافت کیا : تمہارے بیٹے کا کیا نام ہے ؟ انہوں نے کہا: اس کا نام عزیز ہے ۔ نبی اکرم صلی اللہ علیہ وسلم نے فرمایا : ” تم اس کا نام عزیز نہ رکھو بلکہ اس کا نام عبدالرحمن رکھو کیونکہ اللہ تعالیٰ کے نزدیک سب سے زیادہ پسندیدہ نام عبداللہ اور عبدالرحمن ہیں ۔ “
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

خیثمہ بن عبدالرحمن اپنے والد کے حوالے سے ان کا یہ بیان نقل کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ نے مجھ سے دریافت کیا : تمہارا نام کیا ہے ؟ میں نے عرض کی : عبدالعزیٰ ۔ نبی اکرم صلی اللہ علیہ وسلم نے فرمایا : بلکہ تم عبدالرحمن ہو ۔
یہ روایت امام طبرانی نے نقل کی ہے ، اور امام بزار نے اس کی مانند نقل کی ہے ، تاہم اس میں یہ الفاظ ہیں : نبی اکرم صلی اللہ علیہ وسلم نے دریافت کیا : تمہارا نام کیا ہے ، تو میں نے عرض کی : عزیز ۔ تو نبی اکرم صلی اللہ علیہ وسلم نے فرمایا : عزیز اللہ تعالیٰ ہے ۔ امام طبرانی کے رجال صحیح کے رجال ہیں ۔

سبرہ بن ابوسبرہ اپنے والد کے حوالے سے یہ بات نقل کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے دریافت کیا : تمہارے بچے کتنے ہیں ؟ انہوں نے عرض کی : فلاں ہے اور فلاں ہے ، اور عبدالعزیٰ ہے ۔ نبی اکرم صلی اللہ علیہ وسلم نے فرمایا : وہ عبدالرحمن ہے ، تمہارے ناموں میں نام رکھنے کا سب سے زیادہ حق دار ( راوی کو شک ہے شاید یہ الفاظ ہیں : ) تمہارے ناموں میں سب سے بہتر نام یہ ہے ( یعنی عبدالرحمن ہے ) اگر تم نام رکھو “ اس کے بعد راوی نے پوری حدیث ذکر کی ہے ۔
یہ روایت امام أحمد نے نقل کی ہے ۔ اس کی سند میں ایک راوی حجاج بن ارطاۃ ہے اور اس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

سیدنا سمرہ بن ابوسره رضی اللہ عنہ بیان کرتے ہیں : ان کے والد نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے دریافت کیا : تمہارے کتنے بچے ہیں ۔ انہوں نے عرض کی : عبدالعزیٰ ہے سبرہ ہے اور حارث ہے ۔ نبی اکرم صلی اللہ علیہ وسلم نے ارشاد فرمایا : تم عبدالعزیٰ نام نہ رکھو بلکہ عبداللہ نام رکھو کیونکہ سب سے بہتر نام عبداللہ ، عبیداللہ ، حارث اور ہمام ہیں ، پھر نبی اکرم صلی اللہ علیہ وسلم نے ان کی اولاد کے لئے دعا کی تو وہ لوگ آج تک معزز ہیں ۔
یہ روایت امام طبرانی نے نقل کی ہے ۔ اس کی سند میں ایک راوی حجاج بن ارطاۃ ہے ، اور اس میں ضعیف ہونا پایا جاتا ہے ۔ اس روایت کے بقیہ رجال صحیح کے رجال ہیں ۔