مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم فال لے لیتے تھے لیکن آپ شگون نہیں لیتے تھے اور آپ کو اچھا نام پسند تھا ۔
یہ روایت امام أحمد نے اور امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ جھوٹ کے بغیر ضعیف ہے ۔

سیدنا عبداللہ بن شخیر رضی اللہ عنہ بیان کرتے ہیں : نبی اکرم صلی اللہ علیہ وسلم جب کسی شخص کا نام پوچھتے تھے ، تو اگر وہ اچھا ہوتا تھا تو اچھائی کا اندازہ آپ کے چہرے سے ہو جاتا تھا ، اور اگر وہ اس کے علاوہ ہوتا تھا تو آپ اس کو ناپسند کرتے تھے ، جب آپ کسی بستی میں پڑاؤ کرتے تھے ، تو وہاں کا نام دریافت کر لیتے تھے ، اگر اس کا نام اچھا ہوتا تھا تو آپ اس بات پر خوش ہوتے تھے اور اگر وہ اس کے علاوہ ( یعنی برا ) ہوتا تھا تو اس کا اندازہ آپ کے چہرے سے ہو جاتا تھا ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال صحیح کے رجال ہیں ، صرف سعید بن بشیر کا معاملہ مختلف ہے ، اور وہ ثقہ ہے اور اس میں ضعف پایا جاتا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” والد کے ذمہ اولاد کے حقوق میں یہ بات شامل ہے کہ والد اس کا نام اچھا رکھے اور اس کی تربیت اچھی طرح سے کرے ۔ “
یہ روایت امام بزار نے نقل کی ہے ۔ اس کی سند میں ایک راوی عبداللہ بن سعید مقبری ہے ، اور وہ متروک ہے ۔

ان کے حوالے سے یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم لوگ میری طرف کسی قاصد کو بھیجو ، تو ایسے شخص کو بھیجو جس کا چہرہ بھی اچھا ہو اور نام بھی اچھا ہو ۔ “
یہ روایت امام بزار نے اور امام طبرانی نے معجم اوسط میں نقل کی ہے ، امام طبرانی کی سند میں ایک راوی عمر بن راشد ہے ، جسے عجلی نے ثقہ قرار دیا ہے ، اور جمہور ائمہ نے اسے ضعیف کہا: ہے ۔ اس روایت کے بقیہ رجال ثقہ ہیں ، امام بزار کا طریق ضعیف ہے ۔

سیدنا یعیش غفاری رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے اونٹنی منگوائی ، آپ نے دریافت کیا : کون اس کا دودھ دوہ لے گا ؟ ایک صاحب نے عرض کی : میں ۔ نبی اکرم صلی اللہ علیہ وسلم نے دریافت کیا : تمہارا نام کیا ہے ؟ اس نے عرض کی : مرہ ( یعنی کڑوا ) نبی اکرم صلی اللہ علیہ وسلم نے فرمایا : تم بیٹھ جاؤ ۔ پھر ایک اور صاحب کھڑے ہوئے ۔ نبی اکرم صلی اللہ علیہ وسلم نے دریافت کیا : تمہارا کیا نام ہے ؟ اس نے کہا: مرہ ۔ نبی اکرم صلی اللہ علیہ وسلم نے ارشاد فرمایا : تم بیٹھ جاؤ ۔ پھر ایک اور صاحب کھڑے ہوئے ، نبی اکرم صلی اللہ علیہ وسلم نے دریافت کیا : تمہارا نام کیا ہے ؟ اس نے جواب دیا : جمرہ ( یعنی انگارہ ) نبی اکرم صلی اللہ علیہ وسلم نے فرمایا : تم بیٹھ جاؤ ۔ پھر سیدنا یعیش رضی اللہ عنہ کھڑے ہوئے ، نبی اکرم صلی اللہ علیہ وسلم نے دریافت کیا : تمہارا نام کیا ہے ؟ انہوں نے جواب دیا : یعیش ۔ نبی اکرم صلی اللہ علیہ وسلم نے فرمایا : تم اس کا دودھ دوہ لو ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدنا ابوحددرد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کون ہمارے ان اونٹوں کو ہانک کر لے جائے گا ( راوی کو شک ہے شاید یہ الفاظ ہیں : ) کون ہمارے اونٹوں کو ( منزل مقصود تک ) پہنچائے گا ، تو ایک صاحب کھڑے ہوئے ، نبی اکرم صلی اللہ علیہ وسلم نے دریافت کیا : تمہارا نام کیا ہے ؟ انہوں نے جواب دیا : فلاں ۔ پھر ایک اور صاحب کھڑے ہوئے انہوں نے عرض کی : میں ایسا کر دوں گا ۔ نبی اکرم صلی اللہ علیہ وسلم نے دریافت کیا : تمہارا نام کیا ہے ؟ انہوں نے جواب دیا : ناجیہ ۔ نبی اکرم صلی اللہ علیہ وسلم نے فرمایا : تم یہ کام کرو گے ، تم انہیں لے جاؤ ۔
یہ روایت امام طبرانی نے أحمد بن بشیر کے حوالے سے اس کے چچا سے نقل کی ہے ، اور میں نے ان دونوں کے بارے میں کوئی جرح یا کوئی تعدیل نہیں پائی ہے ۔ اس روایت کے بقیہ رجال ثقہ ہیں ۔