مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم کو سلام کیا ، آپ اس وقت نماز پڑھ رہے تھے ، تو نبی اکرم صلی اللہ علیہ وسلم نے اسے اشارے کے ساتھ جواب دیا ، جب آپ نے سلام پھیر لیا تو آپ نے ارشاد فرمایا : پہلے ہم ( نماز کے دوران ) سلام کا جواب دیدیا کرتے تھے ، پھر ہمیں اس سے منع کر دیا گیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن صالح ہے ، جو لیث کا کاتب ہے ۔ اس کی توثیق کی گئی ہے ، اور ایک جماعت نے اسے ضعیف بھی قرار دیا ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس سے گزرا ، آپ اس وقت نماز ادا کر رہے تھے ، میں نے آپ کو سلام کیا تو آپ نے مجھے اشارے کے ساتھ جواب دیا ۔
یہ روایت امام طبرانی نے معجم صغیر اور معجم اوسط میں نقل کی ہے ، اور اس کے رجال صحیح کے رجال ہیں ۔

سیدنا جابر رضی اللہ عنہ فرماتے ہیں : اگر میں کچھ لوگوں کے پاس جاؤں جو نماز ادا کر رہے ہوں ، تو میں انہیں سلام نہیں کروں گا ۔
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں ۔