مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ آ رہے تھے ، ہم نے ذوالحلیفہ کو دیکھا تو کچھ افراد مدینہ منورہ کی طرف جلدی روانہ ہو گئے ، نبی اکرم صلی اللہ علیہ وسلم نے رات وہیں بسر کی ، ہم نے بھی رات وہیں بسر کی ، صبح کے وقت نبی اکرم صلی اللہ علیہ وسلم نے ان لوگوں کے بارے میں دریافت کیا ، تو عرض کی گئی : وہ مدینہ کی طرف جلدی چلے گئے ہیں ، نبی اکرم صلی اللہ علیہ وسلم نے ارشاد فرمایا : وہ لوگ مدینہ کی طرف اور عورتوں کی طرف جلدی چلے گئے ہیں ، یہ لوگ عنقریب مدینہ کو چھوڑ دیں گے ، جب کہ وہ اس سے پہلے کے مقابلے میں زیادہ اچھی حالت میں ہو گا ، پھر آپ نے ارشاد فرمایا : افسوس کہ جب یمن سے ایک آگ نکلے گی جو وراق کے پہاڑ سے نکلے گی اور اُس کے ذریعے بصریٰ میں موجود اونٹوں کی گردنیں روشن ہو جائیں گی ، یوں جیسے دن کی روشنی ہوتی ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف حبیب بن جماز کا معاملہ مختلف ہے اور وہ ثقہ ہے ۔

سیدنا رافع بن بسر ( راوی کو شک ہے شاید یہ الفاظ ہیں : ) بشر سلمی رضی اللہ عنہ نبی اکرم صلی اللہ علیہ وسلم کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب ایک آگ ” حبس سیل “ کے مقام سے نکلے گی اور وہ یوں چلے گی جیسے سست رفتار اونٹ ہوتا ہے ، وہ دن کے وقت چلتی رہے گی ، رات کے وقت ٹھہر جائے گی ۔ وہ صبح جائے گی شام کو جائے گی ، یہ بات کہی جائے گی : آگ صبح کے وقت گئی ہے ، لوگو ! تو تم بھی چلو ، آگ نے آرام کیا ہے : اے لوگو ! تم لوگ آرام کرو ، آگ شام کو روانہ ہو گئی ہے ۔ اے لوگو ! تم روانہ ہو جاؤ ، جس شخص کو وہ پائے گی اس کو کھا لے گی ۔ “
یہ روایت امام أحمد نے اور امام طبرانی نے نقل کی ہے ، اور امام أحمد کے رجال صحیح کے رجال ہیں صرف رافع کا معاملہ مختلف ہے ، اور وہ ثقہ ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل مشرق پر ایک آگ کو بھیجا جائے گا وہ انہیں اکٹھا کر کے مغرب کی طرف لے جائے گی ، وہ ان کے ساتھ رات بسر کرے گی ، جہاں وہ رات بسر کریں گے ، اور ان کے ساتھ دوپہر کرے گی جہاں وہ دوپہر کریں گے ، اس آگ کے لئے وہ چیزیں ہوں گی ، جو ان میں گر جائیں گے اور جو پیچھے رہ جائیں گے ، اور پھر وہ انہیں ہانک کر یوں لے جائے گی جیسے ٹوٹی ہوئی ہڈی والے اونٹ کو ہانک کر لے جایا جاتا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا عبدالله بن سلام رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : آپ سے قیامت کی پہلی نشانی کے بارے میں دریافت کیا گیا ، تو آپ نے ارشاد فرمایا : قیامت کی نشانیوں میں سے سب سے پہلی ( نشانی ) وہ آگ ہو گی جو مشرق کی طرف سے نکلے گی اور لوگوں کو اکٹھا کر کے مغرب کی طرف لے جائے گی ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عاصم بن عدی انصاری رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم سے دریافت کیا : جو کچھ آگے آئے گا اس میں سب سے پہلی چیز کیا ہے ، تو آپ نے دریافت کیا : حبس سیل کہاں ہیں ؟ ہم نے جواب دیا : ہمیں نہیں معلوم ، پھر بنو سلیم سے تعلق رکھنے والا ایک شخص میرے پاس سے گزرا ، میں نے دریافت کیا : تم کہاں سے آئے ہو ، اس نے بتایا : حبس سیل سے ۔ میں نے اپنا جوتا منگوایا اور جلدی سے نبی اکرم صلی اللہ علیہ وسلم کی خدمت میں گیا ، میں نے عرض کی : یا رسول اللہ ! آپ نے ہم سے حبس سیل کے بارے میں دریافت کیا تھا ، تو ہم نے یہ عرض کی تھی کہ ہمیں اس کے بارے میں علم نہیں ہے ، ابھی میرے پاس سے ایک شخص گزرا ، میں نے اس سے دریافت کیا تو اس کا یہ کہنا ہے کہ وہ وہاں کا رہنے والا ہے ۔ نبی اکرم صلی اللہ علیہ وسلم نے اس شخص سے اس بارے میں دریافت کیا اور فرمایا : تمہارے گھر والے کہاں ہیں ؟ اس نے جواب دیا : حبس سیل کے مقام پر ، نبی اکرم صلی اللہ علیہ وسلم نے فرمایا : تم اپنے اہل خانہ کو وہاں سے نکال دو کیونکہ عنقریب وہاں سے ایک آگ نکلے گی ، جس کے ذریعے بصریٰ میں موجود اونٹوں کی گردنیں روشن ہو جائیں گی ۔ “
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن اسماعیل بن مجمع ہے اور وہ ضعیف ہے ۔