مجمع الزوائد ومنبع الفوائد

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تمہیں مہدی کے بارے میں خوشخبری دیتا ہوں ، اسے اختلاف کے وقت بھیجا جائے گا ، جسے لوگوں کے اختلاف اور زلزلوں کے وقت بھیجا جائے گا ، وہ زمین کو انصاف اور عدل سے یوں بھر دے گا ، جس طرح پہلے وہ ظلم و ستم سے بھری ہوئی تھی ، آسمان کے رہنے والے اور زمین کے رہنے والے اس سے راضی ہوں گے اور وہ صحیح طریقے سے مال تقسیم کرے گا ، ایک شخص نے آپ کی خدمت میں عرض کی : صحیح طریقے سے مراد کیا ہے ؟ آپ نے فرمایا : لوگوں کے درمیان برابری کی بنیاد پر کرے گا اور اللہ تعالیٰ سیدنا محمد صلی اللہ علیہ وسلم کی امت کے دلوں کو غنا سے بھر دے گا اور اس شخص کا عدل ان لوگوں کے لئے کفایت کرے گا ، یہاں تک کہ وہ منادی کو حکم دے گا ، وہ منادی اعلان کرے گا اور کہے گا : کسی شخص کو مال کی ضرورت ہے ؟ تو لوگوں میں سے صرف ایک شخص کھڑا ہو گا اور وہ کہے گا : مجھے ( ضرورت ) ہے ، تو مہدی کہے گا : تم خازن کے پاس چلے جاؤ اور اس سے کہو : مہدی تمہیں یہ حکم دیتا ہے کہ تم مجھے مال دو ! وہ شخص اس سے کہے گا ، تو خازن کہے گا : تم دونوں ہاتھوں سے اس کو بھر لو ، وہ ان کو بھرے گا ، پھر وہ ندامت کا شکار ہو کر یہ کہے گا : کیا میں سیدنا محمد صلی اللہ علیہ وسلم کی امت میں سب سے زیادہ حریص ہوں ، یا جو چیز ان کے لئے پوری آ رہی ہے وہ مجھے کیوں نہیں پوری آ رہی ؟ پھر وہ اس مال کو واپس کرنا چاہے گا ، تو اس سے وہ مال قبول نہیں کیا جائے گا ، اور اس سے یہ کہا: جائے گا : ہم جو چیز دیدیتے ہیں وہ واپس نہیں لیتے ، تو مہدی اس طرح سات سال یا آٹھ سال یا نو سال تک حکمران رہے گا ، پھر اس کے بعد زندگی میں کوئی بھلائی نہیں ہو گی ( راوی کو شک ہے ، شاید یہ الفاظ ہیں : ) اس کے بعد حیات میں کوئی بھلائی نہیں ہو گی ۔ “ ( علامہ ہیثمی فرماتے ہیں ) میں یہ کہتا ہوں :
یہ روایت امام ترمذی نے اور دیگر حضرات نے بہت زیادہ اختصار کے ساتھ نقل کی ہے ۔
یہ روایت امام أحمد نے مختلف اسانید کے ساتھ نقل کی ہے اور امام ابویعلیٰ نے بہت زیادہ اختصار کے ساتھ نقل کی ہے ان دونوں روایات کے رجال ثقہ ہیں ۔

اُن کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” زمانے کے منقطع ہونے کے وقت اور فتنوں کے ظہور کے وقت ایک شخص نکلے گا ، جس کا نام سفاح ہو گا اور وہ مال دونوں ہاتھ میں بھر بھر کے دے گا ۔ “
یہ روایت امام أحمد نے نقل کی ہے ، اس کی سند میں ایک راوی عطیہ عوفی ہے اور وہ ضعیف ہے ، یحیی بن معین نے اسے ثقہ قرار دیا ہے ، اس روایت کے بقیہ رجال ثقہ ہیں ۔

اُن کے حوالے سے نبی اکرم صلی اللہ علیہ وسلم کا یہ فرمان منقول ہے : ” میری امت کا حکمران ، میرے اہل بیت سے تعلق رکھنے والا ایک شخص ہو گا ، جس کی ناک اونچی اور رنگ روشن ہو گا ، وہ زمین کو عدل سے بھر دے گا ، جس طرح پہلے یہ ظلم و ستم سے بھری ہوئی تھی اور وہ سات سال تک حکومت کرے گا ۔ “
یہ روایت امام ابویعلیٰ نے نقل کی ہے اس کی سند میں ایک راوی عدی بن ابوعمارہ ہے ، عقیلی کہتے ہیں : اس کی حدیث میں اضطراب پایا جاتا ہے ، اس روایت کے بقیہ رجال صحیح کے رجال ہیں ۔

سیدنا قرہ بن ایاس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زمین ضرور ظلم و ستم سے بھر جائے گی ، اور جب یہ ظلم و ستم سے بھر جائے گی ، تو اللہ تعالیٰ ہم میں سے ایک شخص کو بھیجے گا ، جس کا نام میرے نام کے مطابق ہو گا ، اس کے باپ کا نام میرے والد کے نام کے مطابق ہو گا ، وہ زمین کو عدل و انصاف سے یوں بھر دے گا ، جس طرح وہ پہلے ظلم و ستم سے بھری ہوئی تھی ، اس وقت آسمان اپنی بارش میں سے کوئی چیز نہیں روکے گا ، اور زمین اپنی نباتات میں سے کوئی چیز نہیں روکے گی ، وہ حکمران تمہارے درمیان سات یا آٹھ یا نو سال رہے گا ( یہ شک راوی کو ہے ) ۔ “
یہ روایت امام بزار نے امام طبرانی نے معجم کبیر اور مجحم اوسط میں نقل کی ہے ، داؤد بن محبر بن قحذم کے حوالے سے اس کے والد سے نقل کی ہے اور یہ دونوں ضعیف ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ایک شخص کی حجراسود اور مقام ابراہیم کے درمیان بیعت کی جائے گی ، جو اتنی تعداد میں لوگ کریں گے ، جتنی اہل بدر کی تعداد تھی ، پھر اہل عراق کے لشکر اس کے پاس آئیں گے اہل شام کے ابدال اس کے پاس آئیں گے اور اہل شام کا ایک لشکر ان کے ساتھ جنگ کرنے کے لئے آئے گا ، یہاں تک کہ جب وہ بیداء کے مقام پر پہنچیں گے ، تو ان لوگوں کو دھنسا دیا جائے گا ، پھر قریش سے تعلق رکھنے والا ایک شخص ان کے ساتھ جنگ کرے گا ، جس کی ننہیال بنو کلب سے ہو گی ، ان دونوں لشکروں کا سامنا ہو گا ، تو اللہ تعالیٰ دشمن کو پسپا کر دے گا ، تو وہ شخص خسارے والا ہو گا ، جو بنو کلب کی غنیمت کے حوالے سے خسارے والا ہوا ۔ “ ( علامہ ہیثمی فرماتے ہیں ) میں یہ کہتا ہوں : ” صحیح “ میں اس روایت کا ایک حصہ منقول ہے ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ، اس کی سند میں ایک راوی عمران قطان ہے ، جسے ابن حبان نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدہ ام سلمہ رضی اللہ عنہا کے حوالے سے یہ بات منقول ہے ، وہ بیان کرتی ہیں : نبی اکرم صلی اللہ علیہ وسلم نے ارشاد فرمایا : ” مشرق کی حکمرانی ، مغرب کی حکمرانی کی طرف چل کے جائے گی اور اسے قتل کر دے گی ، پھر وہ ایک لشکر مدینہ کی طرف بھیجیں گے ، انہیں دھنسا دیا جائے گا ، پھر اس لشکر کو زندہ کیا جائے گا ، تو اہل مدینہ میں سے ایک شخص لوگوں کو بھول جائے گا ، اور ایک پناہ لینے والا حرم میں پناہ لے گا ، لوگ اس کی طرف اکٹھے ہو کر یوں جائیں گے ، جس طرح متفرق پرندے آتے ہیں ، یہاں تک کہ تین سو چودہ افراد ، اُن میں خواتین بھی شامل ہوں گی ، وہ اکٹھے ہو کر ان کے پاس آ جائیں گے اور پھر وہ حکمران ، ہر ظالم حکمران اور ظالم کے بیٹے پر غالب آ جائے گا ، وہ عدل کو ظاہر کرے گا ، کہ زندہ لوگ اپنے مردوں کے لیے آرزو کریں ، وہ سات سال زندہ رہے گا ، پھر اس کے بعد ( ایسا وقت آ جائے گا ) کہ زمین کے نیچے والا حصہ ، اُس کے اوپر والے حصے سے زیادہ بہتر ہو گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” خلیفہ کے انتقال کے وقت اختلاف رونما ہو گا ، پھر بنو ہاشم سے تعلق رکھنے والا ایک شخص نکلے گا ، وہ مکہ آئے گا ، لوگ اسے اس کے گھر سے نکلنے پر مجبور کریں گے ، وہ حجراسود اور مقام ابراہیم کے درمیان آئے گا ، پھر شام کا ایک لشکر اس کے ساتھ جنگ کرنے کے لئے آئے گا ، یہاں تک کہ جب وہ بیداء کے مقام پر پہنچیں گے ، تو انہیں دھنسا دیا جائے گا ، پھر عراق کے لشکر اور شام کے ابدال اس کے پاس آئیں گے اور پھر شام میں ایک شخص نمودار ہو گا ، جس کی ننھیال بنو کلب سے ہو گی ، اس کا لشکر ( مہدی سے لڑنے کے لئے ) آئے گا ، اللہ تعالیٰ ان کو پسپا کر دے گا اور وہ لوگ ہار جائیں گے اور اس دن بنو کلب ہار جائیں گے ، وہ شخص خسارے کا شکار ہو گا جو بنو کلب کی مال غنیمت کے حوالے سے خسارے کا شکار ہو گا ، پھر خزانوں کا منہ کھول دیا جائے گا ، وہ ( یعنی مہدی ) مال تقسیم کرے گا اور زمین میں اسلام کو غلبہ دے گا ، اور وہ لوگ اسی حالت میں سات سال ( راوی کو شک ہے ، شاید یہ الفاظ ہیں : ) نو سال گزار دیں گے ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” محروم وہ شخص ہے جو بنو کلب کی غنیمت سے محروم رہے ۔ “
یہ روایت امام أحمد نے نقل کی ہے اس کی سند میں ایک راوی ابن لہیعہ ہے اور وہ کمزور ہے ۔

ان کے حوالے سے یہ بات منقول ہے ۔ وہ بیان کرتے ہیں : میرے خلیل سیدنا ابوالقاسم صلی اللہ علیہ وسلم نے مجھے یہ بات بیان کی ہے : ” قیامت اس وقت تک قائم نہیں ہو گی جب تک میرے اہل بیت سے تعلق رکھنے والا ایک شخص ان لوگوں پر نہیں آئے گا ، اور وہ ان پر ضربیں لگائے گا یہاں تک کہ وہ حق کی طرف لوٹ آئیں گے ۔ راوی کہتے ہیں : میں نے دریافت کیا : وہ کتنا عرصہ حکومت کرے گا ؟ آپ نے فرمایا : پچیس ۔ راوی کہتے ہیں : میں نے اپنے استاد سے دریافت کیا : پچیسں سے مراد کیا ہے ؟ انہوں نے جواب دیا : مجھے نہیں معلوم ۔ “
یہ روایت امام ابویعلیٰ نے نقل کی ہے ۔ اس کی سند میں ایک راوی مرجیٰ بن رجاء ہے ، جسے ابوزرعہ نے ثقہ قرار دیا ہے ، اور یحیی بن معین نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدہ ام حبیبہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مشرق کی طرف سے کچھ لوگ آئیں گے جو بیت اللہ کے قریب ایک شخص کے پاس کے جانا چاہتے ہوں گے ، یہاں تک کہ وہ جب بیداء کے مقام پر پہنچیں گے ، تو انہیں دھنسا دیا جائے گا ، ان کے پیچھے والے لوگ جب ان تک پہنچیں گے ، تو انہیں بھی وہ چیز لاحق ہو گی جو ان لوگوں کو لاحق ہوئی تھی ، میں نے عرض کی : یا رسول اللہ ! اس شخص کا کیا بنے گا ، جسے زبردستی لایا گیا ہو ؟ نبی اکرم صلی اللہ علیہ وسلم نے فرمایا : جو مصیبت دوسروں کو لاحق ہوئی ہے ۔ وہ انہیں بھی لاحق ہو گی اور پھر اللہ تعالیٰ ہر فرد کو اس کی نیت کے مطابق زندہ کرے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلمہ بن فضل ابرش ہے ، جسے یحیی بن معین اور دیگر حضرات نے ثقہ قرار دیا ہے ، اور ایک جماعت نے اُسے ضعیف کہا: ہے ۔ سیدہ ام سلمہ رضی اللہ عنہا بیان کرتی ہیں : ایک مرتبہ نبی اکرم صلی اللہ علیہ وسلم میرے گھر میں آرام فرما رہے تھے اسی دوران آپ اٹھ کر بیٹھ گئے ، آپ نے انا للہ وانا الیہ راجعون پڑھا ۔ میں نے عرض کی : میرے ماں باپ آپ پر قربان ہوں ، کیا وجہ ہے ، آپ نے انا اللہ وانا الیہ راجعون کیوں پڑھا ہے ؟ نبی اکرم صلی اللہ علیہ وسلم نے ارشاد فرمایا : میں نے اپنی امت کے ایک لشکر کے حوالے سے یہ پڑھا ہے ، جو شام کی طرف سے آئیں گے وہ بیت اللہ کا قصد رکھتے ہوں گے ، اور ایک شخص کے خلاف آئیں گے ، اور وہ اس تک نہیں پہنچ پائیں گے ، یہاں تک کہ جب وہ ذوالحلیفہ کے بیداء کے مقام پر ہوں گے ، تو انہیں زمین میں دھنسا دیا جائے گا ، اگرچہ ان کی آمد کا مقصد ایک دوسرے سے مختلف ہو گا ، میں نے عرض کی : میرے ماں باپ آپ پر قربان ہوں ، اُن سب کو کیوں دھنسا دیا جائے گا ، جب کہ ان کی آمد کا مقصد ایک دوسرے سے مختلف ہو گا ۔ نبی اکرم صلی اللہ علیہ وسلم نے فرمایا : ان میں سے کچھ وہ ہوں گے ، جن کے ساتھ زبردستی کی گئی ہو گی ، ان میں سے کچھ وہ ہوں گے ، جن کے ساتھ زبردستی کی گئی ہو گی ۔
یہ روایت امام ابویعلیٰ نے نقل کی ہے ۔ اس کی سند میں ایک راوی علی بن زید ہے ، اور وہ حسن الحدیث ہے ۔ اس میں ضعف پایا جاتا ہے ۔

سیدہ ام سلمہ رضی اللہ عنہا سے روایت ہے ، وہ بیان کرتی ہیں کہ : ایک بار رسول اللہ صلی اللہ علیہ وسلم میرے گھر میں لیٹے ہوئے تھے کہ اچانک آپ صلی اللہ علیہ وسلم چونک کر (سیدھے ) بیٹھ گئے اور “” إِنَّا لِلَّهِ وَإِنَّا إِلَيْهِ رَاجِعُونَ “” پڑھنے لگے ۔ میں نے عرض کیا : میرے ماں باپ آپ پر قربان ہوں ! کیا بات ہے ، آپ استرجاع (إِنَّا لِلَّهِ ۔ ۔ ۔ ) کیوں پڑھ رہے ہیں ؟ آپ صلی اللہ علیہ وسلم نے فرمایا :” میری امت کے ایک لشکر کی وجہ سے جو شام کی طرف سے آئے گا اور بیت اللہ کا قصد کرے گا ، ایک ایسے شخص (کو پکڑنے ) کے لیے جو ان کی مخالفت اور دفاع کر رہا ہوگا ، یہاں تک کہ جب وہ ذو الحلیفہ کے قریب بیداء (مقام) پر پہنچیں گے تو انہیں زمین میں دھنسا دیا جائے گا ، جبکہ ان کی نیتیں اور احوال مختلف ہوں گے “ ۔ میں نے عرض کیا : اے اللہ کے رسول ! میرے ماں باپ آپ پر فدا ہوں ، ان سب کو ایک ساتھ کیسے دھنسا دیا جائے گا جبکہ ان کی نیتیں اور مقاصد مختلف ہوں گے ؟ آپ صلی اللہ علیہ وسلم نے فرمایا : ” (ہاں ! لیکن ) ان میں سے کچھ وہ بھی ہوں گے جنہیں مجبور کر کے لایا گیا ہوگا ، ان میں سے کچھ وہ بھی ہوں گے جنہیں مجبور کر کے لایا گیا ہوگا ، ان میں سے کچھ وہ بھی ہوں گے جنہیں مجبور کر کے لایا گیا ہوگا (لہٰذا قیامت کے دن سب کو ان کی نیتوں کے مطابق اٹھایا جائے گا) “ ۔
اسے امام ابویعلیٰ رحمہ اللہ نے روایت کیا ہے ، اور اس کی سند میں علی بن زید بن جدعان ہے جو حسن الحديث ہے لیکن اس میں کچھ ضعف بھی موجود ہے ۔

اسی سند کے ساتھ سیدہ عائشہ صدیقہ رضی اللہ عنہا کے حوالے سے نبی اکرم ﷺ سے اس کی مانند روایت نقل کی گئی ہے ، اور اس کے رجال ثقہ ہیں ۔

اسی سند کے ساتھ سیدہ عائشہ صدیقہ رضی اللہ عنہا کے حوالے سے نبی اکرم صلی اللہ علیہ وسلم سے اس کی مانند روایت نقل کی گئی ہے ، اور اس کے رجال ثقہ ہیں ۔ سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سیدہ ام سلمہ رضی اللہ عنہا کے گھر میں سوئے ہوئے تھے ، آپ بیدار ہوئے تو آپ نے إِنَّا لِلَّهِ وَإِنَّا إِلَيْهِ رَاجِعُونَ پڑھنا شروع کر دیا ، میں نے عرض کی : یا رسول اللہ ! آپ کس وجہ سے اِنَّا لِلَّهِ وَإِنَّا إِلَيْهِ راجِعُونَ پڑھ رہے تھے ۔ نبی اکرم صلی اللہ علیہ وسلم نے ارشاد فرمایا : ” ایک لشکر کی وجہ سے جو عراق کی طرف سے مدینہ سے تعلق رکھنے والے ایک شخص کی تلاش میں آئے گا اور انہیں اس شخص تک نہیں پہنچنے دیا جائے گا ، جب وہ ذوالحلیفہ میں بیداء کے مقام پر پہنچیں گے تو انہیں دھنسا دیا جائے گا ، ان کے اوپر والے ، نیچے والوں تک نہیں پہنچ سکیں گے اور نیچے والے اوپر والوں تک نہیں پہنچ سکیں گے ۔ ایسا قیامت کے دن تک ہو گا حالانکہ ان کی آمد کا مقصد مختلف ہو گا ۔ عرض کی گئی : یا رسول اللہ ! سب کو دھنسا دیا جائے گا ۔ جب کہ ان سب کی آمد کا مقصد مختلف ہو گا ۔ نبی اکرم صلی اللہ علیہ وسلم نے ارشاد فرمایا : ان میں ایسے لوگ بھی ہوں گے ، جن کے ساتھ زبردستی کی گئی ہو گی ۔ “
یہ روایت امام بزار نے نقل کی ہے ۔ اس کی سند میں ایک راوی ہشام بن حکم ہے اور میں اس سے واقف نہیں ہوں ، البتہ ابن ابوحاتم نے اس کا ذکر کیا ہے ۔ انہوں نے نہ اس پر جرح کی ہے اور نہ اس کی توثیق کی ہے ۔ اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مشرق کی طرف سے سیاہ جھنڈے آئیں گے اور گھوڑے سینوں تک خون میں ڈوب جائیں گے ۔ “ اس کے بعد راوی نے پوری حدیث ذکر کی ہے ۔ اس کی سند میں ایک راوی یزید بن ابوزیاد ہے اور وہ کمزور ہے ۔ اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مہدی کا ذکر کرتے ہوئے ارشاد فرمایا : ” اگر اس کی مدت کم ہوئی تو وہ سات سال ہو گی ، ورنہ آٹھ سال ہو گی ، ورنہ نو سال ہو گی اور وہ زمین کو عدل و انصاف سے ضرور بھر دے گا ، جس طرح وہ پہلے ظلم و ستم سے بھری ہوئی تھی ۔ “
یہ روایت امام بزار نے نقل کی ہے ، اور اس کے رجال ثقہ ہیں ، اور اس کے بعض راویوں میں کچھ ضعف پایا جاتا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت میں ایک خلیفہ ہو گا ، جو لوگوں کو مال ، ہاتھ بھر بھر کے دے گا ، وہ اس کا شمار نہیں کرے گا ، پھر آپ نے ارشاد فرمایا : اس ذات کی قسم ! جس کے دست قدرت میں میری جان ہے ۔ وہ لوگ دوبارہ ایسا کریں گے ( یعنی اور مانگیں گے یا لیں گے ) ۔ “
یہ روایت امام بزار نے نقل کی ہے ، اور اس کے رجال صحیح کے رجال ہیں ۔

سیدنا طلحہ بن عبیداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب ایسا فتنہ ہو گا ، جب اس کی ایک طرف پرسکون ہو گی تو دوسری طرف سے جوش آ جائے گا ، یہاں تک کہ آسمان سے ایک منادی یہ اعلان کرے گا کہ تمہارا امیر فلاں شخص ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی مثنی بن صباح ہے اور وہ متروک ہے ، ایک روایت کے مطابق یحیی بن معین نے اسے ثقہ قرار دیا ہے ، اور انہوں نے اسے ضعیف بھی کہا: ہے ۔

سیدنا علی بن ابوطالب رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کی خدمت میں عرض کی : یا رسول الله ! مہدی ہم میں سے ہو گا یا ہمارے علاوہ کسی اور خاندان سے ہو گا ؟ نبی اکرم صلی اللہ علیہ وسلم نے فرمایا : جی نہیں بلکہ وہ ہم میں سے ہو گا ، ہمارے ذریعے اللہ تعالیٰ اس کو ختم کرے گا ، جس طرح ہمارے ذریعے اللہ تعالیٰ نے اس کو شروع کیا تھا ، اور ہمارے ذریعے لوگوں کو شرک سے بچایا گیا اور ہمارے ذریعے اللہ تعالیٰ نے لوگوں کے درمیان واضح دشمنی کے بعد الفت پیدا کر دی ، جس طرح اس نے لوگوں کے دلوں میں شرک کی عداوت کے بعد باہمی الفت پیدا کر دی ، سیدنا علی رضی اللہ عنہ نے دریافت کیا : کیا وہ مومن ہوں گے یا کافر ہوں گے ؟ نبی اکرم صلی اللہ علیہ وسلم نے ارشاد فرمایا : وہ فتنے کا شکار ہوں گے ، اور کافر ہوں گے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن جابر حضرمی ہے ، اور وہ کذاب ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں ایسا فتنہ ہو گا ، جو لوگوں کو یوں خراب کرے گا جس طرح معدن میں سے سونے کو نکالا جاتا ہے ، تم اہل شام کو برا نہ کہو ، بلکہ وہاں کے برے لوگوں کو برا کہو ، کیونکہ ان میں ابدال بھی ہیں ، عنقریب اہل شام پر آزمائشوں کو بھیجا جائے گا ، وہ ان کی اجتماعیت کو بکھیر دیں گی ، یہاں تک کہ اگر لومڑیاں بھی ان پر حملہ کریں گی ، تو ان پر غالب آ جائے گی ، اس وقت میرے اہل بیت میں سے ایک شخص نکلے گا ، جس کے تین جھنڈے ہوں گے ، جو شخص یہ سمجھے گا کہ ان کی تعداد زیادہ ہے ۔ وہ کہے گا : یہ پندرہ ہزار ہیں ، جو شخص یہ کہے گا : ان کی تعداد کم ہے ۔ وہ یہ کہے گا : بارہ ہزار ہے ، ان کا مخصوص لفظ یہ ہو گا ” مار دو مار دو “ وہ سات جھنڈوں کا سامنا کریں گے ، جن میں سے ہر ایک جھنڈے کے نیچے ایک شخص ہو گا ، جو حکمرانی کا طلبگار ہو گا ، وہ ان سب کو مار دے گا ، اور مسلمانوں کی الفت اور نعمت ان کے ہر قریبی اور دور کے فرد تک لوٹا دی جائے گی ۔ “
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی ابن لہیعہ ہے ، اور وہ کمزور ہے ۔ اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری امت میں مہدی ہو گا ، اگر اس کی مدت کم ہوئی تو سات سال ہو گی ، یا آٹھ سال ہو گی ، یا نو سال ہو گی ، اس عرصے کے دوران میری امت کو نعمتیں ملیں گی ، کہ اس طرح کی نعمتیں انہیں پہلے کبھی نہیں ملی ہوں گی ، آسمان سے موسلا دھار بارش نازل ہو گی ، زمین کے نباتات میں سے چھپی نہیں رہے گی ، مال زیادہ ہو جائے گا ، ایک شخص کھڑا ہو کر یہ کہے گا : اے مہدی مجھے کچھ دو ، تو وہ کہے گا لے لو ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت میں ایک شخص نکلے گا ، جو میری سنت کے مطابق بات کہے گا ، اللہ تعالیٰ اس کے لئے آسمان سے بارش نازل کرے گا ، اللہ تعالیٰ اس کے لئے زمین سے اس کے لئے برکتیں اگائے گا ، اور زمین کو عدل و انصاف سے یوں بھر دیا جائے گا ، جس طرح وہ پہلے ظلم سے بھری ہوئی تھی ، وہ سات سال تک اس امت کی حکومت کرے گا ، اور وہ بیت المقدس میں رہے گا ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے اور امام بن ماجہ نے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کچھ مہاجرین اور انصار کے درمیان تشریف فرما تھے ۔ سیدنا علی بن ابوطالب رضی اللہ عنہ آپ کے بائیں طرف تھے ، سیدنا عباس رضی اللہ عنہ آپ کے دائیں طرف تھے ، اسی دوران سیدنا عباس رضی اللہ عنہ اور انصار سے تعلق رکھنے والے ایک شخص کے درمیان تکرار ہو گئی ، انصاری نے سیدنا عباس رضی اللہ عنہ کے خلاف سخت الفاظ استعمال کیے ، تو نبی اکرم صلی اللہ علیہ وسلم نے سیدنا عباس رضی اللہ عنہ اور سیدنا علی رضی اللہ عنہ کا ہاتھ پکڑ لیا اور ارشاد فرمایا : ان کی اولاد میں سے ایک شخص نکلے گا ، جو زمین کو ظلم و ستم سے بھر دے گا ، اور پھر ان کی اولاد میں سے ایک شخص نکلے گا ، جو زمین کو عدل و انصاف سے بھر دے گا ، جب تم یہ صورت حال دیکھو تو تم پر لازم ہے کہ تمیم قبیلے کے نوجوان کے ساتھ رہو کیونکہ وہ مشرق کی طرف سے آئے گا ، اور وہ مہدی کا علمبردار ہو گا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے ۔ اس میں کمزور ہونا پایا جاتا ہے ، تاہم
یہ روایت منکر ہے ، کیونکہ نبی اکرم صلی اللہ علیہ وسلم کسی بھی شخص کے ساتھ اس طرح سامنا نہیں کرتے تھے کہ آپ کے چہرے سے ناگواری کا اظہار ہو رہا ہو ، اور بطور خاص اپنے چچا سیدنا عباس رضی اللہ عنہ کا تو خاص کر خیال رکھتے تھے ، جن کے بارے میں آپ صلی اللہ علیہ وسلم نے یہ فرمایا ہے کہ وہ میرے والد کی جگہ ہیں ، باقی اللہ بہتر جانتا ہے ۔

سیدنا عبداللہ بن حارث بن جزء زبیدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مشرق کی طرف سے ایک قوم نکلے گی وہ مہدی کے لئے اس کی حکومت کو بچھا دے گی ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن جابر ہے ، اور وہ کذاب ہے ۔ ( علامہ ہیثمی فرماتے ہیں : ) میں یہ کہتا ہوں علی ہلالی کی نقل کردہ حدیث جو مہدی کے بارے میں ہے ۔ وہ اہل بیت کے فضائل سے متعلق باب میں آگے آئے گی ، اگر اللہ نے چاہا ۔