مجمع الزوائد ومنبع الفوائد

سیدنا جابر بن عبدالله رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” سب سے برا مقتول وہ ہے ، جو دو ایسے گروہوں کے درمیان ( قتل ہوا ہو ) کہ ان دونوں میں سے کوئی ( بھی ) ایک گروہ حکومت چاہتا ہو ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالاول ابونعیم ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

ثروان بن ملحان بیان کرتے ہیں : ہم لوگ مسجد میں بیٹھے ہوئے تھے ، سیدنا عمار بن یاسر رضی اللہ عنہ ہمارے پاس سے گزرے ، ہم نے کہا: آپ ہمیں کوئی ایسی احادیث بیان کیجئے ، جو آپ نے فتنے کے بارے میں نبی اکرم صلی اللہ علیہ وسلم کی زبانی سنی ہو ، تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرے بعد کچھ لوگ آئیں گے ، جو حکومت حاصل ( کرنا چاہیں ) گے اور وہ اس کی خاطر ایک دوسرے کے ساتھ جنگ کریں گے ۔ “ راوی کہتے ہیں : ہم نے ان سے کہا: اگر آپ کی بجائے کسی اور نے ہمیں یہ حدیث بیان کی ہوتی ، تو ہم نے اس کی بات کی تصدیق نہیں کرنی تھی ، تو سیدنا عمار رضی اللہ عنہ نے فرمایا : ایسا ہو گا ۔
یہ روایت امام أحمد ، امام طبرانی نے اور امام ابویعلیٰ نے نقل کی ہے اور اس کے رجال صحیح کے رجال ہیں ، صرف ثروان کا معاملہ مختلف ہے اور وہ ثقہ ہے ۔

یحیی بن حبان بیان کرتے ہیں : وہ سیدنا عبداللہ بن عمر رضی اللہ عنہما کے ساتھ تھے ، سیدنا عبداللہ بن عمر رضی اللہ عنہما نے اُن سے کہا: جب فتنہ ہو گا ، تو تم لوگ قتل کرنے کو کچھ بھی نہیں سمجھو گے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف یحیی بن حبان کا معاملہ مختلف ہے ، ابن حبان نے اسے ثقہ قرار دیا ہے ۔ ( علامہ ہیثمی فرماتے ہیں ) میں یہ کہتا ہوں اس نوعیت کی کچھ احادیث ، اس باب میں آئیں گی جو فتنوں سے متعلق ہے ۔