مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے بنو ہاشم ! عنقریب تمہیں میرے بعد زیادتی کا سامنا کرنا پڑے گا ، تو اس کے حوالے سے تم کمزور لوگوں سے مدد حاصل کرنا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حسین بن عبداللہ ہاشمی ہے ، جسے جمہور نے ضعیف قرار دیا ہے ، ایک روایت کے مطابق یحیی بن معین نے اسے ثقہ کہا: ہے اور دوسری روایت کے مطابق انہوں نے اسے ضعیف کہا: ہے اس روایت کو امام بزار نے اختصار کے ساتھ نقل کیا ہے ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” عربوں کے لئے اس برائی کے حوالے سے بربادی ہے ، جو قریب آ چکی ہے ، ایسے فتنے ہوں گے جو تاریک رات کے ٹکڑوں کی مانند ہوں گے ، ان میں آدمی صبح کے وقت مومن ہو گا تو شام کو کافر ہو جائے گا ، لوگ دنیاوی ساز و سامان کے عوض میں ، اپنا دین فروخت کر دیں گے ، اس وقت دین کو تھامنے والے لوگ تھوڑے ہوں گے اور دین کو تھامنے والے کی مثال یوں ہو گی ، جیسے مٹھی میں انگارہ لیا ہو ( راوی کو شک ہے ، شاید یہ الفاظ ہیں : ) کانٹے لیے ہوں ۔ “ ایک روایت میں یہ الفاظ ہیں : ” کانٹوں کی شاخ لی ہو ۔ “ ( علامہ ہیثمی فرماتے ہیں ) میں یہ کہتا ہوں
یہ روایت امام ابوداؤد اور دیگر حضرات نے نقل کی ہے ، جس میں یہ الفاظ ہیں : ” دین کو تھامنے والا شخص ۔ ۔ ۔ ۔ ۔ ۔ ۔ “ ۔ اس کے بعد سے لے کر آخر تک کے الفاظ ہیں ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اس میں ضعف پایا جاتا ہے ، اس روایت کے بقیہ رجال صحیح کے رجال ہیں ۔ ( علامہ ہیثمی فرماتے ہیں ) میں یہ کہتا ہوں اس باب سے متعلق باقی احادیث ، صبر سے متعلق باب میں آئیں گی ۔

سیدنا عتبہ بن غزوان رضی اللہ عنہ ، جو صحابہ کرام میں سے ایک ہیں ، وہ بیان کرتے ہیں نبی اکرم صلی اللہ علیہ وسلم نے ارشاد فرمایا : ” تمہارے بعد صبر والے دن آئیں گے اور ان دنوں میں دین کو مضبوطی سے تھامنے والے شخص کو تم میں سے پچاس افراد کے اجر کی مانند اجر ملے گا ، لوگوں نے عرض کی : یا رسول اللہ ! کیا وہ ( پچاس ) افراد ان میں سے ہوں گے ؟ نبی اکرم صلی اللہ علیہ وسلم نے ارشاد فرمایا : جی نہیں ! بلکہ ( وہ پچاس افراد ) تم میں سے ہوں گے ، لوگوں نے عرض کی : اے اللہ کے نبی ! کیا وہ ( پچاس افراد ) ان میں سے ہوں گے ؟ نبی اکرم صلی اللہ علیہ وسلم نے فرمایا : جی نہیں ! بلکہ تم میں سے ہوں گے “ یہ مکالمہ تین یا شاید چار مرتبہ ہوا ۔
یہ روایت امام طبرانی نے معجم کبیر اور معجم اوسط میں ، اپنے استاد بکر بن سہل کے حوالے سے عبداللہ بن یوسف سے نقل کی ہے اور ان دونوں کی توثیق کی گئی ہے اور ان دونوں کے بارے میں اختلاف پایا جاتا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے بعد صبر والے دن آئیں گے ، اُن میں صبر کرنا ، انگارہ ہاتھ میں لینے کے مترادف ہے اور ان دنوں میں عمل کرنے والے شخص کو پچاس افراد کا اجر ملے گا ، لوگوں نے عرض کی : یا رسول اللہ ! ان میں سے پچاس افراد کا ؟ یا ہم میں سے پچاس افراد کا اجر ؟ نبی اکرم صلی اللہ علیہ وسلم نے فرمایا : تم میں سے پچاس افراد کا ( اجر ) ۔
یہ روایت امام بزار نے نقل کی ہے ، امام طبرانی نے اس کی مانند نقل کی ہے ، تاہم انہوں نے یہ الفاظ نقل کے ہیں : ” مضبوطی سے تھامے رکھنے والے کے لئے ، پچاس شہیدوں کا اجر ہو گا ، سیدنا عمر رضی اللہ عنہ نے عرض کی : یا رسول اللہ ! وہ ( شہید ) ہم میں سے ہوں گے ؟ یا اُن میں سے ہوں گے ؟ نبی اکرم صلی اللہ علیہ وسلم نے فرمایا : تم میں سے ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ، صرف سہل بن عامر بجلی کا معاملہ مختلف ہے ، جسے ابن حبان نے ثقہ قرار دیا ہے ۔

سیدنا حذیفہ رضی اللہ عنہ فرماتے ہیں : تم لوگ صبر کی عادت بناؤ ! کیونکہ عنقریب تم پر آزمائشیں نازل ہوں گی ، باوجودیکہ تم کسی ایسی آزمائش کا سامنا نہیں کرو گے جو اس سے زیادہ سخت ہو ، جس طرح کی آزمائش کا سامنا ہم نے نبی اکرم صلی اللہ علیہ وسلم کے ساتھ کیا تھا ۔
یہ روایت امام بزار نے نقل کی ہے اس کی سند میں ایک راوی مجالد ہے جس کی توثیق کی گئی ہے اور اس میں ضعف پایا جاتا ہے ۔

سیدنا عبداللہ بن مسعود رضی اللہ عنہ بیان کرتے ہیں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب تم لوگوں پر ایسا زمانہ آئے گا کہ اس زمانے میں تم ایسے شخص پر رشک کرو گے ، جس کی ذمہ داریاں کم ہوں ، بالکل اسی طرح جس طرح آج تم ایسے شخص پر رشک کرتے ہو ، جس کا مال اور اولاد زیادہ ہوتا ہے ، یہاں تک کہ ( اس زمانے میں ) تم میں سے کوئی ایک شخص اپنے بھائی کی قبر کے پاس سے گزرے گا ، تو مٹی کے ساتھ یوں لوٹ پوٹ ہو جائے گا ، جس طرح چراگاہ میں کوئی جانور مٹی میں لوٹ پوٹ ہو جاتا ہے اور وہ شخص یہ کہے گا : اے کاش ! میں تمہاری جگہ ہوتا ، وہ شخص اللہ تعالیٰ کی بارگاہ میں حاضری کے شوق کی وجہ سے یہ بات نہیں کہے گا ، یا اس نے کوئی ایسا نیک عمل نہیں آگے بھیجا ہو گا ، جس کی وجہ وہ یہ کہے گا ، بلکہ اس پر جو آزمائش نازل ہوئی ہو گی ، اس کی وجہ سے وہ یہ بات کہے گا ۔ “
یہ روایت امام بزار نے اور امام طبرانی نے نقل کی ہے ، اس کی سند میں ایک راوی علی بن یزید الہانی ہے اور وہ متروک ہے ۔

اُن کے حوالے سے یہ بات منقول ہے وہ فرماتے ہیں : ” تم پر ایسا زمانہ ضرور آئے گا کہ جس میں آدمی قبر کے پاس سے گزرے گا ، تو یہ کہے گا : کاش میں اس مردے کی جگہ ہوتا اور وہ اللہ تعالیٰ کی بارگاہ حاضری کے شوق کی وجہ سے یہ نہیں کہے گا ، بلکہ جس آزمائش کا اس نے سامنا کیا ہو گا ، اُس کی شدت کی وجہ سے یہ بات کہے گا ، عرض کی گئی : اس وقت کون سی چیز زیادہ بہتر ہو گی ؟ انہوں نے فرمایا : مضبوط گھوڑا ، مضبوط ہتھیار ، جس کے ذریعے آدمی جہاں چاہے جا سکے ۔ “
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال صحیح کے رجال ہیں ، صرف ابوزعراء کبیر کا معاملہ مختلف ہے ، ابن حبان نے اسے ثقہ قرار دیا ہے اور دیگر لوگوں نے اسے ضعیف کہا: ہے ۔

سیدنا ابوذر غفاری رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اے ابوذر ! اس وقت تمہارا کیا بنے گا ؟ جب تم ردّی لوگوں میں باقی رہ جاؤ گے ؟ پھر نبی اکرم صلی اللہ علیہ وسلم نے اپنی انگلیاں ایک دوسرے میں داخل کر لیں ، میں نے عرض کی : یا رسول اللہ ! آپ مجھے کیا حکم دیتے ہیں ؟ نبی اکرم صلی اللہ علیہ وسلم نے ارشاد فرمایا : ” تم صبر سے کام لینا ! تم صبر سے کام لینا ! لوگوں سے ان کے اخلاق کے حوالے سے ملتے جلتے رہنا اور لوگوں کے اعمال کے حوالے سے اُن کے برخلاف کرنا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یزید بن ربیعہ رحبی ہے اور وہ متروک ہے ۔

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کوئی بدعت ایجاد کرے ، یا کسی بدعتی کو پناہ دے ، یا اپنے باپ کے علاوہ ، یا اپنے آزاد کرنے والے آقا کے علاوہ کسی اور کی طرف خود کو منسوب کرے ، تو اس پر اللہ تعالیٰ فرشتوں اور لوگوں ، سب کی لعنت ہو گی ، اس شخص کی کوئی فرض یا نفل عبادت قبول نہیں ہو گی ، نبی اکرم صلی اللہ علیہ وسلم نے ارشاد فرمایا : اس وقت تمہارا کیا بنے گا ؟ جب تم ایسے لوگوں میں رہ جاؤ گے ، جن کے عہد اور ان کی امانتیں ایک دوسرے میں داخل ہو جائیں گے اور وہ لوگ ردّی ہو چکے ہوں گے ، نبی اکرم صلی اللہ علیہ وسلم نے اپنی انگلیاں ایک دوسرے میں داخل کر کے یہ بات ارشاد فرمائی ، لوگوں نے عرض کی : یا رسول الله ! ہمیں کیا کرنا چاہیے ؟ نبی اکرم صلی اللہ علیہ وسلم نے فرمایا : تم صبر سے کام لینا ، تم صبر سے کام لینا ، تم لوگوں کے ساتھ اُن کے اخلاق کے مطابق پیش آنا اور اُن کے اعمال کے بارے میں اُن ( لوگوں ) کے برخلاف کرنا ۔ “
یہ روایت امام بزار نے نقل کی ہے اس کی سند میں ایک راوی یزید بن ربیعہ ہے اور وہ متروک ہے ، ابن عدی کہتے ہیں : مجھے یہ امید ہے کہ اس میں کوئی حرج نہیں ہو گا ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے عبداللہ بن عمرو ! اس وقت تمہارا کیا بنے گا ؟ ردّی لوگوں میں رہ جاؤ گے ، انہوں نے عرض کی : یا رسول اللہ ! وہ کیا صورت حال ہو گی ؟ نبی اکرم صلی اللہ علیہ وسلم نے ارشاد فرمایا : اس وقت لوگوں کی امانتیں اور ان کے عہد ، ایک دوسرے میں داخل ہو جائیں گے اور وہ یوں ہو جائیں گے ، نبی اکرم صلی اللہ علیہ وسلم نے اپنی انگلیاں ایک دوسرے میں داخل کر کے یہ بات ارشاد فرمائی ، انہوں نے عرض کی : یا رسول اللہ ! مجھے کیا کرنا چاہیے ؟ نبی اکرم صلی اللہ علیہ وسلم نے ارشاد فرمایا : تم وہ عمل کرنا جسے تم نیکی سمجھو اور اسے ترک کر دینا ، جسے تم منکر ( یا برائی ) سمجھو اور تم بطور خاص اپنی ذات کے لئے عمل کرنا اور لوگوں کو ( ان کے حال پر ) چھوڑ دینا ۔ “
یہ روایت امام طبرانی نے معجم اوسط میں دو اسناد کے ساتھ نقل کی ہے ، جن میں سے ایک کے رجال صحیح کے رجال ہیں ۔

سیدنا عمر بن خطاب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب تمہیں آزمایا جاتا رہے گا ، یہاں تک کہ تم ردّی لوگوں میں رہ جاؤ گے ، جن کے عہد ایک دوسرے میں داخل ہو چکے ہوں گے اور ان کی امانتیں خراب ہو چکی ہوں گی ، ہم میں سے کسی نے عرض کی : یا رسول اللہ پھر ہمیں کیا کرنا چاہیے ؟ نبی اکرم صلی اللہ علیہ وسلم نے فرمایا : تم وہ عمل کرنا جسے تم نیکی سمجھو اور اس چیز کو ترک کر دینا جسے تم منکر سمجھو اور تم یہ کہنا : کوئی ہے ؟ کوئی ہے ؟ کون اس شخص کے خلاف مدد کرے گا ، جس نے ہم پر ظلم کیا ہے اور اس شخص کے حوالے سے ہماری کفایت کرے گا ، جس نے ہم سے سرکشی ہے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقریب میرے بعد ترجیحی سلوک ہو گا اور کچھ اور امور ہوں گے ، جنہیں تم منکر قرار دو گے ، لوگوں نے عرض کی : یا رسول اللہ ! جو شخص اس صورت حال کو پاتا ہے ، آپ اسے کیا حکم دیتے ہیں ؟ نبی اکرم صلی اللہ علیہ وسلم نے ارشاد فرمایا : ” تم اس حق کو ادا کرنا جو تمہارے ذمہ لازم ہے اور جو تمہارا حق ہے ، وہ اللہ تعالیٰ سے مانگنا ۔ “ ( علامہ ہیثمی فرماتے ہیں ) میں یہ کہتا ہوں : سیدنا عبداللہ بن مسعود رضی اللہ عنہ کی نقل کردہ حدیث صحیح میں مذکور ہے ۔
یہ روایت امام طبرانی نے معجم اوسط اور معجم صغیر میں نقل کی ہے اس کی سند میں ایک راوی أحمد بن عبدالعزیز واسطی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” لوگوں پر ایسا زمانہ ضرور آئے گا ، جس میں سچے کو جھوٹا قرار ضرور دیا جائے گا اور جھوٹے کی تصدیق کی جائے گی ، جس میں امین کو خائن قرار دیا جائے گا اور خائن کو امین بنا دیا جائے گا ، آدمی گواہی دے گا حالانکہ اس سے گواہی نہیں مانگی گئی ہو گی ، آدمی حلف اٹھاے گا ، حالانکہ اس سے حلف نہیں مانگا گیا ہو گا ، اور دنیا میں سب سے زیادہ سعادت مند ( یعنی دنیاوی اعتبار سے سب سے زیادہ صاحب حیثیت ) وہ شخص ہو گا ، جو خود بے وقوف ہو گا اور بے وقوف کا بچہ ہو گا ، وہ اللہ اور اس کے رسول صلی اللہ علیہ وسلم پر ایمان نہیں رکھتا ہو گا ۔ “
یہ روایت امام طبرانی نے معجم اوسط میں اور معجم کبیر میں نقل کی ہے اس کی سند میں ایک راوی عبداللہ بن صالح ہے ، جو لیث کا کاتب ہے اور وہ ضعیف ہے ، ویسے اس کی توثیق کی گئی ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دجال سے پہلے کچھ سال دھوکے کے ہوں گے ، جن میں سچے کو جھوٹا قرار دیا جائے گا اور ان میں جھوٹے کو سچا قرار دیا جائے گا ، اُن میں امین کو خائن قرار دیا جائے گا اور خائن کو ان میں امین بنا دیا جائے گا ، ان میں رویبضہ کلام کریں گے ، عرض کی گئی : رویبضہ سے مراد کیا ہے ؟ نبی اکرم صلی اللہ علیہ وسلم نے فرمایا : فاسق شخص کا عمومی معاملات میں بات چیت کرنا ۔ “
یہ روایت امام أحمد ، امام ابویعلیٰ نے اور امام طبرانی نے معجم اوسط میں نقل کی ہے ، اس کی سند میں ایک راوی ابن اسحاق ہے اور وہ مدلس ہے ، امام طبرانی کی سند میں ایک راوی ابن لہیعہ ہے اور وہ کمزور ہے ۔

سیدنا عمرو بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت سے پہلے کچھ سال دھوکے کے ہوں گے ، جن میں جھوٹے کو سچا قرار دیا جائے گا اور ان میں سچے کو جھوٹا قرار دیا جائے گا ، ان میں خائن کو امین بنا دیا جائے گا اور امین کو ان میں خائن قرار دیا جائے گا ، اور ان میں رویبضہ کلام کریں گے ، عرض کی گئی : یا رسول اللہ رویبضہ سے مراد کیا ہے ؟ آپ نے فرمایا : حقیر شخص ، جو عمومی معاملات میں کلام کرے ۔ “

ابن اسحاق بیان کرتے ہیں : عبداللہ بن دینار نے مجھے سیدنا انس رضی اللہ عنہ کے حوالے سے نبی اکرم صلی اللہ علیہ وسلم سے اس کی مانند روایت نقل کی ہے ۔
یہ روایت امام بزار نے نقل کی ہے ، ابن اسحاق نے اس میں عبداللہ بن دینار سے سماع کی تصریح کی ہے ، اس روایت کے بقیہ رجال ثقہ ہیں ۔ ( علامہ ہیثمی فرماتے ہیں ) میں یہ کہتا ہوں قیامت کی نشانیوں سے متعلق باب میں ، اس میں سے کچھ روایات آئیں گی ۔

سیدنا انس رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : قیامت کی نشانیوں میں فحاشی ، فحش گفتگو کرنا ، رشتے داری کے حقوق کو پامال کرنا ، امین کو خائن قرار دینا اور خائن کو امین بنا لینا ، شامل ہیں ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، اس کے بعض راویوں کے بارے میں اختلاف پایا جاتا ہے ۔

ابوسبرہ بیان کرتے ہیں : میری ملاقات سیدنا عبداللہ بن عمرو رضی اللہ عنہ اللہ سے ہوئی تو انہوں نے مجھے وہ احادیث بیان کیں ، جو انہوں نے نبی اکرم صلی اللہ علیہ وسلم سے سنی تھیں ، اور وہ روایات مجھے املاء کروائیں ، میں نے اپنے ہاتھ سے روایات نوٹ کیں اور کوئی ایک حرف زائد نہیں کیا اور کوئی حرف کم نہیں کیا ، انہوں نے مجھے یہ حدیث بیان کی : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ فحاشی کو پسند نہیں کرتا ہے ، وہ فحاشی والے شخص اور فحش گفتگو کرنے والے شخص کو ناپسند کرتا ہے ، اور قیامت اس وقت تک قائم نہیں ہو گی ، جب تک فحاشی اور فحش گفتگو اور رشتے داری کے حقوق کو پامال کرنا اور برا پڑوس ظاہر نہیں ہو جائیں گے ، یہاں تک کہ خائن شخص کو امین بنایا جائے گا اور امین شخص کو خائن قرار دیا جائے گا ۔ “
یہ روایت امام أحمد نے ایک طویل حدیث کے ضمن میں نقل کی ہے ، ابوسبرہ ( نامی راوی ) کا نام سالم بن سبرہ ہے ، ابوحاتم کہتے ہیں : یہ مجہول ہے ۔

سیدنا حذیفہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” لوگوں پر ایسا زمانہ آئے گا ، جس میں وہ لوگ دجال کی آرزو کریں گے ، میں نے عرض کی : یا رسول اللہ ! میرے ماں باپ قربان ہوں ، اس کی وجہ کیا ہو گی ؟ آپ نے فرمایا : کیونکہ ان لوگوں کو یکے بعد دیگرے اتنی پریشانیوں کا سامنا کرنا پڑے گا ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ، یہ روایت امام بزار نے اس کی مانند نقل کی ہے اور اس کے رجال بھی ثقہ ہیں ۔

سیدنا ابوامامہ باہلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” لوگ ایسے درخت کی مانند ہیں ، جس پر پھل لگا ہو اور عنقریب وہ ایسے درخت کی مانند ہو جائیں گے ، جو کانٹے والا ہوتا ہے ، اگر تم انہیں کھینچو گے تو وہ تمہیں کھینچیں گے اور اگر تم انہیں چھوڑ دو گے ، تو وہ تمہیں چھوڑیں گے ، اگر تم ان سے بھاگو گے ، تو وہ تمہیں تلاش کریں گے ، راوی نے عرض کی : یا رسول اللہ اس سے بچنے کا طریقہ کیا ہو گا ؟ نبی اکرم صلی اللہ علیہ وسلم نے فرمایا : تم اپنے فاقہ کے دن ، اپنی عزت نہیں دیدینا“ ۔
یہ روایت امام طبرانی نے نقل کی ہے اس کی سند میں ایک راوی بقیہ ہے اور وہ مدلس ہے اور ایک راوی صدقہ بن عبداللہ ہے جو انتہائی ضعیف ہے ، دحیم اور ابوحاتم نے اسے ثقہ قرار دیا ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” معاملے کی شدت میں اضافہ ہوتا چلا جائے گا اور مال پھیلتا چلا جائے گا اور لوگوں کی کنجوسی میں اضافہ ہوتا چلا جائے گا اور قیامت بدترین لوگوں پر قائم ہو گی ۔ “
یہ روایت امام طبرانی نے نقل کی ہے اس کے رجال کی توثیق کی گئی ہے اور ان میں ضعف پایا جاتا ہے انہوں نے یہ روایت ایک اور ضعیف سند کے ساتھ بھی نقل کی ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ فرماتے ہیں : ” تم لوگ ایسے زمانے میں ہو ، جس میں نماز طویل ادا کی جاتی ہے اور خطبہ مختصر دیا جاتا ہے ، اس زمانے کے علماء بہت زیادہ ہیں اور خطیب کم ہیں ، عنقریب لوگوں پر ایسا زمانہ آئے گا ، جس میں نماز مختصر ادا کی جائے گی اور خطبہ طویل دیا جائے گا ، اس زمانے میں خطیب زیادہ ہوں گے اور علماء کم ہوں گے ، وہ لوگ نمازیں تاخیر سے ادا کریں گے ، یہاں تک کہ وہ عصر کی نماز اس وقت ادا کریں گے جب سورج کی روشنی کمزور ہو چکی ہو گی ، تم میں سے جو شخص وہ زمانہ پائے ، وہ نماز کو اس کے مخصوص وقت پر ادا کر لے اور ان لوگوں کے ساتھ ادا کی جانے والی اپنی نماز کو نفل قرار دیدے ، تم لوگ ایک ایسے زمانے میں ہو ، جس میں ایسے شخص پر رشک کیا جاتا ہے ، جس کے بال بچے کم ہوں اور اخراجات کم ہوں ، میں اپنے بعد اپنے اہل خانہ کے لئے کوئی ایسی چیز نہیں چھوڑوں گا ، جو میرے نزدیک ان کے لئے موت سے زیادہ محبوب ہو ، اور نہ ہی جعلان سے زیادہ کوئی گھرانہ چھوڑوں گا ، میں ان سے اسی طرح محبت کرتا ہوں ، جس طرح تم اپنے اہل خانہ سے محبت رکھتے ہو ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، اس کا ایک طریق کتاب الزہد میں گزر چکا ہے ، اس سے پہلے کتاب العلم میں اس کی مانند روایت گزر چکی ہے ۔

محمد بن زید بن خلیدہ بیان کرتے ہیں : سیدنا عبداللہ رضی اللہ عنہ ان کے پاس آئے ، انہوں نے گھر میں موجود سامان تیار رکھا ، تو سیدنا عبداللہ رضی اللہ عنہ نے کہا: تم اپنے گھر کے ساز و سامان کو پوشیدہ رکھو ، کیونکہ لوگ عنقریب اشتعال میں آ جائیں گے ۔
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔