مجمع الزوائد ومنبع الفوائد

علقمہ بن عبداللہ مزنی بیان کرتے ہیں : مجھے ایک صاحب نے یہ بات بتائی ہے : وہ کہتے ہیں : میں ایک ایسی محفل میں موجود تھا ، جس میں سیدنا عمر بن خطاب رضی اللہ عنہ بھی موجود تھے ، یہ مدینہ منورہ کی بات ہے ، انہوں نے حاضرین میں سے ایک شخص سے کہا: اے فلاں ! تم نے نبی اکرم صلی اللہ علیہ وسلم کو اسلام کی صفت بیان کرتے ہوئے کیسے سنا ہے ؟ تو ان صاحب نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اسلام کا آغاز جذع ہونے ( یعنی کم سن اونٹ ہونے ) کے عالم میں ہوا ، پھر وہ ثنی ( یعنی تیسرے سال میں داخل ہونے والا ) ہو گیا ، پھر وہ رباعی ( یعنی چوتھے سال میں داخل ہونے والا ) اونٹ ہو گیا ، پھر وہ سدیس ( یعنی آٹھویں سال میں داخل ہونے والا ) اونٹ ہو گیا ، پھر وہ بازل ( یعنی جس کے آٹھ سال پورے ہو گئے اور وہ نویں سال میں داخل ہو گیا ہو ، وہ ) ہو گیا ۔ “ تو سیدنا عمر رضی اللہ عنہ نے فرمایا : ” بازل “ ہو جانے کے بعد تو کم ہونا ہی باقی رہ جاتی ہے ۔
یہ روایت امام أحمد اور امام ابویعلیٰ نے نقل کی ہے اور اس کی سند میں ایک راوی ایسا ہے جس کا نام بیان نہیں کیا گیا ہے ، اس روایت کے بقیہ رجال ثقہ ہیں ۔