مجمع الزوائد ومنبع الفوائد

سیدنا عبدالرحمن بن عوف رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” میں بنو ہاشم بنو زہرہ اور بنو تیم کے حلف کے وقت موجود تھا ، اور مجھے یہ بات پسند نہیں ہے کہ میں اس عہد کو توڑ دوں ، اگرچہ اس کے بدلے میں ، مجھے سرخ اونٹ مل رہے ہوں ، اگر آج بھی مجھے اس کے حوالے سے بلایا جائے گا ، تو میں جاؤں گا ، اس شرط پر کہ نیکی کا حکم دیا جائے ، برائی سے منع کیا جائے ، اور ظالم سے مظلوم کا حق لیا جائے ۔ “
یہ روایت امام بزار نے نقل کی ہے ، اس کی سند میں ایک راوی ضرار بن صرد ہے اور وہ ضعیف ہے ، اس روایت کا ایک اور طریق بھی ہے ۔

سیدنا عبداللہ بن مسعود رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” دنیا ملعون ہے اور اس میں جو کچھ موجود ہے ، وہ ملعون ہے ، البتہ نیکی کا حکم دینے ، برائی سے منع کرنے اور اللہ کے ذکر کا معاملہ مختلف ہے ۔ “
یہ روایت امام بزار نے نقل کی ہے ، اس کی سند میں ایک راوی مغیرہ بن مطرف ہے اور میں اس سے واقف نہیں ہوں ، اس روایت کے بقیہ رجال کی توثیق کی گئی ہے ۔

سیدنا سہل بن سعد رضی اللہ عنہ بیان کرتے ہیں : انہوں نے سیدنا ابوذر غفاری رضی اللہ عنہ نے ، سیدنا ابوسعید خدری رضی اللہ عنہ نے اور سیدنا محمد بن مسلمہ انصاری رضی اللہ عنہ نے اور ایک اور صحابی نے ، اس بات پر نبی اکرم صلی اللہ علیہ وسلم کی بیعت کی تھی کہ اللہ تعالیٰ کے بارے میں کسی ملامت کرنے والے کی ملامت اُن پر اثر انداز نہیں ہو گی ۔ “
یہ روایت امام طبرانی نے نقل کی ہے ، اس کی سند میں ایک راوی عبدالمہیمن بن عیاش ہے اور وہ ضعیف ہے ۔

یزید بن ابوحبیب بیان کرتے ہیں : محمد بن یزید بن ابوزید نے یہ بات بیان کی ہے : ” ایک مرتبہ قیس بن خرشہ اور کعب ایک ساتھ تھئے ، یہ دونوں صفین کے مقام پر پہنچے ، تو وہاں کعب گھڑی بھر کے لئے ٹھہر گئے اور بولے : اللہ کے علاوہ اور کوئی معبود نہیں ہے ، اس مقام پر مسلمانوں کا خون ضرور بہایا جائے گا کہ اتنا خون زمین کے کسی اور حصے میں نہیں بہایا جائے گا ، تو قیس غصے میں آ گئے اور بولے : اے ابواسحاق ! تمہیں اس بات کا کیسے پتہ چلا ؟ یہ کیسے ہو سکتا ہے ؟ یہ تو وہ غیب ہے ، جس کا علم اللہ تعالیٰ نے کسی کو نہیں دیا ہے ، تو کعب نے فرمایا : روئے زمین کا کوئی ایک بالشت ایسا نہیں ہے ، جس کا ذکر اس ” تورات “ میں نہ ہو ، جس کو اللہ تعالیٰ نے سیدنا موسیٰ علیہ السلام پر نازل کیا تھا ، زمین پر جو کچھ ہو گا اور جو قیامت تک اس میں سے نکلے گا ( اُن سب کا ذکر اس میں ہے ) ۔ محمد بن یزید نے دریافت کیا : قیس بن خرشہ کون ہے ؟ انہوں نے بتایا : یہ قیس قبیلے سے تعلق رکھنے والے ایک صاحب ہیں ، تم انہیں نہیں جانتے ، حالانکہ وہ تمہارے علاقے کے آدمی ہیں ، انہوں نے کہا: اللہ کی قسم ! میں انہیں نہیں جانتا ، تو انہوں نے بتایا کہ سیدنا قیس بن خرشہ رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے تھے ، انہوں نے عرض کی : میں اس چیز پر آپ کی بیعت کرنے کے لیے حاضر ہوا ہوں ، جو آپ صلی اللہ علیہ وسلم کے پاس اللہ تعالیٰ کی طرف سے آئی ہے ، اور اس بات پر بھی بیعت کرنے کے لئے کہ میں حق بات کہوں گا ، تو نبی اکرم صلی اللہ علیہ وسلم نے ارشاد فرمایا : ” اے قیس ! ہو سکتا ہے کہ جب طویل زمانہ گزر جائے اور میرے بعد ایسے لوگ حکمران بن جائیں کہ تم ان کے سامنے حق نہ کہہ سکو ۔ “ قیس نے عرض کی : اللہ کی قسم ! میں کسی چیز پر آپ کی بیعت نہیں کروں گا ، مگر یہ کہ آپ کی خاطر اسے پورا بھی کروں گا ، تو نبی اکرم صلی اللہ علیہ وسلم نے ارشاد فرمایا : ایسی صورت میں تمہیں کوئی چیز نقصان نہیں پہنچائے گی ۔ راوی بیان کرتے ہیں : تو سیدنا قیس رضی اللہ عنہ ، زیاد اور اُس کے بیٹے عبیداللہ بن زیاد پر تنقید کیا کرتے تھے ، اس نے انہیں پیغام بھیج کر بلایا اور کہا: کیا تم وہ شخص ہو کہ جو اللہ اور اس کے رسول صلی اللہ علیہ وسلم کی طرف جھوٹی بات منسوب کرتے ہو ؟ تو سیدنا قیس رضی اللہ عنہ نے فرمایا : جی نہیں ! اگر تم چاہو تو میں تمہیں یہ بات بتا دیتا ہوں کہ کون شخص اللہ اور اس کے رسول صلی اللہ علیہ وسلم کی طرف جھوٹی بات منسوب کرتا ہے ، یہ وہ شخص ہے جو اللہ کی کتاب اور اس کے رسول صلی اللہ علیہ وسلم کی سنت پر عمل کو ترک کر دیتا ہے ۔
یہ روایت امام طبرانی نے نقل کی ہے اور یہ روایت ” مرسل “ ہے ۔

سیدنا ابوذر غفاری رضی اللہ عنہ بیان کرتے ہیں : میرے خلیل ( یعنی نبی اکرم صلی اللہ علیہ وسلم ) نے مجھے یہ تلقین کی تھی کہ اللہ تعالیٰ کے بارے میں کسی ملامت کرنے والی ملامت ، مجھ پر اثر انداز نہ ہو ، اور میں اُس کا جائزہ لوں کہ جو شخص مجھ سے نیچے ہے ، اس کی طرف نہ دیکھوں ، جو مجھ سے اوپر ہے اور آپ صلی اللہ علیہ وسلم نے مجھے مسکینوں کے ساتھ محبت رکھنے اور ان کے ساتھ رہنے کی تلقین کی تھی اور آپ صلی اللہ علیہ وسلم نے مجھے حق بات کہنے کی تلقین کی تھی ، اگرچہ وہ کڑوی ہو اور آپ نے مجھے صلہ رحمی کرنے کی تلقین کی تھی ، اگرچہ دوسرا شخص پیٹھ پھیر رہا ہو ، اور آپ نے مجھے یہ تلقین کی تھی کہ میں لوگوں سے کچھ نہیں مانگوں گا ، اور آپ نے مجھے یہ تلقین کی تھی کہ میں کثرت کے ساتھ لا حول ولا قوة الا بالله العلی العظیم پڑھتا رہوں گا ، کیونکہ یہ جنت کے خزانوں میں سے ہے ۔
یہ روایت امام طبرانی نے معجم صغیر میں نقل کی ہے اور معجم کبیر میں اس کی مانند نقل کی ہے اور یہ الفاظ زائد نقل کئے ہیں : ” اور یہ کہ میں لوگوں سے کچھ نہیں مانگوں گا ۔ “ اس روایت کے رجال صحیح کے رجال ہیں ، صرف سلام بن ابومنذر کا معاملہ مختلف ہے اور وہ ثقہ ہے ، یہ روایت امام بزار نے نقل کی ہے ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے مجھ سے فرمایا : ” اے ابوہریرہ ! تم کسی امیر ( یا حکمران ) کے پاس نہ جانا اور اگر تم اس کے پاس چلے جاؤ ، تو میری سنت سے تجاوز نہ کرنا اور اس کی تلوار یا کوڑے سے اس حوالے سے خوف زدہ نہ ہونا کہ تم اُسے اللہ کا تقویٰ اختیار کرنے اور اس کی فرمانبرداری کا حکم دو ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالمنعم بن بشر ہے اور وہ ضعیف ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” لوگوں کا خوف ، تم میں سے کسی ایک شخص کو اس بات سے ہرگز نہ روکے کہ وہ شخص جب حق کو دیکھے ، تو حق کے مطابق بات کرے ، یا وہ شخص کسی بڑے شخص ( یعنی حکمران ) کو نصیحت کرے ، کیونکہ یہ چیز نہ تو موت کو قریب کرتی ہے ، اور نہ ہی رزق کو دور کرتی ہے ، آدمی کو حق کے مطابق بات کہنی چاہیے اور بڑے ( یعنی حکمران ) کو نصیحت کرنی چاہیے ۔ “ ( علامہ ہیثمی فرماتے ہیں ) میں یہ کہتا ہوں : امام ترمذی اور امام ابن ماجہ نے اس روایت کا ایک حصہ نقل کیا ہے ۔
یہ روایت امام طبرانی نے معجم اوسط میں نقل کی ہے اور امام طبرانی کے استاد کے علاوہ اس روایت کے رجال صحیح کے رجال ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” سیدنا موسیٰ علیہ السلام نے عرض کی : اے میرے پروردگار ! تو مجھے بتا کہ تیرے نزدیک تیری مخلوق میں سب سے زیادہ معزز کون شخص ہے ؟ تو اللہ تعالیٰ نے ارشاد فرمایا : وہ شخص جو میرے حکم کی پیروی کے لئے اس طرح تیزی کرتا ہے ، جس طرح کوئی عقاب اپنے ٹھکانے کی طرف تیزی سے جاتا ہے اور وہ شخص جو میرے نیک بندوں کی بہ تکلف پیروی کرنے کی کوشش کرتا ہے ، جس طرح بچے کو لوگوں کی پیروی کروائی جاتی ہے ، اور وہ شخص کہ جب میری کسی حرمت کی پامالی ہو رہی ہو ، تو وہ یوں غضبناک ہوتا ہے ، جس طرح کوئی چیتا اپنی ذات کے لئے غضبناک ہوتا ہے ، کیونکہ جب چیتا غضبناک ہو ، تو وہ اس بات کی پرواہ نہیں کرتا کہ لوگ کم ہیں یا زیادہ ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن عبداللہ بن یحیی بن عروہ ہے اور وہ متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن شہداء کے سردار سیدنا حمزہ بن عبدالمطلب رضی اللہ عنہ ہوں گے اور وہ شخص ہو گا ، جو کسی ظالم حکمران کے سامنے کھڑا ہو کر اسے نیکی کا حکم دے ، یا اسے برائی سے منع کرے اور وہ حکمران اُسے قتل کروا دے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک ایسا شخص ہے جو حدیث میں ضعیف ہے ۔

ابوجعفر خطمی بیان کرتے ہیں : ان کے دادا سیدنا عمیر بن حبیب بن حماشہ رضی اللہ عنہ ، جنہوں نے بلوغت کے وقت نبی اکرم صلی اللہ علیہ وسلم کا زمانہ پایا ہے ، اُنہوں نے اپنے بیٹے کو تلقین کی اور یہ کہا: ” اے میرے بیٹے ! تم بے وقوف لوگوں کی ہمنشینی سے بچ کے رہنا ، کیونکہ ان کی ہمنشینی ، بیماری ہوتی ہے اور جو شخص بے وقوف شخص کے حوالے سے بردباری اختیار کرے ، وہ ٹھیک رہتا ہے ، جو شخص اُسے جواب دے وہ ندامت کا شکار ہوتا ہے ، اور جو شخص بے وقوف کی لائی ہوئی تھوڑی چیز سے راضی نہیں ہوتا ، وہ زیادہ سے راضی ہو جاتا ہے ، اور جب تم میں سے کوئی شخص نیکی کا حکم دے یا برائی سے منع کرے ، تو اپنے آپ کو تکلیف دہ چیز پر صبر کرنے کے لئے تیار کرے ، اور اللہ تعالیٰ کی طرف سے ملنے والے ثواب کی توقع رکھے ، کیونکہ جو شخص اللہ تعالیٰ کی طرف سے ملنے والے ثواب پر یقین رکھے گا ، تو تکلیف کا پہنچنا اُسے نقصان نہیں دے گا ۔ “
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم میرے پاس تشریف لائے ، آپ صلی اللہ علیہ وسلم کے چہرے سے مجھے اندازہ ہو گیا کہ آپ کو کوئی ناگوار صورت حال پیش آئی ہے ، آپ نے وضو کیا اور آپ نے کسی کے ساتھ بات چیت نہیں کی ، میں حجروں کے قریب ہوئی تو میں نے آپ صلی اللہ علیہ وسلم کو یہ ارشاد فرماتے ہوئے سنا : ” اے لوگو ! بے شک اللہ تعالیٰ نے یہ ارشاد فرمایا ہے ، کہ تم لوگ نیکی کا حکم دو اور تم برائی سے منع کرو ، اس سے پہلے کہ تم لوگ مجھ سے دعا کرو اور میں تمہاری دعا قبول نہ کروں ، تم لوگ مجھ سے مانگو ، تو میں تمہیں عطا نہ کروں ، تم لوگ مجھ سے مدد مانگو ، تو میں تمہاری مدد نہ کروں ۔ “ ( علامہ ہیثمی فرماتے ہیں ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام أحمد اور امام بزار نے نقل کی ہے ، اس کی سند میں ایک راوی عاصم بن عمر ہے ، جو مجہول راویوں میں سے ایک ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے لوگو ! نیکی کا حکم دو اور برائی سے منع کرو ، اس سے پہلے کہ تم لوگ اللہ تعالیٰ سے دعا کرو ، تو وہ تمہاری دعا قبول نہ کرے ، اس سے پہلے کہ تم اس سے مغفرت طلب کرو ، تو وہ تمہاری مغفرت قبول نہ کرے ، بے شک نیکی کا حکم دینا ، موت کو قریب نہیں کرتا ہے ، یہودیوں کے علماء اور عیسائیوں کے راہب ، جب اُنہوں نے نیکی کا حکم دینا اور برائی سے منع کرنا ترک کر دیا ، تو اللہ تعالیٰ نے ان کے انبیاء کی زبانی اُن ( لوگوں ) پر لعنت کی اور آزمائش نے اُن سب کو اپنی لپیٹ میں لے لیا ۔ “
یہ روایت امام طبرانی نے معجم اوسط میں نقل کی ہے اس کی سند میں ایسے راوی ہیں جن سے میں واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں ، نبی اکرم صلی اللہ علیہ وسلم نے ارشاد فرمایا : ” یا تو تم لوگ نیکی کا حکم دو گے اور برائی سے منع کرو گے ، یا پھر اللہ تعالیٰ تمہارے بدترین لوگوں کو تم پر مسلط کر دے گا اور پھر تمہارے نیک لوگ دعا کریں گے اور اُن کی دعا قبول نہیں ہو گی ۔ “
یہ روایت امام طبرانی نے معجم اوسط میں نقل کی ہے اور امام بزار نے نقل کی ہے ، اس کی سند میں ایک راوی حبان بن علی ہے اور وہ متروک ہے ، ایک روایت کے مطابق یحیی بن معین نے اسے ثقہ قرار دیا ہے اور دوسری کے مطابق انہوں نے اسے ضعیف کہا: ہے ۔