مجمع الزوائد ومنبع الفوائد

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں محمد کی جان ہے ، نیکی اور برائی دو قسم کی مخلوق ہیں ، جنہیں لوگوں کے لئے قیامت کے دن نصب کیا جائے گا ، جہاں تک نیکی کا تعلق ہے ، تو وہ اپنے متعلقہ افراد کو خوشخبری دے گی اور ان کے ساتھ بھلائی کا وعدہ کرے گی ، اور جہاں تک برائی کا تعلق ہے ، تو وہ یہ کہے گی : تم خود کو سنبھالو ! تم خود کو سنبھالو ! اور وہ لوگ اس کے ساتھ ہی چمٹے رہیں گے ۔ “
یہ روایت امام أحمد اور امام بزار نے نقل کی ہے اور ان دونوں کے رجال صحیح کے رجال ہیں ،
یہ روایت امام طبرانی نے معجم اوسط میں نقل کی ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” دنیا میں نیکیاں کرنے والے ، آخرت میں نیکیاں کرنے والے ہوں گے ، اور دنیا میں برائیاں کرنے والے ، آخرت میں برائیاں کرنے والے ہوں گے ۔ “
یہ روایت امام بزار نے نقل کی ہے ، اس کی سند میں ایک راوی خازم ابومحمد ہے ، ابوحاتم کہتے ہیں : یہ مجہول ہے ۔

سیدنا قبیصہ بن برمہ اسدی رضی اللہ عنہ بیان کرتے ہیں : ایک دن میں نبی اکرم صلی اللہ علیہ وسلم کے پاس بیٹھا ہوا تھا ، میں نے آپ کو یہ ارشاد فرماتے ہوئے سنا : ” دنیا میں نیکیاں کرنے والے ، آخرت میں نیکیاں کرنے والے ہوں گے اور دنیا میں برائیاں کرنے والے ، آخرت میں برائیوں والے ہوں گے ۔ “
یہ روایت امام طبرانی نے اور امام بزار نے نقل کی ہے ، اس کی سند میں ایک راوی علی بن ابوہاشم ہے ، ابوحاتم کہتے ہیں : یہ صدوق ہے ، البتہ اس کی حدیث کو اس لئے متروک قرار دیا گیا ، کیونکہ یہ قرآن کے بارے میں تؤقف سے کام لیتا تھا ، اس روایت کی سند میں ایسا راوی بھی ہے ، جس سے میں واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا میں نیکیوں والے ، آخرت میں نیکیوں والے ہوں گے اور دنیا میں برائیوں والے ، آخرت میں برائیوں والے ہوں گے ۔ “
یہ روایت امام طبرانی نے معجم صغیر اور معجم اوسط میں دو اسناد کے ساتھ نقل کی ہے ، جن میں سے ایک سند میں ایک راوی یحیی بن خالد بن حیان رقی ہے اور میں اس سے واقف نہیں ہوں اور نہ ہی اس کے بیٹے أحمد سے واقف ہوں ، اس روایت کے بقیہ رجال صحیح کے رجال ہیں ، دوسری روایت میں ایک راوی مسیب بن واضح ہے ، ابوحاتم کہتے ہیں : یہ بہت زیادہ غلطی کرتا ہے اور جب اس کو غلطی پر تنبیہ کی جائے ، تو یہ رجوع نہیں کرتا ہے ۔

سیدنا ابوموسیٰ اشعری روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا میں نیکی والے ، آخرت میں نیکی والے ہوں گے اور دنیا میں برائی والے ، آخرت میں برائی والے ہوں گے ۔ “
یہ روایت امام طبرانی نے معجم صغیر میں نقل کی ہے اور اس کے رجال کی توثیق کی گئی ہے ، اس کے بعض رجال کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا میں نیکی والے ، آخرت میں نیکی والے ہوں گے اور دنیا میں برائی والے ، آخرت میں برائی والے ہوں گے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، معجم کبیر کی سند میں ایک راوی عبداللہ بن ہارون فروی ہے اور وہ ضعیف ہے ، دوسری روایت میں ایک راوی لیث بن ابوسلیم ہے اور وہ مدلس ہے ۔

سیدنا سلمان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا میں نیکی والے لوگ ، آخرت میں نیکی والے ہوں گے اور دنیا میں برائی والے لوگ ، آخرت میں برائی والے ہوں گے ۔ “
یہ روایت امام طبرانی نے نقل کی ہے اس کی سند میں ایک راوی ہشام بن لاحق ہے جسے امام أحمد نے متروک قرار دیا ہے ، امام نسائی رحمہ اللہ نے اسے قوی قرار دیا ہے ، اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دنیا میں نیکی والے لوگ ہی آخرت میں نیکی والے ہوں گے اور اہل جنت میں سے ، سب سے پہلے نیکی والے جنت میں داخل ہوں گے ۔ “
یہ روایت امام طبرانی نے نقل کی ہے اس کی سند میں ایک راوی ایسا ہے ، جس سے میں واقف نہیں ہوں ۔

سیده دُرّه بنت ابولہب رضی اللہ عنہا بیان کرتی ہیں : ایک شخص نبی اکرم صلی اللہ علیہ وسلم کے سامنے کھڑا ہوا ، آپ صلی اللہ علیہ وسلم اس وقت منبر پر موجود تھے ، اس نے عرض کی : یا رسول اللہ ! لوگوں میں کون شخص سب سے بہتر ہے ؟ نبی اکرم صلی اللہ علیہ وسلم نے ارشاد فرمایا : لوگوں میں سب سے بہتر وہ شخص ہے جو سب سے زیادہ عالم ہو ، سب سے زیادہ پرہیزگار ہو ، سب سے زیادہ نیکی کا حکم دینے والا ہو ، سب سے زیادہ برائی سے منع کرنے والا ہو ، اور سب سے زیادہ صلہ رحمی کرنے والا ہو ۔ “
یہ روایت امام أحمد نے نقل کی ہے ، روایت کے یہ الفاظ اُن کے نقل کردہ ہیں ، اسے امام طبرانی نے بھی نقل کیا ہے اور یہ الفاظ زائد نقل کئے ہیں : ” وہ خاتون بیان کرتی ہیں : میں سیدہ عائشہ رضی اللہ عنہا کے پاس موجود تھی ، اسی دوران ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے بلند آواز میں نبی اکرم صلی اللہ علیہ وسلم کو پکارا ، نبی اکرم صلی اللہ علیہ وسلم اس وقت منبر پر موجود تھے ، اس نے عرض کی : یا رسول اللہ ! لوگوں میں کون زیادہ بہتر ہے ؟ وہ خاتون بیان کرتی ہیں : ایک شخص آیا ، اس کو پکڑا گیا تھا ، اس نے عرض کی : یا رسول اللہ ! میرا کوئی گناہ نہیں ہے ، مجھے فلاں شخص نے یہ کہا: تھا ۔ ۔ ۔ ۔ ۔ ۔ ۔ باقی روایت حسب سابق ہے ۔ ان دونوں روایات کے رجال ثقہ ہیں اور اس کے بعض رجال کے بارے میں ایسا کلام کیا گیا ہے ، جو نقصان دہ نہیں ہے ۔