مجمع الزوائد ومنبع الفوائد

سیدنا عبداللہ بن سلام رضی اللہ عنہ کے بارے میں یہ بات منقول ہے کہ سیدنا عثمان رضی اللہ عنہ کے معاملے میں جب لوگوں نے احتجاج کیا تو انہوں نے یہ فرمایا : اے لوگو ! تم اس بزرگ کو قتل نہ کرنا اور ان کا خیال رکھنا کیونکہ جب بھی کسی امت نے اپنے نبی کو شہید کیا تو ان لوگوں کا معاملہ اس وقت تک ٹھیک نہیں ہوا ، جب تک ان میں سے ستر ہزار لوگوں کا خون نہیں بہا دیا گیا اور جب بھی کسی امت نے اپنے نبی کے خلیفہ کو شہید کیا تو ان لوگوں کا معاملہ اس وقت تک ٹھیک نہیں ہوا ، جب تک ان میں سے چالیس ہزار افراد کا خون نہیں بہا دیا گیا ، لیکن لوگوں نے ان کی کہی ہوئی بات پر توجہ نہیں دی اور انہیں مارا پیٹا ، ایک مرتبہ وہ راستے میں سیدنا علی رضی اللہ عنہ سے ملنے کے لئے بیٹھے ہوئے تھے ، انہوں نے سیدنا علی رضی اللہ عنہ سے دریافت کیا : آپ کہاں جانے کا ارادہ رکھتے ہیں ، انہوں نے فرمایا : عراق کی سرزمین کی طرف جانا چاہتا ہوں ، سیدنا عبداللہ بن سلام رضی اللہ عنہ نے فرمایا : آپ عراق نہ جائیں ، آپ اللہ کے رسول کے منبر پر تشریف فرما ہوں ، سیدنا علی رضی اللہ عنہ کے ساتھیوں میں سے کچھ ان پر حملہ کرنے لگے ، تو سیدنا علی رضی اللہ عنہ نے فرمایا : انہیں چھوڑ دو کیونکہ یہ ہم میں سے ، اہل بیت میں سے ایک ہیں ، جب سیدنا علی رضی اللہ عنہ کو شہید کر دیا گیا تو سیدنا عبداللہ بن سلام رضی اللہ عنہ نے ابن معقل سے کہا: یہ چالیس ہجری ہے ، اس کے اختتام پر صلح ہو گی ، جب بھی کسی امت نے اپنے نبی کو شہید کیا ، تو اس کے بدلے میں ستر ہزار افراد شہید کیے گئے اور جب بھی کسی امت نے نبی کے خلیفہ کو شہید کیا ، تو اس کے بدلے میں چالیس ہزار لوگ قتل کئے گئے ۔
یہ روایت امام طبرانی نے دو حوالوں سے نقل کی ہے اور اس کے رجال صحیح کے رجال ہیں ۔ اس روایت کا ایک طریق سیدنا عثمان رضی اللہ عنہ کے مناقب سے متعلق باب میں آئے گا ۔

سیدنا جابر رضی اللہ عنہ بیان کرتے ہیں نبی اکرم صلی اللہ علیہ وسلم نے سیدنا امام حسن رضی اللہ عنہ کے بارے میں یہ ارشاد فرمایا : ” میرا یہ بیٹا سردار ہے اور اللہ تعالیٰ اس کے ذریعے مسلمانوں کے دو گروہوں کے درمیان صلح کروائے گا ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

ابومجلز بیان کرتے ہیں سیدنا عمرو رضی اللہ عنہ اور سیدنا مغیرہ بن شعبہ رضی اللہ عنہ نے سیدنا معاویہ رضی اللہ عنہ سے کہا: سیدنا امام حسن بن علی رضی اللہ عنہما ایک کمزور رائے شخص ہیں اور ان کا ایک مخصوص موقف ہے ، ہم ان کے موقف کو جانتے ہیں ، ہم اس حوالے سے کلام کر لیں گے ، تو ان کے پاس کہنے کے لیے کچھ نہیں رہے گا ، سیدنا معاویہ رضی اللہ عنہ نے فرمایا : تم لوگ ایسا نہ کرو ! لیکن ان لوگوں نے سیدنا معاویہ رضی اللہ عنہ کی بات نہیں مانی ، پھر سیدنا عمرو رضی اللہ عنہ منبر پر چڑھے ، انہوں نے سیدنا علی رضی اللہ عنہ کا ذکر کرتے ہوئے ان پر تنقید کی ، سیدنا مغیرہ بن شعبہ رضی اللہ عنہ منبر پر چڑھے انہوں نے اللہ تعالیٰ کی حمد و ثناء بیان کی اور سیدنا علی رضی اللہ عنہ پر تنقید کی ، سیدنا امام حسن بن علی رضی اللہ عنہما سے یہ کہا: گیا : آپ منبر پر چڑھیں ، تو انہوں نے فرمایا : میں ( اس وقت تک منبر پر ) نہیں چڑھوں گا اور اس وقت تک بات چیت نہیں کروں گا ، جب تک تم میرے ساتھ یہ طے نہیں کرتے کہ اگر میں نے سچ بات بیان کی ، تو تم میری تصدیق کرو گے اور اگر میں نے غلط بات بیان کی ، تو تم مجھے جھٹلا دو گے ، لوگوں نے ان کے ساتھ یہ طے کر لیا ، وہ منبر پر چڑھئے ، انہوں نے اللہ تعالیٰ کی حمد و ثناء بیان کی اور پھر ارشاد فرمایا : اے عمرو ! اور اے مغیرہ ! میں آپ دونوں کو اللہ کا واسطہ دے کر یہ دریافت کرتا ہوں کہ کیا آپ دونوں یہ بات جانتے ہیں کہ نبی اکرم صلی اللہ علیہ وسلم نے ارشاد فرمایا تھا : ” ہانک کر لے جانے والے اور سوار شخص پر ، اللہ تعالیٰ لعنت کرے ۔ “ اور ان دونوں میں سے ایک شخص فلاں تھا ، ان دونوں صاحبان نے جواب دیا ، اللہ جانتا ہے ایسا ہی ہے ، سیدنا امام حسن رضی اللہ عنہ نے فرمایا : اے معاویہ اور اے مغیرہ ! میں آپ کو اللہ کا واسطہ دے کر یہ دریافت کرتا ہوں کہ کیا آپ دونوں یہ بات جانتے ہیں کہ اللہ کے رسول نے عمرو ( بن العاص ) پر لعنت کی تھی ، ان دونوں نے جواب دیا ، اللہ جانتا ہے جی ہاں ، سیدنا امام حسن رضی اللہ عنہ نے فرمایا : اے عمرو ! میں آپ کو اللہ کا واسطہ دے کر دریافت کرتا ہوں اور اے معاویہ بن ابوسفیان ! آپ سے بھی دریافت کرتا ہوں کہ کیا آپ دونوں یہ بات جانتے ہیں کہ اللہ کے رسول نے اس قوم پر لعنت کی ہے ، ان دونوں نے جواب دیا ، جی ہاں ، تو سیدنا امام حسن رضی اللہ عنہ نے فرمایا : میں اس بات پر اللہ کی حمد بیان کرتا ہوں کہ آپ لوگوں نے جن صاحب پر تنقید کی تھی وہ اس چیز سے لاتعلق ہیں ( کہ اللہ کے رسول نے ان پر لعنت کی ہو ) ۔ ۔ ۔ ۔ ۔ ۔ راوی کہتے ہیں : اس کے بعد انہوں نے پوری روایت ذکر کی ہے ۔
یہ روایت امام طبرانی نے اپنے استاد زکریا بن یحیی ساجی کے حوالے سے نقل کی ہے ، امام ذہبی کہتے ہیں یہ مثبت راویوں میں سے ایک ہے ، مجھے اس کے بارے میں سرے سے کسی جرح کا علم نہیں ہے ، ابن قطان کہتے ہیں حدیث کے بارے میں اس شخص کے بارے میں اختلاف کیا گیا ہے ، ایک قوم نے اسے ثقہ قرار دیا ہے اور دوسرے لوگوں نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

عیسیٰ بن یزید بیان کرتے ہیں : اشعث بن قیس نے کوفہ میں سیدنا معاویہ رضی اللہ عنہ کے پاس آنے کی اجازت مانگی ، سیدنا معاویہ رضی اللہ عنہ نے اسے اجازت دینے میں ذرا تاخیر کی ، پھر جب وہ سیدنا معاویہ رضی اللہ عنہ کے پاس آیا تو سیدنا معاویہ کے پاس سیدنا عبداللہ بن عباس اور سیدنا امام حسن بن علی رضی اللہ عنہم بھی موجود تھے ، اشعث نے کہا: اے امیرالمؤمنین ! کیا آپ نے ان دو افراد کی وجہ سے مجھے اندر آنے نہیں دیا ؟ جبکہ آپ یہ بات جانتے ہیں کہ ان کے آقا ہمارے پاس آئے اور انہوں نے ہمیں جھوٹ سے بھر دیا ، راوی کہتے ہیں : اس کی مراد سیدنا علی رضی اللہ عنہ تھے ، تو سیدنا عبداللہ بن عباس رضی اللہ عنہما نے فرمایا : اللہ کی قسم ! ان صاحب ( یعنی سیدنا علی رضی اللہ عنہ ) کے پاس تمہارے دادا کا گھوڑا تھا اور انہوں نے تمہارے باپ پر وار کیا تھا ( یعنی ان صاحب نے اسلام کی سربلندی کی خاطر تمہارے باپ دادا کے ساتھ جنگ کی تھی ) تو اشعث نے کہا: اے امیرالمؤمنین ! آپ سن رہے ہیں یہ کیا کہہ رہے ہیں ؟ سیدنا معاویہ رضی اللہ عنہ نے فرمایا : بات شروع تم نے کی تھی ۔
یہ روایت امام طبرانی نے نقل کی ہے اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا شداد بن اوس رضی اللہ عنہ کے بارے میں یہ بات منقول ہے کہ ایک مرتبہ وہ سیدنا معاویہ رضی اللہ عنہ کے پاس آئے ، سیدنا معاویہ رضی اللہ عنہ بیٹھے ہوئے تھے اور سیدنا عمرو بن العاص رضی اللہ عنہ بچھونے پر بیٹھے ہوئے تھے ، سیدنا شداد رضی اللہ عنہ ان دونوں کے درمیان بیٹھ گئے اور انہوں نے فرمایا : کیا تم دونوں یہ بات جانتے ہو کہ میں تم دونوں کے درمیان کیوں بیٹھا ہوں ؟ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب تم لوگ ان دونوں کو ایک ساتھ دیکھو ، تو ان دونوں کو الگ کروا دینا کیونکہ اللہ کی قسم ! یہ دونوں کسی عہد شکنی پر ہی اکٹھے ہوں گے ۔ “ ( پھر سیدنا شداد بن اوس رضی اللہ عنہ نے فرمایا : ) تو میں نے اس بات کو پسند کیا کہ میں تم دونوں کو الگ کروا دوں ۔
یہ روایت امام طبرانی نے نقل کی ہے اس کی سند میں ایک راوی عبداللہ بن یعلیٰ بن شداد ہے ، میں اس سے واقف نہیں ہوں ، اس روایت کے بقیہ رجال ثقہ ہیں ۔