مجمع الزوائد ومنبع الفوائد

سیدنا عثمان غنی رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ یہ ارادہ کرتا ہے کہ وہ کسی بندے کو دل کو ٹیڑھا کر دے ، تو اللہ تعالیٰ اُس کو حیلوں کے حوالے سے نابینا کر دیتا ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن عیسیٰ طرسوسی ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب بھی آسمان کی طرف سر اٹھا کر دیکھتے تھے تو یہ کہتے تھے : اے دلوں کو پھیرنے والے ! تو میرے دل کو ، اپنی اطاعت پر ثابت رکھنا ۔ “
یہ روایت امام أحمد نے نقل کی ہے ، اس کی سند میں ایک راوی مسلم بن محمد بن زائدہ ہے ، بعض حضرات نے یہ کہا: ہے : درست یہ ہے کہ یہ صالح بن محمد بن زائدہ ہے ، امام أحمد نے اسے ثقہ قرار دیا ہے ، زیادہ تر لوگوں نے اسے ضعیف کہا: ہے ، اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم یہ دعا کیا کرتے تھے : ” اے دلوں کو پھیرنے والے ! تو میرے دل کو اپنے دین پر ثابت رکھنا ۔ “ سیدہ عائشہ رضی اللہ عنہا بیان کرتی ہیں : میں نے عرض کی : یا رسول اللہ ! میرے ماں باپ آپ پر قربان ہوں ، کیا آپ کو بھی اندیشہ ہے حالانکہ آپ اللہ کے رسول ہیں ؟ نبی اکرم صلی اللہ علیہ وسلم نے ارشاد فرمایا : ” اے عائشہ ! اولاد آدم کے دل ، رحمن کی انگلیوں میں سے ، دو انگلیوں کے درمیان ہیں ، وہ جس کے بارے میں چاہتا ہے کہ اُسے گمراہی سے ہدایت کی طرف پلٹ دے یا ہدایت سے گمراہی کی طرف پلٹ دے ، تو وہ ایسا کر دیتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی معلیٰ بن فضل ہے ، ابن عدی کہتے ہیں : اس کی نقل کردہ بعض روایات میں منکر ہونا پایا جاتا ہے ، اس روایت کے بقیہ رجال کی توثیق کی گئی ہے ، اور ان کے بارے میں اختلاف پایا جاتا ہے ۔

سیده ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم اپنی دعا میں اکثر یہ دعا کیا کرتے تھے : ” اے اللہ ! اے دلوں کو پھیرنے والے ! تو میرے دل کو اپنے دین پر ثابت رکھنا ۔ “ سیدہ ام سلمہ رضی اللہ عنہا بیان کرتی ہیں : میں نے عرض کی : یا رسول اللہ ! کیا دل بھی تبدیل ہو جاتے ہیں ؟ نبی اکرم صلی اللہ علیہ وسلم نے ارشاد فرمایا : جی ہاں ! اللہ تعالیٰ کی مخلوق میں سے ، بنی آدم میں سے ہر انسان کا دل اللہ تعالیٰ کی انگلیوں میں سے ، دو انگلیوں کے درمیان ہے ، اگر اللہ تعالیٰ چاہے تو اسے ٹھیک رکھتا ہے اور اگر چاہے تو اُسے ٹیڑھا کر دیتا ہے ، تو ہم اللہ تعالیٰ سے یہ دعا مانگتے ہیں ، کہ وہ ہمیں ہدایت دینے کے بعد ہمارے دلوں کو ٹیڑھا نہ کرے ، اور ہم اس سے یہ دعا مانگتے ہیں کہ وہ ہمیں اپنی طرف سے رحمت عطا کرے ، بے شک وہ بہت زیادہ عطا کرنے والا ہے ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ، جس کا کچھ حصہ امام ترمذی نے بھی روایت کیا ہے ۔
یہ روایت امام أحمد نے نقل کی ہے اس کی سند میں ایک راوی شہر بن حوشب ہے ، جس کی توثیق کی گئی ہے اور اس میں ضعف پایا جاتا ہے ۔

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” انسان کا دل رحمن کی انگلیوں میں سے دو انگلیوں کے درمیان ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن صالح ہے ، جسے عبدالملک بن شعیب نے ثقہ قرار دیا ہے اور دیگر حضرات نے اسے ضعیف کہا: ہے ۔

سیدنا نعیم بن ہمار غطفانی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر آدمی کا دل ، رحمن کی انگلیوں میں سے دو انگلیوں کے درمیان ہوتا ہے ، اگر اللہ تعالیٰ اسے ٹیڑھا کرنا چاہے ، تو اسے ٹیڑھا کر دیتا ہے ، اگر وہ اُسے ٹھیک رکھنا چاہے ، تو اُسے ٹھیک رکھتا ہے ، اور روزانہ اللہ تعالیٰ کے ہاتھ میں میزان ہوتا ہے ، وہ کچھ اقوام کو سربلندی عطا کرتا ہے ، اور کچھ لوگوں کو پست کر دیتا ہے ، ایسا قیامت تک ہو گا ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا سمرہ بن فاتک اسدی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میزان ( یعنی ترازو ) اللہ تعالیٰ کے ہاتھ میں ہے ، وہ کچھ لوگوں کو بلند کرتا ہے اور کچھ لوگوں کو پست کر دیتا ہے ، اور انسان کا دل ، رحمن کی انگلیوں میں سے دو انگلیوں کے درمیان ہے ، اگر وہ چاہے تو اُسے ٹیڑھا کر دیتا ہے اور اگر چاہے ، تو اُسے ٹھیک کر دیتا ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا مقداد بن اسود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” انسان کا دل ، اُس ہنڈیا سے زیادہ تیزی سے تبدیل ہوتا ہے کہ جب وہ جوش مار رہی ہو ( یعنی ابلنے والی ہو ) ۔ “
یہ روایت امام طبرانی نے مختلف اسانید کے ساتھ کے ساتھ نقل کی ہے ، جن میں سے ایک کے رجال ثقہ ہیں ۔