مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : جب اللہ تعالیٰ نے سیدنا موسیٰ علیہ السلام کو مبعوث کیا ، تو اللہ تعالیٰ نے ان پر تورات نازل کی ، تو انہوں نے عرض کی : ” اے اللہ ! تو عظمت والا پروردگار ہے ، اگر تو یہ چاہے کہ تیری اطاعت کی جائے ، تو تیری اطاعت ہی کی جائے ، اور اگر تو یہ چاہے کہ تیری نافرمانی نہ کی جائے ، تو تیری نافرمانی نہ کی جائے ، اور تو اس بات کو پسند کرتا ہے کہ تیری اطاعت کی جائے ، لیکن اس کے باوجود یہ صورت حال ہے کہ تیری نافرمانی کی جاتی ہے ، تو اے پروردگار ! اس کی وجہ کیا ہے ؟ “ ۔ اللہ تعالیٰ نے اُن کی طرف وحی کی : ” میں جو کرتا ہوں ، اس کے حوالے سے مجھ سے نہیں پوچھا: جا سکتا ، البتہ لوگوں سے ( ان کے اعمال کے بارے میں ) پوچھا: جائے گا “ تو سیدنا موسیٰ علیہ السلام اس بارے میں سوال کرنے سے باز آ گئے ۔ جب اللہ تعالیٰ نے سیدنا عزیر علیہ السلام کو مبعوث کیا اور بنی اسرائیل سے تورات کو اٹھا لینے کے بعد اُن پر تورات نازل کی ، یہاں تک کہ ان لوگوں میں سے کچھ نے یہ کہا: یہ اللہ کے بیٹے ہیں ، تو سیدنا عزیر علیہ السلام نے یہ کہا: ” اے اللہ ! بے شک تو عظمت والا پروردگار ہے ، اگر تو یہ چاہے کہ تیری اطاعت کی جائے ، تو تیری اطاعت کی جائے اور اگر تو یہ چاہے کہ تیری نافرمانی نہ کی جائے ، تو تیری نافرمانی نہ کی جائے ، اور تو اس بات کو پسند کرتا ہے کہ تیری اطاعت کی جائے جبکہ صورت حال یہ ہے کہ تیری نافرمانی بھی کی جاتی ہے ، تو اے پروردگار ! اس کی وجہ کیا ہے ؟ “ ۔ تو اللہ تعالیٰ نے اُن کی طرف یہ وحی کی : ” میں جو کرتا ہوں ، اُس کے حوالے سے مجھ سے نہیں پوچھا: جائے گا اور لوگوں سے ( ان کے اعمال کے بارے میں ) پوچھا: جائے گا ۔ “ سیدنا عزیر علیہ السلام نے اس بات کو نہیں مانا ، یہاں تک کہ انہوں نے پھر یہی سوال کیا اور بولے : ” اے اللہ ! بے شک تو عظیم پروردگار ہے ، اگر تو یہ چاہے کہ تیری اطاعت کی جائے ، تو تیری اطاعت کی جائے اور اگر تو یہ چاہے کہ تیری نافرمانی نہ کی جائے ، تو تیری نافرمانی نہ کی جائے ، اور تو یہ پسند کرتا ہے کہ تیری اطاعت کی جائے ، جبکہ تیری نافرمانی بھی کی جاتی ہے ، تو اے پروردگار ! اس کی وجہ کیا ہے ؟ “ تو اللہ تعالیٰ نے اُن کی طرف یہ وحی کی : ” میں جو کرتا ہوں ، اُس کے حوالے سے مجھ سے سوال نہیں کیا جا سکتا اور لوگوں سے ( ان کے اعمال کے بارے میں ) سوال کیا جائے گا ۔ “ سیدنا عزیر علیہ السلام نے یہ بات نہیں مانی اور انہوں نے پھر یہی سوال کر دیا اور بولے : ” اے اللہ ! بے شک تو عظمت والا ہے ، اگر تو یہ چاہے کہ تیری اطاعت کی جائے ، تو تیری اطاعت ہی کی جائے اور اگر تو یہ چاہے کہ تیری نافرمانی نہ کی جائے ، تو تیری نافرمانی نہ کی جائے ، اور تو اس بات کو پسند کرتا ہے کہ تیری اطاعت کی جائے ، لیکن پھر بھی تیری نافرمانی کی جاتی ہے ، اس کی وجہ کیا ہے ؟ اے میرے پروردگار ! “ ۔ تو اللہ تعالیٰ نے اُن کی طرف یہ وحی کی : ” میں جو کرتا ہوں ، اس کے بارے میں مجھ سے سوال نہیں کیا جا سکتا ہے اور لوگوں سے ( ان کے اعمال کے بارے میں ) سوال کیا جائے گا ۔ “ سیدنا عزیر علیہ السلام نے یہ بات نہیں مانی ، انہوں نے پھر یہی سوال کیا ، تو اللہ تعالیٰ نے فرمایا : کیا تم یہ استطاعت رکھتے ہو کہ تم دھوپ کی تپش میں شدت پیدا کر سکو ؟ انہوں نے عرض کی : جی نہیں ! اللہ تعالیٰ نے فرمایا : کیا تم یہ استطاعت رکھتے ہو ؟ کہ تم ہوا بنا سکو ، انہوں نے عرض کی : جی نہیں ! اللہ تعالیٰ نے فرمایا : کیا تم یہ استطاعت رکھتے ہو کہ نور کا ایک مثقال لے آؤ ؟ انہوں نے عرض کی : جی نہیں ! اللہ تعالیٰ نے فرمایا : اسی طرح تم اس چیز پر بھی قدرت نہیں رکھتے ، جس کے بارے میں تم نے پوچھا: ہے ، میں جو کرتا ہوں ، اُس کے بارے میں مجھ سے نہیں پوچھا: جا سکتا اور لوگوں سے حساب لیا جائے گا ، البتہ یہ ہے کہ میں تمہیں یہ سزا دیتا ہوں کہ تمہارا نام انبیاء میں سے ( ان کا ذکر ہونے کے حوالے سے ) مٹا دیتا ہوں ، تو تمہارا ان کے درمیان ذکر نہیں کیا جائے گا ، تو اللہ تعالیٰ نے اُن کا نام انبیاء میں سے مٹا دیا ، انبیاء کے درمیان ان کا ذکر نہیں کیا جاتا ، حالانکہ وہ نبی ہیں ۔ جب اللہ تعالیٰ نے سیدنا عیسیٰ علیہ السلام کو مبعوث کیا اور انہوں نے پروردگار کی بارگاہ میں اپنی قدر و منزلت کو دیکھا اور اللہ تعالیٰ نے انہیں کتاب اور حکمت اور تورات اور انجیل کا علم عطا کیا اور وہ پیدائشی نابینا اور برص کے مریض کو ٹھیک کر دیتے تھے اور مردے کو زندہ کر دیتے تھے اور لوگوں کو اس چیز کے بارے میں اطلاع دیدیتے تھے ، جو وہ لوگ کھاتے تھے اور جو وہ لوگ اپنے گھروں میں سنبھال کے رکھتے تھے ( یہ سب کچھ دیکھنے کے بعد ) انہوں نے عرض کی : ” اے اللہ ! بے شک تو عظمت والا ہے ، پروردگار ہے ، اگر تو چاہے کہ تیری اطاعت کی جائے ، تو تیری اطاعت ہی کی جائے اور اگر تو یہ چاہے کہ تیری نافرمانی نہ کی جائے ، تو تیری نافرمانی نہ کی جائے اور تو یہ پسند کرتا ہے کہ تیری اطاعت کی جائے ، اور اس کے باوجود تیری نافرمانی بھی کی جاتی ہے ، تو اے پروردگار ! اس کی وجہ کیا ہے ؟ “ ۔ اللہ تعالیٰ نے اُن کی طرف یہ وحی کی : ” میں جو کرتا ہوں ، اُس کے بارے میں مجھ سے سوال نہیں کیا جا سکتا ، اور لوگوں سے حساب لیا جائے گا ، تم میرے بندے ، میرے رسول ہو اور میرا کلمہ ہو ، میں نے تمہیں مریم کی طرف القاء کیا تھا ، تم میری طرف سے آنے والی روح ہو ، میں نے تمہیں مٹی سے پیدا کیا ، پھر تم سے یہ فرمایا : تم ہو جاؤ ! تو تم ہو گئے اگر تم اس سے باز نہ آئے تو میں تمہارے ساتھ بھی وہی کروں گا ، جو تم سے پہلے تمہارے ایک ساتھی کے ساتھ کیا تھا ، میں جو کرتا ہوں ، اُس کے بارے میں مجھ سے حساب نہیں لیا جائے گا اور لوگوں سے حساب لیا جائے گا ۔ “ تو سیدنا عیسیٰ علیہ السلام نے اپنے پیروکار لوگوں کو جمع کیا اور فرمایا : ” تقدیر ، اللہ تعالیٰ کا ” ستر“ ہے ، تو تم اس کے درپے نہ ہو ۔ “
یہ روایت امام طبرانی نے نقل کی ہے ، اس کی سند میں ایک راوی ابویحیی قتات ہے اور وہ جمہور کے نزیک ضعیف ہے ، ایک روایت کے مطابق یحیی بن معین نے اسے ثقہ قرار دیا ہے اور دوسری کے مطابق انہوں نے اسے ضعیف قرار دیا ہے ، اور ایک راوی مصعب بن سوار ہے اور میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

سعید بن جبیر بیان کرتے ہیں : بنی اسرائیل نے کہا: اے سیدنا موسیٰ علیہ السلام ! آپ کے پروردگار نے ایک مخلوق کو پیدا کیا ، پھر وہ انہیں عذاب دے گا ، تو اللہ تعالیٰ نے اُن کی طرف یہ وحی کی : تم کوئی چیز بو دو ! انہوں نے وہ چیز بو دی ، اللہ تعالیٰ نے فرمایا : اب اس کو کاٹو انہوں نے اسے کاٹ دیا ، اللہ تعالیٰ نے فرمایا : اب اس کو چھان لو ! انہوں نے اسے چھان لیا ، پھر صرف بھوسہ باقی رہ گیا ، تو اللہ تعالیٰ نے فرمایا : یہ کس کام آ سکتا ہے ؟ انہوں نے عرض کی : آگ جلانے کے ، اللہ تعالیٰ نے فرمایا : اسی طرح میں بھی اپنی مخلوق میں سے صرف اس شخص کو عذاب دوں گا ، جسے میں آگ کا اہل بناؤں گا ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

وہب بن منبہ بیان کرتے ہیں : میں سیدنا عبداللہ بن عباس رضی اللہ عنہما کی بینائی رخصت ہونے سے پہلے اور بینائی رخصت ہو جانے کے بعد بھی ، اُن کے ساتھ رہا ہوں ، ان سے تقدیر کے بارے میں دریافت کیا گیا ، تو انہوں نے فرمایا : میں نے یہ چیز پائی ہے کہ اس کے بارے میں سب سے درست بات وہ شخص کرتا ہے ، جو اس سے سب سے زیادہ ناواقف ہو ، اور اس کے بارے میں سب سے زیادہ ضعیف بات وہ کرتا ہے ، جو اس کے بارے میں سب سے زیادہ علم رکھتا ہو ، اور میں نے یہ بات بھی پائی ہے کہ اس کے بارے میں غور و فکر کرنے والے شخص کی مثال ، سورج کی شعاع کی طرف دیکھنے والے کی مانند ہے ، وہ جتنا زیادہ دیکھتا ہے ، اُس کے بارے میں اُس کی بینائی کی حیرت میں اتنا ہی اضافہ ہوتا جاتا ہے ۔
یہ روایت امام طبرانی نے نقل کی ہے ، اس کی سند میں ایک راوی یزید بن ابوسلمہ ہے ، جسے یحیی بن معین نے ضعیف قرار دیا ہے ۔