مجمع الزوائد ومنبع الفوائد

سیدنا ابودرداء رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” ہر چیز کی ایک حقیقت ہوتی ہے اور بندہ ایمان کی حقیقت تک اس وقت تک نہیں پہنچ سکتا ، جب تک وہ یہ بات نہ جان لے کہ جو چیز اسے ملنی ہے ، وہ اسے ملے بغیر نہیں رہے گی ، اور جو چیز اُسے نہیں ملتی ہے ، وہ اُسے نہیں ملے گی“ ۔
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ، اسے امام طبرانی نے معجم اوسط میں نقل کیا ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آدمی اُس وقت تک مومن نہیں ہوتا ، جب تک وہ تقدیر پر ایمان نہیں رکھتا ، خواہ وہ اچھی ہو یا بری ہو ۔ “
یہ روایت امام أحمد نے نقل کی ہے اور اس کے رجال ثقہ ہیں ،
یہ روایت امام طبرانی نے معجم اوسط میں نقل کی ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمام امور ، خواہ وہ اچھے ہوں یا برے ہوں ، اللہ تعالیٰ کی طرف سے ہوتے ہیں ۔ “ آپ صلی اللہ علیہ وسلم نے یہ بھی ارشاد فرمایا ہے : ” تقدیر ، توحید کا نظام ہے ، جو شخص اللہ تعالیٰ کی وحدانیت کا قائل ہو اور تقدیر پر ایمان رکھتا ہو ، اُس نے مضبوط رسّی کو مضبوطی سے تھام لیا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہانی بن متوکل ہے اور وہ ضعیف ہے ۔

عمرو بن شعیب بیان کرتے ہیں : میں سعید بن مسیب کے پاس بیٹھا ہوا تھا ، انہوں نے ایک شخص کو سنا ، جو یہ کہہ رہا تھا کہ اللہ تعالیٰ نے اعمال کے علاوہ ہر چیز تقدیر میں طے کر دی ہے ، راوی کہتے ہیں : اللہ کی قسم ! میں نے سعید بن مسیب کو اس سے زیادہ شدید غصے میں کبھی نہیں دیکھا ، یہاں تک کہ انہوں نے یہ ارادہ کیا کہ وہ اُٹھ کر ( اس شخص کی پٹائی کریں ) پھر ان کا غصہ ذرا کم ہوا ، تو انہوں نے فرمایا : یہ لوگ اس بارے میں کلام کر رہے ہیں ، اللہ کی قسم ! میں نے ان لوگوں کے بارے میں ایک حدیث سنی ہوئی ہے جو ان کے برا ہونے کے لئے کافی ہے ، ان کا ستیاناس ہو ! کاش یہ لوگ علم رکھتے ، راوی کہتے ہیں : میں نے کہا: اللہ تعالیٰ آپ پر رحم کرے ، اے ابومحمد ! وہ حدیث کیا ہے ؟ راوی کہتے ہیں : انہوں نے میری طرف دیکھا ، اس دوران ان کا غصہ کچھ کم ہو گیا تھا ، پھر انہوں نے بتایا : سیدنا رافع بن خدیج رضی اللہ عنہ نے مجھے یہ حدیث بیان کی ہے : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت میں ایک قوم ہو گی ، جو اللہ تعالیٰ کا اور قرآن کا انکار کریں گے اور انہیں اس کا شعور بھی نہیں ہو گا ، اور وہ اس طرح کریں گے ، جس طرح یہودیوں اور عیسائیوں نے کفر کیا تھا ۔ “ سیدنا رافع رضی اللہ عنہ بیان کرتے ہیں : میں نے عرض کی : یا رسول اللہ ! اللہ تعالیٰ مجھے آپ پر فدا کر دے ، وہ کیسے ہو گا ؟ نبی اکرم صلی اللہ علیہ وسلم نے فرمایا : وہ کچھ تقدیر کا اقرار کریں گے ، اور تقدیر کے کچھ حصے کا انکار کریں گے ، راوی کہتے ہیں : پھر میں نے دریافت کیا : وہ لوگ کیا کہیں گے ؟ نبی اکرم صلی اللہ علیہ وسلم نے فرمایا : وہ لوگ یہ کہیں گے کہ بھلائی ، اللہ تعالیٰ کی طرف سے ہے اور برائی ، ابلیس کی طرف سے ہے ، اور پھر وہ اس چیز کی نسبت ، اللہ تعالیٰ کی کتاب کی طرف کر دیں گے ، تو وہ ایمان لانے کے بعد اور معرفت رکھنے کے بعد ، قرآن کے منکر ہو جائیں گے ، اور پھر میری امت کو ان لوگوں کی طرف سے دشمنی ، بغض اور لڑائی کا سامنا کرنا پڑے گا ، یہ لوگ اس امت کے زندیق ہوں گے ، ان کے زمانے میں حکمرانوں کا ظلم ہو گا ، کاش ان کے لئے ظلم اور ترجیحی سلوک اور زیادتی ہوئی ، پھر اللہ تعالیٰ ان لوگوں پر طاعون کو بھیجے گا ، جو ان کے زیادہ تر لوگوں کو فنا کر دے گا ، پھر انہیں زمین میں دھنسایا جائے گا ، ان میں سے تھوڑے سے لوگ ہی اس سے نجات پائیں گے ، اس زمانے میں مؤمن کی خوشی کم ہو گی اور پریشانی زیادہ ہو گی ، پھر مسخ کرنے کا عذاب ہو گا ، اللہ تعالیٰ ان کے زیادہ تر لوگوں کو مسخ کر دے گا اور وہ خنزیر اور بندر بن جائیں گے اور اس کے تھوڑے ہی عرصے بعد دجال کا خروج ہو گا ۔ پھر نبی اکرم صلی اللہ علیہ وسلم رونے لگے ، آپ کے رونے کی وجہ سے ہم بھی رونے لگے ، ہم نے عرض کی : آپ کس بات پر رو رہے ہیں ؟ نبی اکرم صلی اللہ علیہ وسلم نے فرمایا : ان لوگوں کے لئے رحمت کی وجہ سے وہ بدنصیب لوگ ہوں گے ، کیونکہ ان میں عبادت گزار بھی ہوں گے ، ان میں تہجد گزار بھی ہوں گے اور اس کے ساتھ یہ پہلے لوگ نہیں ہیں ، جو اس موقف کو اختیار کریں گے اور اس کے بارے میں آستینیں چڑھائیں گے ، بنی اسرائیل کے زیادہ تر لوگ تقدیر کو جھٹلانے کی وجہ سے ہلاکت کا شکار ہوئے تھے ، میں نے عرض کی : یا رسول اللہ ! میں آپ پر فدا ہو جاؤں ، آپ مجھے بتائیے کہ تقدیر پر ایمان کیسے ہونا چاہیے ؟ نبی اکرم صلی اللہ علیہ وسلم نے ارشاد فرمایا : ” تم اللہ تعالیٰ کی وحدانیت پر ایمان رکھو اور اس بات پر ایمان رکھو کہ اس کے علاوہ اور کوئی بھی ، کسی قسم کا نقصان کرنے یا نفع پہنچانے کا مالک نہیں ہے ، اور تم جنت اور جہنم پر ایمان رکھو اور تم یہ بات جان لو ! کہ مخلوق کو پیدا کرنے سے پہلے اللہ تعالیٰ نے ان دونوں ( یعنی جنت اور جہنم ) کو پیدا کر دیا تھا ، پھر اس نے اپنی مخلوق ( یعنی بنی نوع انسان ) کو پیدا کیا اور اُن میں سے جس کو چاہا اسے جنت کے لئے بنا دیا اور ان میں سے جس کو چاہا اسے جہنم کے لئے بنا دیا ، اور یہ چیز اللہ تعالیٰ کی طرف سے عدل کے طور پر ہے اور ہر ایک اُس کے مطابق عمل کرے گا ، جس حوالے سے اس کی طرف سے فارغ ہوا جا چکا ہے ، اور ہر ایک شخص اس طرف جائے گا ، جس کے حوالے سے فارغ ہوا جا چکا ہے “ تو میں نے کہا: اللہ تعالیٰ اور اُس کے رسول صلی اللہ علیہ وسلم نے سچ فرمایا ہے ۔
یہ روایت امام طبرانی نے مختلف اسانید کے ساتھ نقل کی ہے ، جن میں سے سب سے بہتر سند میں ایک راوی ابن لہیعہ ہے اور وہ حدیث میں کمزور ہے ۔

ولید بن عبادہ بیان کرتے ہیں جب سیدنا عبادہ رضی اللہ عنہ کا آخری وقت قریب آیا تو ان کے صاحبزادے عبدالرحمن نے ان سے گزارش کی : ابا جان ! آپ ہمیں کوئی نصیحت کیجئے ، انہوں نے فرمایا : تم لوگ مجھے بٹھاؤ ! لوگوں نے انہیں بٹھایا ، تو انہوں نے فرمایا : اے میرے بیٹو ! تم اللہ سے ڈرتے رہنا اور تم اللہ تعالیٰ سے اس وقت تک نہیں ڈرو گے ، جب تک تم اللہ تعالیٰ پر ایمان نہیں رکھتے اور تم اللہ تعالیٰ پر اس وقت تک ایمان نہیں رکھو گے ، جب تک تم اچھی اور بری ، ہر قسم کی تقدیر پر ایمان نہیں رکھتے ، اور یہ نہیں جان لیتے کہ جو چیز تمہیں ملنی ہے ، وہ تمہیں ملے بغیر نہیں رہے گی اور جو چیز تمہیں نہیں ملنی ہے ، وہ تمہیں نہیں ملے گی ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تقدیر پر ایمان ، اس کے مطابق ہوتا ہے ، جو شخص اس کے علاوہ پر مرے گا ، وہ جہنم میں جائے گا ۔ “

ایک روایت میں یہ الفاظ ہیں : ” وہ ایمان کا ذائقہ نہیں چکھے گا ، تم اللہ تعالیٰ کے بارے میں علم کی حقیقت تک ، اُس وقت تک نہیں پہنچ سکتے ، جب تک تم تقدیر پر ایمان نہیں رکھتے ۔ “
( علامہ ہیثمی فرماتے ہیں ) میں یہ کہتا ہوں
یہ روایت امام ترمذی نے ” موقوف “ روایت کے طور پر اور مختصر روایت کے طور پر نقل کی ہے ۔
یہ روایت امام طبرانی نے معجم کبیر میں مختلف اسانید کے ساتھ نقل کی ہے اور معجم اوسط میں بھی نقل کی ہے ، ان دونوں میں سے ایک کی سند میں ایک راوی عثمان بن ابوعاتکہ ہے اور وہ ضعیف ہے ، دحیم نے اسے ثقہ قرار دیا ہے اس روایت کے بقیہ رجال ثقہ ہیں ، اس کے بعض راویوں کے بارے میں کلام کیا گیا ہے ۔

ابواسود دؤلی کے بارے میں یہ بات منقول ہے : انہوں نے سیدنا عمران بن حصین رضی اللہ عنہ اور سیدنا عبداللہ بن مسعود رضی اللہ عنہ اور سیدنا ابی بن کعب رضی اللہ عنہ سے تقدیر کے بارے میں سوال کیا اور بولے : میں قدریہ فرقے کے لوگوں کے ساتھ بحث کرتا رہا ، یہاں تک کہ ان لوگوں نے مجھے نکال دیا ، تو کیا آپ لوگوں کے پاس اس حوالے سے کوئی علم ہے ؟ اگر ہے تو آپ مجھے بیان کریں ! ان حضرات نے یہ فرمایا : ” اگر اللہ تعالیٰ تمام آسمان والوں اور زمین کو والوں عذاب دے ، تو وہ انہیں عذاب دیتے ہوئے ظلم کرنے والا نہیں ہو گا اور اگر وہ اُن سب کو اپنی رحمت میں داخل کر لے ، تو اُس کی رحمت ان لوگوں کے گناہوں کے مقابلے میں زیادہ وسعت والی ہے ، لیکن صورت حال اسی طرح ہے ، جس طرح اس نے فیصلہ کیا ہے کہ وہ جسے چاہے گا ، اسے عذاب دے گا اور جس پر چاہے گا ، اس پر رحم کرے گا ، تو جسے وہ عذاب دے گا ، تو یہ بھی حق کے مطابق ہو گا ، اور جس پر وہ رحم کرے گا ، تو یہ بھی حق کے مطابق ہو گا ، اگر تمہارے پاس اُحد پہاڑ جتنا سونا ہو ، اور اُسے تم اللہ تعالیٰ کی راہ میں خرچ کرو ، تو یہ تمہاری طرف سے اُس وقت تک قبول نہیں ہو گا ، جب تک تم اچھی اور بری ، ہر قسم کی تقدیر پر ایمان نہیں رکھتے ۔ “ پھر سیدنا عمران بن حصین رضی اللہ عنہ نے ابواسود دؤلی کو یہ حدیث بیان کرنے کے بعد فرمایا : میں نے یہ بات نبی اکرم صلی اللہ علیہ وسلم کی زبانی سنی ہے ، اور میرے ساتھ یہ بات سیدنا عبداللہ بن مسعود رضی اللہ عنہ اور سیدنا ابی بن کعب رضی اللہ عنہ نے بھی سنی ہے ، ابواسود نے اُن دونوں صاحبان سے یہ سوال کیا ، تو ان دونوں حضرات نے بھی نبی اکرم صلی اللہ علیہ وسلم کے حوالے سے یہ حدیث انہیں بیان کی ۔
یہ روایت امام طبرانی نے دو اسناد کے ساتھ نقل کی ہے اور اس طریق کے رجال ثقہ ہیں ۔

سیدنا معاویہ بن ابوسفیان رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” تم کسی چیز کے حوالے سے یوں جلدی نہ کرو کہ تم یوں سمجھتے ہو کہ اگر تم نے اس کے بارے میں جلدی کر لی ، تو تم اس تک پہنچ جاؤ گے ، اگر اللہ تعالیٰ نے وہ تمہارے نصیب میں نہ لکھی ہو اور تم کسی چیز کے حوالے سے اس وجہ سے تاخیر نہ کرو کہ تم یہ سمجھو کہ اگر تم نے تاخیر کی ، تو وہ تم سے پرے ہو جائے گی ، اگر اللہ تعالیٰ نے اُسے تمہارے بارے میں ، تقدیر میں طے کر دیا ہو ۔ “
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبدالوہاب بن مجاہد ہے اور وہ ضعیف ہے ۔

حارث بیان کرتے ہیں : میں نے سیدنا عبداللہ بن مسعود رضی اللہ عنہ کو دیکھا کہ انہوں نے اپنے منہ میں انگلی ڈال کر اسے تر کیا اور پھر ارشاد فرمایا : اللہ کی قسم ! انسان ، ایمان کا ذائقہ اس وقت تک نہیں پا سکتا ، جب تک وہ تقدیر پر ایمان نہیں رکھتا اور یہ بات جان نہیں لیتا کہ ایک دن وہ مر جائے گا اور پھر مرنے کے بعد اُسے دوبارہ زندہ کیا جائے گا ۔
یہ روایت امام طبرانی نے نقل کی ہے ، حارث نامی راوی ضعیف ہے ، جسے یحیی بن معین اور دیگر حضرات نے ثقہ قرار دیا ہے ، اس کی دو اسناد میں سے ایک کے رجال صحیح کے رجال ہیں ۔

ابوحجاج ازدی بیان کرتے ہیں : میں نے اصبہان میں سیدنا سلمان فارسی رضی اللہ عنہ کو یہ فرماتے ہوئے سنا : ” بندہ اُس وقت تک مومن نہیں ہوتا ، جب تک وہ یہ بات نہیں جان لیتا کہ جو چیز اسے ملنی ہے وہ اسے ملے بغیر نہیں رہے گی ، اور جو چیز اسے نہیں ملنی ہے ، وہ اسے نہیں ملے گی ۔ “
یہ روایت امام طبرانی نے نقل کی ہے اور ابوحجاج نامی راوی سے میں واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عمرو بن العاص رضی اللہ عنہ بیان کرتے ہیں : نبی اکرم صلی اللہ علیہ وسلم تشریف لائے اور لوگوں کے پاس ٹھہر گئے آپ صلی اللہ علیہ وسلم نے ارشاد فرمایا : ” تم سے پہلے کے لوگ اپنے انبیاء سے ( غیر ضروری ) سوالات کرنے کی وجہ سے اور اُن سے اختلاف کرنے کی وجہ سے ہلاکت کا شکار ہوئے تھے ، اور کوئی شخص اس وقت تک مومن نہیں ہو سکتا ، جب تک وہ اچھی اور بری ( ہر قسم کی ) تقدیر پر ایمان نہیں رکھتا ۔ “
یہ روایت امام طبرانی نے اور امام ابویعلیٰ نے نقل کی ہے اور اس کے رجال ثقہ ہیں ۔

عامر شعبی بیان کرتے ہیں : سیدنا عدی بن حاتم رضی اللہ عنہ کوفہ تشریف لائے ، علمائے کوفہ سے تعلق رکھنے والے کچھ افراد کے ہمراہ ، میں اُن کی خدمت میں حاضر ہوا ، میں ان دنوں نوجوان تھا ، ہم نے گزارش کی کہ آپ ہمیں کوئی ایسی حدیث بیان کیجئے ، جو آپ نے نبی اکرم صلی اللہ علیہ وسلم کی زبانی سنی ہو ، انہوں نے فرمایا : ٹھیک ہے ، میں اسلام قبول کرنے کے لئے نبی اکرم صلی اللہ علیہ وسلم کی خدمت میں حاضر ہوا ، تو نبی اکرم صلی اللہ علیہ وسلم نے ارشاد فرمایا : اے عدی بن حاتم ! تم اسلام قبول کر لو ، تم سلامت رہو گے ، میں نے عرض کی : اسلام سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : ” یہ کہ تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے اور تم اس بات کی گواہی دو کہ میں اللہ کا رسول ہوں اور تم ہر قسم کی تقدیر پر ایمان رکھو ، خواہ وہ اچھی ہو یا بری ہو ، میٹھی ہو یا کڑوی ہو ۔ “
یہ روایت امام طبرانی نے نقل کی ہے اس کی سند میں ایک راوی عبدالاعلیٰ بن ابومساور ہے اور وہ متروک ہے ۔ ( علامہ ہیثمی فرماتے ہیں : ) میں یہ کہتا ہوں اس نوعیت کی کچھ احادیث اس باب میں آئیں گی ، جس میں یہ مذکور ہے کہ ہر چیز تقدیر کے مطابق ہے ۔