مجمع الزوائد ومنبع الفوائد

سیدنا عبداللہ بن جعفر رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں سواری پر اپنے پیچھے بٹھایا اور فرمایا : ” اے نوجوان ! کیا میں تمہیں ایک چیز نہ دوں ؟ کیا میں تمہیں ایسے کلمات کی تعلیم نہ دوں ؟ جن کے ذریعے اللہ تعالیٰ تمہیں نفع عطا کرے گا ، تم اللہ تعالیٰ کی حفاظت کرو ، وہ تمہاری حفاظت کرے گا ، تم اللہ کی طرف توجہ رکھو ، تم اس کو اپنے پاس پاؤ گے ، جب تم مانگو تو اللہ تعالیٰ سے مانگو ، جب تم مدد مانگو ، تو اللہ تعالیٰ سے مدد مانگو ، اور تم یہ بات جان لو کہ جو ہونا ہے ، اُس کے حوالے سے قلم خشک ہو چکا ہے ، اور تم یہ بات جان لو کہ اگر ساری مخلوق کسی حوالے سے تمہارے بارے میں کوئی ارادہ کرے ، جو چیز تمہارے خلاف نوٹ نہ کی گئی ہو ، تو وہ تم پر قدرت نہیں حاصل کر پائیں گے ، اور تم یہ بات جان لو ! کہ صبر کے ساتھ مدد ملتی ہے اور پریشانی کے ساتھ کشادگی نصیب ہوتی ہے اور تنگی کے ساتھ آسانی ہوتی ہے ۔ “
یہ روایت امام طبرانی نے نقل کی ہے ، اس کی سند میں ایک راوی علی بن ابوعلی قرشی ہے اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ نے سب سے پہلے جو چیز پیدا کی ، وہ قلم ہے ، تو اللہ تعالیٰ نے اُسے یہ حکم دیا کہ وہ نوٹ کر لے ۔ “
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب اللہ تعالیٰ نے قلم کو پیدا کیا تو اُس سے فرمایا : تم لکھو ! تو قیامت قائم ہونے تک جو کچھ ہونا تھا ، اُس نے وہ لکھ دیا ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔ اس سے پہلے سورت ” ن“ کی تفسیر میں اس نوعیت کی ایک حدیث گزر چکی ہے اور ایک حدیث آگے چل کر ، نیکی اور صلہ رحمی سے متعلق باب میں آئے گی ، اگر اللہ نے چاہا ۔

حبان بن عبیداللہ بن زہیر ابوزہیر بصری بیان کرتے ہیں : میں نے ضحاک بن مزاحم سے ، اللہ تعالیٰ کے اس فرمان کے بارے میں دریافت کیا : ” زمین میں ، یا تمہارے وجودوں میں ، جو بھی مصیبت لاحق ہوتی ہے ، تو وہ پہلے سے اس کتاب ( یعنی لوح محفوظ ) میں طے شدہ ہے ( اس سے پہلے کہ ) ہم اس کو ( عملی طور پر ) پیدا کریں ، بے شک یہ اللہ تعالیٰ کے لئے آسان ہے ۔ “ اور اللہ تعالیٰ کے اس فرمان کے بارے میں دریافت کیا : ” تم لوگ جو عمل کرتے تھے ، ہم اُسے نقل کر رہے تھے ۔ “ اور اس فرمان کے بارے میں دریافت کیا : ” بے شک ہم نے ہر چیز کو تقدیر کے مطابق پیدا کیا ہے ۔ “ تو ضحاک نے جواب دیا : سیدنا عبداللہ بن عباس رضی اللہ عنہما نے یہ بات بیان کی ہے : اللہ تعالیٰ نے عرش کو پیدا کیا ، پھر اس پر استواء کیا ، پھر اُس نے قلم کو پیدا کیا اور اُسے یہ حکم دیا کہ وہ اس کے علم کے تحت جاری ہو ، تو قلم اتنا بڑا ہے ، جتنا آسمان اور زمین کے درمیان فاصلہ ہے ، اس نے دریافت کیا : اے پروردگار ! کس چیز کے لئے جاری ہو جاؤں ؟ تو پروردگار نے فرمایا : اس چیز کے حوالے سے کہ میں خالق ہوں اور میں نے اپنی مخلوق میں جو کچھ کرنا ہے ، خواہ اس کا تعلق بارش سے ہو ، یا نباتات سے ہو ، یا جانوں سے ہو یا اعمال سے ہو ، یا رزق سے ہو ، یا موت سے ہو ، تو قیامت تک جو کچھ ہونے والا ہے ، قلم اُس کے لئے جاری ہو گیا ، اللہ تعالیٰ نے عرش کے نیچے اپنے پاس موجود ایک پوشیدہ تحریر میں اُسے برقرار رکھا ۔ جہاں تک اللہ تعالیٰ کے اس فرمان کا تعلق ہے : تم لوگ جو عمل کرتے تھے ہم اسے نقل کر رہے تھے ۔ “ تو اللہ تعالیٰ نے کچھ فرشتے مقرر کیے ہیں ، جو اس کتاب میں سے ہر سال رمضان کے مہینے میں شب قدر میں نقل کرتے ہیں ، جو کچھ بھی زمین پر ہونا ہے ، اس وقت سے لے کر اگلے سال کے اُسی وقت تک جو کچھ ہونا ہے ، اس کو نوٹ کرتے ہیں اور پھر وہ اس کے ذریعے بندوں پر مقرر ، اللہ تعالیٰ کے محافظ فرشتوں کو ہر جمعرات کی شام ملتے ہیں ، تو وہ یہ پاتے ہیں کہ محافظ فرشتوں نے جو کچھ اوپر لے جانا ہے ، وہ اس چیز کے مطابق ہے ، جو ان کے پاس موجود تحریر میں ہے ، اس میں کوئی کمی یا کوئی اضافہ نہیں ہوتا ۔ جہاں تک اللہ تعالیٰ کے اس فرمان کا تعلق ہے : ” بے شک ہم نے ہر چیز کو تقدیر کے مطابق پیدا کیا ہے ۔ “ تو بے شک اللہ تعالیٰ نے ہر چیز کو پیدا کیا ہے ، مخلوق میں کوئی بھی چیز اس کی ہم شکل نہیں ہے اور پھر اس ( چیز ) کے لئے جو رزق مناسب تھا ، اُس کو طے کیا ہے ، اس نے اونٹ کو اس طرح سے پیدا کیا ہے کہ اس کی مخلوق میں سے دوسرے جانوروں میں سے وہ چیز نہیں ہے ، اسی طرح جس بھی چیز کو اس نے پیدا کیا ہے ، اس کی یہی صورت حال ہے ، اس نے خشکی کے جانور اور پرندوں کے لئے مخصوص رزق مقرر کیا ہے ، جو خشکی کے حساب سے ان کے لئے مناسب ہے ، اس نے سمندر کے جانوروں اور پرندوں کے لئے ان کے لئے سمندر میں ، جو چیز بہتر ہے ، وہ چیز پیدا کی ہے ، تو اللہ تعالیٰ کے اس فرمان سے یہی مراد ہے : ” بے شک ہم نے ہر چیز کو تقدیر کے مطابق پیدا کیا ہے ۔ “
یہ روایت امام طبرانی نے نقل کی ہے ، اس کی سند میں ایک راوی ضحاک ہے ، جسے ایک جماعت نے ضعیف قرار دیا ہے اور ابن حبان نے اسے ثقہ کہا: ہے ، وہ فرماتے ہیں : اس نے سیدنا عبداللہ بن عباس رضی اللہ عنہما سے سماع نہیں کیا ہے ، اس روایت کے بقیہ رجال کی توثیق کی گئی ہے ۔

سیدنا عبداللہ بن عباس رضی اللہ عنہما نے فرمایا : میری یہ خواہش تھی کہ اگر قدریہ فرقے کا کوئی شخص میرے پاس ہوتا ، تو میں اُس کے سر کو تکلیف پہنچاتا ( یعنی اس کی پٹائی کرتا ) لوگوں نے دریافت کیا : وہ کیوں ؟ انہوں نے فرمایا : اس لئے کہ اللہ تعالیٰ نے سفید موتی سے لوح محفوظ کو پیدا کیا ہے ، جس کے دونوں کنارے سرخ یاقوت کے ہیں ، اس کا قلم نور ہے اور اس کی کتاب نور ہے اور وہ اتنا بڑا ہے ، جتنا آسمان اور زمین کے درمیان فاصلہ ہے ، پروردگار روزانہ تین سو ساٹھ مرتبہ اس کی طرف نظر کرتا ہے اور ہر نظر میں کوئی چیز تخلیق کرتا ہے ، کسی کو زندگی دیتا ہے کسی کو موت دیتا ہے کسی کو عزت دیتا ہے کسی کو ذلت دیتا ہے ، اور جو وہ چاہتا ہے ، وہ کرتا ہے ۔
یہ روایت امام طبرانی نے دو حوالوں سے نقل کی ہے اور اس روایت کے رجال ثقہ ہیں ۔

سیدنا مرثد رضی اللہ عنہ ، جو نبی اکرم صلی اللہ علیہ وسلم کے اصحاب میں سے ایک ہیں ، وہ فرماتے ہیں : اللہ تعالیٰ نے اپنی تحریر میں دو قسم کی لکیریں لگائیں پھر اس نے قلم اٹھا لیا ، ان دونوں میں سے ایک میں اس نے مخلوق کو تحریر کیا اور دوسری سطر میں وہ تحریر کیا جو مخلوق نے عمل کرنے ہیں ۔
یہ روایت امام طبرانی نے نقل کی ہے ، اس کی سند میں ایک راوی حسین بن یحیی خشنی ہے ، جسے دحیم اور دیگر حضرات نے ثقہ قرار دیا ہے اور جمہور نے اسے ضعیف کہا: ہے ۔

سیدنا امام حسن بن علی رضی اللہ عنہما فرماتے ہیں : کتاب کو اٹھا لیا گیا ہے اور قلم خشک ہو چکا ہے اور تقدیر کے فیصلے سے متعلق امور کتاب میں موجود ہیں ، جو پہلے سے طے ہو چکے ہیں ۔
یہ روایت امام طبرانی نے نقل کی ہے ، اس کی سند میں ایک راوی لیث بن ابوسلیم ہے اور وہ حدیث میں کمزور ہے ، اس روایت کے بقیہ رجال ثقہ ہیں ۔