مجمع الزوائد ومنبع الفوائد

سیدنا ابوقتادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے ( مجھے خواب میں ) دیکھا ، اُس نے درحقیقت مجھے ہی دیکھا “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابومالک اشجعی ، رضی اللہ عنہ اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے مجھے خواب میں دیکھا ، اُس نے مجھے ہی دیکھا “ ۔
یہ روایت امام أحمد ، امام بزار اور امام طبرانی نے نقل کی ہے اور اس کے رجال صحیح کے رجال ہیں ۔

سیدنا ابوقتادہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” نیک خواب ، اللہ تعالیٰ کی طرف سے ہوتے ہیں ، اور برے خواب ، شیطان کی طرف سے ہوتے ہیں ، جو شخص ( خواب میں ) کوئی ایسی چیز دیکھے ، جو اسے ناگوار گزرے ، تو اسے اپنے بائیں تین مرتبہ تھوک دینا چاہیے ، اور شیطان سے ، اللہ کی پناہ مانگ لینی چاہیے ، تو وہ خواب اسے نقصان نہیں پہنچائے گا اور شیطان میری شکل اختیار نہیں کر سکتا ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے مجھے خواب میں دیکھا ، اُس نے مجھے ہی دیکھا ، کیونکہ شیطان ، میری ، یا کعبہ کی شکل اختیار نہیں کر سکتا “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی محمد بن ابوسری ہے ، جسے یحییٰ بن معین اور دیگر حضرات نے ثقہ قرار دیا ہے ، اس میں کمزوری پائی جاتی ہے اس روایت کے بقیہ رجال صحیح کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے مجھے خواب میں دیکھا ، گویا اُس نے مجھے بیداری میں دیکھا ( یعنی درحقیقت اُس نے مجھے ہی دیکھا ) اور شیطان میری شکل اختیار نہیں کر سکتا ہے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اور ان کی روایت کے الفاظ یہ ہیں : ” جس نے مجھے خواب میں دیکھا ، تو گویا اُس نے مجھے بیداری میں دیکھا اور جس نے مجھے دیکھا ، اُس نے حق کو دیکھا کیونکہ شیطان میری شکل و صورت اختیار نہیں کر سکتا ہے “ ۔ اس روایت کے رجال ثقہ ہیں ۔

سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس نے مجھے خواب میں دیکھا ، تحقیق اُس نے مجھے بیداری میں دیکھا ( یعنی اُس نے درحقیقت مجھے ہی دیکھا ) ۔ ۔ ۔ ۔ ۔ ۔ “ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ، اس کی سند میں ایک راوی حکم بن ظہیر ہے اور وہ ضعیف ہے ۔

سیدنا مالک بن عبدالله خثعمی رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ۔ ۔ ۔ ۔ ۔ ۔ ۔ اس کے بعد راوی نے سیدنا ابوقتادہ رضی اللہ عنہ کی نقل کردہ حدیث کی مانند روایت نقل کی ہے : نبی اکرم صلی اللہ علیہ وسلم نے ارشاد فرمایا : ” جس نے مجھے خواب میں دیکھا ، وہ عنقریب مجھے بیداری میں دیکھ لے گا ، اور شیطان میری شکل و صورت اختیار نہیں کر سکتا ہے “ ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن مسعود رضی اللہ عنہ فرماتے ہیں : جو شخص اللہ تعالیٰ کے رسول صلی اللہ علیہ وسلم کو ( خواب میں ) دیکھتا ہے تو یہ محض اس کا خیال نہیں ہوتا ( بلکہ اس نے واقعی اللہ تعالیٰ کے رسول صلی اللہ علیہ وسلم کو دیکھا ہوتا ہے ) ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا خزیمہ بن ثابت رضی اللہ عنہ بیان کرتے ہیں : میں نے خواب میں دیکھا کہ میں نبی اکرم صلی اللہ علیہ وسلم کی پیشانی پر سجدہ کر رہا ہوں ، میں نے نبی اکرم صلی اللہ علیہ وسلم کو اس بارے میں بتایا ، تو نبی اکرم صلی اللہ علیہ وسلم نے ارشاد فرمایا : ” ( خواب میں ) ایک روح ، دوسری روح سے ملتی ہے “ پھر نبی اکرم صلی اللہ علیہ وسلم نے اپنا سر مبارک جھکایا ، تو سیدنا خزیمہ رضی اللہ عنہ نے اپنی پیشانی ، نبی اکرم صلی اللہ علیہ وسلم کی پیشانی پر رکھی ۔
یہ روایت امام أحمد نے مختلف اسانید کے ساتھ نقل کی ہے ، جن میں سے ایک یہ ہے اور یہ متصل ہے ۔

یہ روایت امام طبرانی نے نقل کی ہے ، تاہم اس میں ان کے یہ الفاظ ہیں : نبی اکرم صلی اللہ علیہ وسلم نے ان سے فرمایا : ” تم بیٹھ کر سجدہ کرو اور اس طرح کرو ، جس طرح تم نے ( خواب میں ) دیکھا ہے “ ۔ ان دونوں روایات کے رجال ثقہ ہیں ۔

ابن شہاب نے ، عمارہ بن خزیمہ بن ثابت انصاری کے حوالے سے ، یہ روایت نقل کی ہے : سیدنا خزیمہ رضی اللہ عنہ وہ صحابی ہیں کہ جن کی گواہی کو ، نبی اکرم صلی اللہ علیہ وسلم نے دو آدمیوں کی گواہی کے برابر قرار دیا تھا ، ابن شہاب بیان کرتے ہیں : عمارہ بن خزیمہ نے ، اپنے چچا کے حوالے سے ، یہ بات نقل کی ہے ، وہ نبی اکرم صلی اللہ علیہ وسلم کے صحابی ہیں ، وہ بیان کرتے ہیں : سیدنا خزیمہ بن ثابت رضی اللہ عنہ نے خواب میں یہ دیکھا کہ وہ نبی اکرم صلی اللہ علیہ وسلم کی پیشانی پر سجدہ کر رہے ہیں ، نبی اکرم صلی اللہ علیہ وسلم تشریف لائے تو انہوں نے نبی اکرم صلی اللہ علیہ وسلم کے سامنے یہ بات ذکر کی ، تو نبی اکرم صلی اللہ علیہ وسلم لیٹ گئے اور سیدنا خزیمہ رضی اللہ عنہ نے نبی اکرم صلی اللہ علیہ وسلم کی پیشانی پر سجدہ کیا ۔
یہ روایت امام أحمد نے ، اپنے استاد عامر بن صالح زبیری کے حوالے سے نقل کی ہے ، جسے امام أحمد اور ابوحاتم نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا خزیمہ بن ثابت رضی اللہ عنہ بیان کرتے ہیں : انہوں نے خواب میں یہ دیکھا کہ وہ نبی اکرم صلی اللہ علیہ وسلم کو بوسہ دے رہے ہیں ، انہوں نے نبی اکرم صلی اللہ علیہ وسلم کو اس بارے میں بتایا ، تو نبی اکرم صلی اللہ علیہ وسلم ان کے سامنے کھڑے ہو گئے ، اور انہوں نے نبی اکرم صلی اللہ علیہ وسلم کی پیشانی مبارک پر بوسہ دیا ۔
یہ روایت امام أحمد نے نقل کی ہے ، اس کی سند میں ایک راوی عمارہ بن عثمان ہے ، ابوجعفر خطمی کے علاوہ اور کسی نے ، اس سے روایت نقل نہیں کی ہے ، اس روایت کے بقیہ رجال صحیح کے رجال ہیں ۔

مثنی بن سعید بیان کرتے ہیں : میں نے سیدنا انس رضی اللہ عنہ کو یہ فرماتے ہوئے سنا ہے : ” مجھے اکثر اوقات ، خواب میں اپنے خلیل صلی اللہ علیہ وسلم کی زیارت ہو جاتی ہے “ ۔ راوی کہتے ہیں : جب سیدنا انس رضی اللہ عنہ یہ بات بیان کرتے تھے ، تو اُن کی آنکھوں سے آنسو جاری ہو جاتے تھے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔