مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنی آوازوں کو قرآن کے ذریعے آراستہ کرو “ ۔

ایک روایت میں یہ الفاظ ہیں : ” اپنی آوازوں کو قرآن کے ساتھ عمدہ کرو “ ۔
یہ روایت امام طبرانی نے دو اسناد کے ساتھ نقل کی ہے ، ان میں سے ایک کی سند میں ایک راوی عبداللہ بن خراش ہے ، جسے ابن حبان نے ثقہ قرار دیا ہے ، اور وہ کہتے ہیں : یہ بعض اوقات غلطی کر جاتا ہے ، امام بخاری رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

عبداللہ بن ابونہیک بیان کرتے ہیں : ایک مرتبہ میں اور عبداللہ بن ابوسائب کھڑے ہوئے تھے ، اسی دوران سیدنا ابولبابہ رضی اللہ عنہ ہمارے پاس سے گزرے ، ہم اُن کے پیچھے گئے ، وہ گھر میں داخل ہو گئے ، ہم نے اندر آنے کی اجازت مانگی ، انہوں نے ہمیں اجازت دے دی ، وہاں ایک شخص موجود تھا ، جو ساز و سامان کا مالک تھا اس نے کہا: تم کون ہو ؟ ہم نے ان کے سامنے اپنا اسم منسوب بیان کیا : تو اس نے کہا: ساتھیوں کو خوش آمدید ہے ، پھر میں نے اس کو یہ بیان کرتے ہوئے سنا کہ نبی اکرم صلی اللہ علیہ وسلم نے ارشاد فرمایا ہے : ” وہ شخص ہم میں سے نہیں ہے ، جو قرآن کو اچھی آواز میں نہ پڑھے “ ۔ ابن ابوملیکہ بیان کرتے ہیں : میں نے دریافت کیا : اے ابومحمد ! ایسے شخص کے بارے میں آپ کی کیا رائے ہے ؟ کہ جس کی آواز اچھی نہ ہو ؟ انہوں نے فرمایا : اُس سے جہاں تک ہو سکے ، آواز کو اچھا کرے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قرآن کو اپنی آوازوں کے ذریعے آراستہ کرو “ ۔
یہ روایت امام بزار نے نقل کی ہے ، اس کی سند میں ایک راوی صالح بن موسیٰ ہے اور وہ متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر چیز کا ایک زیور ہوتا ہے اور قرآن کا زیور ، اچھی آواز ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن عمر بجلی ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر چیز کا ایک زیور ہوتا ہے اور قرآن کا زیور اچھی آواز ہے “ ۔
یہ روایت امام بزار نے نقل کی ہے ، اس کی سند میں ایک راوی عبداللہ بن محرز ہے اور وہ متروک ہے ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اچھی آواز ، قرآن کو آراستہ کرنے کا باعث ہے “ ۔
یہ روایت امام بزار نے نقل کی ہے ، اس کی سند میں ایک راوی سعید بن زرق ہے اور وہ ضعیف ہے ۔

علقمہ بیان کرتے ہیں : میں ایک ایسا شخص تھا کہ اللہ تعالیٰ نے قرآن کے لئے مجھے اچھی آواز عطا کی تھی ، سیدنا عبداللہ بن مسعود رضی اللہ عنہ مجھے پیغام بھیج کر بلواتے تھے ، میں ان کے سامنے قرآن مجید کی تلاوت کیا کرتا تھا ، جب میں تلاوت کر کے فارغ ہو جاتا تھا ، تو وہ فرماتے تھے : تم مزید تلاوت کرو ! میرے ماں باپ تم پر قربان ہوں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اچھی آواز ، قرآن مجید کی زینت ہے “ ۔
یہ روایت امام طبرانی نے نقل کی ہے ، اس کی سند میں ایک راوی سعید بن ابوزربی ہے اور وہ ضعیف ہے ۔

سیدنا ابوموسیٰ اشعری رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم اور سیدہ عائشہ صدیقہ رضی اللہ عنہا ، سیدنا ابوموسیٰ اشعری رضی اللہ عنہ کے پاس سے گزرے ، وہ اپنے گھر میں تلاوت کر رہے تھے ، یہ دونوں کھڑے ہو کر اُن کی تلاوت سننے لگے ، پھر یہ دونوں چلے گئے ، اگلے دن صبح سیدنا ابوموسی اشعری رضی اللہ عنہ سے ، نبی اکرم صلی اللہ علیہ وسلم کی ملاقات ہوئی ، تو نبی اکرم صلی اللہ علیہ وسلم نے ارشاد فرمایا : اے ابوموسی ! میں گزشتہ رات تمہارے گھر کے پاس سے گزرا تھا ، میرے ساتھ عائشہ بھی تھی ، تم اپنے گھر میں تلاوت کر رہے تھے ، تو ہم کھڑے ہو کر تمہاری تلاوت سنتے رہے ، سیدنا ابوموسیٰ اشعری رضی اللہ عنہ نے آپ کی خدمت میں عرض کی : یا رسول اللہ ! اگر مجھے یہ پتہ ہوتا ، تو میں اپنی تلاوت کو اور زیادہ بنا سنوار کر تلاوت کرتا ۔
یہ روایت امام ابویعلیٰ نے نقل کی ہے اس کی سند میں ایک راوی خالد بن نافع اشعری ہے اور وہ ضعیف ہے ۔