مجمع الزوائد ومنبع الفوائد

عثمان بن عبداللہ بن اوس ثقفی ، اپنے دادا کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” دیکھے بغیر ، قرآن مجید کی تلاوت کرنا ، ایک ہزار درجات کا باعث ہے ، قرآن مجید کو دیکھ کر اس کی تلاوت کرنا ، اس سے دگنا ہو جاتا ہے اور دو ہزار درجات کا باعث ہے “ ۔
یہ روایت امام طبرانی نے نقل کی ہے اس کی سند میں ایک راوی ابوسعید بن عون ہے ، جسے ایک روایت کے مطابق یحییٰ بن معین نے ثقہ قرار دیا ہے اور دوسری کے مطابق انہوں نے اسے ضعیف قرار دیا ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : اپنی نظر ہمیشہ قرآن مجید پر رکھو ۔
یہ روایت امام طبرانی نے اپنے استاد عبداللہ بن محمد بن سعید بن ابومریم کے حوالے سے نقل کی ہے اور وہ ضعیف ہے ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص زبانی طور پر ، یا قرآن مجید کو دیکھ کر قرآن کی تلاوت کرے گا ، تو اللہ تعالیٰ اسے جنت میں ایک درخت عطا کرے گا کہ اگر کوئی ” بچہ کوا “ اس کی کسی شاخ میں موجود ہو اور پھر وہ اُڑے تو اس کے کسی پتے کو پار کرنے سے پہلے وہ کوا بوڑھا ہو جائے گا “ ۔
یہ روایت امام بزار اور امام طبرانی نے نقل کی ہے ، تاہم انہوں نے یہ الفاظ نقل کیے ہیں : ” اگر کوئی ” بچہ کوا “ ہو اور وہ اس کے پتے کے نیچے ہو اور پھر وہ ” کوا “ بن جائے اور اُڑتا رہے ، تو اس پتے کو پار کرنے سے پہلے اسے بڑھاپا لاحق ہو جائے گا “ ۔ اس روایت کی سند میں ایک راوی محمد بن محمد ہجیمی ہے اور ایک راوی سعید بن سالم قداح ہے ، جس کے بارے میں اختلاف پایا جاتا ہے اس روایت کے بقیہ رجال ثقہ ہیں ۔ امام بزار کی سند ضعیف ہے ۔