مجمع الزوائد ومنبع الفوائد

سیدنا واثلہ بن اسقع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے تورات کی جگہ سات ( سورتیں ) عطا کی گئی ہیں ، زبور کی جگہ دو سو ( آیات والی سورتیں ) عطا کی گئی ہیں اور مجھے انجیل کی جگہ ” مثانی “ عطا کی گئیں اور مفصل کے حوالے سے مجھے فضیلت دی گئی ہے ۔
یہ روایت امام أحمد نے نقل کی ہے اور امام طبرانی نے اس کی مانند نقل کی ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے پروردگار نے مجھے تورات کی جگہ سات طویل ( سورتیں ) عطا کی ہیں اور انجیل کی جگہ دو سو ( آیتوں والی سورتیں ) عطا کی ہیں اور مفصل سورتوں کے حوالے سے مجھے فضیلت دی گئی ہے “ ۔
یہ روایت امام طبرانی نے نقل کی ہے ، اس کی سند میں ایک راوی لیث بن ابوسلیم ہے ، جسے ایک جماعت نے ضعیف قرار دیا ہے اس کی حدیث کو معتبر قرار دیا گیا ہے ، اس روایت کے بقیہ رجال صحیح کے رجال ہیں ۔

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اس قرآن کو ، اگر کسی چمڑے میں ڈالا جائے اور پھر اسے آگ میں ڈال دیا جائے ، تو وہ نہیں جلے گا “ ۔
یہ روایت امام أحمد ، امام ابویعلیٰ اور امام طبرانی نے نقل کی ہے ، اس کی سند میں ایک راوی ابن لہیعہ ہے ، اس میں اختلاف پایا جاتا ہے ، ابویعلیٰ کے بعض راویوں نے اس کی یہ وضاحت کی ہے : اس سے مراد یہ ہے کہ جو شخص قرآن کا علم حاصل کرنے کے بعد بھی جہنم میں داخل ہو ، تو وہ خنریر سے بھی زیادہ برا ہے ۔

سیدنا عصمہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر قرآن کو کسی چمڑے میں رکھا جائے ، تو آگ اُسے نہیں جلائے گی “ ۔
یہ روایت امام طبرانی نے نقل کی ہے ، اس کی سند میں ایک راوی فضل بن مختار ہے اور وہ ضعیف ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر قرآن کسی چمڑے میں ہو ، تو آگ اُسے نہیں چھوئے گی “ ۔
یہ روایت امام طبرانی نے نقل کی ہے اور اس کی سند میں ایک راوی عبدالوہاب بن ضحاک ہے اور وہ متروک ہے ۔

سیدنا انس رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” قرآن ایسی خوشحالی ہے کہ اس کے بعد غربت نہیں ہے اور اس کے علاوہ کوئی خوشحالی نہیں ہے “ ۔
یہ روایت امام ابویعلیٰ نے نقل کی ہے اس کی سند میں ایک راوی یزید بن ابان رقاشی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قرآن کے بعد کوئی غربت نہیں ہے اور اس کے علاوہ کوئی خوشحالی نہیں ہے “ ۔
یہ روایت امام طبرانی نے نقل کی ہے اس کی سند میں ایک راوی یزید رقاشی ہے اور وہ ضعیف ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص قرآن کا علم حاصل کرتا ہے ، تو گویا اس کے دونوں پہلوؤں کے درمیان نبوت ( کے فیوض و برکات ڈال دیے جاتے ہیں ) البتہ یہ ہے کہ اُس کی طرف وحی نہیں کی جاتی اور جو شخص قرآن پڑھتا ہے اور پھر یہ سمجھتا ہے کہ جو نعمت اُسے دی گئی ہے ، کسی اور کے پاس ، اُس سے زیادہ فضیلت والی نعمت ہے ، تو اس نے اس چیز کو عظیم قرار دیا ، جسے اللہ نے چھوٹا قرار دیا ہے ، اور اس چیز کو چھوٹا قرار دیا ہے ، جسے اللہ تعالیٰ نے عظمت والا قرار دیا ہے ، قرآن کے عالم کے لئے یہ مناسب نہیں ہے کہ دوسروں کی طرح بے وقوفی کا مظاہرہ کرے ، یا دوسروں کی طرح غضب کا مظاہرہ کرے ، یا کسی معاملے میں غصے کا اظہار کرے ، بلکہ اسے معاف کر دینا چاہیے اور درگزر سے کام لینا چاہیئے ، ایسا قرآن کی فضیلت کی وجہ سے کرنا چاہیے “ ۔
یہ روایت امام طبرانی نے نقل کی ہے اس کی سند میں ایک راوی اسماعیل بن رافع ہے اور وہ متروک ہے ۔