مجمع الزوائد ومنبع الفوائد

سیدنا حذیفہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قرآن ، سات حروف پر نازل ہوا ہے “ ۔
یہ روایت امام أحمد ، بزار اور طبرانی نے نقل کی ہے ، اس کی سند میں ایک راوی عاصم بن بہدلہ ہے اور وہ ثقہ ہے ، اس کے بارے میں ایسا کلام کیا گیا ہے ، جو نقصان دہ نہیں ہے ۔

امام أحمد کی سند کے ساتھ ، سیدنا حذیفہ رضی اللہ عنہ کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” احجار مراء “ کے مقام پر ، میری ملاقات جبرائیل سے ہوئی ، میں نے کہا: اے جبرائیل ! مجھے ایک ایسی اُمت کی طرف بھیجا گیا ہے ، جو لکھنا پڑھنا نہیں جانتے ، اس میں مرد ہیں ، خواتین ہیں ، بچے ہیں ، بچیاں ہیں ، بڑی عمر کے لوگ ہیں ، جنہوں نے کبھی کوئی تحریر نہیں پڑھی ، تو جبرائیل نے کہا: بے شک قرآن ، سات حروف پر نازل ہوا ہے “ ۔

سیدنا حذیفہ رضی اللہ عنہ ہی کے حوالے سے یہ بات منقول ہے : نبی اکرم صلی اللہ علیہ وسلم کی ملاقات ” احجار مراء “ کے مقام پر ، سیدنا جبرائیل سے ہوئی ، تو نبی اکرم صلی اللہ علیہ وسلم نے ارشاد فرمایا : مجھے ایک ایسی امت کی طرف مبعوث کیا گیا ہے جو لکھنا پڑھنا نہیں جانتے ہیں اور ان لوگوں کی طرف مبعوث کیا گیا جنہوں نے کبھی کوئی تحریر نہیں پڑھی تو سیدنا جبرائیل نے کہا: بے شک اللہ تعالیٰ آپ کو یہ حکم دیتا ہے کہ آپ ایک حرف کے مطابق قرآن پڑھیں سیدنا میکائیل نے کہا: آپ مزید کے بارے میں کہیئے ( نبی اکرم صلی اللہ علیہ وسلم نے یہ کہا: ) تو سیدنا جبرائیل نے کہا: آپ دو حروف پر پڑھ لیں سیدنا میکائیل نے کہا: آپ مزید کے بارے میں کہیئے ( نبی اکرم صلی اللہ علیہ وسلم نے مزید کے بارے میں کہا: ) یہاں تک کہ وہ سات حروف تک پہنچ گیا ۔
یہ روایت امام بزار نے نقل کی ہے اس کی سند میں ایک راوی عاصم بن بہدلہ ہے اور وہ ثقہ ہے اس کے بارے میں ایسا کلام کیا گیا ہے جو نقصان دہ نہیں ہے اس روایت کے بقیہ رجال صحیح کے رجال ہیں ۔

سیدنا عمرو بن العاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں ” قرآن سات حروف پر نازل ہوا ہے تم جس بھی حرف کے مطابق تلاوت کرو گے ٹھیک کرو گے تم بحث کا شکار نہ ہونا ، کیونکہ اس کے بارے میں بحث کفر ہے “ ۔
یہ روایت امام أحمد نے نقل کی ہے ۔

سیدنا عمرو بن العاص رضی اللہ عنہ کے غلام ابوقیس بیان کرتے ہیں : سیدنا عمرو بن العاص رضی اللہ عنہ نے ایک شخص کو قرآن کی ایک آیت تلاوت کرتے ہوئے سنا ، تو اس سے دریافت کیا : تمہیں یہ کس نے پڑھائی ہے ؟ اس نے بتایا : اللہ کے رسول نے ، سیدنا عمرو رضی اللہ عنہ نے کہا: اللہ کے رسول نے مجھے تو یہ اس سے مختلف طور پر پڑھائی ہے ، پھر وہ دونوں نبی اکرم صلی اللہ علیہ وسلم کی خدمت میں حاضر ہوئے ، ان دونوں میں سے ایک نے عرض کی : یا رسول اللہ ! فلاں ، فلاں آیت ، پھر ان صاحب نے وہ آیت تلاوت کی ، تو نبی اکرم صلی اللہ علیہ وسلم نے ارشاد فرمایا : یہ اسی طرح نازل ہوئی ہے ، پھر دوسرے صاحب نے عرض کی : یا رسول اللہ ! پھر انہوں نے نبی اکرم صلی اللہ علیہ وسلم کے سامنے وہی آیت پڑھی اور دریافت کیا : یا رسول اللہ ! کیا یہ اس طرح نہیں ہے ؟ نبی اکرم صلی اللہ علیہ وسلم نے فرمایا : یہ اسی طرح نازل ہوئی ہے ، پھر نبی اکرم صلی اللہ علیہ وسلم نے ارشاد فرمایا : ” بے شک یہ قرآن ، سات حروف پر نازل ہوا ہے ، تو تم جس بھی قرأت کو کر لو گے ، تم درست کرو گے ، تم اس کے بارے میں بحث کا شکار نہ ہونا ، کیونکہ اس کے بارے میں بحث کرنا کفر ہے ( راوی کو شک ہے ، شاید یہ الفاظ ہیں : ) ایسا کرنا اس کا کفر کرنے کے مترادف ہے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، البتہ
یہ روایت ” مرسل “ ہے ۔

سیدنا ابوطلحہ رضی اللہ عنہ بیان کرتے ہیں : ایک شخص نے سیدنا عمر رضی اللہ عنہ کی موجودگی میں تلاوت کی ، تو سیدنا عمر رضی اللہ عنہ نے اس حوالے سے اس پر اعتراض کیا ، اس نے کہا: میں نے نبی اکرم صلی اللہ علیہ وسلم کے سامنے اس کو پڑھا ہے ، نبی اکرم صلی اللہ علیہ وسلم نے تو اس میں کوئی تبدیلی نہیں کروائی راوی بیان کرتے ہیں : پھر وہ دونوں صاحبان ، نبی اکرم صلی اللہ علیہ وسلم کے پاس اکٹھے ہوئے ، تو ان دونوں میں سے ایک نے نبی اکرم صلی اللہ علیہ وسلم کے سامنے اس کی تلاوت کی ، تو نبی اکرم صلی اللہ علیہ وسلم نے اس سے فرمایا : تم نے ٹھیک تلاوت کی ہے ، سیدنا عمر رضی اللہ عنہ کو اس حوالے سے الجھن محسوس ہوئی ، تو نبی اکرم صلی اللہ علیہ وسلم نے ارشاد فرمایا : ” اے عمر ! بے شک قرآن پورے کا پورا ٹھیک ہے ، جب تک مغفرت کو عذاب ، یا عذاب کو مغفرت نہ بنا دیا جائے “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوبکرہ رضی اللہ عنہ بیان کرتے ہیں : سیدنا جبرائیل علیہ السلام نے عرض کی : اے سیدنا محمد ! آپ قرآن کو ایک حرف کے مطابق پڑھیں تو سیدنا میکائیل نے کہا: آپ مزید کے بارے میں کہیے ! نبی اکرم صلی اللہ علیہ وسلم نے انہیں مزید کے بارے میں کہا: ، تو سیدنا جبرائیل نے کہا: آپ اس کو دو حروف کے مطابق پڑھ لیں ، سیدنا میکائیل نے کہا: آپ مزید کے بارے میں کہیے ! نبی اکرم صلی اللہ علیہ وسلم نے انہیں مزید کے بارے میں کہا: ، تو انہوں نے کہا: آپ تین حروف کے مطابق پڑھ لیں ، سیدنا میکائیل نے کہا: آپ مزید کے بارے میں کہیے ، یہاں تک کہ سات حروف تک پہنچ گئے ، نبی اکرم صلی اللہ علیہ وسلم نے ( یا سیدنا جبرائیل نے ) ارشاد فرمایا : سب کافی و شافی ہیں ، جب تک عذاب سے متعلق آیت کو رحمت ، یا رحمت سے متعلق آیت کو عذاب والی نہ بنا دیا جائے ، جیسے آپ کا یہ کہنا : تعال ، یا اقبل ( دونوں کا مطلب یہی ہے کہ تم آ جاؤ ) یا ھلم یا اذہب ( دونوں کا مطلب یہی ہے کہ چلے جاؤ ) یا اسرع ، اور اعجل ( دونوں کا مطلب یہی ہے کہ تم جلدی کرو ) ۔
یہ روایت امام أحمد نے نقل کی ہے اور امام طبرانی نے اس کی مانند نقل کی ہے ، تاہم انہوں نے لفظ ” اذہب اور ادبر “ ( یعنی تم چلے جاؤ ) نقل کیا ہے اس کی سند میں ایک راوی علی بن زید بن جدعان ہے اور وہ خراب حافظے کا مالک ہے ، اس کی متابعت کی گئی ہے امام أحمد کے بقیہ رجال صحیح کے رجال ہیں ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم کی ملاقات ، سیدنا جبرائیل سے ہوئی ، آپ اس وقت ” احجار مراء “ کے مقام پر تھے ، سیدنا جبرائیل نے کہا: آپ کی امت قرآن کو سات حروف پر تلاوت کرے گی ، ان میں سے جو شخص ، جس بھی حرف کے مطابق تلاوت سیکھے گا ، وہ اس کے مطابق تلاوت کرے ، جس کی اس نے تعلیم حاصل کی ہے اور اس کو نہ چھوڑے ۔ ابن مہدی نے یہ الفاظ نقل کیے ہیں : ” آپ کی امت میں کمزور لوگ بھی ہیں ، تو جو شخص ایک مخصوص حرف کے مطابق تلاوت سیکھے ، تو وہ اس کو چھوڑ کر دوسری کی طرف منتقل نہ ہو “ ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوجہیم رضی اللہ عنہ بیان کرتے ہیں : دو آدمیوں کے درمیان قرآن کی ایک آیت کے بارے میں اختلاف ہو گیا ، ایک نے کہا: میں نے یہ آیت خود نبی اکرم صلی اللہ علیہ وسلم سے سیکھی ہے ، دوسرے نے کہا: میں نے بھی یہ نبی اکرم صلی اللہ علیہ وسلم سے سیکھی ہے ، ان دونوں نے نبی اکرم صلی اللہ علیہ وسلم سے اس بارے میں دریافت کیا ، تو آپ نے ارشاد فرمایا : ” قرآن کو سات حروف پر پڑھا جا سکتا ہے ، تو تم لوگ قرآن کے بارے میں اختلاف کا شکار نہ ہو ، کیونکہ قرآن میں اختلاف کرنا ( یا بحث کرنا ) کفر ہے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قرآن سات حروف پر نازل ہوا ہے اور قرآن کے بارے میں اختلاف کرنا ( یا بحث کرنا ) کفر ہے ، یہ بات آپ نے تین مرتبہ ارشاد فرمائی ، جب تم اس کا علم حاصل کر لو ، تو اس پر عمل کرو اور جس چیز سے تم نا واقف ہو ، اُس کا حکم ، اس کے عالم فرد کی طرف لوٹا دو “ ۔

ایک روایت میں یہ الفاظ ہیں : ” قرآن کو سات حروف پر نازل کیا گیا ہے ( جیسے ) علم رکھنے والا ، حکمت والا ۔ مغفرت کرنے والا ، رحم کرنے والا ۔ یہ تمام روایات دو اسناد کے ساتھ منقول ہیں ، جن میں سے ایک کے رجال صحیح کے رجال ہیں ، امام بزار نے اس کی مانند روایت نقل کی ہے ۔ سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” نبی اکرم صلی اللہ علیہ وسلم کے سامنے تین مرتبہ قرآن پڑھا گیا “ ۔ راوی بیان کرتے ہیں : لوگ یہ سمجھتے تھے کہ ہماری قرات ہی آخری قرأت ہے ، راوی بیان کرتے ہیں : مجھے نہیں معلوم کہ ان کی روایت کے یہ الفاظ حدیث کا حصہ ہیں ، یا نہیں ہیں ؟ یعنی یہ الفاظ : ” کہ لوگ یہ سمجھتے ہیں کہ ہماری قرأت ہی“ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا سمرہ (بن جندب) رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : «قرآنِ مجید رسول اللہ صلی اللہ علیہ وسلم پر تین بار پیش کیا گیا (دہرایا گیا) » ۔ (راوی کہتے ہیں : ) وہ (علماء و صحابہ) سمجھتے تھے کہ ہماری یہ (عام) قرائت وہی آخری پیشی والی (عرضہِ اخیرہ کے مطابق) ہے ؛ (راوی کہتے ہیں : ) اب مجھے معلوم نہیں کہ یہ جملہ — یعنی ” وہ سمجھتے تھے کہ ہماری قرٱت وہی آخری قرٱت ہے “ — اسی حدیث کا حصہ ہے یا کسی دوسری روایت سے ہے ۔
اسے امام بزار رحمہ اللہ نے روایت کیا ہے ، اور اس کے تمام راوی صحیح بخاری و مسلم کے راوی ہیں۔

سیدنا سمرہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” قرآن ، سات حروف پر نازل ہوا ہے “ ۔

ایک روایت میں یہ الفاظ ہیں : ” تین حروف ۔ ۔ ۔ ۔ ۔ ۔ ۔ “ ۔
یہ روایت امام أحمد نے امام بزار نے اور امام طبرانی نے تینوں کتابوں میں نقل کی ہے امام أحمد کے رجال اور امام طبرانی کی دو میں سے ایک سند کے رجال اور امام بزار کے رجال صحیح کے رجال ہیں ۔

ابومنہال سیار بن سلامہ بیان کرتے ہیں : ہم تک یہ روایت پہنچی ہے کہ ایک دن سیدنا عثمان غنی رضی اللہ عنہ جب منبر پر موجود تھے تو انہوں نے یہ فرمایا : کہ میں اُس شخص کو اللہ کا واسطہ دے کر دریافت کرتا ہوں ، جس نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قرآن سات حروف پر نازل ہوا ہے ، جن میں سے ہر ایک کافی و شافی ہے “ ۔ راوی بیان کرتے ہیں : ابھی وہ کھڑے ہوئے تھے کہ اسی دوران اتنے لوگ کھڑے ہو گئے کہ انہیں شمار نہیں کیا جا سکتا تھا اور ان لوگوں نے اس بات کی گواہی دی کہ نبی اکرم صلی اللہ علیہ وسلم نے ارشاد فرمایا ہے : ” بے شک قرآن سات حروف پر نازل ہوا ہے اور ان میں سے ہر ایک کافی و شافی ہے “ ۔ تو سیدنا عثمان غنی رضی اللہ عنہ نے فرمایا : ان لوگوں کے ساتھ میں بھی ( اس بات کے حوالے سے ) گواہ ہوں ۔
یہ روایت امام ابویعلیٰ نے ، کبیر میں نقل کی ہے اور اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قرآن سات حروف پر نازل ہوا ہے اور اس کی ہر آیت کا ایک ظاہری پہلو ہے اور ایک باطنی پہلو ہے “ ۔ نبی اکرم صلی اللہ علیہ وسلم نے اس بات سے بھی منع کیا ہے کہ آدمی چٹ لیٹے ، راوی کہتے ہیں : میرا خیال ہے ، روایت میں یہ الفاظ ہیں : ” مسجد میں ، اور ایک پاؤں دوسرے پر رکھ لے “ ۔
یہ روایت امام بزار نے اور امام ابویعلیٰ نے کبیر میں نقل کی ہے ، ان کی روایت میں یہ الفاظ ہیں : ” اس کے ہر حرف کا ایک باطنی پہلو ہے اور ایک ظاہری پہلو ہے “ ۔
یہ روایت امام طبرانی نے معجم اوسط میں اس کے آخری حصے کے اختصار کے ساتھ نقل کی ہے امام ابویعلیٰ کے رجال ثقہ ہیں ۔ امام بزار کی روایت میں یہ بات مذکور ہے کہ یہ محمد بن عجلان کے حوالے سے ابواسحاق سے منقول ہے اس کے آخر میں انہوں نے یہ کہا: ہے کہ محمد بن عجلان نے ابراہیم ہجری کے حوالے سے اس کے علاوہ کوئی اور روایت نقل نہیں کی ہے ۔ ( علامہ ہیثمی فرماتے ہیں : ) میں یہ کہتا ہوں : محمد بن عجلان نے ابواسحاق سبعیی سے روایات نقل کی ہیں اگر تو اس سے مراد ابواسحاق سبعیی ہے ، تو پھر امام بزار کے رجال بھی ثقہ ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں یہ حکم دیتے تھے کہ ہم قرآن اس طرح پڑھیں ، جس طرح آپ نے ہمیں قرآن پڑھنا سکھایا ہے ، آپ یہ فرماتے تھے : ” یہ تین حروف پر نازل ہوا ہے ، تم اس کے بارے میں اختلاف نہ کرو ، کیونکہ یہ پورے کا پورا ، برکت والا ہے ، تم اسے اسی طرح پڑھو ، جس طرح تمہیں پڑھنا سکھایا گیا ہے “ ۔
یہ روایت امام طبرانی نے اور امام بزار نے نقل کی ہے ، تاہم انہوں نے یہ الفاظ نقل کیے ہیں : ” تم اس سے الگ نہ ہو “ انہوں نے ” تم اس کے بارے میں بحث نہ کرو “ کی جگہ یہ الفاظ نقل کیے ہیں ، ان دونوں کی سند ضعیف ہے ۔ اس سے پہلے اس کا ایک طریق گزر چکا ہے ، جس کے رجال صحیح کے رجال ہیں اور وہ روایت مختصر ہے ۔

فلفلہ جعفی بیان کرتے ہیں : میں بھی اُن لوگوں میں شامل تھا ، جو قرآن کے بارے میں پریشانی کا شکار ہوئے تھے اور اس حوالے سے سیدنا عبداللہ بن مسعود رضی اللہ عنہ کی خدمت میں حاضر ہوئے ، جب ہم ان کے پاس آئے ، تو حاضرین میں سے ایک صاحب نے کہا: کہ ہم آپ کے پاس ملنے کے لئے نہیں آئے ہیں ، بلکہ ہم آپ کے پاس اس لئے آئے ہیں کہ ہمیں اس بارے میں یہ اطلاع ملی ہے ، تو انہوں نے فرمایا : یہ قرآن تمہارے نبی پر سات ابواب سے سات حروف پر نازل ہوا ہے ( یہاں ایک لفظ کے بارے میں راوی کو شک ہے ) اور اس سے پہلے کی ( ہر الہامی ) کتاب ، ایک دروازے سے ، ایک حروف کے مطابق نازل ہوتی تھی ۔
( علامہ ہیثمی فرماتے ہیں : ) میں یہ کہتا ہوں : اُن کے حوالے سے ” صحیح “ میں اس کے علاوہ روایت منقول ہے ۔
یہ روایت امام أحمد نے نقل کی ہے ، اس کی سند میں ایک راوی عثمان بن حسان عامری ہے ، جس کا ذکر ابن ابوحاتم نے کیا ہے انہوں نے اس پر کوئی جرح نہیں کی اور اس کی توثیق نہیں کی ، اس روایت کے بقیہ رجال ثقہ ہیں ۔

عبدالرحمن بن عابس بیان کرتے ہیں : ہمدان سے تعلق رکھنے والے ایک صاحب ، جن کا تعلق سیدنا عبداللہ رضی اللہ عنہ کے شاگردوں سے ہے ، انہوں نے ہمیں یہ بات بتائی راوی بیان کرتے ہیں عبدالرحمن نے ان صاحب کا نام بیان نہیں کیا ، وہ صاحب بیان کرتے ہیں : جب سیدنا عبداللہ رضی اللہ عنہ نے مدینہ منورہ جانے کا ارادہ کیا تو انہوں نے اپنے شاگردوں کو جمع کیا اور فرمایا : اللہ کی قسم ! مجھے یہ امید ہے کہ دین ، اس کی سمجھ بوجھ اور قرآن کے علم کے حوالے سے ، تم لوگوں کی صورت حال ، مسلمانوں کے لشکروں میں سے ، سب سے بہتر ہے اور اس قرآن میں اختلاف نہیں پایا جاتا ، اور یہ پرانا نہیں ہوتا اور بکثرت پڑھنے کی وجہ سے یہ بوسیدہ نہیں ہوتا ، جو شخص ایک طریقے کے مطابق اس کو پڑھے ، تو وہ اس سے منہ پھیرتے ہوئے ، اس کو نہ چھوڑے ، اور جو شخص ان حروف میں سے کوئی چیز پڑھے ، جن کی تعلیم نبی اکرم صلی اللہ علیہ وسلم نے دی ہے ، تو وہ اُس سے منہ پھیرتے ہوئے ، اس کو نہ چھوڑے ، کیونکہ جو شخص اس کی ایک آیت کا انکار کرے گا ، وہ اس کے پورے وجود ) کا انکار کرنے کے مترادف ہو گا اور تمہارا کسی دوسرے شخص کو یہ کہنے کی مانند ہو گا ” اعجل ، حی ، ھلا ( یعنی آ جاؤ ) ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام أحمد نے ایک طویل حدیث میں نقل کی ہے اور امام طبرانی نے نقل کی ہے ، اس کی سند میں ایسا راوی ہے ، جس کا نام بیان نہیں کیا گیا ہے ، اس کے بقیہ رجال صحیح کے رجال ہیں ۔

سیدنا عمر بن ابوسلمہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا عبداللہ بن مسعود رضی اللہ عنہ سے فرمایا : ” بے شک ( دوسری الہامی ) کتابیں ، آسمان سے ایک ہی دروازے سے نازل ہوئی ہیں اور قرآن سات دروازوں سے سات حروف پر نازل ہوا ہے ، حلال ، حرام ، محکم ، متشابہ ، مثالیں بیان کرنا ، امر اور زجر ( کسی بات سے روکنا ) تو تم اس کے حلال کو حلال قرار دو ، اس کے حرام کو حرام سمجھو ، اس کے محکم پر عمل کرو ، اس کے متشابہ پر خاموش ہو جاؤ ، اس کی مثالوں سے نصیحت حاصل کرو ، کیونکہ یہ سب اللہ تعالیٰ کی طرف سے ہے ، اور صرف عقل مند لوگ ہی ( اس سے ) نصیحت حاصل کرتے ہیں “ ۔
یہ روایت امام طبرانی نے نقل کی ہے “ اس کی سند میں ایک راوی عمار بن مطر ہے اور وہ انتہائی ضعیف ہے ، بعض حضرات نے اسے ثقہ قرار دیا ہے ۔

سیدنا عبداللہ بن مسعود رضی اللہ عنہ فرماتے ہیں : ” بے شک اس قرآن کے ، ہر ایک حرف کی مخصوص حد ہے اور ہر حد کا ایک مطلع ہے “ ۔
یہ روایت امام طبرانی نے نقل کی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قرآن ، سات حروف پر نازل ہوا ہے ، اور قرآن کے بارے میں بحث ( یا اختلاف ) کرنا کفر ہے “ ۔
یہ روایت امام بزار نے نقل کی ہے ، اس کی سند میں ایک راوی محمد بن عمرو ہے اور وہ حسن الحدیث ہے ، اس روایت کے بقیہ رجال صحیح کے رجال ہیں ۔

سیدنا ابوسعید خدری رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” بے شک قرآن سات حروف پر نازل ہوا ہے اور یہ پورے کا پورا ، شافی و کافی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی میمون ابوحمزہ ہے اور وہ متروک ہے ۔

سیدنا سلیمان بن صرد رضی اللہ عنہ بیان کرتے ہیں سیدنا محمد صلی اللہ علیہ وسلم کے پاس دو فرشتے آئے ان میں سے ایک نے کہا: کہ آپ قرآن ایک حرف کے مطابق پڑھیں ، تو دوسرے فرشتے نے کہا: آپ اس کو مزید کے لیے کہیں ، تو آپ مسلسل مزید دینے کے لئے کہتے رہے ، یہاں تک کہ اس فرشتے نے کہا: آپ سات حروف کے مطابق پڑھیں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی جعفر ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

زید قصار ، سیدنا زید بن ارقم رضی اللہ عنہ کے بارے میں یہ بات نقل کرتے ہیں : ہم ان کے ساتھ مسجد میں موجود تھے انہوں نے ہمیں کچھ دیر احادیث بیان کیں ، پھر انہوں نے بتایا : ایک مرتبہ ایک شخص نبی اکرم صلی اللہ علیہ وسلم کے پاس آیا اور بولا: سیدنا عبداللہ بن مسعود رضی اللہ عنہ نے مجھے ایک سورت سکھائی ہے ، وہی سورت ، سیدنا زید بن ثابت رضی اللہ عنہ نے مجھے پڑھائی ہے ، وہی سیدنا ابی بن کعب رضی اللہ عنہ نے مجھے پڑھائی ہے تو ان کی قرأت کے درمیان اختلاف ہے ، تو میں اُن میں سے کس کی قرأت کو اختیار کروں ؟ تو نبی اکرم صلی اللہ علیہ وسلم خاموش رہے ، سیدنا علی رضی اللہ عنہ آپ صلی اللہ علیہ وسلم کے پہلو میں موجود تھے ، سیدنا علی رضی اللہ عنہ نے فرمایا : ” ہر انسان کو اس طرح پڑھنا چاہیے ، جس طرح اُسے سکھایا گیا ہو ، یہ سب اچھا اور خوبصورت ہے “ ۔
یہ روایت امام طبرانی نے نقل کی ہے اس کی سند میں ایک راوی عیسیٰ بن قرطاس ہے اور وہ متروک ہے ۔

سیدنا معاذ بن جبل رضی اللہ عنہ بیان کرتے ہیں : ” قرآن ، سات دروازوں سے ، سات حروف پر نازل کیا گیا ہے ، یہ پورے کا پورا ، شافی و کافی ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیده ام ایوب رضی اللہ عنہا ، نبی اکرم صلی اللہ علیہ وسلم کا یہ فرمان نقل کرتی ہیں : ” قرآن ، سات حروف پر نازل ہوا ہے ، تم جس کے مطابق تلاوت کرو گے ، ٹھیک کرو گے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔