مجمع الزوائد ومنبع الفوائد

ابوالعلاء یزید بن عبدالله بن شخیر بیان کرتے ہیں : ایک صاحب نے یہ بات بیان کی ہے : ہم ایک سفر کے دوران نبی اکرم صلی اللہ علیہ وسلم کے ساتھ تھے ، لوگ باری ، باری سواریوں پر سوار ہوتے تھے ، سواریاں کم تھیں ، نبی اکرم صلی اللہ علیہ وسلم کے اُترنے اور میرے اترنے کا موقع آیا ، تو نبی اکرم صلی اللہ علیہ وسلم میرے پاس تشریف لائے ، آپ نے میرے کندھے پر ہاتھ مارا ، اور فرمایا : تم ﴿قُلْ أَعُوذُ بِرَبِّ الْفَلَقِ﴾ [الفلق : 1] پڑھو ، تو میں ﴿أَعُوذُ بِرَبِّ الْفَلَقِ﴾ پڑھا ، نبی اکرم صلی اللہ علیہ وسلم نے یہ پوری سورت تلاوت کی ، میں نے بھی آپ کی پیروی میں اس کو پڑھا ، پھر نبی اکرم صلی اللہ علیہ وسلم نے فرمایا :” تم ﴿قُلْ أَعُوذُ بِرَبِّ النَّاسِ﴾ [الناس : 1] پڑھو “، نبی اکرم صلی اللہ علیہ وسلم نے یہ سورت تلاوت کی ، میں نے بھی آپ کے ساتھ اس کو پڑھا ، نبی اکرم صلی اللہ علیہ وسلم نے ارشاد فرمایا : جب تم نماز ادا کرو ، تو تم ان دونوں ( سورتوں ) کی تلاوت کرنا ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عقبہ بن عامر رضی اللہ عنہ بیان کرتے ہیں : میری نبی اکرم صلی اللہ علیہ وسلم سے ملاقات ہوئی ، تو آپ نے ارشاد فرمایا : ” اے عقبہ بن عامر ! کیا میں تمہیں ایسی سورتوں کی تعلیم نہ دوں کہ تورات میں ، نہ زبور میں ، نہ انجیل میں ، اور نہ ہی قرآن میں ، اُن جیسی سورتیں نازل ہوئی ہیں ؟ جو بھی رات آتی ہیں ، میں اُس میں اِن کی تلاوت کرتا ہوں ( وہ سورتیں یہ ہیں : ) سورت اخلاص ، سورت فلق اور سورت ناس “ ۔ ( علامہ ہیثمی فرماتے ہیں : ) میں یہ کہتا ہوں : سیدنا عقبہ رضی اللہ عنہ سے منقول حدیث ” صحیح “ اور دیگر کتابوں میں اس کی بہ نسبت اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابومسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھ پر ایسی آیات نازل ہوئی ہیں کہ مجھ پر ان جیسی ( آیات ) نازل نہیں ہوئی ہیں ، وہ معوذتین ہیں “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

اور سیدنا عبداللہ اسلمی رضی اللہ عنہ سے روایت ہے ، وہ بیان کرتے ہیں کہ : ہم رسول اللہ صلی اللہ علیہ وسلم کے ساتھ ایک عمرے میں (سفر پر) تھے ، یہاں تک کہ جب ہم بطنِ واقم کے مقام پر پہنچے تو ہمیں شدید دھند (یا بادل) نے آ گھیرا اور ہم راستہ بھول گئے ۔ ہمیں خبر ہی نہ ہوئی یہاں تک کہ ہم ایک گھاٹی پر جا نکلے ۔ جب رسول اللہ صلی اللہ علیہ وسلم نے یہ دیکھا تو آپ صلی اللہ علیہ وسلم ایک ریت کے ٹیلے کی طرف مڑے اور وہاں اپنی اونٹنی کو بٹھایا ، پھر آپ صلی اللہ علیہ وسلم (نماز کے لیے ) کھڑے ہو گئے اور اللہ نے جن کو چاہا وہ بھی آپ کے ساتھ (نماز میں) کھڑے ہو گئے ۔ چنانچہ آپ صلی اللہ علیہ وسلم مسلسل نماز پڑھتے رہے یہاں تک کہ فجر طلوع ہو گئی ۔ پھر رسول اللہ صلی اللہ علیہ وسلم نے اپنی اونٹنی کی مَہار (نکیل) پکڑی اور پیدل چلنے لگے اور عبداللہ اسلمی رضی اللہ عنہ آپ کے ساتھ ساتھ تھے ، (اس وقت) رسول اللہ صلی اللہ علیہ وسلم کے ساتھ ان کے علاوہ کوئی اور نہ تھا ۔ پھر رسول اللہ صلی اللہ علیہ وسلم نے اپنا (مبارک) ہاتھ ان کے سینے پر رکھا اور فرمایا : ” پڑھو ! “ ۔ میں نے عرض کیا : میں کیا پڑھوں ؟ آپ صلی اللہ علیہ وسلم نے فرمایا : ﴿قُلْ هُوَ اللَّهُ أَحَدٌ﴾ اور ﴿قُلْ أَعُوذُ بِرَبِّ الْفَلَقِ - مِنْ شَرِّ مَا خَلَقَ﴾ ، یہاں تک کہ میں اس (پوری سورت) سے فارغ ہو گیا ۔ پھر آپ صلی اللہ علیہ وسلم نے فرمایا :” پڑھو ! “۔ میں نے عرض کیا : میں کیا پڑھوں ؟ آپ صلی اللہ علیہ وسلم نے فرمایا : ﴿قُلْ أَعُوذُ بِرَبِّ النَّاسِ﴾ ، یہاں تک کہ میں اس (پوری سورت) سے بھی فارغ ہو گیا ۔ تب رسول اللہ صلی اللہ علیہ وسلم نے فرمایا : ” اسی طرح پناہ مانگو ، کیونکہ بندوں نے ان سورتوں کے جیسے کلمات سے کبھی پناہ نہیں مانگی “ ۔
(اسے امام بزار رحمہ اللہ نے روایت کیا ہے اور اس کے تمام راوی صحیح بخاری و مسلم کے راوی ہیں) ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شیطان ، انسان کے دل پر اپنی لگام ڈال دیتا ہے اگر آدمی اللہ تعالیٰ کا ذکر کرے تو وہ پیچھے ہٹ جاتا ہے اور اگر آدمی ( اللہ کا ذکر کرنا ) بھول جائے تو شیطان اس کے دل کو نگل لیتا ہے اور یہی وسوسے ڈالنے والا اور پیچھے ہٹنے والا ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عدی بن عمارہ ہے اور وہ ضعیف ہے ۔

زر بیان کرتے ہیں : میں نے سیدنا ابی رضی اللہ عنہ سے کہا: آپ کے بھائی قرآن مجید میں سے ، ان دو سورتوں کو مٹا دیتے ہیں ، یہاں سفیان نامی راوی سے دریافت کیا گیا : کیا اُن کی مراد سیدنا عبداللہ بن مسعود رضی اللہ عنہ تھے ؟ تو سفیان نے اس بات کا انکار نہیں کیا ، سیدنا ابی رضی اللہ عنہ نے زر کو جواب دیا : میں نے نبی اکرم صلی اللہ علیہ وسلم سے سوال کیا ، تو آپ صلی اللہ علیہ وسلم نے ارشاد فرمایا : مجھ سے یہ کہا: گیا کہ ( میں ان کو پڑھوں ) تو میں نے ان کو پڑھا ( سیدنا ابی رضی اللہ عنہ نے فرمایا ) تو ہم بھی اُسی طرح پڑھتے ہیں ، جس طرح نبی اکرم صلی اللہ علیہ وسلم نے پڑھا ہے ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تا ہم اس میں یہ ذکر نہیں ہے : اُن دونوں کو مصحف میں سے مٹایا جاتا ہے ۔
یہ روایت امام أحمد اور امام طبرانی نے نقل کی ہے ، امام أحمد کے رجال صحیح کے رجال ہیں ۔

عبدالرحمن بن یزید نخعی بیان کرتے ہیں : سیدنا عبداللہ بن مسعود رضی اللہ عنہ اپنے قرآن مجید میں سے ” معوذتین “ مٹا دیتے تھے اور یہ فرماتے تھے : یہ دونوں ، اللہ کی کتاب کا حصہ نہیں ہیں ۔
یہ روایت عبداللہ بن أحمد اور طبرانی نے نقل کی ہے ، عبداللہ کے رجال صحیح کے رجال ہیں اور طبرانی کے رجال ثقہ ہیں ۔

سیدنا عبداللہ رضی اللہ عنہ کے بارے میں یہ بات منقول ہے : وہ مصحف میں سے معوذتین مٹا دیتے تھے اور یہ فرماتے تھے : نبی اکرم صلی اللہ علیہ وسلم نے ان دونوں کے ذریعے پناہ مانگنے کا حکم دیا ہے ، راوی کہتے ہیں : سیدنا عبداللہ رضی اللہ عنہ ان دونوں سورتوں کی تلاوت نہیں کرتے تھے ۔
یہ روایت امام بزار نے اور امام طبرانی نے نقل کی ہے ، ان دونوں کے رجال ثقہ ہیں ، امام بزار کہتے ہیں : صحابہ کرام میں سے کسی ایک نے بھی اس بارے میں سیدنا عبداللہ بن مسعود رضی اللہ عنہ کی متابعت نہیں کی ہے اور نبی اکرم صلی اللہ علیہ وسلم سے یہ بات مستند طور پر منقول ہے کہ آپ صلی اللہ علیہ وسلم نماز میں یہ دونوں سورتیں پڑھا کرتے تھے اور ان دونوں سورتوں کو مصحف میں برقرار رکھا گیا ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم سے ان دو سورتوں کے بارے میں دریافت کیا گیا ، تو آپ نے ارشاد فرمایا : مجھے یہ پڑھنے کے لئے کہا: گیا ، تو میں نے یہ جس طرح پڑھی ہیں ، اُس طرح تم بھی پڑھو ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی اسماعیل بن مسلم مکی ہے اور وہ ضعیف ہے ۔