مجمع الزوائد ومنبع الفوائد

سیدنا بریدہ رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ) ” صمد ، سے مراد وہ ذات ہے ، جس کا پیٹ نہ ہو “ ۔
یہ روایت امام طبرانی نے نقل کی ہے ، اس کی سند میں ایک راوی صالح بن حبان ہے اور وہ ضعیف ہے ۔

ضحاک بن مزاحم بیان کرتے ہیں : نافع بن ازرق نے ، سیدنا عبداللہ بن عباس رضی اللہ عنہما سے ، اللہ تعالیٰ کے اس فرمان کے بارے میں دریافت کیا ” الصمد “ اُس نے کہا: جہاں تک لفظ ” احد “ کا تعلق ہے ، تو اس کو تو ہم جانتے ہیں ، ” صمد “ سے کیا مراد ہے ؟ تو سیدنا عبداللہ بن عباس رضی اللہ عنہما نے فرمایا : جس کی طرف تمام اُمور میں رجوع کیا جائے ، اُس نے دریافت کیا : سیدنا محمد صلی اللہ علیہ وسلم پر کتاب نازل ہونے سے پہلے ، عرب اس مفہوم سے واقف تھے ؟ سیدنا عبداللہ بن عباس رضی اللہ عنہما نے جواب دیا : جی ہاں ! کیا تم نے اسدیہ کا یہ شعر نہیں سنا ہے : ” خبردار ! موت کی اطلاع دینے والے کو بنو اسد کو ، عمرو بن مسعود کی اطلاع دے دینی چاہیے ، جو سردار تھا اور جس کی طرف رجوع کیا جاتا تھا “ ۔ تو نافع نے کہا: آپ نے سچ کہا: ہے ۔
یہ روایت امام طبرانی نے ایک طویل حدیث میں نقل کی ہے ، جو اس سے پہلے ” قرآن کی تفسیر کیسے کی جائے گی ؟ “ میں گزر چکی ہے اس کی سند میں ایک راوی جویبر ہے اور وہ متروک ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم ایک شخص کے پاس سے گزرے جو سورت اخلاص کی تلاوت کر رہا تھا نبی اکرم صلی اللہ علیہ وسلم نے ارشاد فرمایا اس نے ( اپنے لئے جنت ) واجب کر لی ہے ( راوی کو شک ہے شاید یہ الفاظ ہیں ) اس کے لئے جنت واجب ہو گئی ہے ۔
یہ روایت امام أحمد اور امام طبرانی نے نقل کی ہے اس کی سند میں ایک راوی علی بن یزید ہے اور وہ ضعیف ہے ۔

ایک بزرگ ، جنہوں نے نبی اکرم صلی اللہ علیہ وسلم کا زمانہ پایا ہے ، وہ بیان کرتے ہیں میں نبی اکرم صلی اللہ علیہ وسلم کے ساتھ ایک سفر پر نکلا نبی اکرم صلی اللہ علیہ وسلم کا گزر ایک شخص کے پاس سے ہوا جو سورت کافرون کی تلاوت کر رہا تھا آپ نے ارشاد فرمایا جہاں تک اس شخص کا تعلق ہے تو یہ شرک سے لاتعلق ہو گیا ہے ایک اور شخص سورت اخلاص کی تلاوت کر رہا تھا تو نبی اکرم صلی اللہ علیہ وسلم نے ارشاد فرمایا اس کی وجہ سے اس شخص کے لئے جنت واجب ہو گئی ۔

ایک روایت میں یہ الفاظ ہیں : ” جہاں تک اس شخص کا تعلق ہے ، تو اس کی مغفرت ہو گئی “ ۔
یہ روایت امام أحمد نے دو اسناد کے ساتھ نقل کی ہے جن میں سے ایک راوی شریک ہے اس کے بارے میں اختلاف پایا جاتا ہے اس روایت کے بقیہ رجال صحیح کے رجال ہیں ۔

سیدنا معاذ بن انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دس مرتبہ سورت اخلاص پڑھ لے گا ، اللہ تعالیٰ اس کے لئے جنت میں گھر بنا دے گا “ ۔ سیدنا عمر بن خطاب رضی اللہ عنہ نے عرض کی : یا رسول اللہ ! اس صورت میں تو ہم بکثرت ( گھر بنوا لیں گے ) نبی اکرم صلی اللہ علیہ وسلم نے ارشاد فرمایا : اللہ تعالیٰ ( کا فضل و کرم ) کہیں زیادہ اور پاکیزہ ہے ۔
یہ روایت امام طبرانی اور امام أحمد نے نقل کی ہے ، وہ فرماتے ہیں : یہ سیدنا سہل بن معاذ بن انس جہنی رضی اللہ عنہ ، جو نبی اکرم صلی اللہ علیہ وسلم کے صحابی ہیں ، اُن کے حوالے سے منقول ہے ، انہوں نے یہ نہیں کہا: کہ یہ اُن کے والد کے حوالے سے منقول ہے ، بظاہر یہ لگتا ہے کہ یہ کلمات ساقط ہو گئے ، ان دونوں روایات کی سند میں ایک راوی رشدین بن سعد اور ایک راوی زبان ہے ، یہ دونوں ضعیف ہیں اور ان دونوں کی کمزور توثیق کی گئی ہے ۔

سیدنا ابن دیلمی رضی اللہ عنہ ، جو نجاشی کے بھانجے ہیں ، وہ نبی اکرم صلی اللہ علیہ وسلم کی خدمت کرتے رہے ہیں ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص نماز میں ، یا نماز کے علاوہ ، ایک سو مرتبہ سورت اخلاص کی تلاوت کر لے گا ، اللہ تعالیٰ اس کے لئے جہنم سے بری ہونا نوٹ کر لے گا “ ۔
یہ روایت امام طبرانی نے نقل کی ہے ، اس کی سند میں ایک راوی محمد بن قدامہ جوہری ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دس مرتبہ سورت اخلاص پڑھے گا ، اس کے لئے جنت میں محل بنا دیا جائے گا اور جو شخص بیس مرتبہ اسے پڑھے گا ، اس کے لئے دو محل بنا دیے جائیں گے ، جو شخص تیس مرتبہ پڑھے گا ، اس کے لئے تین محل بنا دیے جائیں گے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہانی بن متوکل ہے اور وہ ضعیف ہے ۔

سیدنا عبداللہ بن شخیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ، اپنی اس بیماری کے دوران ، جس میں اس کا انتقال ہو جائے گا ، اس میں سورت اخلاص پڑھ لے گا ، وہ قبر کی آزمائش میں مبتلاء نہیں ہو گا اور قبر کے بھینچنے سے محفوظ رہے گا ، قیامت کے دن فرشتے اسے اپنی ہتھیلیوں پر اٹھا کر لائیں گے یہاں تک کہ اسے پل صراط پار کروا کر اسے جنت تک لے کر جائیں گے “ ۔
یہ روایت امام طبرانی نے معجم اوسط میں نقل کی ہے اور وہ کہتے ہیں : یہ نبی اکرم صلی اللہ علیہ وسلم سے صرف اسی سند کے ساتھ منقول ہے ، اس کی سند میں ایک راوی نصر بن حماد وزاق ہے اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص صبح کی نماز کے بعد سورت اخلاص بارہ مرتبہ پڑھ لے گا ، تو گویا اس نے قرآن چار مرتبہ پڑھا ، اور وہ اس دن اہل زمین کا سب سے زیادہ فضیلت رکھنے والا شخص ہو گا ، جبکہ وہ پرہیزگاری اختیار کرے ( یا وہ گناہوں سے بچتا رہے ) “ ۔
یہ روایت امام طبرانی نے معجم صغیر میں نقل کی ہے اس کی سند میں ایسے راوی ہیں ، جن سے میں واقف نہیں ہوں ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سورت اخلاص پڑھ لے گا ، تو گویا اُس نے ایک تہائی قرآن پڑھ لیا اور جو شخص سورت کافرون پڑھ لے گا ، تو گویا اس نے ایک چوتھائی قرآن پڑھ لیا “ ۔
یہ روایت امام طبرانی نے معجم صغیر میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص روزانہ پچاس مرتبہ سورت اخلاص پڑھے گا ، تو قیامت کے دن اس کی قبر پر یہ اعلان کیا جائے گا : اے اللہ کی تعریف کرنے والے ! اُٹھ جاؤ اور جنت میں داخل ہو جاؤ “ ۔
یہ روایت امام طبرانی نے معجم صغیر اور معجم اوسط میں اپنے استاد یعقوب بن اسحاق بن زبیر حلبی کے حوالے سے نقل کی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : لوگوں نے عرض کی : یا رسول اللہ ! آپ اپنے پروردگار کا نسب ہمارے سامنے بیان کریں ! تو یہ سورت نازل ہوئی : ” تم فرما دو ! کہ وہ اللہ ایک ہے ۔ ۔ ۔ ۔ ۔ ۔ ۔ ، یہ سورت کے آخر تک ہے ۔
یہ روایت امام طبرانی نے معجم اوسط میں نقل کی ہے اور
یہ روایت امام ابویعلیٰ نے بھی نقل کی ہے ، تاہم انہوں نے یہ الفاظ نقل کیے ہیں : ایک دیہاتی ، نبی اکرم صلی اللہ علیہ وسلم کی خدمت میں حاضر ہوا اور بولا: اللہ کا نسب بیان کریں ۔ اس روایت کی سند میں ایک راوی مجالد بن سعید ہے ، ابن عدی کہتے ہیں : اس نے شعبی کے حوالے سے سیدنا جابر رضی اللہ عنہ سے روایات نقل کی ہیں ، اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر چیز کی ایک نسبت ہے اور اللہ کی نسبت ، سورت اخلاص ہے “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی واضح بن نافع ہے اور وہ متروک ہے ۔

حمزہ بن یوسف بن عبدالله بن سلام بیان کرتے ہیں : سیدنا عبداللہ بن سلام رضی اللہ عنہ نے یہودیوں کے علماء سے فرمایا : میں نے اپنے جد امجد سیدنا ابراہیم علیہ السلام اور سیدنا اسماعیل علیہ السلام کی مسجد میں ایک عہد لیا ہے ، پھر وہ نبی اکرم صلی اللہ علیہ وسلم کی طرف روانہ ہوئے ، نبی اکرم صلی اللہ علیہ وسلم اس وقت مکہ میں موجود تھے ، یہ اس وقت وہاں پہنچے ، جب لوگ حج کر کے واپس آ رہے تھے ، انہوں نے نبی اکرم صلی اللہ علیہ وسلم کو منی میں پایا ، لوگ آپ کے اردگرد تھے ، یہ لوگوں کے ساتھ کھڑے ہو گئے ، جب نبی اکرم صلی اللہ علیہ وسلم نے ان کی طرف دیکھا تو فرمایا : کیا تم عبداللہ بن سلام ہو ؟ راوی کہتے ہیں : میں نے عرض کی : جی ہاں ! نبی اکرم صلی اللہ علیہ وسلم نے فرمایا : تم قریب ہو جاؤ ! میں قریب ہو گیا ، نبی اکرم صلی اللہ علیہ وسلم نے فرمایا : میں تمہیں اللہ کا واسطہ دے کر دریافت کرتا ہوں ، اے عبداللہ بن سلام ! کیا تم نے تورات میں مجھے اللہ کا رسول نہیں پایا ہے ؟ میں نے آپ کی خدمت میں عرض کی : آپ ہمارے پروردگار کی صفات ہمارے سامنے بیان کیجئے ! راوی کہتے ہیں تو سیدنا جبرائیل علیہ السلام آئے ، اور نبی اکرم صلی اللہ علیہ وسلم کے سامنے ٹھہر گئے اور یہ آیات پڑھیں : ” تم یہ فرما دو ! کہ اللہ ایک ہے ، اللہ بے نیاز ہے ، اس نے کسی کو جنم نہیں دیا ہے اور نہ ہی اُس کو جنم دیا گیا ہے اور نہ ہی اُس کا کوئی ہمسر ہے “ ۔ نبی اکرم صلی اللہ علیہ وسلم نے ہمارے سامنے یہ سورت تلاوت کی ، تو سیدنا عبداللہ بن سلام رضی اللہ عنہ نے عرض کی : میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور بے شک آپ ، اللہ کے رسول ہیں ۔ ( علامہ ہیثمی فرماتے ہیں : ) میں یہ کہتا ہوں : اس کے بعد راوی نے پوری حدیث ذکر کی ہے ، جو آگے چل کر سیدنا عبداللہ بن سلام رضی اللہ عنہ کے مناقب سے متعلق باب میں مکمل روایت آئے گی ۔
یہ روایت امام طبرانی نے نقل کی ہے اور اس کے رجال ثقہ ہیں ، البتہ حمزہ نامی نے اپنے دادا سیدنا عبداللہ بن سلام رضی اللہ عنہ کا زمانہ نہیں پایا ہے ۔

سلمہ بن وردان بیان کرتے ہیں : سیدنا انس بن مالک رضی اللہ عنہ ، جو نبی اکرم صلی اللہ علیہ وسلم کے صحابی ہیں ، انہوں نے سلمہ کو یہ حدیث بیان کی کہ نبی اکرم صلی اللہ علیہ وسلم نے اپنے اصحاب میں سے ایک شخص سے سوال کیا اور فرمایا : اے فلاں ! کیا تم نے شادی کر لی ہے ؟ اس نے عرض کی : جی نہیں ! میرے پاس اتنا کچھ ہے ہی نہیں کہ جس کی مدد سے میں شادی کر سکوں ، تو نبی اکرم صلی اللہ علیہ وسلم نے دریافت کیا : کیا تمہیں سورت اخلاص نہیں آتی ہے ؟ اس نے عرض کی : جی ہاں ! نبی اکرم صلی اللہ علیہ وسلم نے فرمایا : یہ ایک چوتھائی قرآن ہے ، پھر آپ نے دریافت کیا : تمہیں سورت کافرون نہیں آتی ہے ؟ اس نے عرض کی : جی ہاں ! نبی اکرم صلی اللہ علیہ وسلم نے فرمایا : یہ ایک چوتھائی قرآن ہے ، پھر آپ نے دریافت کیا : کیا تمہیں سورت زلزال نہیں آتی ہے ؟ اس نے عرض کی : جی ہاں ! نبی اکرم صلی اللہ علیہ وسلم نے فرمایا : یہ ایک تہائی قرآن ہے ، پھر آپ نے دریافت کیا : کیا تمہیں سورت نصر نہیں آتی ہے ؟ اس نے عرض کی : جی ہاں ! نبی اکرم صلی اللہ علیہ وسلم نے فرمایا : یہ ایک چوتھائی قرآن ہے ، پھر نبی اکرم صلی اللہ علیہ وسلم نے دریافت کیا : کیا تمہیں آیت الکرسی نہیں آتی ہے ؟ اس نے عرض کی : جی ہاں ! نبی اکرم صلی اللہ علیہ وسلم نے فرمایا : یہ ایک چوتھائی قرآن ہے ، تم شادی کر لو ، تم شادی کر لو ، تم شادی کر لو ( یعنی یہ بات نبی اکرم صلی اللہ علیہ وسلم نے تین مرتبہ ارشاد فرمائی ) ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے صرف آیت الکرسی کے اختصار کے ساتھ نقل کی ہے اور یہ بات نقل کی ہے کہ سورت اخلاص ، ایک چوتھائی قرآن ہے ۔
یہ روایت امام أحمد نے نقل کی ہے اور سلمہ نامی راوی ضعیف ہے ۔

سیدنا عبداللہ بن عمرو رضی اللہ عنہ بیان کرتے ہیں : سیدنا ابوایوب انصاری رضی اللہ عنہ ایک محفل میں موجود تھے اور وہ یہ فرما رہے تھے : کیا ہم اس بات کی استطاعت نہیں رکھتے ؟ کہ روزانہ رات کے وقت ، ایک تہائی قرآن پڑھ لیا کریں ، لوگوں نے عرض کی : کیا ہم اس بات کی استطاعت رکھتے ہیں ؟ تو انہوں نے فرمایا : سورت اخلاص ایک تہائی قرآن ہے ، راوی بیان کرتے ہیں : اسی دوران نبی اکرم صلی اللہ علیہ وسلم تشریف لے آئے ، آپ صلی اللہ علیہ وسلم ، سیدنا ابوایوب انصاری رضی اللہ عنہ کی بات سن رہے تھے ، نبی اکرم صلی اللہ علیہ وسلم نے ارشاد فرمایا : ابوایوب نے ٹھیک کہا: ہے ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور اس میں ضعف پایا جاتا ہے ۔

سیدنا ابی بن کعب رضی اللہ عنہ ، یا شاید انصار سے تعلق رکھنے والے ایک صاحب کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” جو شخص سورت اخلاص پڑھ لیتا ہے ، تو وہ گویا ایک تہائی قرآن پڑھ لیتا ہے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدہ ام کلثوم بنت عقبہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” سورت اخلاص ، ایک تہائی قرآن کے برابر ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے امام أحمد کے رجال صحیح کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا تم میں سے کوئی ایک شخص یہ استطاعت نہیں رکھتا کہ وہ رات کے وقت قرآن کی تلاوت کے طور پر سورت اخلاص پڑھ لیا کرے ، کیونکہ یہ پورے قرآن کے برابر ہے “ ۔ اس کے بعد راوی نے پوری حدیث ذکر کی ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی عبیس بن میمون ہے اور وہ متروک ہے ۔

سیدنا انس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کیا تم میں سے کوئی شخص یہ استطاعت نہیں رکھتا کہ وہ روزانہ رات کے وقت تین مرتبہ سورت اخلاص پڑھ لیا کرے ، کیونکہ یہ ایک تہائی قرآن کے برابر ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبیس ہے اور وہ متروک ہے ۔ یہ مکمل روایت آگے چل کر ، برے کام کرنے والے لوگوں اور ظالموں کے مددگاروں سے متعلق باب میں ” کتاب الخلافہ “ میں آئے گی ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص سورت اخلاص پڑھ لے ، تو گویا اُس نے ایک تہائی قرآن پڑھ لیا “ ۔
یہ روایت امام بزار نے نقل کی ہے ، اس کی سند میں ایک راوی زکریا بن عطیہ ہے اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا تم میں سے کوئی ایک شخص یہ استطاعت نہیں رکھتا کہ وہ روزانہ رات کے وقت ایک تہائی قرآن پڑھ لیا کرے ؟ لوگوں نے عرض کی : یا رسول اللہ ! کون اس کی طاقت رکھتا ہے ؟ نبی اکرم صلی اللہ علیہ وسلم نے فرمایا : کیا وہ یہ استطاعت نہیں رکھتا کہ وہ سورت اخلاص پڑھ لیا کرے ، کیونکہ یہ ایک تہائی قرآن کے برابر ہے “ ۔
یہ روایت امام بزار نے ، امام طبرانی نے معجم کبیر اور معجم اوسط میں اختصار کے ساتھ نقل کی ہے ، ان دونوں کی مختلف اسانید ہیں ، جن میں سے ایک کے رجال صحیح کے رجال ہیں ، صرف عبداللہ بن أحمد کا معاملہ مختلف ہے اور وہ ثقہ اور امام ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سورت اخلاص ، ایک تہائی قرآن کے برابر ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں اس کے بعض راویوں کے بارے میں اختلاف پایا جاتا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سورت اخلاص ، ایک تہائی قرآن کے برابر ہے “ ۔
یہ روایت امام بزار نے ، اپنے استاد مفرج بن شجاع کے حوالے سے نقل کی ہے اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سورت اخلاص ، ایک تہائی قرآن کے برابر ہے ، سورت کافرون ایک چوتھائی قرآن کے برابر ہے “ ۔ راوی بیان کرتے ہیں : نبی اکرم صلی اللہ علیہ وسلم فجر کی دو رکعات ( سنتوں ) میں ، ان دونوں کی تلاوت کرتے تھے اور یہ فرماتے تھے : ” یہ دو رکعات وہ ہیں کہ ان میں ہمیشہ رغبت پائی جاتی ہے “ ۔ ( علامہ ہیثمی فرماتے ہیں : ) میں یہ کہتا ہوں : امام ترمذی نے اس میں سے ، صرف فجر کی دو رکعات ( سنتوں ) میں ان دونوں ( سورتوں ) کی تلاوت والا حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبیداللہ بن زحر ہے ، جسے ایک جماعت نے ثقہ قرار دیا ہے اور اس میں ضعف پایا جاتا ہے ۔