مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم کے زمانہ اقدس میں ہم ڈول اور کلہاڑی کو ” ماعون “ شمار کیا کرتے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے نقل کی ہے ، تاہم انہوں نے لفظ ” فاس “ نقل نہیں کیا ہے ۔
یہ روایت امام بزار نے اور امام طبرانی نے معجم اوسط میں نقل کی ہے ، امام طبرانی کے رجال صحیح کے رجال ہیں ۔

سیدہ حفصہ بنت سیرین رضی اللہ عنہا بیان کرتی ہیں : سیدہ ام عطیہ رضی اللہ عنہا نے ہم سے کہا: نبی اکرم صلی اللہ علیہ وسلم نے اس سے منع کیا تھا کہ ہم معمولی چیز روکیں ، میں نے دریافت کیا : معمولی چیز سے مراد کیا ہے ؟ انہوں نے فرمایا : وہ چیز ، جو لوگ عام طور پر ایک دوسرے کو دے دیتے ہیں ۔ اس روایت کی سند میں ایک راوی عبدالرحمن بن عمرو بن جبلہ ہے اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں ( ارشاد باری تعالیٰ ہے : ) ” اور وہ لوگ معمولی چیز نہیں دیتے ہیں “ ۔ سیدنا عبداللہ بن عباس رضی اللہ عنہما کہتے ہیں اس سے مراد عارضی استعمال کے لئے وہ چیز دینا ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا سعد بن ابی وقاص رضی اللہ عنہ بیان کرتے ہیں میں نے نبی اکرم صلی اللہ علیہ وسلم سے اللہ تعالیٰ کے اس فرمان کے بارے میں دریافت کیا ( ارشاد باری تعالیٰ ہے : ) ” وہ لوگ جو اپنی نمازوں سے غافل ہیں “ ۔ نبی اکرم صلی اللہ علیہ وسلم نے ارشاد فرمایا : اس سے مراد وہ لوگ ہیں جو نمازوں کو ان کے مخصوص اوقات میں ادا نہیں کرتے ہیں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عکرمہ بن ابراہیم ہے اور وہ انتہائی ضعیف ہے ۔ اس سے پہلے نماز سے متعلق باب میں ، اس روایت کے مختلف طرق گزر چکے ہیں ۔