مجمع الزوائد ومنبع الفوائد

سیدنا محمود بن لبید رضی اللہ عنہ بیان کرتے ہیں جب یہ سورت نازل ہوئی : ” کثرت کی طلب تمہیں غافل کر دے گی “ ۔ نبی اکرم صلی اللہ علیہ وسلم نے اسے پڑھا یہاں تک کہ آپ اس مقام تک پہنچے : ” پھر اس دن تم سے نعمتوں کے بارے میں حساب لیا جائے گا “ ۔ لوگوں نے عرض کی : یا رسول اللہ ! کون سی نعمتوں کے بارے میں ہم سے حساب لیا جائے گا ؟ ہمارے پاس تو یہ دو قسم کی چیزیں ہوتی ہیں ، کھجور اور پانی ، ہماری تلواریں ہماری گردنوں میں ہوتی ہیں ، دشمن سامنے موجود ہے ، تو پھر ہم سے کون سی نعمتوں کے بارے میں حساب لیا جائے گا ؟ نبی اکرم صلی اللہ علیہ وسلم نے ارشاد فرمایا : وہ ( نعمتیں ، تمہیں ) عنقریب مل جائیں گی ۔
یہ روایت امام أحمد نے نقل کی ہے ، اس کی سند میں ایک راوی محمد بن عمرو بن علقمہ ہے اور اس کی نقل کردہ حسن ہے اور اس میں ضعف پایا جاتا ہے کیونکہ اس کا حافظہ خراب ہے اس روایت کے بقیہ رجال صحیح کے رجال ہیں ۔

سیدنا عبداللہ بن زبیر رضی اللہ عنہما بیان کرتے ہیں جب یہ آیت نازل ہوئی : ” پھر تم سے اس دن نعمتوں کے بارے میں حساب لیا جائے گا “ ۔ تو سیدنا زبیر بن عوام رضی اللہ عنہ نے عرض کی ! یا رسول اللہ ! کون سی نعمتوں کے بارے میں ہم سے حساب لیا جائے گا ؟ ہمارے پاس تو یہ دو چیزیں ہیں ، پانی اور کھجور ؟ نبی اکرم صلی اللہ علیہ وسلم نے فرمایا : وہ ( نعمتیں ، تمہارے پاس ) عنقریب آ جائیں گی ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن بشار رمادی ہے ، جسے ابن حبان اور دیگر حضرات نے ثقہ قرار دیا ہے ، امام أحمد اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

حسن بیان کرتے ہیں : جب یہ آیت نازل ہوئی : ” پھر اُس دن تم سے نعمتوں کے بارے میں حساب لیا جائے گا “ ۔ لوگوں نے عرض کی : یا رسول اللہ ! کون سی نعمتوں کے بارے میں ہم سے حساب لیا جائے گا ؟ جبکہ ہماری تلواریں ، ہمارے کندھوں پر ہیں ۔ ۔ ۔ ۔ ۔ ۔ ، راوی بیان کرتے ہیں : اس کے بعد انہوں نے پوری حدیث ذکر کی ہے ۔
یہ روایت امام ابویعلیٰ نقل کی ہے اس کی سند میں ایک راوی اشعث بن براز ہے اور میں اس سے واقف نہیں ہوں ۔