مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے کچھ گھڑ سوار بھیجے ایک مہینہ گزر گیا ، لیکن ان کی طرف سے کوئی اطلاع نہیں آئی ، تو یہ سورت نازل ہوئی : ” ان کی قسم ہے ، جو دوڑتے ہیں اور ان کے سینے سے آواز نکلتی ہے “ ۔ ( سیدنا عبداللہ بن عباس رضی اللہ عنہما کہتے ہیں : ) یعنی ان کے پاؤں سے آواز نکلتی ہے ۔ ” جو پاؤں مار کر پتھروں میں سے آگ نکالتے ہیں “ ۔ سیدنا عبداللہ بن عباس رضی اللہ عنہما کہتے ہیں : یعنی اپنے پاؤں پتھروں پر مارتے ہیں ، تو اس سے چنگاریاں لپکتی ہیں ۔ ” اور صبح کے وقت حملہ کرنے والوں کی قسم ہے “ ۔ سیدنا عبداللہ بن عباس رضی اللہ عنہما کہتے ہیں : یعنی وہ صبح کے وقت دشمن پر حملہ کرتے ہیں ۔ ” پھر وہ غبار اڑاتے ہیں “ ۔ سیدنا عبداللہ بن عباس رضی اللہ عنہما کہتے ہیں : یعنی وہ اپنے پاؤں کے ذریعے مٹی اڑاتے ہیں ۔ ” اور پھر وہ دشمن کے درمیان گھس جاتے ہیں “ ۔ سیدنا عبداللہ بن عباس رضی اللہ عنہما کہتے ہیں : یعنی دشمن اکٹھا ہو چکا ہوتا ہے ( یا وہ دشمن کے درمیان گھس جاتے ہیں ) ۔
یہ روایت امام بزار نے نقل کی ہے ، اس کی سند میں ایک راوی حفص بن جمیع ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ کے سامنے لفظ ” کنود “ ( ناشکرا ) ذکر کیا گیا تو آپ صلی اللہ علیہ وسلم نے ارشاد فرمایا : ” اس سے مراد ، وہ شخص ہے ، جو اکیلا کھانا کھاتا ہے اور پیالے کو ( یعنی لوگوں کو کھانا کھلانے کو ) روکتا ہے اور اپنے غلام کو مارتا ہے “ ۔
یہ روایت امام طبرانی نے دو اسناد کے ساتھ نقل کی ہے جن میں سے ایک میں ایک راوی جعفر بن زبیر ہے اور وہ ضعیف ہے اور دوسری میں ایک راوی ایسا ہے جس سے میں واقف نہیں ہوں ۔