مجمع الزوائد ومنبع الفوائد

سیدنا ابوواقد لیثی رضی اللہ عنہ بیان کرتے ہیں : جب نبی اکرم صلی اللہ علیہ وسلم پر وحی نازل ہوتی تھی ، پھر ہم آپ کے پاس آتے تھے تو آپ ہمیں اس بارے میں بتایا کرتے تھے ، ایک دن آپ نے ہم سے فرمایا : ” بے شک اللہ تعالیٰ نے یہ ارشاد فرمایا ہے : ہم نے نماز قائم کرنے اور زکوۃ کی ادائیگی کے لئے مال کو نازل کیا ہے اور اگر کسی انسان کے پاس ( مال کی ) ایک وادی ہو ، تو وہ یہ خواہش کرے گا کہ اس کے پاس دوسری بھی ہو ، اور اگر اس کے پاس دو ہوں ، تو وہ یہ خواہش کرے گا کہ اس کے پاس ان دونوں کے ساتھ تیسری بھی ہو ، انسان کا پیٹ صرف مٹی بھر سکتی ہے اور جو شخص توبہ کرے ، اللہ تعالیٰ اس کی توبہ کو قبول کرتا ہے “ ۔
یہ روایت امام أحمد اور امام طبرانی نے نقل کی ہے امام أحمد کے رجال صحیح کے رجال ہیں ۔

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے یہ حکم دیا ہے ، میں تمہارے سامنے تلاوت کروں ، راوی کہتے ہیں : پھر نبی اکرم صلی اللہ علیہ وسلم نے میرے سامنے ( یہ آیات ) تلاوت کیں : ” اہل کتاب میں سے کفر کرنے والے لوگ اور مشرکین الگ ہونے والے نہ تھے ، یہاں تک کہ اُن کے پاس واضح نشانی آ گئی ( اور وہ نشانی ) اللہ کی طرف سے آنے والا رسول ہے ، جو پاکیزہ صحیفوں کی تلاوت کرتا ہے ، جن میں مستحکم احکام ہیں اور جن لوگوں کو کتاب دی گئی ، وہ تفرقہ کا شکار اُس کے بعد ہوئے ، جب اُن کے پاس واضح نشانی آ گئی “ ۔ بے شک اللہ تعالیٰ کے نزدیک دین وہ ہے ، جو باطل سے الگ ہو ، جس میں شرک نہ ہو ، جو یہودیت نہ ہو ، عیسائیت نہ ہو ، جو شخص بھلائی کرے گا ، تو اس بھلائی کا انکار نہیں کیا جائے گا ۔ شعبہ بیان کرتے ہیں : اس کے بعد انہوں نے مختلف باتیں بیان کیں ، پھر یہ کلمات پڑھے : ” اگر انسان کے پاس مال کی دو وادیاں ہوں ، تو وہ تیسری مانگے گا ، انسان کا پیٹ صرف مٹی بھر سکتی ہے “ ۔ اس کے بعد انہوں نے باقی رہ جانے والی سورت کی بھی تلاوت کی ۔

ایک روایت میں سیدنا ابی بن کعب رضی اللہ عنہ کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے یہ حکم دیا ہے کہ میں تمہارے سامنے قرآن پڑھوں ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق روایت کی ذکر کی ہے ، جس میں یہ الفاظ ہیں : ” اگر انسان ، مال کی ایک وادی مانگے اور وہ اُسے دیدی جائے ، تو وہ دوسری مانگے گا ، اگر وہ دوسری اسے دیدی جائے ، تو وہ تیسری مانگے گا “ ۔ باقی روایت حسب سابق ہے ۔ ( علامہ ہیثمی فرماتے ہیں : ) میں یہ کہتا ہوں : ترمذی میں اس کا کچھ حصہ منقول ہے اور ” صحیح “ میں اس کا ایک حصہ منقول ہے ۔
یہ روایت امام أحمد اور ان کے صاحبزادے نے نقل کی ہے ، اس کی سند میں ایک راوی عاصم بن بہدلہ ہے ، جسے ایک قوم نے ثقہ قرار دیا ہے اور دوسرے لوگوں نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں ایک شخص سیدنا عمر رضی اللہ عنہ کے پاس آیا اور ان سے ( مال وغیرہ ) مانگا ، سیدنا عمر رضی اللہ عنہ نے اس کا سر سے لے کر پاؤں تک بغور جائزہ لیا کہ کیا اس پر غربت کے آثار دکھائی دیتے ہیں ؟ پھر سیدنا عمر رضی اللہ عنہ نے اس سے دریافت کیا : تمہارے پاس کتنا مال ہے ؟ اس نے جواب دیا : چالیس اونٹ ہیں ، سیدنا عبداللہ بن عباس رضی اللہ عنہما کہتے ہیں : میں نے کہا: اللہ اور اس کے رسول نے سچ فرمایا ہے ( نبی اکرم ْ صلی اللہ علیہ وسلم نے فرمایا ہے : ) ” اگر انسان کے پاس سونے کی دو وادیاں ہوں ، تو وہ تیسری کی خواہش کرے گا ، انسان کا پیٹ صرف مٹی بھر سکتی ہے اور جو شخص توبہ کرے ، تو اللہ تعالیٰ اس کی توبہ قبول کرتا ہے “ ۔ سیدنا عمر رضی اللہ عنہ نے دریافت کیا : یہ کیا چیز ہے ؟ میں نے کہا: سیدنا ابی رضی اللہ عنہ نے مجھے یہ اسی طرح پڑھایا ہے ، راوی کہتے ہیں : پھر سیدنا عمر رضی اللہ عنہ ہمیں ساتھ لے کر سیدنا ابی رضی اللہ عنہ کے پاس گئے ، اور دریافت کیا : یہ کیا کہتا ہے ؟ سیدنا ابی رضی اللہ عنہ نے بتایا کہ اللہ کے رسول صلی اللہ علیہ وسلم نے مجھے اسی طرح پڑھایا ہے ، پھر انہوں نے دریافت کیا : کیا میں اسے مصحف میں نوٹ کر لوں ؟ انہوں نے جواب دیا : جی ہاں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک شخص سیدنا عمر رضی اللہ عنہ کے پاس آیا اور بولا: قحط سالی نے ہمیں نگل لیا ہے ، سیدنا عمر رضی اللہ عنہ نے دریافت کیا : تمہارا تعلق کہاں سے ہے ؟ سیدنا عمر رضی اللہ عنہ مسلسل اس کی شناخت جانتے رہے ، یہاں تک کہ وہ اس کو پہچان گئے تو وہ شخص خوشحال تھا ، سیدنا عمر رضی اللہ عنہ نے فرمایا : ” اگر انسان کے پاس ایک ، یا دو وادیاں ہوں ، تو وہ تیسری ساتھ ملانا چاہے گا ، انسان کا پیٹ صرف مٹی بھر سکتی ہے اور جو شخص توبہ کر لے ، تو اللہ تعالیٰ اس کی توبہ قبول کرتا ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے ، تا ہم اس میں سیدنا عمر رضی اللہ عنہ کے یہ الفاظ نہیں ہیں : ” جو شخص توبہ کر لے ، تو اللہ تعالیٰ اس کی توبہ قبول کرتا ہے “ ۔
یہ روایت امام أحمد نے نقل کی ہے اور اس کے رجال ثقہ ہیں ،
یہ روایت امام طبرانی نے معجم اوسط میں نقل کی ہے ۔