مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری یہ خواہش ہے کہ میری امت کے ہر ایک فرد کو یہ زبانی یاد ہو “ ۔ نبی اکرم صلی اللہ علیہ وسلم کی مراد سورت ملک تھی ۔
یہ روایت امام طبرانی نے نقل کی ہے اس کی سند میں ایک راوی ابراہیم بن حکم بن ابان ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قرآن کی ایک سورت ہے جو تیس آیات پر مشتمل ہے وہ اپنے پڑھنے والے شخص کے بارے میں جھگڑا کرے گی اور وہ اسے جنت میں داخل کروا دے گی اور وہ سورت ملک ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں نبی اکرم صلی اللہ علیہ وسلم کے زمانہ اقدس میں ہم اس سورت کو ( قبر کے عذاب سے ) ” رکاوٹ بننے والی “ کا نام دیتے تھے اور یہ اللہ کی کتاب میں موجود ایک سورت ہے جو شخص رات کے وقت اسے پڑھ لے گا تو وہ بکثرت ( تلاوت کرے گا ) اور عمدہ کام کرے گا ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں قبر میں آدمی کے پاس دو فرشتے پاؤں کی طرف سے آتے ہیں وہ یہ کہتے ہیں اس طرف سے اس کے پاس جانے کے لئے کوئی راستہ نہیں ہے کیونکہ یہ شخص سورت ملک پڑھا کرتا تھا پھر وہ پیٹ کی طرف سے آتے ہیں تو وہ یہ کہتا ہے کہ میرے پاس آنے کے لئے تمہارے پاس راستہ نہیں ہے کیونکہ وہ سورت ملک پڑھا کرتا تھا پھر وہ سر کی طرف سے آتا ہے تو کہتا ہے میری طرف آنے کے لئے تمہارے پاس راستہ نہیں ہے کیونکہ وہ سورت ملک پڑھا کرتا تھا ۔ سیدنا عبداللہ رضی اللہ عنہ کہتے ہیں تو یہ رکاوٹ بننے والی سورت ہے جو قبر کے عذاب کو روک دیتی ہے اور تورات میں یہ سورت ملک تھی جو شخص رات کے وقت اسے پڑھ لیتا ہے وہ بکثرت اور پاکیزہ کام کرتا ہے ۔

ایک روایت میں یہ الفاظ ہیں : ایک شخص مر گیا عذاب کے فرشتے اس کے پاس آئے اور اس کے سرہانے بیٹھے تو اس نے کہا: تم اس تک نہیں جا سکتے کیونکہ یہ سورت ملک پڑھا کرتا تھا ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام طبرانی نے نقل کی ہے اس کی سند میں ایک راوی عاصم بن بہدلہ ہے اور وہ ثقہ ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔