مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : جب یہ آیت نازل ہوئی ( ارشاد باری تعالیٰ ہے : ) ” پہلے والوں میں سے ایک گروہ ، اور بعد والوں میں سے تھوڑے سے لوگ “ ۔ تو یہ بات مسلمانوں پر گراں گزری ، تو یہ آیت نازل ہوئی : ” پہلے والوں میں سے ایک گروہ ، اور بعد والوں میں سے ایک گروہ “ ۔
یہ روایت امام أحمد نے محمد بیاع کی اپنے والد سے نقل کردہ روایت کے طور پر نقل کی ہے اور میں ان دونوں سے واقف نہیں ہوں اس کے بقیہ رجال ثقہ ہیں ۔

سیدنا ابوبکره رضی اللہ عنہ نبی اکرم صلی اللہ علیہ وسلم کے حوالے سے ، اللہ تعالیٰ کے اس فرمان کے بارے میں نقل کرتے ہیں : ” پہلے والوں میں سے ایک گروہ اور بعد والوں میں سے ایک گروہ “ ۔ نبی اکرم صلی اللہ علیہ وسلم نے ارشاد فرمایا : یہ دونوں گروہ اس امت سے تعلق رکھتے ہیں ۔
یہ روایت امام طبرانی نے دو اسناد کے ساتھ نقل کی ہے ، جن میں سے ایک کے رجال صحیح کے رجال ہیں ، صرف علی بن زید کا معاملہ مختلف ہے اور وہ ثقہ ہے ، لیکن خراب حافظے کا مالک ہے ۔