مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے جب قوم عاد پر وہ ہوا بھیجی ، جس میں وہ ہلاکت کا شکار ہوئے ، تو اس کے صرف اتنے حصے کو کھولا گیا تھا ، جتنی ایک انگوٹھی کی جگہ ہوتی ہے ، وہ دیہاتی لوگوں کے پاس سے گزری ، تو اس نے ان کے جانور اور اموال ، زمین اور آسمان کے درمیان اٹھا لیے ، جب شہری لوگوں نے اس ہوا کو دیکھا تو انہوں نے کہا: یہ تو بادل ہے جو ہم پر بارش نازل کرے گا تو اس ہوا نے دیہاتی لوگوں کو اور ان کے جانوروں کو شہری لوگوں پر ڈال دیا “ ۔
یہ روایت امام طبرانی نے نقل کی ہے اس کی سند میں ایک راوی مسلم ملائی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے قوم عاد پر جو ہوا بھیجی تھی ، وہ صرف اتنی جگہ تھی ، جتنی انگوٹھی جتنی جگہ ہوتی ہے ، اللہ تعالیٰ نے ان پر وہ ہوا بھیجی اس نے دیہاتی لوگوں کو اٹھایا اور شہر کی طرف لے آئی ، جب شہر والوں نے اس کو دیکھا ، تو انہوں نے کہا: یہ تو بادل لگتا ہے ، جو ہم پر بارش کرے گا ، جو ہماری وادیوں کی طرف آ رہا ہے ، اور اس ہوا میں دیہاتی لوگ تھے ، تو اس ہوا نے دیہاتی لوگوں کو شہری لوگوں پر ڈال دیا یہاں تک کہ وہ لوگ ہلاکت کا شکار ہو گئے “ ۔ نبی اکرم صلی اللہ علیہ وسلم نے ارشاد فرمایا : اس ہوا نے اپنے نگران فرشتوں کی نافرمانی کی ، یہاں تک کہ وہ دروازوں کے درمیان میں سے نکل آئی ۔
یہ روایت امام طبرانی نے نقل کی ہے اس کی سند میں ایک راوی مسلم ملائی ہے اور وہ ضعیف ہے ۔