مجمع الزوائد ومنبع الفوائد

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے اللہ تعالیٰ کے اس فرمان کے بارے میں بیان کیا ہے : ( ارشاد باری تعالیٰ ہے : ) ” ان کی مخصوص نشانی ، ان کے چہروں پر موجود سجدے کا نشان ہے “ ۔ نبی اکرم صلی اللہ علیہ وسلم نے ارشاد فرمایا اس سے مراد قیامت کے دن نور ہے ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی رؤاد بن جراح ہے ، جسے ابن حبان اور دیگر حضرات نے ثقہ قرار دیا ہے ، امام دارقطنی رحمہ اللہ اور دیگر حضرات نے اسے ضعیف کہا: ہے ۔

جعید بن عبدالرحمن بیان کرتے ہیں : میں سائب بن یزید کے پاس موجود تھا ، اسی دوران زبیر بن سہیل بن عبدالرحمن بن عوف تشریف لائے ، ان کے چہرے پر سجدے کا نشان موجود تھا ، جب سائب نے انہیں دیکھا تو دریافت کیا : یہ کون ہے ؟ انہیں بتایا گیا یہ زبیر ہیں ، تو انہوں نے فرمایا : اس نے اپنے چہرے کو خراب کر لیا ہے ، اللہ کی قسم ! جس نشان کا ذکر اللہ تعالیٰ نے کیا ہے ، اُس سے مراد یہ والا نشان نہیں ہے ، میں اسی سال سے نماز پڑھ رہا ہوں ، لیکن میری دونوں آنکھوں کے درمیان تو کوئی نشان نہیں بنا ۔
یہ روایت امام طبرانی نے نقل کی ہے اور اس کے رجال ثقہ ہیں ۔