مجمع الزوائد ومنبع الفوائد

عباد بن عبداللہ بن زبیر بیان کرتے ہیں : حارث بن خزمہ سورت بقرہ کی یہ آخری دو آیات ساتھ لے کر سیدنا عمر بن خطاب رضی اللہ عنہ کے پاس آئے ۔ ” تمہارے پاس رسول آیا جو تم میں سے ہے “ ۔ سیدنا عمر رضی اللہ عنہ نے دریافت کیا : اس کا گواہ تمہارے علاوہ اور کون ہے ؟ انہوں نے جواب دیا : مجھے نہیں معلوم لیکن اللہ کی قسم ! میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کی زبانی یہ آیت سنی ہے اسے محفوظ رکھا ہے ، اور یاد رکھا ہے ، تو سیدنا عمرو رضی اللہ عنہ نے کہا: میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کی زبانی یہ آیت سنی ہے پھر سیدنا عمر رضی اللہ عنہ نے کہا: اگر یہ تین آیات ہوتیں تو میں انہیں الگ سے ایک سورت بنا دیتا تم لوگ قرآن کی اس سورت کا جائزہ لو اور اسے اس میں شامل کر دو ، تو میں اس کو سورت توبہ کے آخر میں شامل کرتا ہوں ۔
یہ روایت امام أحمد نے نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے اس روایت کے بقیہ رجال ثقہ ہیں ۔

سیدنا ابی بن کعب رضی اللہ عنہ بیان کرتے ہیں : ان لوگوں نے سیدنا ابوبکر رضی اللہ عنہ کے عہد خلافت میں قرآن کو مصحف کی شکل میں جمع کرنا شروع کیا کچھ لوگ لکھتے تھے اور سیدنا ابی رضی اللہ عنہ انہیں املاء کرواتے تھے جب وہ لوگ سورت توبہ کی اس آیت پر پہنچے ( ارشاد باری تعالیٰ ہے : ) ” پھر وہ پلٹ جاتے ہیں اللہ تعالیٰ نے ان کے دلوں کو پھیر دیا ہے اس کی وجہ یہ ہے ، وہ ایسے لوگ ہیں جو سمجھ بوجھ نہیں رکھتے ہیں “ ۔ تو لوگوں نے گمان کیا کہ شاید یہ قرآن میں نازل ہونے والا آخری حصہ ہے ( یعنی اس سورت کا آخری حصہ ہے ) تو سیدنا ابی بن کعب رضی اللہ عنہ نے ان لوگوں سے کہا: نبی اکرم صلی اللہ علیہ وسلم نے اس کے بعد دو آیات مجھے سکھائیں تھیں ( اور وہ یہ ہیں : ارشاد باری تعالٰی ہے : ) ” تمہارے پاس ایک رسول آیا ہے جو تم میں سے ہے اور تمہارا مشقت کا شکار ہونا اس پر گراں گزرتا ہے وہ تمہاری ( بھلائی اور بہتری ) کا شدید خواہش مند ہے ، اور اہل ایمان کے بارے میں مہربان رحم کرنے والا ہے “ ۔ یہ آیت یہاں تک ہے : ” اور وہ عظیم پروردگار کا مالک ہے “ ۔ پھر سیدنا ابی رضی اللہ عنہ نے بتایا کہ یہ قرآن میں سے نازل ہونے والا آخری حصہ ہے ( یعنی اس سورت کا آخری حصہ ہے ) راوی بیان کرتے ہیں : تو اس طرح اس سورت کا اختتام اس چیز کے ذریعے ہوتا ہے جس کے ذریعے اللہ تعالیٰ نے اس سورت کا آغاز کیا تھا کہ اللہ کی ذات وہ ہے جس کے علاوہ اور کوئی معبود نہیں ہے ، اور اس سے مراد اللہ تعالیٰ کا یہ فرمان ہے : ” اور ہم نے تم سے پہلے جس بھی رسول کو مبعوث کیا تو اس کی طرف یہی بات وحی کی گئی کہ میرے علاوہ کوئی معبود نہیں ہے ، تو تم لوگ میری عبادت کرو “ ۔
یہ روایت عبداللہ بن أحمد نے نقل کی ہے ۔ اس کی سند میں ایک راوی محمد بن جابر انصاری ہے ، اور وہ ضعیف ہے ۔

سیدنا ابی بن کعب رضی اللہ عنہ بیان کرتے ہیں : آخر میں یہ آیت نازل ہوئی : ” تمہارے پاس رسول آیا جو تم میں سے ہے “ ۔
یہ روایت عبداللہ بن أحمد نے اور امام طبرانی نے نقل کی ہے ۔ اس کی سند میں ایک راوی علی بن زید بن جدعان ہے ، اور وہ ثقہ ہے ، اور خراب حافظے کا مالک ہے اس روایت کے بقیہ رجال ثقہ ہیں ۔