مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم سے اصحاب اعراف کے بارے میں دریافت کیا گیا تو آپ نے ارشاد فرمایا : یہ وہ لوگ ہوں گے جنہیں اللہ کی راہ میں قتل کر دیا جائے گا یہ اپنے باپ دادا کے نافرمان ہوں گے ، تو شہادت انہیں اس چیز سے روک دے گی کہ وہ جہنم میں جائیں اور گناہ ( یا آبا ؤ اجداد کی نافرمانی ) انہیں اس چیز سے روک دے گی کہ وہ جنت میں داخل ہوں ، تو وہ لوگ جنت اور جہنم کے درمیان موجود فصیل پر ہوں گے یہاں تک کہ ان کے گوشت اور چربی پگھل جائیں گے یہ اس وقت تک ہو گا جب تک اللہ تعالیٰ مخلوق کا حساب کر کے فارغ ہو گا جب وہ اپنی مخلوق کا حساب کر کے فارغ ہو جاتا ، تو ان لوگوں کے علاوہ اور کوئی باقی نہیں رہا ہو گا ، تو اس وقت اللہ تعالیٰ انہیں اپنی رحمت کے ذریعے ڈھانپ لے گا اور اپنی رحمت کے وسیلے سے انہیں جنت میں داخل کر دے گا “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی محمد بن مخلد رعینی ہے ، اور وہ ضعیف ہے ۔

عمر بن عبدالرحمن بن مدنی اپنے والد کے حوالے سے یہ بات نقل کرتے ہیں نبی اکرم صلی اللہ علیہ وسلم سے اصحاب اعراف کے بارے میں دریافت کیا گیا تو آپ نے ارشاد فرمایا : ” یہ وہ لوگ ہوں گے جو اللہ کی راہ میں شہید ہو جائیں گے اور یہ اپنے باپ دادا کے نافرمان ہوں گے اور باپ دادا کی نافرمانی ان کو جنت میں جانے سے روک دے گی اور اللہ کی راہ میں قتل ہونا انہیں جہنم میں جانے سے روک دے گا “ ۔
یہ روایت امام طبرانی نے نقل کی ہے اس کا ایک راوی ابومعشر نجیح ہے ، اور وہ ضعیف ہے ۔