مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : پہلے ہم کبیرہ گناہوں کے مرتکبین کے لئے دعائے مغفرت کرنے سے رکے رہتے تھے یہاں تک کہ ہم نے نبی اکرم صلی اللہ علیہ وسلم کو یہ آیت تلاوت کرتے ہوئے سنا : ” بے شک اللہ اس بات کی مغفرت نہیں کرے گا کہ کسی کو اس کا شریک قرار دیا جائے اور وہ اس کے علاوہ جس کی چاہے گا مغفرت کر دے گا “ ۔ نبی اکرم صلی اللہ علیہ وسلم نے یہ بھی ارشاد فرمایا : ” میں نے اپنی مخصوص دعا کو اپنی امت سے تعلق رکھنے والے کبیرہ گناہوں کے مرتکبین افراد کی شفاعت کے لئے سنبھال کے رکھ لیا ہے “ ۔ ( سیدنا عبداللہ بن عمر رضی اللہ عنہما فرماتے ہیں : ) تو پہلے ہم بہت سے امور کے حوالے سے رکے رہتے تھے ، بعد میں ہم نے ان کے بارے میں بات چیت کرنا شروع کر دی اور یہ امید رکھی ( کہ ان کی مغفرت ہو جائے گی ) ۔
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں صرف حرب بن سریج کا معاملہ مختلف ہے ، اور وہ ثقہ ہے ۔

سیدنا ابوایوب رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : میرا ایک بھتیجا ہے جو کسی حرام کام کے ارتکاب سے باز نہیں آتا نبی اکرم صلی اللہ علیہ وسلم نے دریافت کیا اس کا دین کیا ہے اس شخص نے بتایا وہ اللہ تعالیٰ کی وحدانیت کا اعتراف کرتا ہے ، اور نماز ادا کرتا ہے نبی اکرم صلی اللہ علیہ وسلم نے فرمایا : پھر تم اس سے اس کا دین طلب کرو اگر وہ نہ مانے تو تم وہ اس سے خرید لینا اس شخص نے اپنے بھتیجے سے اس کا دین مانگا اس نے انکار کر دیا وہ شخص نبی اکرم صلی اللہ علیہ وسلم کے پاس آیا اور آپ کو اس بارے میں بتایا اس نے عرض کی : میں نے اس کو پایا ہے کہ وہ اپنے دین کے بارے میں لگاؤ رکھتا ہے ، تو اس بارے میں یہ آیت نازل ہوئی : ” بے شک اللہ تعالیٰ اس بات کی مغفرت نہیں کرے گا کہ کسی کو اس کا شریک قرار دیا جائے اور وہ اس کے علاوہ جس کی چاہے گا مغفرت کر دے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی واصل بن سائب ہے ، اور وہ ضعیف ہے ۔