مجمع الزوائد ومنبع الفوائد

سیدنا عبداللہ بن عباس رضی اللہ عنہما فرماتے ہیں : نبی اکرم صلی اللہ علیہ وسلم کو سورت کے ختم ہونے کا اس وقت تک پتہ نہیں چلتا تھا جب تک «بسم الله الرحمن الرحيم» نازل نہیں ہو گئی جب «بسم الله الرحمن الرحيم» نازل ہو جاتی تو آپ کو یہ پتہ چل جاتا کہ سورت ختم ہو گئی ہے ، اور اب نئے سرے سے اگلی سورت شروع ہو گی ۔
( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت میں سے یہ حصہ نقل کیا ہے : ” سورت کے خاتمے کا پتہ نہیں چلتا تھا یہاں تک کہ «بسم الله الرحمن الرحيم» نازل ہو گئی “ ۔
یہ روایت امام بزار نے دو اسناد کے ساتھ نقل کی ہے جن میں سے ایک کے رجال صحیح کے رجال ہیں ۔ اس موضوع سے متعلق کچھ احادیث کتاب الصلوٰۃ میں گزر چکی ہیں ۔

سیدنا ابن جابر رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ نے پانی بہایا تھا ( یعنی آپ قضائے حاجت کر کے آئے تھے ) میں نے عرض کی : السلام علیک یا رسول اللہ ! آپ نے مجھے جواب نہیں دیا میں نے عرض کی : یا رسول اللہ ! آپ پر سلام ہو آپ نے مجھے جواب نہیں دیا میں نے عرض کی : یا رسول اللہ ! آپ پر سلام ہو آپ نے مجھے جواب نہیں دیا پر نبی اکرم صلی اللہ علیہ وسلم پیدل چلتے ہوئے تشریف لے گئے میں آپ کے پیچھے تھا ۔ نبی اکرم صلی اللہ علیہ وسلم پلان میں داخل ہوئے میں مسجد میں داخل ہو گیا ۔ پریشان اور غمگین بیٹھا ہوا تھا اسی دوران نبی اکرم صلی اللہ علیہ وسلم میرے پاس تشریف لائے آپ وضو کر چکے تھے آپ نے فرمایا : تم پر بھی سلام ہو اور اللہ کی رحمتیں ہوں تم پر بھی سلام ہو اور اللہ کی رحمتیں ہوں اور تم پر بھی سلام ہو اور اللہ کی رحمتیں ہوں پھر آپ نے ارشاد فرمایا : اے عبداللہ بن جابر کیا میں تمہیں قرآن میں موجود سب سے زیادہ بہتر سورت کے بارے میں نہ بتاؤں ؟ میں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے فرمایا : تم «الحمد لله رب العالمين» پڑھو ! یہاں تک کہ آپ نے پوری سورت کو پڑھ لیا ۔
یہ روایت امام أحمد نے نقل کی ہے ۔ اس کی سند میں ایک راوی عبداللہ بن محمد بن عقیل ہے ، اور وہ خراب حافظے کا مالک ہے اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدنا ابوزید رضی اللہ عنہ جنہیں صحابی ہونے کا شرف حاصل ہے وہ بیان کرتے ہیں : میں نبی اکرم صلی اللہ علیہ وسلم کے ساتھ مدینہ منورہ کی کسی گلی سے گزر رہا تھا آپ نے ایک شخص کو تہجد کی نماز میں «سورة الفاتحة» کی تلاوت کرتے ہوئے سنا ، نبی اکرم صلی اللہ علیہ وسلم کھڑے ہو گئے ، آپ غور سے تلاوت سنتے رہے ، اس شخص نے اس سورت کو مکمل پڑھ لیا تو نبی اکرم صلی اللہ علیہ وسلم نے ارشاد فرمایا : ” قرآن میں اس جیسی کوئی اور سورت نہیں ہے “ ۔
علامہ ہیثمی فرماتے ہیں : یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسن بن دینار ہے اور وہ ضعیف ہے ۔

عبداللہ بن شقیق بیان کرتے ہیں : انہیں ان صاحب نے یہ بات بتائی ہے جنہوں نے نبی اکرم صلی اللہ علیہ وسلم کو ارشاد فرماتے ہوئے سنا : آپ اس وقت وادی قری میں موجود تھے ، آپ اس وقت اپنے گھوڑے پر سوار تھے ، بلقین سے تعلق رکھنے والے ایک شخص نے آپ سے سوال کیا ، اس نے نبی اکرم صلی اللہ علیہ وسلم سے دریافت کیا یہ کون لوگ ہیں ؟ تو نبی اکرم صلی اللہ علیہ وسلم نے ارشاد فرمایا : یہ وہ لوگ ہیں جن پر غضب نازل ہوا تھا ، نبی اکرم صلی اللہ علیہ وسلم نے یہودیوں کی طرف اشارہ کیا ، اس نے دریافت کیا یہ کون لوگ ہیں ؟ نبی اکرم صلی اللہ علیہ وسلم نے فرمایا : یہ گمراہ ہیں ، نبی اکرم صلی اللہ علیہ وسلم کی مراد عیسائی لوگ تھے ، پھر ایک شخص آپ کی خدمت میں حاضر ہوا ، اس نے عرض کی : آپ کے فلاں غلام نے جام شہادت نوش کر لیا ہے ، یہاں ایک لفظ کے بارے میں راوی کو شک ہے لیکن مفہوم یہی ہے ، تو نبی اکرم صلی اللہ علیہ وسلم نے ارشاد فرمایا : جی نہیں ! بلکہ اسے اس کی وجہ سے گھسیٹ کر جہنم کی طرف لے جایا جائے گا جو عباء اس نے خیانت کے طور پر حاصل کی تھی ۔

ایک روایت جو اسی سند کے ساتھ منقول ہے اس میں یہ مذکور ہے : بلقین سے تعلق رکھنے والے ایک شخص نے آپ سے سوال کیا اس نے عرض کی : یا رسول اللہ ! یہ کون لوگ ہیں جن پر غضب نازل کیا گیا ؟ تو نبی اکرم صلی اللہ علیہ وسلم نے یہودیوں کی طرف اشارہ کیا ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ پوری روایت امام أحمد نے نقل کی ہے ، اور ان تمام روایات کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کے سامنے لفظ «مَالِكِ يَوْمِ الدِّينِ» یعنی الف کے ساتھ اسے پڑھا اور «غَيْرِ الْمَغْضُوبِ عَلَيْهِم» پڑھا ، یعنی یہ زیر کے ساتھ ہے ۔
علامہ ہیثمی فرماتے ہیں : یہ روایت امام طبرانی نے نقل کی ہے ۔ اس کی سند میں ایک راوی فیاض بن غزوان ہے اور وہ ضعیف ہے ، اس کے علاوہ راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : ارشاد باری تعالی ہے : «وَلَقَدْ آتَيْنَاكَ سَبْعًا مِّنَ الْمَثَانِي وَالْقُرْآنَ الْعَظِيمَ» ، تحقیق ہم نے تمہیں دو مرتبہ پڑھی جانے والی سات آیات عطا کی ہیں ، سیدنا عبداللہ بن عباس رضی اللہ عنہما فرماتے ہیں : اس سے مراد «سورة الفاتحة» ہے ۔
علامہ ہیثمی فرماتے ہیں : یہ روایت امام طبرانی نے نقل کی ہے ۔ اس کی سند میں ایک راوی ابوسعید بقال ہے اور وہ مدلس ہے ۔

سیدنا ابوہریرہ رضی اللہ عنہ فرماتے ہیں : جب سورت فاتحہ نازل ہوئی تھی اس وقت ابلیس رویا تھا یہ سورت مدینہ منورہ میں نازل ہوئی تھی ۔
یہ روایت امام طبرانی نے معجم اوسط میں نقل کی ہے ، اور یہ مرفوع روایت کے ساتھ مشابہت رکھتی ہے ، اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی بچہ پیدا ہوتا ہے اس کے سر کے جوڑوں پر ، سورت فاتحہ کی پانچ آیات لکھی ہوئی ہوتی ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ولید بن ولید ہے ، جسے ابوحاتم اور ابن حبان نے قرار دیا ہے ، اور ایک جماعت نے اسے متروک قرار دیا ہے اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سورت فاتحہ اور سورت اخلاص پڑھ لیتا ہے وہ گویا ایک تہائی قرآن پڑھ لیتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن أحمد واسطی ہے ، اور وہ متروک ہے ۔