مجمع الزوائد ومنبع الفوائد

سیدنا معقل بن یسار رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” سورت بقرہ قرآن کی کوہان اور اس کی چوٹی ہے اس کی ہر ایک آیت کے ساتھ اسی فرشتے نازل ہوئے اور آیت الکرسی کو عرش کے نیچے سے نکالا گیا اور سورت بقرہ کے ساتھ ملا دیا گیا اور سورت یسین قرآن کا دل ہے جو بھی شخص اللہ تعالیٰ اور آخرت کے ( اجر و ثواب ) حصول کے لئے اس کی تلاوت کرے گا اس کی مغفرت ہو جائے گی تم اپنے مرحومین پر ( یا قریب المرگ افراد پر ) اس کی تلاوت کرو “ ۔
( علامہ ہیثمی فرماتے ہیں : ) میں یہ کہتا ہوں : سنن ابوداؤد میں اس کا ایک حصہ منقول ہے ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے اس روایت کے بقیہ رجال صحیح کے رجال ہیں
یہ روایت امام طبرانی نے بھی نقل کی ہے ، اور انہوں نے مبہم راوی کا ذکر ساقط کیا ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر چیز کی ایک کوہان ہوتی ہے ، اور قرآن کی کوہان سورت بقرہ ہے جو شخص اپنے گھر میں رات کے وقت اسے پڑھ لے گا ، تو شیطان تین راتوں تک اس گھر میں داخل نہیں ہو گا اور جو شخص اپنے گھر میں دن کے وقت اسے پڑھ لے گا ، تو شیطان تین دن تک اس گھر میں داخل نہیں ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی سعید بن خالد خزاعی مدنی ہے ، اور وہ ضعیف ہے ۔

سیدنا عبداللہ بن مغفل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” وہ گھر جس میں سورت بقرہ کی تلاوت کی جاتی ہے اس رات میں شیطان اس گھر میں داخل نہیں ہوتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عدی بن فضل ہے ، اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے سورت بقرہ کی آخری آیات ، عرش کے نیچے موجود خزانے سے عطا کی گئی ہیں یہ مجھ سے پہلے کسی نبی کو عطا نہیں کی گئی ہیں “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے امام أحمد کے رجال صحیح کے رجال ہیں ۔

سیدنا عقبہ بن عامر جہنی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے ارشاد فرمایا : ” سورت بقرہ کی آخری دو آیات تلاوت کرو کیونکہ یہ دونوں مجھے عرش کے نیچے سے عطا کی گئی ہیں “ ۔

ایک روایت میں یہ الفاظ ہیں : میں نے نبی اکرم صلی اللہ علیہ وسلم کو منبر پر یہ ارشاد فرماتے ہوئے سنا : ” تم دو آیات تلاوت کرو “ ۔ اس کے بعد راوی نے حسب سابق حدیث ذکر کی ہے ۔
یہ روایت امام أحمد امام ابویعلیٰ اور امام طبرانی نے نقل کی ہے ۔ اس کی سند میں ایک راوی سلمہ بن فضل ہے ، جسے ابن حبان نے ثقہ قرار دیا ہے وہ کہتے ہیں : یہ غلطی کر جاتا ہے ایک جماعت نے اسے ضعیف کہا: ہے ابن لہیعہ نے اس کی متابعت کی ہے ، تو یہ حدیث حسن ہو گی ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” دو آیات ہیں جو مجھے عرش کے نیچے موجود ایک گھر کے خزانے سے عطا کی گئی ہیں ، اور یہ دونوں مجھ سے پہلے کسی ( اور ) نبی کو عطا نہیں کی گئی ہیں “ ۔ راوی بیان کرتے ہیں : نبی اکرم صلی اللہ علیہ وسلم کی مراد سورت بقرہ کی آخری دو آیات تھیں ۔

ایک روایت میں یہ الفاظ ہیں : سورت بقرہ کی اختتامی آیات مجھے ایک گھر سے عطا کی گئی ہیں “ ۔ یہ تمام روایات امام أحمد نے مختلف اسانید کے ساتھ نقل کی ہیں جن میں سے ایک کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص سورت بقرہ کی آخری آیات رات کے وقت تلاوت کر لیتا ہے ، تو وہ بکثرت ( تلاوت کرتا ہے ) اور اچھا کام کرتا ہے ۔
یہ روایت امام طبرانی نے نقل کی ہے ۔ اس کی سند میں ایک راوی مسعودی ہے ، جو اختلاط کا شکار ہو گیا تھا ۔

سیدنا شداد بن اوس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے آسمانوں اور زمین کو پیدا کرنے سے دو ہزار سال پہلے ایک کتاب تحریر کی اور اس میں سے دو آیات نازل کیں جن کے ذریعے سورت بقرہ ختم ہوتی ہے یہ دونوں آیات جس گھر میں تلاوت کی جائیں گی تو تین راتوں تک وہاں شیطان نہیں آئے گا “ ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا عقبہ بن عامر رضی اللہ عنہ بیان کرتے ہیں : سورت بقرہ کی آخری دو آیات یعنی «آمَنَ الرَّسُولُ» [البقرة: 285] سے لے کر اس کے ختم ہونے تک ، انہیں بار بار پڑھو کیونکہ اللہ تعالیٰ نے یہ بطور خاص سیدنا محمد صلی اللہ علیہ وسلم کو عطا کی ہیں ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بن حارث بن سوید حاسب مہری ہے ، اور میں اس سے واقف نہیں ہوں اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تم میں سے کسی ایک شخص کو ایسی حالت میں ہرگز نہ پاؤں کہ اس نے اپنا ایک پاؤں دوسرے پر رکھا ہوا ہو اور پھر وہ گنگنا رہا ہو اور اس نے سورت بقرہ کو پڑھنا ترک کر دیا ہو “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے ، اور ایسے راوی بھی ہیں جن سے میں واقف نہیں ہوں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دو چمک دار چیزوں سورت بقرہ اور سورت آل عمران کا علم حاصل کرو کیونکہ قیامت کے دن یہ دونوں یوں آئیں گی جیسے یہ دونوں دو بادل ہیں ( یہاں ایک لفظ کے بارے میں راوی شک ہے ) یا یہ پرندوں کی دو قطاریں ہیں ، اور یہ دونوں اپنے پڑھنے والے کی طرف سے بحث کریں گی ، تم لوگ سورت بقرہ سیکھو کیونکہ اس کو حاصل کرنا برکت ہے ، اور اسے ترک کر دینا حسرت ہے ، اور باطل لوگ ( یعنی جادوگر اس کو سیکھنے کی ) استطاعت نہیں رکھتے ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی عاصم بن ہلال بارقی ہے ، جسے ابوحاتم اور دیگر حضرات نے ثقہ قرار دیا ہے یحییٰ بن معین اور دیگر حضرات نے اسے ضعیف کہا: ہے ، اور ایک راوی عبدالرحمن بن خلاد ہے ، اور ایک راوی عمرو بن مخلد لیثی ہے میں ان دونوں سے واقف نہیں ہوں ۔

امام طبرانی نے معجم اوسط میں یہ روایت سیدنا انس رضی اللہ عنہ کے حوالے سے اس کی مانند نقل کی ہے ، اور اس روایت میں ایک راوی مبارک بن سحیم ہے ، اور وہ متروک ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں تم میں سے کسی ایک شخص کو ایسی حالت میں ہرگز نہ پاؤں کہ اس نے اپنا ایک پاؤں دوسرے پر رکھا ہوا ہو اور وہ گنگنا رہا ہو اور اس نے سورت بقرہ پڑھنی چھوڑ دی ہو “ ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایسے راوی ہیں جن سے میں واقف نہیں ہوں ۔