مجمع الزوائد ومنبع الفوائد

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دس درہم سے کم ( قیمت والی چیز کی چوری ) پر ہاتھ نہیں کاٹا جائے گا “ ۔
یہ روایت امام أحمد نے نقل کی ہے ۔ اس کی سند میں ایک راوی حجاج بن ارطاۃ ہے ، اور وہ مدلس ہے ، اور ایک راوی نصر بن باب ہے ، جسے جمہور نے ضعیف قرار دیا ہے امام أحمد کہتے ہیں : اس میں کوئی حرج نہیں ہے ۔

عراک بیان کرتے ہیں : انہوں نے حج کے موقع پر مروان کو یہ کہتے ہوئے سنا : نبی اکرم صلی اللہ علیہ وسلم نے ایک ڈھال کی چوری پر ہاتھ کٹوا دیا تھا اور اونٹ تو ڈھال سے مہنگا ہوتا ہے ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : ہاتھ صرف ایک دینار ، یا دس درہم ( قیمت والی چیز کی چوری ) پر کاٹا جائے گا ۔
یہ روایت امام طبرانی نے نقل کی ہے یہ موقوف ہے قاسم ابوعبدالرحمن نامی راوی ضعیف ہے ، ویسے اس کی توثیق کی گئی ہے ۔

زحر بن ربیعہ بیان کرتے ہیں : سیدنا عبداللہ بن مسعود رضی اللہ عنہ نے انہیں بتایا : نبی اکرم صلی اللہ علیہ وسلم نے ارشاد فرمایا : ” ایک دینار یا دس درہم ( قیمت والی چیز چوری کرنے ) پر ہاتھ کاٹا جائے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن داؤد شاذ کونی ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” صرف ( یعنی کم از کم ) دس درہم ( قیمت والی چیز چوری کرنے ) پر ہاتھ کاٹا جائے گا “ ۔
یہ روایت امام طبرانی نے معجم اوسط میں نقل کی ہے ، اور اس کی سند ضعیف ہے ۔

سیدہ ام ایمن رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” چور ( کا ہاتھ ) صرف ڈھال ( یا اس کی قیمت جتنی قیمت والی چیز چوری کرنے ) پر کاٹا جائے گا “ ۔ نبی اکرم صلی اللہ علیہ وسلم کے زمانہ اقدس میں اس کی قیمت ایک دینار یا دس درہم ہوتی تھی ۔
یہ روایت امام طبرانی نے نقل کی ہے ۔ اس کی سند میں ایک راوی یحییٰ بن عبدالحمید حمانی ہے ، اور وہ ضعیف ہے ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک ڈھال ( چوری کرنے پر چور کا ہاتھ ) کٹوا دیا تھا ، جس کی قیمت پانچ درہم تھی ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” پانچ درہم تھی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوواقد صغیر ہے ۔ امام أحمد کہتے ہیں : میں اس میں کوئی حرج نہیں سمجھتا جمہور نے اسے ضعیف قرار دیا ہے ۔

سیدنا علی رضی اللہ عنہ فرماتے ہیں : نبی اکرم صلی اللہ علیہ وسلم نے لوہے کی ڈھال ( چوری کرنے پر چور کا ہاتھ ) کٹوا دیا تھا اس ( ڈھال ) کی قیمت اکیس درہم تھی ۔
یہ روایت امام بزار نے نقل کی ہے ۔ اس کی سند میں ایک راوی مختار بن نافع ہے ، اور وہ ضعیف ہے ۔

سیدنا جابر بن عبدالله رضی اللہ عنہما بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک لڑکی نے شراب کا مٹکا ( یا مشکیزہ ) چوری کر لیا اس کی قیمت تین درہم بھی نہیں تھی ، تو نبی اکرم صلی اللہ علیہ وسلم نے اس کا ہاتھ نہیں کٹوایا ۔
یہ روایت امام بزار نے نقل کی ہے وہ فرماتے ہیں : یہ شراب کی حرمت نازل ہونے سے پہلے کی بات ہے باقی اللہ بہتر جانتا ہے ۔ اس کی سند میں ایک راوی ابوحومل ہے ۔ امام ذہبی کہتے ہیں : یہ معروف نہیں ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہاتھ کاٹنے کی سزا صرف اس جانور ( کی چوری ) پر دی جائے گی ، جو باڑے میں سے ( چوری کیا گیا ہو ) اور اس کھجور ( کی چوری ) پر دی جائے گی ، جو گودام میں سے ( چوری کی گئی ہو ) “ ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن سعید بن ابوسعید ہے ، اور وہ متروک ہے ۔

ہمام بن حارث بیان کرتے ہیں : ابن مقرن نے سیدنا عبداللہ بن مسعود رضی اللہ عنہ سے دریافت کیا ، اور کہا: اے ابوعبدالرحمن ! میں نے یہ حلف اٹھایا ہے کہ میں ایک سال تک اپنے بستر پر نہیں سوؤں گا ، تو سیدنا عبداللہ رضی اللہ عنہ نے یہ آیت تلاوت کی : اے ایمان والو ! ان پاکیزہ حلال چیزوں کو حرام قرار نہ دو ، جو اللہ تعالیٰ نے تمہارے لئے حلال قرار دی ہیں ، اور تم حد سے تجاوز نہ کرو بے شک اللہ تعالیٰ حد سے تجاوز کرنے والوں کو پسند نہیں کرتا “ ۔ اس کے بعد سیدنا عبداللہ بن مسعود رضی اللہ عنہ نے ارشاد فرمایا : ) تم اپنی قسم کا کفارہ دے دو اور اپنے بستر پر سو جاؤ انہوں نے کہا: میں خوشحال شخص ہوں سیدنا عبداللہ رضی اللہ عنہ نے فرمایا : تم غلام آزاد کر دو انہوں نے کہا: میرے غلام نے میرے پاس قبا چوری کر لی تو سیدنا عبداللہ رضی اللہ عنہ نے فرمایا : تمہارے مال کے ایک حصے نے دوسرے کو چوری کر لیا ہے ان کی مراد یہ تھی کہ اس کو ہاتھ کاٹنے کی سزا نہیں دی جا سکتی ابن مقرن نے کہا: میری کنیز نے زنا کیا ہے سیدنا عبداللہ رضی اللہ عنہ نے فرمایا : تم اسے کوڑے لگاؤ انہوں نے کہا : وہ محصنہ نہیں ہے ، تو سیدنا عبداللہ رضی اللہ عنہ نے فرمایا : اس کا اسلام اس کا احصان ہے ۔
یہ روایت امام طبرانی نے مختلف اسانید کے ساتھ نقل کی ہے ، اور اس کے رجال اور دیگر روایات کے رجال صحیح کے رجال ہیں ۔

قاسم بیان کرتے ہیں : سیدنا عبداللہ رضی اللہ عنہ کے پاس ایک کنیز ( یا لڑکی ) کو لایا گیا جس نے چوری کی تھی وہ محصنہ نہیں تھی ، تو سیدنا عبداللہ رضی اللہ عنہ نے اس کا ہاتھ نہیں کاٹا ۔
یہ روایت امام طبرانی نے نقل کی ہے ، اور قاسم بن عبدالرحمن بن عبداللہ بن مسعود نے اپنے دادا سے سماع نہیں کیا ہے لیکن اس روایت کے رجال صحیح کے رجال ہیں ۔

قاسم نامی اسی راوی کے حوالے سے یہ بات منقول ہے وہ بیان کرتے ہیں : سیدنا عبداللہ بن مسعود رضی اللہ عنہ آئے سیدنا سعد رضی اللہ عنہ نے قصر بنوایا تھا اور انہوں نے اصحاب نمر کے درمیان مسجد بنائی تھی ، وہ نکل کر اس کی طرف نمازوں کی ادائیگی کے لئے جاتے تھے جب سیدنا عبداللہ رضی اللہ عنہ کو بیت المال کا نگران مقرر کیا گیا اور بیت المال میں نقب لگی تو انہوں نے ایک شخص کو پکڑ لیا تو سیدنا عبداللہ رضی اللہ عنہ نے اس بارے میں سیدنا عمر رضی اللہ عنہ کو خط لکھا تو سیدنا عمر رضی اللہ عنہ نے جوابی خط میں لکھا کہ تم اس کا ہاتھ نہ کاٹو اور مسجد کو منتقل کر دو اور بیت المال کو قبلہ والی سمت میں کر دو کیونکہ جو شخص نماز ادا کرے گا وہ مسلسل مسجد میں رہے گا ، تو سیدنا عبداللہ رضی اللہ عنہ نے اسے منتقل کر دیا اور وہاں لکیر لگوا دی سیدنا سعد رضی اللہ عنہ نے جو محل تعمیر کروایا تھا وہ شاذروان تھا امام اس پر کھڑا ہوتا تھا سیدنا عبداللہ رضی اللہ عنہ کے حکم کے تحت اسے توڑ دیا گیا تھا یہاں تک کہ امام لوگوں کے برابر کھڑا ہونے لگا ۔
یہ روایت امام طبرانی نے نقل کی ہے قاسم نامی راوی نے اپنے دادا سے سماع نہیں کیا ہے اس روایت کے رجال صحیح کے رجال ہیں ۔

سیدنا عصمہ رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک غلام نے چوری کر لی یہ معاملہ نبی اکرم صلی اللہ علیہ وسلم کی بارگاہ میں پیش کیا گیا تو نبی اکرم صلی اللہ علیہ وسلم نے اس سے درگزر کیا پھر دوسری مرتبہ آپ کے سامنے اسے پیش کیا گیا کہ اس نے چوری کی ہے ، تو آپ نے پھر اسے معاف کر دیا پھر تیسری مرتبہ اسے آپ کے سامنے لایا گیا اس نے چوری کی ہوئی تھی نبی اکرم صلی اللہ علیہ وسلم نے اس سے درگزر کیا پھر چوتھی مرتبہ اسے نبی اکرم صلی اللہ علیہ وسلم کے سامنے پیش کیا گیا اس نے چوری کی تھی نبی اکرم صلی اللہ علیہ وسلم نے اسے معاف کر دیا پھر پانچویں مرتبہ اسے نبی اکرم صلی اللہ علیہ وسلم کے پاس لایا گیا اس نے چوری کی ہوئی تھی ، تو نبی اکرم صلی اللہ علیہ وسلم نے اس کا ہاتھ کٹوا دیا پھر چھٹی مرتبہ اسے نبی اکرم صلی اللہ علیہ وسلم کے پاس لایا گیا اس نے چوری کی ہوئی تھی ، تو نبی اکرم صلی اللہ علیہ وسلم نے اس کا ایک پاؤں کٹوا دیا پھر ساتویں مرتبہ اسے نبی اکرم صلی اللہ علیہ وسلم کے پاس لایا گیا اس نے چوری کی ہوئی تھی ، تو نبی اکرم صلی اللہ علیہ وسلم نے اس کا دوسرا ہاتھ کٹوا دیا پھر اسے آٹھویں مرتبہ نبی اکرم صلی اللہ علیہ وسلم کے پاس لایا گیا کہ اس نے چوری کی تھی تو نبی اکرم صلی اللہ علیہ وسلم نے اس کا دوسرا پاؤں کٹوا دیا اور نبی اکرم صلی اللہ علیہ وسلم نے فرمایا : چار کے بدلے چار ہو گئے ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے ، اور وہ ضعیف ہے ۔

ابوماجد حنفی بیان کرتے ہیں : میں سیدنا عبداللہ رضی اللہ عنہ کے پاس بیٹھا ہوا تھا ، انہوں نے فرمایا : اور میں اس شخص کا ذکر کر رہا تھا ، جس کا نبی اکرم صلی اللہ علیہ وسلم نے سب سے پہلے ہاتھ کٹوایا تھا ایک چور کو لایا گیا آپ نے اس کا ہاتھ کٹوا دیا ۔ نبی اکرم صلی اللہ علیہ وسلم کا چہرہ مبارک تبدیل ہو گیا ( یعنی آپ اس حوالے سے غمگین تھے ) ۔ راوی کہتے ہیں : لوگوں نے عرض کی : یا رسول اللہ ! گویا آپ کو یہ بات اچھی نہیں لگی کہ اس کا ہاتھ کاٹ دیا جائے ۔ نبی اکرم صلی اللہ علیہ وسلم نے ارشاد فرمایا : میرے لئے کیا چیز رکاوٹ ہو سکتی ہے تم لوگ اپنے بھائی کے خلاف شیطان کے مددگار نہ بنوحکمران کے لئے مناسب یہ ہے : جب کوئی مقدمہ آئے ، تو وہ اس کی سزا کو جاری کرے بے شک اللہ تعالیٰ معاف کرنے والا ہے وہ معاف کرنے کو پسند کرتا ہے ( بے شک اس نے ارشاد فرمایا ہے : ) ” لوگوں کو چاہیے کہ وہ معاف کریں اور درگزر کریں کیا تم لوگ یہ بات پسند نہیں کرتے ہو کہ اللہ تعالیٰ تمہاری مغفرت کر دے اور اللہ تعالیٰ مغفرت کرنے والا رحم کرنے والا ہے “ ۔
یہ روایت امام أحمد نے نقل کی ہے ۔

ان کی نقل کردہ ایک روایت میں یہ الفاظ ہیں : وہ بیان کرتے ہیں : نبی اکرم صلی اللہ علیہ وسلم کا چہرہ مبارک متغیر ہو گیا ۔ راوی کہتے ہیں : یوں لگتا تھا جیسے اس پر راکھ ڈال دی گئی ہو ۔

ایک روایت میں یہ الفاظ ہیں : ایک شخص سیدنا عبداللہ بن مسعود رضی اللہ عنہ کے پاس اپنے بھتیجے کو لے کر آیا اور بولا: یہ میرا بھتیجا ہے ، اور اس نے چوری کی ہے ، سیدنا عبداللہ رضی اللہ عنہ نے فرمایا : تم یہ بات جانتے ہو کہ اسلام میں جو پہلی حد جاری ہوئی تھی وہ ایک عورت پر جاری ہوئی تھی جس نے چوری کی تھی اور اس کا ہاتھ کاٹ دیا گیا تھا ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت نقل کی ہے ۔ یہ تمام روایات امام أحمد نے نقل کی ہیں ، اور امام ابویعلیٰ نے صرف عورت والی روایت نقل کی ہے ابوماجد حنفی نامی راوی ضعیف ہے ۔

ابوماجد حنفی بیان کرتے ہیں : ایک شخص اپنے بھتیجے کو لے کر سیدنا عبداللہ بن مسعود رضی اللہ عنہ کی خدمت میں آیا وہ بھتیجا نشے کی حالت میں تھا اس شخص نے بتایا میں نے اسے نشے کی حالت میں پایا ہے سیدنا عبداللہ رضی اللہ عنہ نے فرمایا : اسے حرکت دو تاکہ اسے ہوش آئے ۔ راوی کہتے ہیں : لوگوں نے اسے ہلایا جلایا اسے حرکت دی اس کے منہ سے شراب کی بو آ رہی تھی سیدنا عبداللہ رضی اللہ عنہ نے اس کے بارے میں حکم دیا کہ اسے قید کر دیا جائے پھر اگلے دن اسے وہاں سے نکالا گیا پھر سیدنا عبداللہ رضی اللہ عنہ نے ایک چھڑی تیار کرنے کا حکم دیا اس کا پھل اتار لیا گیا یہاں تک کہ وہ ہلکی ہو گئی ، پھر سیدنا عبداللہ رضی اللہ عنہ نے جلاد سے کہا: تم اسے کوڑے لگاؤ اور اپنا ہاتھ کھینچ کے رکھنا اور ہر عضو کو اس کا حق دینا تو اس جلاد نے اسے ایسے مارا کہ جو زیادہ تکلیف دہ نہیں تھا لیکن تکلیف دہ تھا اور سیدنا عبداللہ رضی اللہ عنہ نے اسے قبا اور شلوار پہنائے رکھی تھی یا قمیص اور شلوار تھی پھر سیدنا عبداللہ رضی اللہ عنہ نے ( اس کے چچا سے کہا: اللہ کی قسم ! تم یتیم کے برے والی ہو تم نے اس کی تربیت کرتے ہوئے اچھی تربیت بھی نہیں کی اور اس رسوائی کی بات کی پردہ پوشی بھی نہیں کی اس نے کہا: اے ابوعبدالرحمن یہ میرا بھتیجا ہے میں اس کے لئے وہی محبت محسوس کرتا ہوں جو اپنی اولاد کے لئے کرتا ہوں تو سیدنا عبداللہ رضی اللہ عنہ نے فرمایا : بے شک اللہ تعالیٰ معاف کرنے کو پسند کرتا ہے لیکن والی کے لئے یہ مناسب نہیں ہے کہ اس کے پاس کوئی حد کا مقدمہ آئے اور وہ اس کو جاری نہ کرے پھر سیدنا عبداللہ رضی اللہ عنہ نے نبی اکرم صلی اللہ علیہ وسلم کے حوالے سے یہ بات بیان کی انہوں نے فرمایا : مسلمانوں میں سے پہلا شخص جس کا ہاتھ کاٹا گیا تھا اس کا تعلق انصار سے تھا ۔ عرض کی گئی : یا رسول اللہ ! اس نے چوری کی ہے ۔ ۔ ۔ ۔ ۔ اس کے بعد حسب سابق حدیث ہے جو پہلے گزر چکی ہے ۔ ابوماجد نامی راوی ضعیف ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک عورت نے چوری کر لی وہ لوگ اسے لے کر آئے جن کے ہاں اس عورت نے چوری کی تھی انہوں نے کہا: یا رسول اللہ ! اس عورت نے ہمارے ہاں چوری کی ہے عورت کی قوم نے کہا: ہم اس کا فدیہ دے دیتے ہیں نبی اکرم صلی اللہ علیہ وسلم نے فرمایا : اس کا ہاتھ کاٹ دو لوگوں نے کہا: ہم اس کے فدیے میں پانچ سو دینار دیدیتے ہیں نبی اکرم صلی اللہ علیہ وسلم نے فرمایا : اس کا ہاتھ کاٹ دو اس عورت کا دایاں ہاتھ کاٹ دیا گیا اس عورت نے کہا: یا رسول اللہ ! کیا میرے لئے توبہ کی گنجائش ہے ؟ نبی اکرم صلی اللہ علیہ وسلم نے فرمایا : جی ہاں تم اپنے اس گناہ کے حوالے سے اس طرح ہو گئی ہو جیسے اس دن تھی جب تمہاری والدہ نے تمہیں جنم دیا تھا ، تو اللہ تعالیٰ نے سورت مائدہ میں یہ آیت نازل کی : ” جو شخص ظلم کرنے کے بعد توبہ کر لے اور اصلاح کر لے تو بے شک اللہ تعالیٰ اس کی توبہ قبول کر لیتا ہے ۔ ۔ ۔ ۔ ۔ ۔ ۔ “ یہ آیت کے آخر تک ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے ، اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : صفوان بن امیہ مدینہ منورہ آئے اور وہ مسجد میں سو گئے انہوں نے اپنی چادر اپنے سر کے نیچے رکھی ایک چور آیا اور اس کو چوری کر لیا وہ اس کو پکڑ کر نبی اکرم صلی اللہ علیہ وسلم کے پاس لے آئے نبی اکرم صلی اللہ علیہ وسلم نے اس چور کے بارے میں حکم دیا کہ اس کا ہاتھ کاٹ دیا جائے تو صفوان نے کہا: یا رسول اللہ ! یہ چادر اس کی ہوئی نبی اکرم صلی اللہ علیہ وسلم نے فرمایا : اس کو میرے پاس لانے سے پہلے تم نے ایسا کیوں نہیں کیا ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن حمید ہے ، جسے ابن حبان اور دیگر حضرات نے ثقہ قرار دیا ہے امام نسائی رحمہ اللہ اور دیگر حضرات نے اسے ضعیف کہا: ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک چور کو لایا گیا لوگوں نے بتایا اس نے چوری کی ہے نبی اکرم صلی اللہ علیہ وسلم نے فرمایا : اس کے بارے میں میرا یہ خیال نہیں ہے کہ اس نے چوری کی ہو گی اس نے عرض کی : جی ہاں یا رسول اللہ ! میں نے چوری کی ہے نبی اکرم صلی اللہ علیہ وسلم نے فرمایا : اسے لے جاؤ اور اس کا ہاتھ کاٹ دو پھر اسے داغ لگوا دینا پھر اسے میرے پاس لے کر آنا اسے لے جایا گیا اس کا ہاتھ کاٹ دیا گیا پھر اسے داغ لگوا دیا گیا ( تاکہ خون بہنا بند ہو جائے ) پھر اسے نبی اکرم صلی اللہ علیہ وسلم کے پاس لایا گیا تو نبی اکرم صلی اللہ علیہ وسلم نے ارشاد فرمایا : تم اللہ تعالیٰ کی بارگاہ میں توبہ کرو اس نے عرض کی : میں اللہ تعالیٰ کی بارگاہ میں توبہ قبول کرتا ہوں ۔ نبی اکرم صلی اللہ علیہ وسلم نے دعا کی : اللہ تعالیٰ تمہاری توبہ قبول کرے ( راوی کو شک ہے شاید یہ الفاظ ہیں : ) اے اللہ ! تو اس کی توبہ قبول فرما لے “ ۔
یہ روایت امام بزار نے اپنے استاد أحمد بن ابان قرشی کے حوالے سے نقل کی ہے ، جسے ابن حبان نے ثقہ قرار دیا ہے اس روایت کے بقیہ رجال صحیح کے رجال ہیں ۔