مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص تھا جو نبی اکرم صلی اللہ علیہ وسلم کے ساتھ ایک غزوہ میں شریک ہوا جب آپ واپس تشریف لائے ، تو وہ شخص اپنی سواری سے اترا اور مسجد نبوی کی طرف گیا اور اس میں نماز ادا کرنے لگا اس نے نماز کو طول دیا ، یہاں تک کہ صحابہ کرام یہ سمجھنے لگے کہ اس شخص کو سب لوگوں پر فضیلت حاصل ہے ایک دن وہ شخص گزرا نبی اکرم صلی اللہ علیہ وسلم اس وقت اپنے اصحاب کے درمیان تشریف فرما تھے آپ کے کسی صحابی نے آپ کی خدمت میں عرضی کی : یا رسول اللہ ! یہ وہی شخص ہے پھر نبی اکرم صلی اللہ علیہ وسلم نے اسے بلوایا ، یا وہ شخص خود اس طرف آ گیا جب نبی اکرم صلی اللہ علیہ وسلم نے اسے آتے ہوئے ملاحظہ کیا ، تو ارشاد فرمایا : اس ذات کی قسم ! جس کے دست قدرت میں میری جان ہے اس کی دونوں آنکھوں کے درمیان شیطان کا شیطان کا داغ ( یا ٹھپہ ) ہے ، جب وہ شخص اس محفل کے پاس آ کر ٹھہر گیا تو نبی اکرم صلی اللہ علیہ وسلم نے اس سے دریافت کیا : جب تم اس محفل کے پاس آ کر ٹھہرے تھے ، تو کیا تم نے من میں یہ سوچا تھا کہ ان لوگوں میں کوئی بھی مجھ سے بہتر نہیں ہے اس نے جواب دیا : جی ہاں پھر وہ شخص چلا گیا وہ مسجد کے ایک کونے میں آیا اس نے اپنے پاؤں کے ذریعے ایک لکیر کھینچی اپنی ایڑیاں درست کیں اور پھر کھڑا ہو کر نماز ادا کرنے لگا نبی اکرم صلی اللہ علیہ وسلم نے دریافت کیا : تم میں سے کون اٹھ کر اس کی طرف جا کر اسے قتل کرے گا سیدنا ابوبکر رضی اللہ عنہ کھڑے ہوئے نبی اکرم صلی اللہ علیہ وسلم نے دریافت کیا : کیا تم نے اس شخص کو قتل کر دیا انہوں نے عرض کی : میں نے اسے نماز ادا کرتے ہوئے پایا تو میں اس سے ڈر گیا ۔ نبی اکرم صلی اللہ علیہ وسلم نے فرمایا : تم میں سے کون اٹھ کر اس کی طرف جائے گا اور اسے قتل کر دے گا سیدنا عمر رضی اللہ عنہ نے عرض کی : میں ، انہوں نے تلوار لی انہوں نے اس شخص کو نماز ادا کرتے ہوئے پایا تو وہ بھی واپس آ گئے نبی اکرم صلی اللہ علیہ وسلم نے سیدنا عمر رضی اللہ عنہ سے دریافت کیا : کیا تم نے اس شخص کو قتل کر دیا انہوں نے عرض کی : یا رسول اللہ ! میں نے اسے نماز ادا کرتے ہوئے پایا تو میں اس سے ڈر گیا ۔ نبی اکرم صلی اللہ علیہ وسلم نے ارشاد فرمایا : تم میں سے کون اٹھ کر اس شخص کی طرف جائے گا اور قتل کر دے گا سیدنا علی رضی اللہ عنہ نے عرض کی : میں ، نبی اکرم صلی اللہ علیہ وسلم نے فرمایا : تم اسے کر دو گے اگر تم نے اسے پایا جب سیدنا علی رضی اللہ عنہ گئے ، تو انہوں نے اس شخص کو نہیں پایا ۔ نبی اکرم صلی اللہ علیہ وسلم نے دریافت کیا : کیا تم نے اس شخص کو قتل کر دیا انہوں نے عرض کی : مجھے پتہ نہیں چلا کہ وہ زمین میں کہاں چلا گیا ۔ نبی اکرم صلی اللہ علیہ وسلم نے ارشاد فرمایا : یہ میری امت میں خروج کرنے والا پہلا گروہ ہے ۔ نبی اکرم صلی اللہ علیہ وسلم نے یہ بھی ارشاد فرمایا : اگر تم اسے قتل کر دیتے ( یہاں ایک لفظ کے بارے میں راوی کو شک ہے ) تو میری امت کے دو افراد کے درمیان بھی اختلاف نہیں ہونا تھا بنی اسرائیل اکہتر فرقوں میں تقسیم ہوئے تھے اور یہ امت ( یعنی نبی اکرم صلی اللہ علیہ وسلم کی امت ) عنقریب بہتر فرقوں میں تقسیم ہو گی ایک گروہ کے علاوہ باقی سب جہنم میں جائیں گے ہم نے عرض کی : اے اللہ کے نبی ! وہ ایک گروہ کون سا ہے ۔ نبی اکرم صلی اللہ علیہ وسلم نے فرمایا : الجماعة یزید رقاشی بیان کرتے ہیں : میں نے سیدنا انس رضی اللہ عنہ سے دریافت کیا : اے ابوحمزہ ! جماعت کہاں ہے ؟ انہوں نے فرمایا : تمہارے حکمرانوں کے ساتھ تمہارے حکمرانوں کے ساتھ ۔
یہ روایت امام ابویعلیٰ نے نقل کی ہے یزید رقاشی نامی راوی کو جمہور نے ضعیف قرار دیا ہے اس کی کمزوری توثیق کی گئی ہے ۔ اس روایت کے بقیہ رجال صحیح کے رجال ہیں ۔ اس سے پہلے سیدنا ابوبکرہ رضی اللہ عنہ اور سیدنا ابوسعید خدری رضی اللہ عنہ کے حوالے سے مستند روایت گزر چکی ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص تھا جس کی عبادت گزاری اور عبادت میں محنت ہمیں اچھی لگتی تھی ہم نے اس کا نام لے کر نبی اکرم صلی اللہ علیہ وسلم کے سامنے اس کا تذکرہ کیا ، تو نبی کرم صلی اللہ علیہ وسلم نے اسے نہیں پہچانا ہم نے اس کا حلیہ بیان کیا ، تو آپ نے اسے نہیں پہچانا ابھی ہم اس کا ذکر کر ہی رہے تھے کہ اسی دوران وہ شخص سامنے آ گیا ہم نے عرض کی : وہ یہ ہے ۔ نبی اکرم صلی اللہ علیہ وسلم نے فرمایا : تم نے مجھے ایک ایسے شخص کے بارے میں بتایا ہے ، جس کے چہرے پر شیطان کا داغ ( یا ٹھپہ ) ہے ، وہ شخص آیا اور ان حضرات کے پاس ٹھہر گیا اس نے سلام نہیں کیا ۔ نبی اکرم صلی اللہ علیہ وسلم نے اس سے فرمایا : میں تمہیں اللہ کا واسطہ دے کر دریافت کرتا ہوں جب تم اس محفل کے پاس آ کر ٹھہرے تھے ، تو کیا تم نے من میں یہ سوچا تھا کہ ان لوگوں میں کوئی بھی مجھ سے زیادہ فضلیت نہیں رکھتا ہے اس نے جواب دیا اللہ جانتا ہے جی ہاں پھر وہ شخص اندر گیا اور نماز ادا کرنے لگا نبی اکرم صلی اللہ علیہ وسلم نے دریافت کیا : کون اس شخص کو قتل کرے گا سیدنا ابوبکر رضی اللہ عنہ نے عرض کی : میں سیدنا ابوبکر رضی اللہ عنہ اس کے پاس گئے ، تو انہوں نے اس شخص کو کھڑے ہو کر نماز ادا کرتے ہوئے پایا تو انہوں نے سوچا سبحان اللہ کیا میں نماز ادا کرنے والے شخص کو قتل کر دوں جبکہ نبی اکرم صلی اللہ علیہ وسلم نمازیوں کو قتل کرنے سے منع کیا ہے وہ باہر آ گئے نبی اکرم صلی اللہ علیہ وسلم نے دریافت کیا : تم نے کیا کیا ؟ انہوں نے عرض کی : میں نے اس کو قتل کرنے کو ناپسند کیا کیونکہ وہ نماز ادا کر رہا تھا ، اور آپ نے نمازیوں کو قتل کرنے سے منع کیا ہے ۔ سیدنا عمر رضی اللہ عنہ نے عرض کی : میں ایسا کروں گا وہ اندر گئے ، تو انہوں نے اس شخص کو پایا کہ اس نے پیشانی زمین پر رکھی ہوئی تھی ( یعنی سجدے کی حالت میں تھا ) سیدنا عمر رضی اللہ عنہ نے سوچا سیدنا ابوبکر رضی اللہ عنہ مجھ سے زیادہ فضیلت رکھتے ہیں ( اگر انہوں نے اسے قتل نہیں کیا ، تو میں بھی نہیں کرتا ) پھر وہ باہر آ گئے نبی اکرم صلی اللہ علیہ وسلم نے دریافت کیا : کیا بنا ؟ انہوں نے عرض کی : میں نے اسے پایا کہ اس نے اپنی پیشانی رکھی ہوئی تھی ، تو میں نے اس کو قتل کرنے کو ناپسند کیا ۔ نبی اکرم صلی اللہ علیہ وسلم نے دریافت کیا : کون اسے قتل کرے گا سیدنا علی رضی اللہ عنہ نے عرض کی : میں نبی اکرم صلی اللہ علیہ وسلم نے فرمایا : تم کر دو گے اگر تم اس تک پہنچ پائے راوی کہتے ہیں : سیدنا علی رضی اللہ عنہ اندر گئے ، تو انہوں نے اس شخص کو پایا کہ وہ جا چکا تھا ۔ سیدنا علی رضی اللہ عنہ نبی اکرم صلی اللہ علیہ وسلم کے پاس واپس آئے نبی اکرم صلی اللہ علیہ وسلم نے دریافت کیا : کیا بنا ؟ انہوں نے عرض کی : میں نے اسے نہیں پایا ۔ نبی اکرم صلی اللہ علیہ وسلم نے ارشاد فرمایا : ” اگر یہ شخص قتل ہو جاتا تو میری امت کے دو آدمیوں میں بھی اختلاف نہیں ہونا تھا یہ ان ( اختلاف کرنے والوں میں ) پہلا اور آخری فرد ہونا تھا “ ۔ موسیٰ نامی راوی بیان کرتے ہیں : میں نے محمد بن کعب کو یہ بیان کرتے ہوئے سنا ہے ، جس شخص کو سیدنا علی رضی اللہ عنہ نے قتل کیا تھا وہ ذو ثدیہ تھا ۔
یہ روایت امام ابویعلیٰ نے نقل کی ہے ۔ اس کی سند میں ایک راوی موسیٰ بن عبیدہ ہے ، اور وہ متروک ہے ۔
یہ روایت امام بزار نے اختصار کے ساتھ نقل کی ہے ، اور اس کے رجال میں سے بعض رجال کے ضعیف ہونے کے باوجود ان کی توثیق کی گئی ہے ۔ اس روایت کا ایک اور طریق بھی ہے ، جو اس سے زیادہ طویل ہے ، اور وہ فتنوں سے متعلق باب میں آئے گا ۔

سیدنا جابر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے پاس سے گزرا لوگوں نے اس کے بارے میں کوئی بات کی اور اس کی تعریف بیان کی تو نبی اکرم صلی اللہ علیہ وسلم نے فرمایا : کون اسے قتل کرے گا سیدنا ابوبکر رضی اللہ عنہ نے عرض کی : میں ، وہ گئے انہوں نے اس شخص کو پایا کہ اس نے اپنے لئے ایک لکیر لگائی ہے ، اور وہاں نماز ادا کر رہا ہے جب سیدنا ابوبکر رضی اللہ عنہ نے اسے اس حالت میں دیکھا تو وہ واپس آ گئے ، اور انہوں نے اسے قتل نہیں کیا ۔ نبی اکرم صلی اللہ علیہ وسلم نے دریافت کیا : کون اسے قتل کرے گا سیدنا عمر رضی اللہ عنہ نے عرض کی : میں ، وہ گئے انہوں نے اس لکیر کو دیکھا کہ وہ شخص نماز ادا کر رہا ہے ، تو وہ واپس آ گئے ، اور انہوں نے اسے قتل نہیں کیا ۔ نبی اکرم صلی اللہ علیہ وسلم نے دریافت کیا : کون اسے سنبھالے گا ( راوی کو شک ہے شاید یہ الفاظ ہیں : ) کون اسے قتل کرے گا ، تو سیدنا علی رضی اللہ عنہ نے عرض کی : میں ، نبی اکرم صلی اللہ علیہ وسلم نے فرمایا : تم کر دو گے ، لیکن تمہارے بارے میں میرا یہ نہیں خیال کہ تم اس تک پہنچ پاؤ گے ۔ سیدنا علی رضی اللہ عنہ گئے ، تو انہوں نے دیکھا کہ وہ شخص جا چکا تھا ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس کچھ دینار لائے گئے آپ انہیں مٹھی میں بھر بھر کے دیکھنے لگے پھر آپ نے اپنے دائیں طرف دیکھا جیسے آپ کسی شخص کو دینے کے بارے میں سوچ رہے ہوں یہاں عفان نامی راوی نے اپنی روایت میں یہ الفاظ نقل کیے ہیں : کہ آپ کسی شخص کے بارے میں جائزہ لے رہے تھے کہ آپ وہ کس شخص کو دیں اسی دوران ایک سیاہ فام شخص جس کا سر مونڈا ہوا تھا ، اور اس نے دو سفید کپڑے پہنے ہوئے تھے اس کی دونوں آنکھوں کے درمیان سجدے کا نشان موجود تھا اس نے کہا: آپ نے تقسیم کرتے ہوئے عدل سے کام نہیں لیا ۔ نبی اکرم صلی اللہ علیہ وسلم غصے میں آ گئے آپ نے فرمایا : میرے بعد تمہارے ساتھ کون عدل کرے گا لوگوں نے عرض کی : یا رسول اللہ ! کیا ہم اسے قتل نہ کر دیں نبی اکرم صلی اللہ علیہ وسلم نے ارشاد فرمایا : جی نہیں پھر نبی اکرم صلی اللہ علیہ وسلم نے اپنے اصحاب سے ارشاد فرمایا : یہ اور اس کے ساتھی دین سے یوں نکل جائیں گے ، جس طرح تیر نشانے کے پار ہو جاتا ہے ، اور ان کا اسلام کے ساتھ کوئی واسطہ نہیں ہو گا ۔
یہ روایت امام أحمد نے نقل کی ہے ۔ امام بزار نے اختصار کے ساتھ نقل کی ہے ، اور امام طبرانی نے نقل کی ہے ۔ اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن حارث بن نوفل رضی اللہ عنہ کے غلام مقسم بیان کرتے ہیں : میں اور تلید بن کلاب لیثی ، ہم نکلے اور سیدنا عبداللہ بن عمرو بن العاص رضی اللہ عنہ کی خدمت میں حاضر ہوئے ، جو بیت اللہ کا طواف کر رہے تھے اور انہوں نے اپنے جوتے اپنے ہاتھ میں پکڑے ہوئے تھے ہم نے ان سے کہا: کیا آپ اس وقت نبی اکرم صلی اللہ علیہ وسلم کے پاس موجود تھے جب غزوہ حنین کے ( مال غنیمت کی تقسیم ) کے دن تمیمی شخص نے نبی اکرم صلی اللہ علیہ وسلم کے ساتھ گفتگو کی تھی ؟ انہوں نے جواب دیا : جی ہاں بنو تمیم سے تعلق رکھنے والا ایک شخص آیا اس کا نام ذوالخویصرہ تھا وہ نبی اکرم صلی اللہ علیہ وسلم کے پاس ٹھہر گیا ۔ نبی اکرم صلی اللہ علیہ وسلم اس وقت لوگوں کو ادائیگیاں کر رہے تھے اس نے کہا: اے سیدنا محمد ( صلی اللہ علیہ وسلم ) آپ صبح سے جو کر رہے ہیں وہ میں دیکھ رہا ہوں ۔ نبی اکرم صلی اللہ علیہ وسلم نے فرمایا : ٹھیک ہے تم نے کیا دیکھا ہے اس نے کہا: آپ کے بارے میں میری یہ رائے ہے کہ آپ نے انصاف سے کام نہیں لیا ۔ راوی کہتے ہیں : تو نبی اکرم صلی اللہ علیہ وسلم غصے میں آ گئے پھر آپ نے ارشاد فرمایا : تمہارا ستیاناس ہو اگر عدل میرے پاس نہیں ہو گا ، تو پھر کس کے پاس ہو گا ؟ سیدنا عمر رضی اللہ عنہ نے عرض کی : یا رسول اللہ ! کیا ہم اسے قتل نہ کر دیں نبی اکرم صلی اللہ علیہ وسلم نے ارشاد فرمایا : ” اسے چھوڑ دو کیونکہ اس کے کچھ ساتھی ہوں گے ، جو دین میں تعمق اختیار کریں گے ، یہاں تک کہ وہ دین سے یوں نکل جائیں گے ، جس طرح تیر نشانے کے پار ہو جاتا ہے آدمی اس کے پھل کا جائزہ لیتا ہے ، تو اسے کچھ نظر نہیں آتا پھر آدمی اس کی لکڑی کا جائزہ لیتا ہے ، تو کوئی چیز نہیں پائی جاتی ، پھر آدمی تار میں تیر کے لگنے کی جگہ کو دیکھتا ہے ، تو اس میں کوئی چیز نہیں پائی جاتی حالانکہ وہ لید اور خون میں سے گزرا ہوتا ہے “ ۔
یہ روایت امام أحمد نے نقل کی ہے ، اور امام طبرانی نے اختصار کے ساتھ نقل کی ہے ۔ امام أحمد کے رجال ثقہ ہیں ۔

شہر بن حوشب بیان کرتے ہیں : جب یزید بن معاویہ کی بیعت ہمارے پاس آئی ، تو میں شام آیا مجھے اس جگہ کے بارے میں بتایا گیا جہاں نوف کھڑے ہوتے تھے میں ان کے پاس آیا اسی دوران ایک شخص ان کے پاس آیا لوگوں نے جلدی کی اس شخص کے جسم پر ایک چادر تھی وہ سیدنا عبداللہ بن عمرو بن العاص رضی اللہ عنہ تھے جب نوف نے انہیں دیکھا تو حدیث بیان کرنے سے رک گیا سیدنا عبداللہ بن عمرو رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مشرق کی طرف سے عنقریب میری امت میں سے کچھ لوگ نکلیں گے ، جو قرآن کی تلاوت کریں گے ، اور وہ ان کے حلق سے آگے نہیں جائے گا ان میں سے جب بھی کوئی گروہ نکلے گا ، تو وہ مار دیا جائے گا جب دوسرا گروہ نکلے گا ، تو وہ مار دیا جائے گا “ ۔ یہاں تک کہ انہوں نے دس سے زیادہ مرتبہ اس چیز کو شمار کروایا کہ جب بھی ان میں سے کوئی گروہ نکلے گا ، تو اسے مار دیا جائے گا ، یہاں تک کہ ان کے باقی بچ جانے والے لوگوں میں دجال نکلے گا ۔
یہ روایت امام أحمد نے ایک طویل حدیث میں نقل کی ہے شہر بن حوشب نامی راوی ثقہ ہے اس کے بارے میں ایسا کلام کیا گیا ہے ، جو نقصان دہ نہیں ہے ۔ اس روایت کے بقیہ رجال صحیح کے رجال ہیں ۔

عقبہ بن وساج بیان کرتے ہیں : میرے ایک ساتھی نے مجھے سیدنا عبداللہ بن عمرو رضی اللہ عنہ کے حوالے سے خوارج کے بارے میں حدیث بیان کی ہے میں حج کے لئے گیا میری ملاقات سیدنا عبداللہ بن عمرو رضی اللہ عنہ سے ہوئی میں نے ان سے کہا: آپ نبی اکرم صلی اللہ علیہ وسلم کے اصحاب میں سے باقی رہ جانے والے افراد میں سے ایک ہیں اللہ تعالیٰ نے آپ کو علم سے نوازا ہے کچھ لوگ اپنے حکمرانوں پر طعن کرتے ہیں ، اور ان کے بارے میں گمراہی کی گواہی دیتے ہیں ، تو سیدنا عبداللہ بن عمرو رضی اللہ عنہ نے فرمایا : ان لوگوں پر اللہ تعالیٰ کی فرشتوں اور انسانوں سب کی لعنت ہو نبی اکرم صلی اللہ علیہ وسلم کے پاس سونے یا چاندی کا ایک تھیلا لایا گیا آپ نے اسے اپنے اصحاب کے درمیان تقسیم کرنا شروع کیا ، تو ایک دیہاتی شخص کھڑا ہوا اور بولا: اے سیدنا محمد ( صلی اللہ علیہ وسلم ) اللہ تعالیٰ نے آپ کو عدل کرنے کا حکم دیا ہے ، اور آپ پھر بھی عدل سے کام نہیں لے رہے ۔ نبی اکرم صلی اللہ علیہ وسلم نے ارشاد فرمایا : تمہارا ستیاناس ہو میرے بعد تمہارے ساتھ کون عدل کرے گا ؟ جب وہ شخص واپس چلا گیا تو نبی اکرم صلی اللہ علیہ وسلم نے ارشاد فرمایا : ” میری امت میں اس جیسے لوگ ہوں گے وہ قرآن پڑھیں گے ، لیکن وہ ان کے حلق سے آگے نہیں جائے گا اگر وہ خروج کریں تو تم انہیں قتل کر دینا پھر اگر وہ خروج کریں تو تم انہیں قتل کر دینا “ ۔ یہ بات نبی اکرم صلی اللہ علیہ وسلم نے تین مرتبہ ارشاد فرمائی ۔
یہ روایت امام بزار نے نقل کی ہے ، اور اس کے رجال صحیح کے رجال ہیں ۔

شریک بن شہاب بیان کرتے ہیں میری یہ خواہش تھی کہ میں نبی اکرم صلی اللہ علیہ وسلم کے اصحاب میں سے کسی صاحب سے ملوں جو مجھے خوارج کے بارے میں کوئی حدیث بیان کریں ایک مرتبہ عرفہ کے دن میری ملاقات سیدنا ابوبرزہ اسلمی رضی اللہ عنہ سے ہوئی جو اپنے کچھ ساتھیوں کے ساتھ موجود تھے میں نے کہا: اے سیدنا ابوبرزہ رضی اللہ عنہ آپ مجھے کوئی ایسی حدیث بیان کیجئے جو آپ نے نبی اکرم صلی اللہ علیہ وسلم کو خوارج کے بارے میں ارشاد فرماتے ہوئے سنا ہو ، تو انہوں نے جواب دیا : میں تمہیں وہ حدیث بیان کروں گا ، جو میرے کانوں نے سنی ہے ، اور میری آنکھیں اس وقت دیکھ رہی تھیں نبی اکرم صلی اللہ علیہ وسلم کے پاس کچھ دینا رلائے گئے آپ نے انہیں تقسیم کرنا شروع کیا آپ کے پاس ایک سیاہ فام شخص موجود تھا جس کے بال مونڈے ہوئے تھے اس نے دو سفید کپڑے پہنے ہوئے تھے اس کی دونوں آنکھوں کے درمیان سجدے کا نشان موجود تھا وہ نبی اکرم صلی اللہ علیہ وسلم کے سامنے آیا وہ سامنے کی طرف سے آپ کے پاس آیا تو آپ نے اسے کچھ نہیں دیا پھر وہ دائیں طرف سے آپ کے پاس آیا تو آپ نے اسے کچھ نہیں دیا پھر وہ پیچھے کی طرف سے آپ کی طرف آیا تو آپ نے اسے کچھ نہیں دیا اس نے کہا: اے سیدنا محمد ( صلی اللہ علیہ وسلم ) اللہ کی قسم آج آپ نے تقسیم کرتے ہوئے عدل سے کام نہیں لیا تو نبی اکرم صلی اللہ علیہ وسلم شدید غصے میں آ گئے پھر آپ نے ارشاد فرمایا : اللہ کی قسم تم میرے بعد کسی ایسے شخص کو نہیں پاؤ گے ، جو تمہارے لئے مجھ سے زیادہ عادل ہو یہ کلمات آپ نے تین مرتبہ ارشاد فرمائے اس کے بعد آپ نے ارشاد فرمایا : مشرق کی طرف سے کچھ لوگ نکلیں گے یہ بھی ان میں سے ایک لگتا ہے ان کی ظاہری ہیئت اس کی مانند ہو گی وہ لوگ قرآن پڑھیں گے لیکن وہ ان کے حلق سے آگے نہیں جائے گا وہ لوگ دین سے یوں نکل جائیں گے ، جس طرح تیر نشانے کے پار ہو جاتا ہے پھر وہ دین کی طرف واپس نہیں آئیں گے پھر نبی اکرم صلی اللہ علیہ وسلم نے ( یا راوی صحابی نے ) اپنا ہاتھ اپنے سینے پر رکھا ( اور نبی اکرم صلی اللہ علیہ وسلم نے ارشاد فرمایا : ) ان کی مخصوص نشانی سر مونڈوانا ہو گی وہ مسلسل دین سے نکلتے رہیں گے ، یہاں تک کہ ان کا آخری فرد بھی دین سے نکل جائے گا جب تم انہیں دیکھو تو انہیں قتل کر دینا یہ بات نبی اکرم صلی اللہ علیہ وسلم نے تین مرتبہ ارشاد فرمائی : ( اور پھر فرمایا : ) وہ خلق اور خلیقہ ( یعنی ہر قسم کی ساری مخلوق ) میں بدترین ہوں گے یہ بات بھی نبی اکرم صلی اللہ علیہ وسلم نے تین مرتبہ ارشاد فرمائی ۔ یہاں حماد نامی راوی نے یہ الفاظ نقل کیے ہیں : ” وہ اس ( دین ) میں واپس نہیں آئیں گے “ ۔

ایک روایت میں یہ الفاظ ہیں : ” وہ مسلسل نکلتے رہیں گے ، یہاں تک کہ ان کے آخری افراد دجال کے ساتھ نکلیں گے “ ۔
یہ روایت امام أحمد نے نقل کی ہے ، اور ازرق بن قیس نامی راوی کو ابن حبان نے ثقہ قرار دیا ہے ۔ اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : میرے سامنے یہ بات ذکر کی گئی ہے کہ نبی اکرم صلی اللہ علیہ وسلم نے یہ بات ارشاد فرمائی ہے میں نے خود نبی اکرم صلی اللہ علیہ وسلم کی زبانی یہ بات نہیں سنی ہے ( آپ نے فرمایا : ) ” تمہارے درمیان کچھ لوگ ہوں گے ، جو عبادت کرتے ہوئے اتنا اہتمام کریں گے کہ لوگوں کو وہ اچھا لگے گا اور وہ خود پسندی کا شکار بھی ہوں گے وہ دین سے یوں نکل جائیں گے ، جس طرح تیر نشانے کے پار ہو جاتا ہے “ ۔
یہ روایت امام أحمد نے نقل کی ہے
یہ روایت امام ابویعلیٰ نے سیدنا انس رضی اللہ عنہ کے حوالے سے نقل کی ہے کہ نبی اکرم صلی اللہ علیہ وسلم نے ارشاد فرمایا ہے ، ان دونوں روایات کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت میں کچھ لوگ نکلیں گے جن کے اعمال برے ہوں گے وہ قرآن پڑھیں گے ، لیکن وہ ان کے حلق سے آگے نہیں جائے گا ، یزید کہتے ہیں : میرے علم کے مطابق روایت میں یہ الفاظ بھی ہیں : تم میں سے کوئی ایک شخص اپنے عمل کو ان لوگوں کے عمل کے مقابلے میں حقیر سمجھے گا وہ لوگ اہل اسلام کو قتل کریں گے جب وہ خروج کریں گے ، تو تم انہیں قتل کرنا پھر اگر وہ نکلیں گے ، تو تم انہیں قتل کرنا ، پھر اگر وہ نکلیں گے ، تو تم انہیں قتل کرنا کیونکہ جو شخص انہیں قتل کرے گا اس کے لئے مبارک باد ہے ، اور جس شخص کو وہ قتل کریں گے اس کے لئے بھی مبارکباد ہے جب بھی ان میں سے کوئی گروہ نکلے گا اللہ تعالیٰ اسے ختم کروا دے گا “ ۔ نبی اکرم صلی اللہ علیہ وسلم نے یہ بات بیس مرتبہ یا اس سے زیادہ مرتبہ دہرائی اور میں یہ بات سن رہا تھا ۔
یہ روایت امام أحمد نے نقل کی ہے ۔ اس کی سند میں ایک راوی ابوجناب ہے ، اور وہ مدلس ہے ۔

سیدنا عقبہ بن عامر رضی اللہ عنہ روایت کرتے ہیں رحمہ اللہ نبی اکرم صلی اللہ علیہ وسلم نے ارشاد فرمایا ” عنقریب میری امت میں کچھ لوگ نکلیں گے ، جو قرآن کو یوں پئیں گے ، جس طرح دودھ پیتے ہیں ( یعنی بکثرت اس کی تلاوت کریں گے ) “
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا عقبہ بن عامر رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” میری امت کے زیادہ تر منافق اس کے قاری ( یعنی قرآن کے عالم یا حافظ ) ہوں گے “ ۔
یہ روایت امام أحمد اور امام طبرانی نے نقل کی ہے ۔ امام أحمد کی مختلف اسانید میں سے ایک کے رجال ثقہ اور ثبت ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت کے زیادہ تر منافق ، اس کے قاری ( یعنی قرآن کے عالم یا حافظ ) ہوں گے “ ۔
یہ روایت امام أحمد اور امام طبرانی نے نقل کی ہے ، اور اس کے رجال ثقہ ہیں اسی طرح امام أحمد کی دو اسناد میں سے ایک کے رجال ثقہ ہیں ۔

سیدنا عصمہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میری امت کے زیادہ تر منافق اس کے قاری ( قرآن کے عالم یا حافظ ) ہوں گے “ ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے ، اور وہ ضعیف ہے ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تمہارے درمیان ایک قوم آئے گی جو قرآن پڑھیں گے ، اور وہ ان کے حلق سے آگے نہیں جائے گا جب ان میں سے کوئی ایک گروہ سامنے آئے گا ، تو وہ کاٹ دیا جائے گا “ ۔ یہاں تک کہ نبی اکرم صلی اللہ علیہ وسلم نے بیس مرتبہ سے زیادہ یہ بات ذکر کی اور فرمایا : ” یہاں تک کہ ان میں سے آخری لوگ دجال کے ساتھ نکلیں گے “ ۔
یہ روایت امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ مدلس ہے ۔

ان کے حوالے سے یہ بات منقول ہے وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مشرق کی طرف سے کچھ لوگ نکلیں گے وہ قرآن پڑھیں گے وہ ان کے حلق سے آگے نہیں جائے گا جب ان میں سے ایک گروہ ( یا نسل ) ختم ہو جائے گی تو دوسرا گروہ قتل ہو جائے گا ، یہاں تک کہ ان کے بقیہ افراد دجال کے ساتھ ہوں گے “ ۔
یہ روایت امام طبرانی نے نقل کی ہے ، اور اس کی سند حسن ہے ۔

سیدنا عامر بن واثلہ رضی اللہ عنہ بیان کرتے ہیں : غزوہ حنین کے موقع پر ایک شخص نبی اکرم صلی اللہ علیہ وسلم کے پاس آیا جس کا سر مونڈا ہوا تھا اس نے کہا: آپ نے عدل سے کام نہیں لیا ۔ نبی اکرم صلی اللہ علیہ وسلم نے ارشاد فرمایا : اگر میں عدل نہیں کروں گا ، تو پھر کون عدل کرے گا ۔ راوی کہتے ہیں : نبی اکرم صلی اللہ علیہ وسلم کی توجہ اس شخص سے ہٹ گئی اور وہ شخص چلا گیا ۔ نبی اکرم صلی اللہ علیہ وسلم نے دریافت کیا : وہ شخص کہاں ہے لوگوں نے اسے تلاش کیا لیکن وہ اس تک نہیں پہنچ پائے ، تو نبی اکرم صلی اللہ علیہ وسلم نے ارشاد فرمایا : ” عنقریب میری امت میں کچھ لوگ نکلیں گے جن کی مخصوص نشانی اس کے جیسی ہو گی ( یعنی وہ سر مونڈواتے ہوں گے ) وہ دین سے یوں نکل جائیں گے ، جس طرح تیر نشانے کے پار ہو جاتا ہے اگر آدمی تیر کی لکڑی کا جائزہ لے ، تو اسے کچھ نظر نہیں آتا ہے ، اگر وہ اس کے پروں کو دیکھے ، تو اسے کچھ نظر نہیں آتا ہے ، اگر وہ اس کے فوق کو دیکھے تو اسے کچھ نظر نہیں آتا ہے “ ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

حسن بن ابوالحسن بصری بیان کرتے ہیں : صریم کی ملاقات ” بدار “ کے مقام پر عبداللہ بن خباب سے ہوئی یہ بصرہ کی ایک بستی ہے وہ صاحب اس وقت کوفہ میں سیدنا علی رضی اللہ عنہ کی طرف جا رہے تھے اور ان کے ساتھ ان کی بیوی اور بچے اور کنیز بھی تھے انہوں نے کہا: یہ اللہ کے رسول کے اصحاب سے تعلق رکھنے والے ایک شخص ہیں ہمیں ان سے اپنی حالت اپنے معاملے اور اپنے نکلنے کے بارے میں دریافت کرنا چاہیے لوگوں نے کہا: ٹھیک ہے وہ لوگ ان کی طرف چلے گئے انہوں نے کہا: کیا آپ ہمیں بتائیں گے نہیں کہ آپ نے نبی اکرم صلی اللہ علیہ وسلم کو ہمارے بارے میں کچھ ارشاد فرماتے ہوئے سنا ہے : ۔ انہوں نے فرمایا : جہاں تک بطور خاص تمہارے بارے میں کا تعلق ہے وہ تو نہیں سنا لیکن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرے بعد کچھ لوگ آئیں گے ، جو قرآن کی تلاوت کریں گے وہ ان کے حلق سے آگے نہیں جائے گا وہ دین سے نکل جائیں گے ، اور پھر وہ دوبارہ اس میں اس وقت تک واپس نہیں آئیں گے جب تک تیر اپنے نکلنے کی جگہ تک واپس نہیں آتا اس شخص کے لئے مبارکباد ہے ، جو انہیں قتل کرے گا اور اس شخص کے لئے بھی مبارکباد ہے ۔ جسے وہ لوگ قتل کریں گے وہ ( یعنی خوارج ) آسمان کے نیچے اور زمین کے اوپر موجود بدترین مقتول ہوں گے ، اور جہنم کے کتے ہوں گے “ ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عمر کلاعی ہے ، اور وہ ضعیف ہے ان صحابی کے حوالے سے منقول ایک حدیث فتنوں سے متعلق باب میں آگے آئے گی ۔

سیدنا مسلم بن ابوبکرہ رضی اللہ عنہ کے بارے میں یہ بات منقول ہے ایک شخص نے ان سے سوال کیا : کیا آپ نے خوارج کے بارے میں کوئی بات سنی ہے ۔ انہوں نے بتایا : میں نے اپنے والد سیدنا ابوبکرہ رضی اللہ عنہ کو نبی اکرم صلی اللہ علیہ وسلم کے حوالے سے یہ بات ارشاد فرماتے ہوئے سنا ہے : ( نبی اکرم صلی اللہ علیہ وسلم نے ارشاد فرمایا ہے : ) ” خبردار ! عنقریب میری امت میں کچھ لوگ نکلیں گے ، جو سخت اور تیز ہوں گے ، اُن کی زبانیں قرآن کے حوالے سے بلیغ ( یا تیز ہوں گی اور وہ قرآن اُن کے حلق سے آگے نہیں جائے گا ، خبردار ! جب تم انہیں دیکھو تو انہیں مار دینا ، جب تم انہیں دیکھو ، تو انہیں مار دینا ، کیونکہ ان کو قتل کرنے والے کو اجر ملے گا “ ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں
یہ روایت امام طبرانی نے بھی نقل کی ہے ، اور اسی طرح امام بزار نے اس کی مانند روایت نقل کی ہے ۔

سیدنا جابر رضی اللہ عنہ بیان کرتے ہیں : جب نبی اکرم صلی اللہ علیہ وسلم نے ہوازن کا مال غنیمت تقسیم کیا ، تو ایک شخص کھڑا ہوا راوی کہتے ہیں : اس کے بعد انہوں نے پوری حدیث ذکر کی ہے ، جس میں آگے چل کر یہ الفاظ ہیں : وہ بیان کرتے ہیں : سیدنا عمر رضی اللہ عنہ کھڑے ہوئے انہوں نے عرض کی : یا رسول اللہ ! کیا میں اٹھ کر اس منافق کو قتل نہ کر دوں ؟ نبی اکرم صلی اللہ علیہ وسلم نے فرمایا : اس بات سے اللہ کی پناہ ہے کہ لوگ ایک دوسرے کو یہ کہتے پھریں کہ محمد اپنے ساتھیوں کو قتل کروا دیتے ہیں ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس میں ضعف پایا جاتا ہے اس کی نقل کردہ حدیث حسن ہے ۔

عبدالملک بن ملیل سلیحی بیان کرتے ہیں : جمعہ کے دن میں منبر کے قریب بیٹھا ہوا تھا محمد بن ابوحذیفہ نکلا اور منبر پر کھڑا ہو گیا اس نے خطبہ دینا شروع کیا پھر اس نے لوگوں کے سامنے قرآن کی کوئی سورت تلاوت کی اور وہ سب سے عمدہ تلاوت کرتا تھا تو سیدنا عقبہ بن عامر رضی اللہ عنہ نے فرمایا : اللہ اور اس کے رسول نے سچ فرمایا ہے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کچھ ایسے لوگ ضرور قرآن پڑھیں گے کہ وہ قرآن ان کے حلق سے آگے نہیں جائے گا اور وہ دین سے یوں نکل جائیں گے ، جس طرح تیر نشانے کے پار ہو جاتا ہے “ ۔
یہ روایت امام أحمد نے نقل کی ہے ، اور امام طبرانی نے اختصار کے ساتھ نقل کی ہے ان دونوں کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ساٹھ ( سال ) کے بعد ایسے لوگ آئیں گے ، جو نماز ضائع کریں گے نفسانی خواہشات کی پیروی کریں گے ، اور وہ عنقریب جہنم میں پہنچ جائیں گے پھر ایسے لوگ آئیں گے ، جو قرآن پڑھیں گے ، اور وہ ان کے حلق سے آگے نہیں جائے گا قرآن تین قسم کے لوگ پڑھیں گے مومن ، منافق اور فاجر “ ۔ بشیر نامی راوی کہتے ہیں : میں نے ولید سے دریافت کیا : ان تین قسم کے لوگوں سے مراد کیا ہے ؟ انہوں نے بتایا : منافق سے مراد وہ شخص ہے ، جو اس کا انکار کرتا ہو فاجر سے مراد وہ شخص ہے ، جو اس کا معاوضہ کھاتا ہو ، اور مومن سے مراد وہ شخص ہے ، جو اس پر ایمان رکھتا ہو ۔
یہ روایت امام أحمد نے نقل کی ہے ، اور اس کے رجال ثقہ ہیں
یہ روایت امام طبرانی نے معجم اوسط میں اسی طرح نقل کی ہے ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخری زمانے میں ایسے لوگ آئیں گے ، جو قرآن پڑھیں گے ، اور وہ ان کے حلق سے آگے نہیں جائے گا وہ اسلام سے یوں نکل جائیں گے ، جس طرح تیر نشانے سے پار ہو جاتا ہے ان کے ساتھ جنگ کرنا ہر مسلمان پر لازم ہو گا “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس میں یہ الفاظ نہیں ہیں : ” ان کے ساتھ جنگ کرنا ہر مسلمان پر لازم ہو گا “ ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

صفوان بن محرز نے سیدنا جندب بن عبداللہ رضی اللہ عنہ کے حوالے سے یہ بات نقل کی ہے ان کا گزر کچھ لوگوں کے پاس سے ہوا جو قرآن پڑھ رہے تھے ، تو انہوں نے فرمایا : یہ لوگ تمہیں غلط فہمی کا شکار نہ کریں یہ لوگ آج قرآن پڑھ رہے ہیں ، اور کل تلواریں لے کر ایک دوسرے کے مد مقابل آ جائیں گے پھر انہوں نے فرمایا : میرے پاس قرآن پڑھنے والے کچھ لوگوں کو لے کر آؤ اور وہ بڑی عمر کے لوگ ہونے چاہیں راوی کہتے ہیں : تو میں نافع بن ازرق کو ان کے پاس لے کر آیا اور مرداس بن بلال کو ان کے پاس لے کر آیا اور ان دونوں کے ساتھ کچھ اور لوگوں کو لے کر آیا جو چھ یا آٹھ افراد تھے جب ہم سیدنا جندب رضی اللہ عنہ کی خدمت میں حاضر ہوئے ، تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص لوگوں کو بھلائی کی تعلیم دیتا ہے ، اور اپنے آپ کو بھول جاتا ہے اس کی مثال چراغ کی مانند ہے جو لوگوں کے لئے روشنی کرتا ہے ، اور اپنے آپ کو جلا دیتا ہے ، اور جو شخص اپنے عمل کے حوالے سے دکھاوا کرتا ہے ، تو اللہ تعالیٰ اس کے دکھاوے کو ظاہر کر دے گا ، تم یہ بات جان لو کہ جب کوئی شخص مر جاتا ہے ، تو سب سے پہلے اس کے وجود میں سے پیٹ بدبودار ہوتا ہے ، تو آدمی کو اپنے پیٹ میں صرف پاکیزہ چیز داخل کرنی چاہیے تم میں سے جو شخص یہ استطاعت رکھتا ہو کہ اس کے اور جنت کے درمیان مٹھی بھر خون بھی رکاوٹ نہ بنے تو اسے ایسا کرنا چاہیے “ ۔

ایک روایت میں یہ الفاظ ہیں : لوگوں نے بات چیت شروع کی انہوں نے امر بالمعروف اور نہی عن المنکر کا ذکر کیا ، تو سیدنا جندب رضی اللہ عنہ خاموش بیٹھ کر ان کی باتیں سنتے رہے پھر انہوں نے ارشاد فرمایا : میں نے آج کے دن کی طرح کبھی کوئی قوم نہیں دیکھی جو نجات کی زیادہ حق دار ہو اگر یہ لوگ سچے ہوں ۔
یہ روایت امام طبرانی نے دو حوالوں سے نقل کی ہے جن میں سے ایک میں ایک راوی لیث بن ابوسلیم ہے ، اور وہ مدلس ہے جبکہ دوسری میں ایک راوی علی بن سلیمان کلبی ہے ، اور میں اس سے واقف نہیں ہوں ۔ ان دونوں روایات کے رجال ثقہ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب کچھ لوگ قرآن پڑھیں گے ، اور وہ ان کے حلق سے آگے نہیں جائے گا وہ اسے یوں پئیں گے ، جس طرح وہ پانی پیتے ہیں لیکن وہ ان کے حلق سے آگے نہیں جائے گا ، پھر نبی اکرم صلی اللہ علیہ وسلم نے ( یا راوی نے ) اپنا ہاتھ اپنے حلق پر رکھ کر یہ ارشاد فرمایا : ” وہ یہاں سے آگے نہیں جائے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسین بن ادریس ہے ، اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے کچھ ضرور قرآن پڑھیں گے ، اور وہ اسلام سے یوں نکل جائیں گے ، جس طرح تیر نشانے سے پار ہو جاتا ہے “ ۔
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں ۔

سعید بن جمہان بیان کرتے ہیں : میں سیدنا عبداللہ بن ابوعوفی رضی اللہ عنہ کی خدمت میں حاضر ہوا ان کی بینائی رخصت ہو چکی تھی میں نے انہیں سلام کیا ۔ انہوں نے دریافت کیا : تم کون ہو میں نے جواب دیا : میں سعید بن جمہان ہوں ۔ انہوں نے دریافت کیا : تمہارے والد کا کیا حال ہے میں نے بتایا : ازارقہ نے انہیں قتل کر دیا ہے ۔ انہوں نے فرمایا : اللہ تعالیٰ ازارقہ پر لعنت کرے اللہ تعالیٰ ازارقہ پر لعنت کرے پھر انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہ جہنم کے کتے ہیں “ ۔ راوی کہتے ہیں : میں نے دریافت کیا : صرف ازارقہ یہ ہیں یا تمام خوارج ایسے ہیں ؟ انہوں نے فرمایا : بلکہ تمام خوارج ( جہنم کے کتے ہیں ) ۔ میں نے کہا: حاکم وقت اگر لوگوں پر ظلم کرتا ہے ، اور ان کے ساتھ برا سلوک کرتا ہے ( تو کیا وہ بھی اس میں شامل ہو گا ؟ ) تو انہوں نے اپنا ہاتھ میری طرف بڑھایا اور پھر زور سے ٹہوکہ دے کر پھر فرمایا : اے ابن جمہان تم پر سواد اعظم کے ساتھ رہنا لازم ہے اگر سلطان تمہاری بات سنتا ہے ، تو تم اس کے گھر میں اس کے پاس جاؤ اور اپنے علم کے مطابق اسے بتا دو اگر وہ تمہاری بات قبول کر لیتا ہے ، تو ٹھیک ہے ورنہ اسے اس کے حال پر چھوڑ دو تم اس سے زیادہ علم رکھنے والے نہیں ہو گے ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں سے صرف خوارج کے جہنم کے کتے ہونے والا حصہ نقل کیا ہے ۔
یہ روایت امام طبرانی نے اور امام أحمد نے نقل کی ہے ۔ امام أحمد کے رجال ثقہ ہیں ۔ اس سے پہلے امام أحمد کی نقل کردہ ایک حدیث گزر چکی ہے ، جو خلافت کے بارے میں حکمرانوں کی خیرخواہی کی کیفیت کے بارے میں ہے یہ مختلف اسانید کے ساتھ نقل ہوئی ہے جن میں سے ایک سند حسن ہے ۔

سیدنا طلق بن علی رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس موجود تھے آپ نے ہم سے ارشاد فرمایا : ” عنقریب کچھ لوگ آئیں گے ، جو قرآن پڑھیں گے ، اور وہ ان کے حلق سے آگے نہیں جائے گا وہ دین سے یوں نکل جائیں گے ، جس طرح تیر نشانے کے پار ہو جاتا ہے اس شخص کے لئے مبارکباد ہے ، جو انہیں قتل کرے گا اور اس شخص کے لئے بھی مبارکباد ہے ، جسے وہ قتل کریں گے “ ۔ راوی کہتے ہیں : پھر نبی اکرم صلی اللہ علیہ وسلم میری طرف متوجہ ہوئے ، اور آپ نے ارشاد فرمایا : ” وہ لوگ عنقریب تمہاری قوم کی سرزمین سے نکلیں گے اے یمامی اور وہ لوگ نہروں کے درمیان جنگ کریں گے میں نے عرض کی : میرے ماں باپ آپ پر قربان ہوں وہاں تو نہریں نہیں ہیں نبی اکرم صلی اللہ علیہ وسلم نے ارشاد فرمایا : وہاں عنقریب ہوں گی “ ۔
یہ روایت امام طبرانی نے علی بن یحیی بن اسماعیل کے حوالے سے ان کے والد سے نقل کی ہے ، اور میں ان دونوں سے واقف نہیں ہوں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میں عنقریب عمالقہ کو ایک لشکر میں قتل کروں گا ، تو سیدنا جبرائیل علیہ السلام نے آپ کی خدمت میں عرض کی : اور سیدنا علی بن ابوطالب رضی اللہ عنہ بھی کریں گے “ ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن مسلمہ بن کہیل ہے ، اور وہ ضعیف ہے ۔