مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک مہم روانہ کی ان لوگوں کو مال غنیمت حاصل ہوا ان میں ایک شخص موجود تھا اس نے کہا: میں ان میں سے نہیں ہوں میں ان میں سے ایک عورت کے ساتھ عشق کرتا تھا تو میں اس سے جا ملا آپ لوگ مجھے موقع دیں کہ میں اسے دیکھ لوں پھر آپ میرے ساتھ جو مناسب ہو گا ؤہ کر لیجئے گا پھر وہ ایک طویل القامت گندمی رنگ کی عورت کے پاس آیا اور اس سے کہا: حبیش تم اسلام قبول کر لو اس سے پہلے کہ زندگی ختم ہو جائے ۔ ( اس کے بعد یہ اشعار کہے : ) ” کیا تمہیں یہ بات یاد ہے کہ جب میں نے تمہیں تلاش کیا تھا تو ہے حلیہ کے مقام پر پایا تھا یا خوانق کے مقام پر میں تم تک پہنچا تھا کیا یہ حق نہیں ہے کہ عاشق کو یہ چیز نصیب ہو کہ وہ رات کا زیادہ تر حصہ اور دن چڑھے کا وقت سفر کرتا رہے “ ۔ اس عورت نے کہا: ٹھیک ہے میں تم پر فدا ہو جاؤں پھر ان لوگوں نے اسے آگے کیا اور اس کی گردن اڑا دی پھر وہ عورت آئی اور اس پر گر گئی اس نے ایک یا دو مرتبہ جھر جھری لی اور پھر مر گئی جب وہ لوگ نبی اکرم صلی اللہ علیہ وسلم کے پاس آئے ، اور آپ کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : کیا تمہارے درمیان کوئی رحم دل شخص نہیں تھا ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کی سند حسن ہے ۔

سیدنا عصام مزنی رضی اللہ عنہ جنہیں صحابی ہونے کا شرف حاصل ہے وہ بیان کرتے ہیں : نبی اکرم صلی اللہ علیہ وسلم نے ایک لشکر یا ایک جنگی مہم روانہ کی آپ نے ان سے فرمایا جب تم لوگ کوئی مسجد دیکھو یا کہیں سے مؤذن کو سنو تو کسی کو قتل نہ کرنا نبی اکرم صلی اللہ علیہ وسلم نے ہمیں ایک جنگی مہم میں بھیج دیا ، اور ہمیں یہ حکم دیا ، تو ہم لوگ تہامہ کی سرزمین پر سفر کرتے ہوئے جا رہے تھے ہمیں ایک شخص ملا جو کچھ عورتوں کے اونٹوں کو لے کے جا رہا تھا ہم نے اسے اسلام کی پیشکش کی ہم نے دریافت کیا : کیا تم مسلمان ہو ۔ اس نے کہا: اسلام کیا ہوتا ہے ہم نے اسے اس بارے میں بتایا تو وہ اس سے واقف نہیں تھا اس نے دریافت کیا : اگر میں ایسا نہیں کرتا تو تم لوگ کیا کرو گے ہم نے کہا: ہم تمہیں قتل کر دیں گے اس نے کہا: کیا تم مجھے موقع دو گے کہ میں ان خواتین کے پاس چلا جاؤں ہم نے کہا: ٹھیک ہے ہم اس تک پہنچ سکتے تھے وہ شخص گیا وہاں ایک عورت اپنے ہودج میں موجود تھی اس شخص نے کہا: اے حبیش تم اسلام قبول کر لو اس سے پہلے کہ زندگی ختم ہو جائے ، تو اس عورت نے کہا: میں دسویں عورت مسلمان ہو جاؤں اور باقی نو بکھری رہیں ۔ پھر اس نے یہ اشعار کہے : ” کیا تمہیں یہ بات یاد ہے کہ جب میں نے تمہیں تلاش کیا تھا تو ہے حلیہ کے مقام پر پایا تھا یا خوانق کے مقام پر میں تم تک پہنچا تھا کیا یہ حق نہیں ہے کہ عاشق کو یہ چیز نصیب ہو کہ وہ رات کا زیادہ تر حصہ اور دن چڑھے کا وقت سفر کرتا رہے تو میرا کوئی گناہ نہیں ہے اگر میں نے یہ کہا: کہ جب ہم اکٹھے ہوں تو وہ میرے پاس ایسی محبت لے کر آئے جو کسی قسم کی تنگی سے پہلے ہو وہ میرے پاس ایسے وصل کے ہمراہ آئے جو دوری سے پہلے ہو اور امیر جدا ہونے والے محبوب سے دور ہو جائے “ ۔ پھر وہ ہمارے پاس آیا اس نے کہا: اب تم نے جو کرنا ہے کر لو ہم نے اسے آگے کر کے اس کی گردن اڑا دی پھر دوسری عورت ہودج سے اتری اور اس پر آ کر گر گئی ، یہاں تک کہ وہ مر گئی ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے اس روایت کا ابتدائی حصہ نقل کیا ہے ۔
یہ روایت امام طبرانی نے اور امام بزار نے نقل کی ہے ، اور ان دونوں کی سند حسن ہے ۔

عروہ بیان کرتے ہیں : نبی اکرم صلی اللہ علیہ وسلم نے نجد کے علاقے عمرہ کی طرف ایک جنگی مہم روانہ کی ان لوگوں کے امیر سیدنا ثابت بنا قرم رضی اللہ عنہ تھے تو اس مہم میں سیدنا ثابت بن اقرم رضی اللہ عنہ نے جام شہادت نوش کیا ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس راوی میں ضعف پایا جاتا ہے ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں ایک جنگی مہم میں بھیجا ہم پسپا ہو گئے ان دشمنوں میں سے سعد نام کا ایک سوار آیا میں نے اس کی طرف مڑ کے دیکھا تو اس کی پنڈلی کو دیکھا کہ وہ رکاب سے باہر نظر آ رہی تھی میں نے اس کی پنڈلی پر تیر مارا تو میں نے دیکھا اس کا خون یوں بہہ رہا تھا جیسے وہ ایک تسمہ ہو ، اس نے اپنے جانور کو بٹھا لیا ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

سیدنا خباب رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں ایک جنگی مہم میں بھیجا ہمیں پیاس لاحق ہو گئی ہمارے پاس پانی موجود نہیں تھا ہم نے اپنے میں سے کسی ایک شخص کی اونٹنی کو کھڑا کیا ، تو اس کی دونوں ٹانگوں کے درمیان مشکیزے کی طرح تھن دودھ سے بھرے ہوئے تھے ) تو ہم نے اس کا دودھ پی لیا ۔
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن بشار رمادی ہے اس میں ضعف پایا جاتا ہے ویسے اس کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا خالد بن ولید رضی اللہ عنہ اور سیدنا علی بن ابوطالب رضی اللہ عنہ کو یمن کی طرف بھیجا آپ نے سیدنا علی بن ابوطالب رضی اللہ عنہ کو مہاجرین کا امیر مقرر کیا اور سیدنا خالد بن ولید رضی اللہ عنہ کو دیہاتیوں کا امیر مقرر کیا آپ نے ارشاد فرمایا : ” اگر لڑائی ہو ، تو علی بن ابوطالب سب لوگوں کا امیر ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن عثمان ابوشیبہ ہے ، اور وہ ضعیف ہے ۔