مجمع الزوائد ومنبع الفوائد

سیدنا عبداللہ بن کعب بن مالک رضی اللہ عنہ اپنے چچا کے حوالے سے یہ بات نقل کرتے ہیں کہ کعب بن اشرف نبی اکرم صلی اللہ علیہ وسلم کی ہجو کیا کرتا تھا نبی اکرم صلی اللہ علیہ وسلم نے سیدنا سعد بن معاذ رضی اللہ عنہ کو حکم دیا کہ اس کی طرف پانچ افراد بھیجیں وہ لوگ اس کے پاس آئے وہ اس وقت نواحی علاقے میں اپنی قوم کی محفل میں بیٹھا ہوا تھا جب اس نے ان لوگوں کو دیکھا کہ تو ان کے حوالے سے پریشان ہو گیا اس نے دریافت کیا : تم لوگ کس وجہ سے آئے ہو انہوں نے بتایا ہم ضرورت کی وجہ سے تمہارے پاس آئے ہیں اس نے کہا: تم میں سے کوئی ایک میرے قریب آ جائے ، اور اپنی ضرورت کے حوالے سے میرے ساتھ بات چیت کرے ان لوگوں میں سے ایک اس کے قریب ہو گیا ان لوگوں نے یہ ظاہر کیا کہ ہم تمہارے پاس اس لئے آئے ہیں تاکہ اپنی زرہیں تمہیں فروخت کر دیں اس نے کہا: اللہ کی قسم اگر تم یہ کرنا چاہتے ہو ، تو بات یہ ہے کہ جب سے یہ صاحب تمہارے درمیان آئے ہیں تم لوگ مسلسل مشقت کا شکار ہو ( یہاں ایک لفظ کے بارے میں راوی کو شک ہے ) پھر ان لوگوں نے اس کے ساتھ یہ وعدہ کیا کہ وہ رات ہو جانے کے بعد اس کے پاس آئیں گے جب وہ لوگ اس کے پاس آئے ، تو وہ اٹھ کر ان کی طرف جانے لگا اس کی بیوی نے اس سے کہا: یہ لوگ اس وقت میں تمہارے پاس کسی ایسی چیز کی وجہ سے نہیں آئے ہوں گے ، جو تمہیں پسند ہو ۔ اس نے کہا: ان لوگوں نے اپنے حاجت مند ہونے کے بارے میں مجھے بتا دیا ہوا ہے جب وہ ان لوگوں کے قریب ہوا تو سیدنا ابوعبس رضی اللہ عنہ نے اس کی گردن پکڑ لی اور سیدنا محمد بن مسلمہ رضی اللہ عنہ نے تلوار کے ذریعے اس پر وار کیا ۔ انہوں نے اس کے پہلو میں تلوار مار کر اسے قتل کر دیا صبح کے وقت یہودی نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ان یہودیوں کے سامنے یہ بات ذکر کی کہ وہ اپنے اشعار میں نبی اکرم صلی اللہ علیہ وسلم کی ہجو کیا کرتا تھا ، اور نبی اکرم صلی اللہ علیہ وسلم کو اذیت پہنچاتا تھا پھر نبی اکرم صلی اللہ علیہ وسلم نے یہودیوں کو یہ دعوت دی کہ آپ اپنے اور ان لوگوں کے درمیان کوئی معاہدہ تحریر کروا لیتے ہیں راوی کہتے ہیں : وہ تحریر سیدنا علی رضی اللہ عنہ کے پاس موجود تھی ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم لوگوں کے ساتھ چلتے ہوئے بقیع غرقد کی طرف جا رہے تھے پھر آپ نے ان لوگوں کی طرف رخ کیا اور فرمایا : تم اللہ کا نام لے کر روانہ ہو جاؤ اے اللہ تو ان کی مدد کرنا راوی کہتے ہیں : یعنی نبی اکرم صلی اللہ علیہ وسلم نے ان لوگوں کے لیے یہ فرمایا تھا جنہیں آپ نے کعب بن اشرف کی طرف بھجوایا تھا ۔
یہ روایت امام أحمد اور امام بزار نے نقل کی ہے ، تاہم انہوں نے یہ الفاظ نقل کیے ہیں : جب نبی اکرم صلی اللہ علیہ وسلم نے سیدنا محمد بن مسلمہ رضی اللہ عنہ اور ان کے ساتھیوں کو کعب بن اشرف کی طرف بھجوایا تھا تاکہ وہ اسے قتل کر دیں ( اس وقت یہ واقعہ پیش آیا ) باقی روایت حسب سابق ہے ۔
یہ روایت امام طبرانی نے نقل کی ہے ، اور یہ الفاظ زائد نقل کیے ہیں : پھر نبی اکرم صلی اللہ علیہ وسلم اپنے گھر واپس تشریف لے آئے ۔ اس روایت کی سند میں ایک راوی ابن اسحاق ہے ، اور وہ مدلس ہے ۔ اس روایت کے بقیہ رجال صحیح کے رجال ہیں ۔

سیدنا عبادہ بن صامت رضی اللہ عنہ بیان کرتے ہیں : کعب بن اشرف نے مکہ میں ابووداعہ کے پاس موجود رہ کر نبی اکرم صلی اللہ علیہ وسلم کی ہجو کی ، نبی اکرم صلی اللہ علیہ وسلم نے سیدنا حسان بن ثابت رضی اللہ عنہ کو حکم دیا ، تو انہوں نے اس کی ہجو کی جب قریش کو اس بات کا پتہ چلا کہ سیدنا حسان رضی اللہ عنہ نے ابووداعہ کی ہجو کی ہے ، تو ان لوگوں نے کعب بن اشرف کو وہاں سے نکال دیا جب وہ مدینہ منورہ آیا تو نبی اکرم صلی اللہ علیہ وسلم نے اس کے لئے محمد بن مسلمہ ابوعبس بن جبر اور ابونائلہ کو بھیجا ان لوگوں نے بنوامیہ بن زید کے علاقے میں عجول نامی نالے کے پاس کعب بن اشرف کو قتل کر دیا ۔
یہ روایت امام طبرانی نے نقل کی ہے اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ۔ اس روایت کے بقیہ رجال ثقہ ہیں ۔