مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : سیدنا علی رضی اللہ عنہ سیدہ فاطمہ رضی اللہ عنہا کے پاس تشریف لائے ، یہ غزوہ اُحد کے بعد کی بات ہے ، انہوں نے یہ اشعار پڑھے : ” اے فاطمہ ! یہ تلوار لو ، جو مذموم نہیں ، کیونکہ میں نہ تو بزدل ہوں ، اور نہ ہی کمتر ہوں ، میں نے سیدنا أحمد صلی اللہ علیہ وسلم کی مدد کرنے ، اور پروردگار کی رضا مندی کے حصول کے لیے بھرپور کوشش کی ہے ، ( وہ پروردگار ) جو بندوں کے افعال کے بارے میں علم رکھتا ہے “ ۔ تو نبی اکرم صلی اللہ علیہ وسلم نے ارشاد فرمایا : اگر تم نے اچھے طریقے سے لڑائی کی ہے ، تو سہل بن حنیف اور ابن صمہ نے بھی اچھے طریقے سے لڑائی کی ہے ۔ راوی کہتے ہیں : روایت میں ایک اور صاحب کا ذکر کیا ہے ، جسے معلیٰ نامی راوی بھول گئے ، تو سیدنا جبرائیل علیہ السلام نے کہا: اے سیدنا محمد ! آپ کے والد کی قسم ! یہ بھائی چارہ ہے ، نبی اکرم صلی اللہ علیہ وسلم نے فرمایا : اے جبرائیل ! یہ ( یعنی سیدنا علی رضی اللہ عنہ ) مجھ سے ہے اور میں اس سے ہوں ، تو سیدنا جبرائیل علیہ السلام نے کہا: میں آپ دونوں سے ہوں ۔
یہ روایت امام بزار نے نقل کی ہے ، اس کی سند میں ایک راوی معلی بن عبدالرحمن واسطی ہے اور وہ انتہائی ضعیف ہے ، ابن عدی کہتے ہیں : مجھے یہ امید ہے کہ اس میں کوئی حرج نہیں ہو گا ۔

سیدنا سہل بن حنیف رضی اللہ عنہ بیان کرتے ہیں : سیدنا علی رضی اللہ عنہ سیدہ فاطمہ رضی اللہ عنہا کے پاس تشریف لائے ، یہ غزوہ احد کے بعد کی بات ہے ، انہوں نے کہا: میری یہ تلوار پکڑ لو ! میں نے اس کے ذریعے آج اچھے طریقے سے ضربیں لگائی ہیں ، تو نبی اکرم صلی اللہ علیہ وسلم نے ارشاد فرمایا : اگر تم نے اچھے طریقے سے لڑائی کی ہے ، تو عاصم بن ثابت ، سہل بن حنیف اور حارث بن صمہ نے بھی اچھے طریقے سے لڑائی کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی ایوب بن ابوامامہ ہے ، ازدی کہتے ہیں : وہ منکر الحدیث ہے ۔

سیدنا عبداللہ بن عباس رضی اللہ عنہما بیان کرتے ہیں : غزوہ اُحد کے بعد ، سیدنا علی بن ابوطالب رضی اللہ عنہ سیدہ فاطمہ رضی اللہ عنہا کے پاس تشریف لائے اور بولے : یہ تلوار لے لو ! جو مذمت کے بغیر ہے ، تو نبی اکرم صلی اللہ علیہ وسلم نے فرمایا : اگر تم نے اچھے طریقے سے لڑائی کی ہے ، تو سہل بن حنیف نے ، اور ابودجانہ سماک بن خرشہ نے بھی اچھے طریقے سے لڑائی کی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔