مجمع الزوائد ومنبع الفوائد

سیدنا ابواسید رضی اللہ عنہ بیان کرتے ہیں : غزوہ بدر کے موقع پر ، مجھے بنو عابد بن مرزبان کی تلوار ملی ، جب نبی اکرم صلی اللہ علیہ وسلم نے یہ حکم دیا کہ لوگ اپنے پاس موجود چیزیں لوٹا دیں ( یعنی مال غنیمت میں جمع کروا دیں ) تو میں آیا اور میں نے اس تلوار کو مال غنیمت میں شامل کر دیا ۔ راوی بیان کرتے ہیں : نبی اکرم صلی اللہ علیہ وسلم سے جو چیز مانگی جاتی تھی ، نبی اکرم صلی اللہ علیہ وسلم کبھی ” نہ “ نہیں کرتے تھے ۔ راوی بیان کرتے ہیں : سیدنا ارقم بن ابوارقم مخزومی رضی اللہ عنہ نے اس تلوار کو پہچان لیا ، انہوں نے وہ نبی اکرم صلی اللہ علیہ وسلم سے مانگ لی ، تو نبی اکرم صلی اللہ علیہ وسلم نے وہ انہیں دیدی ۔

ایک روایت میں یہ الفاظ ہیں : سیدنا ابواسید رضی اللہ عنہ کے حوالے سے یہ بات منقول ہے : سیدنا مالک بن ربیعہ رضی اللہ عنہ بیان کرتے ہیں : غزوہ بدر کے موقع پر مجھے ” بنو عابد مخزومیوں مرزبان “ کی تلوار ملی ۔ یہ تمام روایات امام أحمد نے نقل کی ہیں اور ان کی سند میں ایسا راوی ہے جس کا نام بیان نہیں کیا گیا ہے ، اس روایت کے بقیہ رجال ثقہ ہیں ۔

سیدنا ارقم بن ابوارقم رضی اللہ عنہ بیان کرتے ہیں : غزوہ بدر کے دن نبی اکرم صلی اللہ علیہ وسلم نے ارشاد فرمایا : ” تم لوگوں کے پاس مال غنیمت میں سے جو کچھ ہے ، اُسے واپس کر دو ( یعنی مال غنیمت میں جمع کروا دو ) سیدنا ابواسید ساعدی رضی اللہ عنہ نے بنو عابد بن مرزبان کی تلوار اٹھائی ، تو سیدنا ارقم رضی اللہ عنہ نے اُسے پہچان لیا انہوں نے عرض کی : یا رسول اللہ ! یہ مجھے ہبہ کے طور پر دیدیں ، تو نبی اکرم صلی اللہ علیہ وسلم نے وہ انہیں عطا کر دی “ ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ، اس کے رجال ثقہ ہیں ۔

سیدنا عبادہ بن صامت رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ نکلا ، میں آپ کے ساتھ غزوہ بدر میں شریک ہوا ، لوگوں کا آمنا سامنا ہوا ، تو اللہ تعالیٰ نے دشمنوں کو پسپا کر دیا ، کچھ لوگ ان کے پیچھے چلے گئے ، وہ انہیں بھگا رہے تھے اور قتل کر رہے تھے ، کچھ لوگ ان کے ساز و سامان کی طرف گئے ، اور اُسے اکٹھا کرنے لگے اور جمع کرنے لگے ، کچھ لوگ نبی اکرم صلی اللہ علیہ وسلم کے پاس آ گئے ، تاکہ دشمن آپ پر حملہ نہ کر دے ، جب رات کا وقت ہوا اور سب لوگ دوبارہ ملے ، تو جن لوگوں نے مال غنیمت جمع کیا تھا ، تو انہوں نے یہ کہا: ہم نے اسے اکٹھا کیا ہے اور جمع کیا ہے ، اس میں کسی اور کا حصہ نہیں ہو گا ، جو لوگ دشمن کے پیچھے گئے تھے ۔ انہوں نے کہا: تم اس کے بارے میں ہم سے زیادہ حق نہیں رکھتے ، کیونکہ ہم نے اس ساز و سامان سے دشمن کو پرے کیا ہے اور انہیں پسپا کیا ہے ، جو لوگ نبی اکرم صلی اللہ علیہ وسلم کی حفاظت کر رہے تھے انہوں نے یہ کہا: اس کے بارے میں تم ، ہم سے زیادہ حق نہیں رکھتے ، ہم نبی اکرم صلی اللہ علیہ وسلم کا دھیان رکھ رہے تھے ، ہمیں یہ اندیشہ تھا کہ کہیں دشمن آپ کو نقصان نہ پہنچا دے ، تو ہم اس طرف مصروف رہے ۔ ( راوی بیان کرتے ہیں : ) تو اس بارے میں یہ آیت نازل ہوئی : ” لوگ تم سے انفال کے بارے میں دریافت کرتے ہیں ، تم یہ فرما دو : انفال ، اللہ اور رسول کے لئے ہے ، تم لوگ اللہ سے ڈرو اور آپس میں اصلاح کرو “ تو اللہ کے رسول صلی اللہ علیہ وسلم نے وہ مال ، مسلمانوں کے درمیان تقسیم کر دیا ۔ نبی اکرم صلی اللہ علیہ وسلم جب دشمن کی سرزمین پر حملہ آور ہوتے تھے ، تو انفال میں سے ایک چوتھائی حصہ ( اضافی ادائیگی ، یا انعام ) کے طور پر دیتے تھے اور جب آپ وہاں سے واپس تشریف لے جاتے تھے ، تو آپ ایک تہائی حصہ اضافی ادائیگی کے طور پر دیتے تھے آپ انفال ( رکھنے ) کو ناپسند کرتے تھے اور یہ فرماتے تھے : ” مومنوں میں سے طاقتور لوگ ، کمزور لوگوں کو لوٹا دیں “ ۔ ( علامہ ہیثمی فرماتے ہیں : ) میں یہ کہتا ہوں : امام ترمذی اور دیگر حضرات نے یہ بات نقل کی ہے : ” نبی اکرم صلی اللہ علیہ وسلم آغاز میں ایک چوتھائی حصہ انعام کے طور پر دیتے تھے اور واپسی کے وقت ایک تہائی حصہ دیتے تھے “ ۔
یہ روایت امام أحمد اور امام طبرانی نے نقل کی ہے ، امام أحمد کے رجال ثقہ ہیں ۔