مجمع الزوائد ومنبع الفوائد

عروہ بیان کرتے ہیں : جب حج کا موقع آیا ، تو انصار میں سے بنو مازن بن نجار سے تعلق رکھنے والے کچھ افراد حج کے لئے آئے ، جن میں سیدنا معاذ بن عفراء رضی اللہ عنہ اور سیدنا اسعد بن زرارہ رضی اللہ عنہ تھے ، ہنو زریق میں سے سیدنا رافع بن مالک رضی اللہ عنہ اور سیدنا ذکوان بن عبدالقیس رضی اللہ عنہ تھے ، بنو اشہل میں سے سیدنا ابوہیثم بن تیہان رضی اللہ عنہ تھے ، بن عمرو بن عوف میں سے سیدنا عویم بن ساعدہ رضی اللہ عنہ تھے ، نبی اکرم صلی اللہ علیہ وسلم ان حضرات کے پاس آئے اور ان لوگوں کو یہ بات بتائی کہ اللہ تعالیٰ نے اپنی نبوت اور عزت افزائی کے لئے آپ کو منتخب کیا ہے ، نبی اکرم صلی اللہ علیہ وسلم نے ان لوگوں کے سامنے قرآن کریم کی تلاوت کی ، جب ان لوگوں نے نبی اکرم صلی اللہ علیہ وسلم کا فرمان سنا ، تو وہ خاموش رہے ، ان کے دل نبی اکرم صلی اللہ علیہ وسلم کی دعوت کے حوالے سے مطمئن ہو گئے اور انہیں یہ بات پتہ چل گئی کہ وہ لوگ اہل کتاب سے جس کا تذکرہ سنتے تھے ، اس کی صفات آپ میں پائی جاتی ہیں ، آپ جس چیز کی طرف دعوت دے رہے ہیں ، انہوں نے اس حوالے سے آپ کی تصدیق کی ، آپ پر ایمان لائے اور وہ لوگ بھلائی کے اسباب میں سے ہو گئے ، پھر ان لوگوں نے نبی اکرم صلی اللہ علیہ وسلم سے کہا: آپ یہ بات جانتے ہیں اوس اور خزرج کے درمیان دشمنی پائی جاتی ہے ، ہمیں یہ بات پسند ہے کہ اللہ تعالیٰ جب آپ کے معاملے کو کامیابی سے دو چار کرے ، تو ہم اللہ تعالیٰ کے لئے اور آپ کے لئے کوشش کرنے والے ہوں ، آپ کو جو مناسب لگتا ہے ، ہم آپ سے وہی طے کرتے ہیں ، آپ اللہ کا نام لے کر یہاں ٹھہرے رہیں ، ہم اپنی قوم کے پاس جاتے ہیں اور انہیں آپ کے بارے میں بتاتے ہیں اور انہیں اللہ اور اس کے رسول کی طرف دعوت دیتے ہیں ، ہو سکتا ہے اللہ تعالیٰ ہمارے درمیان بہتری کر دے اور ہمارے معاملے کو اکٹھا کر دے ، آج ہم ایک دوسرے سے جدا ہیں ، ایک دوسرے سے دشمنی رکھتے ہیں ، اگر اب آپ ہمارے پاس تشریف لے آئے اور ہمارے درمیان آپس میں صلح نہ ہوئی ، تو ہم اجتماعی طور پر آپ کا ساتھ نہیں دے سکیں گے ، ہم اگلے سال حج کے موقع پر دوبارہ آپ سے ملاقات کریں گے ، نبی اکرم صلی اللہ علیہ وسلم ان کی کہی ہوئی بات سے راضی ہو گئے اور وہ لوگ اپنی قوم کی طرف واپس چلے گئے ، وہ پوشیدہ طور پر ان لوگوں کو دعوت دیتے رہے اور انہیں نبی اکرم صلی اللہ علیہ وسلم کے بارے میں بتاتے رہے اور ان تعلیمات کے بارے میں بتاتے رہے ، جن کے ہمراہ اللہ تعالیٰ نے آپ کو مبعوث کیا ہے ، انہیں قرآن کی دعوت دیتے رہے ، یہاں تک کہ انصار کے تقریباً ہر ایک محلے میں کچھ لوگ مسلمان ہو گئے ۔ پھر ان لوگوں نے نبی اکرم صلی اللہ علیہ وسلم کو پیغام بھیجا کہ آپ ہماری طرف اپنے میں سے کسی فرد کو بھیجیں ، جو لوگوں کو اللہ کی کتاب کے مطابق دعوت دے ، کیونکہ یہ اس بات کے زیادہ مناسب ہو گا کہ اس کی پیروی کی جائے ، تو نبی اکرم صلی اللہ علیہ وسلم نے بنوعبدالدار سے تعلق رکھنے والے سیدنا مصعب بن عمیر رضی اللہ عنہ کو ان کی طرف بھیج دیا ، انہوں نے بنو غنم کے علاقے میں سیدنا اسعد بن زرارہ رضی اللہ عنہ کے ہاں پڑاؤ کیا اور پوشیدہ طور پر لوگوں کو دعوت دینے لگے اور اسلام پھیلنے لگا اور اس کے ماننے والے زیادہ ہو گئے ، ابھی ان کی دعوت کی بنیاد پر یہ لوگ پوشیدہ زندگی گزار رہے تھے ، تو اسی دوران ایک مرتبہ سیدنا اسعد بن زرارہ رضی اللہ عنہ اور سیدنا مصعب بن عمیر رضی اللہ عنہ ” مری “ کے کنویں کے پاس آئے ، یا اس کے قریب آئے اور وہاں بیٹھ گئے ، انہوں نے کچھ لوگوں کو پیغام بھیجا تھا ، وہ پوشیدہ طور پر ان لوگوں کے پاس آئے ، ابھی سیدنا مصعب بن عمیر رضی اللہ عنہ ان لوگوں کے ساتھ بات چیت کر رہے تھے اور انہیں قرآن کے بارے میں بتا رہے تھے کہ سیدنا سعد بن معاذ رضی اللہ عنہ کو ان لوگوں کے بارے میں بتا دیا گیا ، تو وہ اسی وقت ہتھیار پہن کر ان لوگوں کے پاس آئے اور ان کے پاس نیزہ بھی تھا ، وہ آ کر سیدنا مصعب رضی اللہ عنہ کے پاس کھڑے ہو گئے اور بولے : یہ اجنبی ، اکیلا وطن سے دور شخص کس لئے ہمارے علاقے میں آیا ہے ؟ تاکہ باطل کے ذریعے ہمارے کمزور لوگوں کو بے وقوف بنا لے ، اور باطل کی طرف ان لوگوں کو دعوت دے ؟ اب کے بعد میں تمہیں اپنے علاقے میں نہ دیکھوں ، تو وہ لوگ واپس چلے گئے ، پھر وہ لوگ دوبارہ ” مری“ نامی کنویں یا اس کے پاس آئے سیدنا سعد بن معاذ رضی اللہ عنہ کو دوسری مرتبہ ان کے بارے میں بتایا گیا ، تو انہوں نے پھر سخت دھمکی دی ، لیکن وہ پہلی سے کم تھی ، جب سیدنا اسعد بن زرارہ رضی اللہ عنہ نے ان کی طرف سے نرمی دیکھی ، تو کہا: اے میرے خالہ زاد ! آپ اس کی بات سن لیں ، اگر آپ نے اس سے کوئی منکر بات سنی ، تو آپ اس کو مسترد کر دیجئے گا اور اگر کوئی بھلائی کی بات سنی ، تو آپ اللہ تعالیٰ کی بات کو قبول کر لیجئے گا ، سیدنا سعد بن معاذ رضی اللہ عنہ نے کہا: یہ کیا کہتا ہے ؟ تو سیدنا مصعب بن عمیر رضی اللہ عنہ نے ان کے سامنے یہ آیات تلاوت کیں : ” حم ! کتاب مبین کی قسم ہے ، ہم نے اسے عربی قرآن بنایا ہے ، تاکہ تم اسے سمجھ لو “ سیدنا سعد رضی اللہ عنہ نے کہا: میں صرف وہ بات سنوں گا جسے میں اچھا سمجھوں گا ، پھر وہ واپس چلے گئے ، اللہ تعالیٰ نے انہیں ہدایت نصیب کر دی لیکن واپس جانے تک انہوں نے اسلام کے معاملے کو ظاہر نہیں کیا پھر وہ اپنی قوم کی طرف واپس گئے اور بنو عبداشہل کو اسلام کی طرف دعوت دی ، اور اپنے اسلام کو ظاہر کر دیا ، انہوں نے اس بارے میں یہ کہا: جو بھی چھوٹا یا بڑا مرد یا عورت اس بارے میں شک کرتے ہیں ، تو وہ ہمارے پاس ایسی چیز لے آئیں ، جو اس سے زیادہ ہدایت والی ہو ، ہم اسے اختیار کر لیں گے ، اللہ کی قسم ! ایک ایسا معاملہ آیا ہے ، اس کے بارے میں گردنیں غمگین ہو جاتی ہیں ، تو بنوعبداشہل نے سیدنا سعد رضی اللہ عنہ کے اسلام قبول کرنے کے وقت اور ان کی دعوت کے وقت اسلام قبول کر لیا ، البتہ اس شخص نے نہیں کیا ، جس کے سامنے اس کی تبلیغ نہیں ہوئی تھی ، تو یہ انصار کا وہ پہلا خاندان تھا جو مکمل مسلمان ہو گیا ، پھر بنونجار نے سیدنا مصعب بن عمیر رضی اللہ عنہ کو نکال دیا اور سیدنا اسعد بن زرارہ رضی اللہ عنہ پر سختی کی ، تو سیدنا مصعب عمیر رضی اللہ عنہ سیدنا سعد بن معاذ رضی اللہ عنہ کے ہاں منتقل ہو گئے اور مسلسل دعوت دیتے رہے ، اللہ تعالیٰ نے ان کے ہاتھ پر اتنے لوگوں کو ہدایت نصیب کی کہ انصار کے ہر خاندان میں کچھ افراد مسلمان ہو گئے ، ان کے معززین مسلمان ہو گئے ، سیدنا عمرو بن جموح رضی اللہ عنہ مسلمان ہو گئے اور ان کے بتوں کو توڑ دیا گیا ، تو مسلمان وہاں کے رہنے والوں میں نمایاں حیثیت کے مالک ہو گئے ، ان کا معاملہ ٹھیک ہو گیا پھر سیدنا مصعب بن عمیر رضی اللہ عنہ نبی اکرم صلی اللہ علیہ وسلم کے پاس واپس چلے گئے ، انہیں ” قاری صاحب“ کہا: جاتا تھا ۔
یہ روایت امام طبرانی نے ” مرسل “ روایت کے طور پر نقل کی ہے اس کی سند میں ایک راوی ابن لہیعہ ہے اور اس میں ضعف پایا جاتا ہے ، یہ حسن الحدیث ہے اس روایت کے بقیہ رجال ثقہ ہیں ۔

ابن اسحاق بیان کرتے ہیں : جب اللہ تعالیٰ نے اپنے دین کو غالب کرنے کا ارادہ کیا اور اپنے نبی کو غلبہ عطا کرنا چاہا اور اپنے وعدے کو پورا کرنا چاہا ، تو نبی اکرم صلی اللہ علیہ وسلم حج کے موقع پر نکلے ، یہ اس حج کی بات ہے جس میں انصار کے گروہ نے آپ سے ملاقات کی ان کے بیان کے مطابق وہ چھ افراد تھے ، جن میں سے ایک سیدنا جابر بن عبداللہ بن رعاب رضی اللہ عنہ تھے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا کعب بن مالک رضی اللہ عنہ بیان کرتے ہیں : عقبہ ( یعنی بیعت عقبہ ) میں سے جب بارہ افراد آئے ، تو نبی اکرم صلی اللہ علیہ وسلم نے انہیں یہ حکم دیا کہ اگلے سال وہ ستر افراد آئیں ، تو ہم ایک سال تک یوں ٹھہرے رہے کہ ہم میں سے کوئی ایک شخص اپنے ساتھی کے پاس فرمانبرداری ، رمل ، اور کھانے کی چیز لے کر جاتا تھا ، یہاں تک کہ ہم میں سے ستر افراد پورے ہو گئے ۔
یہ روایت امام طبرانی نے نقل کی ہے اس کی سند میں ایک راوی یعقوب بن محمد زہری ہے جسے حجاج بن شاعر نے ثقہ قرار دیا ہے اور جمہور نے اسے ضعیف کہا: ہے ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم حج کے موقع پر ایک ، ایک قبیلے کے پاس جا کر انہیں دعوت دیا کرتے تھے یہاں تک کہ اللہ تعالیٰ انصار کے گروہ کو لے آیا ، جب اللہ تعالیٰ نے ان کے لئے سعادت مندی طے کر دی ، اور ان کے لئے عزت کو لے آیا ، تو انہوں نے ساتھ دینے کا وعدہ بھی کیا اور مدد کرنے کا وعدہ بھی کیا ، تو اللہ تعالیٰ ان کے نبی کے حوالے سے انہیں جزائے خیر عطا کرے ، اللہ کی قسم ہم نے ان کے ساتھ جو طے کیا تھا ، اسے اس طرح پورا نہیں کیا ، ہم ان سے یہ کہا: کرتے تھے کہ ہم امیر ہوں گے اور تم وزیر ہو گے ، اگر میں ایک سال تک باقی رہ گیا ، تو میرا کوئی غلام باقی نہیں رہے گا البتہ انصاری کا معاملہ مختلف ہے ۔
یہ روایت امام بزار نے نقل کی ہے ، اس کی سند حسن ہے ، اس کی سند میں ایک راوی عبداللہ بن شبیب ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم ہر سال عرب کے مختلف قبائل کے سامنے دعوت دیا کرتے تھے اور یہ کہتے تھے : وہ لوگ اپنی قوم کے پاس نبی اکرم صلی اللہ علیہ وسلم کو لے جائیں ، تاکہ آپ اللہ کے کلام اور اس کی رسالت کی تبلیغ کر سکیں ، پھر ان لوگوں کو جنت نصیب ہو گی ، عربوں کے کسی بھی قبیلے نے آپ کی اس پیشکش کو قبول نہیں کیا ، یہاں تک کہ جب اللہ تعالیٰ نے اپنے دین کو غالب کرنے کا اور اپنے نبی کی مدد کرنے کا اور اپنے وعدے کو پورا کرنے کا ارادہ کیا ، تو انصار کا ایک گروہ آپ کے پاس آ گیا ان لوگوں نے نبی اکرم صلی اللہ علیہ وسلم کی دعوت کو قبول کیا ، تو اللہ تعالیٰ نے اپنے نبی کے لیے ہجرت کا مقام ( مدینہ منورہ ) بنا دیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن عمر عمری ہے ، جسے امام أحمد اور ایک جماعت نے ثقہ قرار دیا ہے ، امام نسائی رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا کعب بن مالک رضی اللہ عنہ ، جو بیعت عقبہ میں شرکت کرنے والے افراد میں سے ایک ہیں ، انہوں نے نبی اکرم صلی اللہ علیہ وسلم کی بیعت بھی کی ہے ، وہ بیان کرتے ہیں : ہم مشرکین سے تعلق رکھنے والے ، اپنی قوم کے حاجیوں ، کے ہمراہ روانہ ہوئے ہم لوگ نماز پڑھا کرتے تھے ہمارے ساتھ سیدنا براء بن معرور رضی اللہ عنہ تھے جو ہمارے بڑے اور ہمارے سردار تھے ، جب ہم سفر پر روانہ ہوئے اور مدینہ منورہ سے نکلے ، تو سیدنا براء رضی اللہ عنہ نے ہم سے کہا: اے افراد ! اللہ کی قسم میری ایک رائے ہے ، اللہ کی قسم مجھے نہیں معلوم کہ تم اس بارے میں میری موافقت کرتے ہو یا نہیں کرتے ہو ؟ انہوں نے کہا: کیا بات ہے ؟ انہوں نے کہا: میں یہ سمجھتا ہوں کہ میں اس عمارت یعنی خانہ کعبہ کی طرف پشت نہ کروں اور میں اس کی طرف رخ کر کے نماز ادا کروں ، ہم نے کہا: اللہ کی قسم ہمیں تو یہی اطلاع ملی ہے کہ نبی اکرم صلی اللہ علیہ وسلم شام کی طرف رخ کر کے نماز ادا کرتے ہیں ، تو ہم نبی اکرم صلی اللہ علیہ وسلم کے برخلاف نہیں کرنا چاہیں گے ، تو ہم نے کہا: ہم ایسا نہیں کریں گے راوی کہتے ہیں : جب نماز کا وقت آتا تھا ، تو ہم شام کی طرف رخ کر کے نماز ادا کرتے تھے ، اور وہ خانہ کعبہ کی طرف رخ کر کے نماز ادا کرتے تھے ، یہاں تک کہ ہم لوگ مکہ آ گئے ، میرے بھائی نے کہا: ہم نے ان کے طرز عمل پر ناراضگی کا اظہار بھی کیا لیکن وہ اپنی بات پر مصر رہے ، جب ہم مکہ آ گئے ، تو انہوں نے کہا: اے میرے بھتیجے ! تم نبی اکرم صلی اللہ علیہ وسلم کی طرف چلو ، تاکہ میں ان سے اس چیز کے بارے میں دریافت کروں ، جو میں سفر کے دوران کرتا رہا ہوں ، اللہ کی قسم ! تم لوگوں نے اس بارے میں جو میرے برخلاف رائے رکھی ہے ، اس بارے میں میرے ذہن میں کچھ الجھن پائی جاتی ہے ، راوی کہتے ہیں : ہم نکلے ہم نبی اکرم صلی اللہ علیہ وسلم کے بارے میں دریافت کرنے لگے ، ہم آپ کو پہچانتے نہیں تھے کیونکہ ہم نے اس سے پہلے آپ کو نہیں دیکھا تھا ، اہل مکہ میں سے ایک شخص ہم سے ملا ، ہم نے ان سے نبی اکرم صلی اللہ علیہ وسلم کے بارے میں دریافت کیا ، تو انہوں نے کہا: کیا تم دونوں انہیں پہچانتے ہو ؟ ہم نے کہا: جی نہیں ! اس نے کہا: کیا تم دونوں سیدنا عباس بن عبدالمطلب رضی اللہ عنہ کو پہچانتے ہو ، جو ان کے چچا ہیں ؟ انہوں نے جواب دیا : جی ہاں ! کیونکہ ہم سیدنا عباس رضی اللہ عنہ کو جانتے تھے ، وہ تجارت کے سلسلے میں ہمارے ہاں آیا کرتے تھے ، پھر ان دونوں کو مسجد ( یعنی خانہ کعبہ کے پاس ) لایا گیا ، تو وہاں ایک صاحب بیٹھے ہوئے تھے ، جو سیدنا عباس رضی اللہ عنہ کے ساتھ بیٹھے ہوئے تھے ۔ راوی کہتے ہیں : ہم مسجد میں داخل ہوئے ، وہاں سیدنا عباس رضی اللہ عنہ بیٹھے ہوئے تھے اور ان کے ساتھ نبی اکرم صلی اللہ علیہ وسلم بیٹھے ہوئے تھے ہم نے سلام کیا اور پھر آپ کے پاس آ کر بیٹھ گئے ، نبی اکرم صلی اللہ علیہ وسلم نے سیدنا عباس رضی اللہ عنہ سے دریافت کیا : اے ابوالفضل ! کیا آپ ان دو افراد کو جانتے ہیں ؟ انہوں نے جواب دیا : جی ہاں ! یہ براء بن معرور ہے ، جو اپنی قوم کا سردار ہے ، اور یہ کعب بن مالک ہے ، سیدنا کعب بن مالک رضی اللہ عنہ کہتے ہیں : اللہ کی قسم ! میں نبی اکرم صلی اللہ علیہ وسلم کے فرمان کو ( آج بھی ) نہیں بھولا ، آپ نے فرمایا : وہ جو شاعر ہے ؟ انہوں نے جواب دیا : جی ہاں ! سیدنا کعب رضی اللہ عنہ کہتے ہیں : سیدنا براء بن معرور رضی اللہ عنہ نے عرض کی : اے اللہ کے نبی ! میں اس سفر پر نکلا ، اللہ تعالیٰ نے مجھے اسلام کی ہدایت دے دی ، لیکن میں نے اس تعمیر ( یعنی خانہ کعبہ ) کی طرف پشت نہیں کی ، میں اس کی طرف رخ کر کے نماز ادا کرتا رہا ، میرے ساتھیوں نے اس بارے میں میری مخالفت کی ، یہاں تک کہ اس حوالے سے میرے ذہن میں الجھن پیدا ہوئی یا رسول اللہ ! اس بارے میں آپ کی کیا رائے ہے ؟ نبی اکرم صلی اللہ علیہ وسلم نے ارشاد فرمایا : تم جس قبلہ پر پہلے ہوا ، گر تم اس پر برقرار رہو ، تو یہ بہتر ہے ، راوی کہتے ہیں : تو سیدنا براء رضی اللہ عنہ نے دوبارہ نبی اکرم صلی اللہ علیہ وسلم کے قبلہ کی طرف رخ کر لیا اور ہمارے ساتھ شام کی طرف رخ کر کے نماز ادا کرنے لگے ، ان کے اہل خانہ ، خانہ کعبہ کی طرف رخ کر کے نماز ادا کرتے رہے ، یہاں تک کہ ان کا انتقال ہو گیا ، اس طرح نہیں ہے ، جس طرح لوگ بیان کرتے ہیں ، ہم اس کے بارے میں ، اُن لوگوں سے زیادہ جانتے ہیں ۔ راوی بیان کرتے ہیں : ہم لوگ حج کے لئے روانہ ہوئے ، ہم نے نبی اکرم صلی اللہ علیہ وسلم کے ساتھ طے کیا کہ ایام تشریق کے درمیانی دن میں عقبہ میں ملیں گے ، جب ہم حج سے فارغ ہو گئے اور وہ رات آ گئی ، جس کا ہم نے نبی اکرم صلی اللہ علیہ وسلم کے ساتھ وعدہ کیا تھا ، تو ہمارے ساتھ سیدنا عبداللہ بن عمرو بن حرام رضی اللہ عنہ تھے ، جو سیدنا جابر رضی اللہ عنہ کے والد ہیں ، وہ ہمارے سرداروں میں سے ایک تھے ، ہم اپنی قوم کے مشرکین سے اپنے معاملے کو چھپا رہے تھے ، ہم نے ان کے ساتھ بات چیت کی ، ہم نے ان سے کہا: اے ابوجابر ! آپ ہمارے سرداروں میں سے ایک ہیں ، اور ہمارے معززین میں سے ایک ہیں ، آپ کے بارے میں ہماری یہ خواہش ہے کہ آپ جس صورت حال میں ہیں ، کہیں کل آپ آگ کا ایندھن نہ بن جائیں ، پھر میں نے انہیں اسلام کی طرف دعوت دی اور انہیں نبی اکرم صلی اللہ علیہ وسلم کے ساتھ طے کیے ہوئے معاملے کے بارے میں بتایا ، تو انہوں نے اسلام قبول کر لیا اور وہ بھی ہمارے ساتھ بیعت عقبہ میں شریک ہوئے وہ نقیب تھے ۔ راوی کہتے ہیں : ہم اس رات اپنی قوم کے ساتھ اپنی رہائشی جگہ پر سو گئے ، یہاں تک کہ جب ایک تہائی رات گزر گئی ، تو ہم اپنی رہائشی جگہ سے نکلے ، کیونکہ نبی اکرم صلی اللہ علیہ وسلم کے ساتھ وعدہ کیا ہوا تھا ، ہم آرام سے چھپ کر کھسکتے ہوئے نکلے ، ہیں جیسے ” قطا “ نامی پرندہ کھسکتا ہوا چلتا ہے ، یہاں تک کہ ہم عقبہ کے پاس گھاٹی میں اکٹھے ہوئے ، ہم ستر افراد تھے ، جن کے ساتھ دو خواتین تھیں ، نسیبہ بنت کعب ام عمارہ ، جو بنو مازن بن نجار سے تعلق رکھتی تھیں ، اور اسماء بنت عمرو بن عدی بن ثابت ، جن کا تعلق بنو سلمہ سے تھا ، اور وہ اُمّ منیع ہیں ، ہم گھائی میں اکٹھے ہو کر نبی اکرم صلی اللہ علیہ وسلم کا انتظار کر رہے تھے ، یہاں تک کہ آپ ہمارے پاس تشریف لے آئے ، اس دن آپ کے ساتھ آپ کے چچا سیدنا عباس بن عبدالمطلب رضی اللہ عنہ تھے ، جو اس وقت اپنی قوم کے دین پر تھے ، لیکن وہ اس بات کو پسند کرتے تھے کہ اپنے بھتیجے کے معاملے میں موجود رہیں ، تاکہ اسے پختہ کروا دیں ، جب ہم بیٹھے تو سیدنا عباس بن عبدالمطلب رضی اللہ عنہ نے بات چیت کا آغاز کیا ، اور اسے کہا: اے خزرج کے گروہ ! اس وقت عربوں کا یہ معمول تھا کہ وہ انصار کے قبیلے کو خزرج کے نام سے یاد کرتے تھے اس میں خزرج اور اوس دونوں شامل تھے ( انہوں نے کہا: ” محمد “ کا تعلق ہم سے ہے ، جیسا کہ تم جانتے ہو اور ہم نے انہیں اپنی قوم سے بچا کے رکھا ہوا ہے ، وہ قوم جو اس کے بارے میں ہمارے جیسی رائے رکھتی ہے ، اور یہ اپنی قوم میں نمایاں حیثیت کے مالک ہیں اپنے شہر میں نمایاں حیثیت کے مالک ہیں ، راوی کہتے ہیں : ہم نے کہا: آپ نے جو بات کہی ہے وہ ہم نے سن لی ہے ، یا رسول اللہ ! اب آپ کلام کیجئے اور آپ اپنے پروردگار کے حوالے سے اور اپنی ذات کے حوالے سے جو آپ مناسب سمجھیں وہ طے کر لیں ، تو نبی اکرم صلی اللہ علیہ وسلم نے گفتگو شروع کی ، آپ نے تلاوت شروع کی ، آپ نے اللہ تعالیٰ کی طرف دعوت دی ، اسلام کی طرف ترغیب دی اور فرمایا : میں تم سے اس بات کی بیعت لیتا ہوں کہ تم میری بھی اسی طرح حفاظت کرو گے ، جس طرح تم اپنے بیوی بچوں کی حفاظت کرتے ہو ، راوی کہتے ہیں : تو سیدنا براء بن معرور رضی اللہ عنہ نے آپ کا ہاتھ پکڑ لیا اور بولے : جی ہاں ! اس ذات کی قسم ! جس نے آپ کو حق کے ہمراہ مبعوث کیا ہے ، ہم آپ کی بھی اسی طرح حفاظت کریں گے ، جس طرح اپنے گھر بار کی حفاظت کرتے ہیں ، یا رسول اللہ ! آپ ہم سے بیعت لیں ، اللہ کی قسم ! ہم جنگ کرنے والے لوگ ہیں اور اہل حلقہ ہیں ، اور یہ چیز نسل در نسل ہمیں وراثت میں منتقل ہوئی ہے ۔ راوی کہتے ہیں : جب سیدنا براء رضی اللہ عنہ نبی اکرم صلی اللہ علیہ وسلم کے ساتھ بات چیت کر رہے تھے ، تو سیدنا ابوہیثم بن تیہان رضی اللہ عنہ جو بنوعبداشہل کے حلیف تھے ، انہوں نے درمیان میں دخل دیا اور عرض کی : یا رسول اللہ ! ہمارے اور لوگوں کے درمیان معاہدے پائے جاتے ہیں ایسی صورت میں وہ ختم ہو جائیں گے ، اگر ہم ایسا کرتے ہیں تو یہ بھی ہو سکتا ہے کہ جب اللہ تعالیٰ آپ کو غلبہ نصیب کر دے ، تو آپ واپس تشریف لے جائیں اور ہمیں چھوڑ دیں ؟ راوی بیان کرتے ہیں : تو نبی اکرم صلی اللہ علیہ وسلم نے ارشاد فرمایا : جی نہیں ! بلکہ خون ، خون ہو گا اور ہدم ہدم ہو گا ، تم مجھ سے ہو گے اور میں تم سے ہوؤں گا ، جس سے تم جنگ کرو گے اُس سے میں جنگ کروں گا ، اور جس کے ساتھ تم سلامت رہو گے ، اس کے ساتھ میں سلامت رہوں گا ۔ نبی اکرم صلی اللہ علیہ وسلم نے ارشاد فرمایا : تم اپنے میں سے بارہ نقیب میرے پاس لے کر آؤ ! جو اپنی قوم کے نگران ہوں ، تو انہوں نے اپنے میں سے بارہ نقیب منتخب کیے ، جن میں سے نو کا تعلق خزرج قبیلے سے تھا ، اور تین کا تعلق اوس قبیلے سے تھا ۔ راوی بیان کرتے ہیں : معبد بن کعب نے مجھے جو حدیث بیان کی ہے ، جو انہوں نے اپنے بھائی کے حوالے سے اپنے والد سیدنا کعب بن مالک رضی اللہ عنہ سے نقل کی ہے وہ بیان کرتے ہیں : نبی اکرم صلی اللہ علیہ وسلم کے دست اقدس پر ، سب سے پہلے بیعت سیدنا براء بن معرور رضی اللہ عنہ نے کی ، پھر لوگوں نے یکے بعد دیگرے بیعت کی ، جب ہم نے نبی اکرم صلی اللہ علیہ وسلم کی بیعت کر لی ، تو شیطان نے گھاٹی کے سرے سے بلند آواز میں پکار کر کہا: اے رہائشی جگہ والو ! کیا تم قابل مذمت فرد اور اس کے ساتھ بے دین لوگوں میں دلچسپی رکھتے ہو ؟ جو تم لوگوں کے ساتھ جنگ کرنے کے لئے اکٹھے ہوئے رہے ہیں ؟ علی بن اسحاق کہتے ہیں : اللہ کا دشمن ( نبی اکرم صلی اللہ علیہ وسلم کو ) ” محمد “ نہیں کہتا تھا ، راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : یہ گھاٹی سے آواز آئی ہے ، اور یہ ابن ازیب ہے ، اے اللہ کے دشمن ! تو سن لے ! اللہ کی قسم ! اب میں تمہارے لئے فارغ ہونے لگا ہوں ، پھر نبی اکرم صلی اللہ علیہ وسلم نے فرمایا : تم لوگ اُٹھ کر اپنی رہائشی جگہ پر چلے جاؤ ، سیدنا عباس بن عبادہ بن نضلہ رضی اللہ عنہ نے آپ کی خدمت میں عرض کی : اس ذات کی قسم ! جس نے آپ کو حق کے ہمراہ مبعوث کیا ہے ، اگر آپ چاہیں ، تو کل ہم اپنی تلواریں لے کر تمام اہل منی پر حملہ آور ہو جاتے ہیں ، نبی اکرم صلی اللہ علیہ وسلم نے فرمایا : مجھے اس بات کا حکم نہیں دیا گیا ہے ۔ راوی بیان کرتے ہیں : جب ہم واپس آئے اور سو گئے ، جب صبح ہوئی تو قریش کے اکابرین ہمارے پاس آئے ، وہ ہماری رہائشی جگہوں پر ہمارے پاس آ گئے اور بولے : اے خزرج قبیلے کے لوگو ! ہمیں یہ اطلاع ملی ہے کہ تم ہمارے ساتھی کے پاس گئے تھے تم انہیں ہمارے درمیان میں سے نکال کر لے جانا چاہتے ہو اور تم نے یہ بیعت کر لی ہے کہ ہمارے ساتھ جنگ کرو گے ، اللہ کی قسم عربوں میں سے کسی کے ساتھ بھی جنگ کی صورت حال پیدا کرنا ، ہمارے نزدیک اس سے زیادہ ناپسندیدہ نہیں ہو گا کہ ہمارے اور تمہارے درمیان یہ صورت حال پیدا ہو جائے ، راوی کہتے ہیں : اس وقت ہم نے اپنی قوم کے مشرک افراد کو بھیجا اور انہوں نے ان لوگوں کے سامنے اللہ کے نام پر قسم اٹھائی کہ ایسی کوئی بات نہیں ہے اور نہ ہی ہمیں علم ہے اور انہوں نے سچ کہا: تھا ، کیونکہ ہم نے جو کچھ کیا تھا ، انہیں اس بارے میں پتہ ہی نہیں تھا ، راوی کہتے ہیں : وہ ایک دوسرے کی طرف دیکھنے لگے ، پھر وہ لوگ کھڑے ہوئے ان میں حارث بن ہشام بن مغیرہ بھی تھے ، انہوں نے دو نئے جوتے پہنے ہوئے تھے راوی کہتے ہیں : میں نے ایک کلمہ کہا: جس کے ذریعے میں یہ چاہ رہا تھا کہ اپنی قوم کی کہی ہوئی باتوں میں ، خود کو ان کا حصے دار ظاہر کروں ، تو ان لوگوں نے کہا: اے ابوجابر ! تم اس کی استطاعت نہیں رکھتے ، تم ہمارے سرداروں میں سے ایک سردار ہو ، کہ تم قریش کے اس نوجوان کے دو نئے جوتوں جیسے دو جوتے پہن لو ؟ راوی کہتے ہیں : جب حارث نے یہ بات سنی ، تو انہوں نے جوتے اتار دیے اور پھر انہیں میری طرف پھینک دیا اور کہا: اللہ کی قسم ! تم ان دونوں کو ضرور پہنو گے ، تو سیدنا ابوجابر رضی اللہ عنہ نے کہا: اللہ کی قسم ! تم نے حفاظت کر لی ہے ، تم اس کے جوتے اسے واپس کر دو ، میں نے کہا: اللہ کی قسم ! میں انہیں واپس نہیں کروں گا ۔ انہوں نے کہا: اللہ کی قسم اگر یہ فال ٹھیک ہے ، تو میں انہیں حاصل کر لوں گا ۔ یہ ابن مالک کی نقل کردہ حدیث ہے ، جو بیعت عقبہ اور اس میں موجود افراد کے بارے میں ہے ۔
یہ روایت امام أحمد نے نقل کی ہے ، امام طبرانی نے اس کی مانند نقل کی ہے ، امام أحمد کے رجال صحیح کے رجال ہیں ، صرف ابن اسحاق کا معاملہ مختلف ہے اور اس نے بھی سماع کی صراحت کی ہے ۔ امام طبرانی نے اپنی روایت میں یہ الفاظ نقل کیے ہیں : ہم لوگ نبی اکرم صلی اللہ علیہ وسلم کی تلاش میں نکلے ” ابطح“ کے مقام پر ہماری ملاقات ایک شخص سے ہوئی ہم نے اُس سے دریافت کیا : تم محمد بن عبداللہ بن عبدالمطلب کی طرف ہماری رہنمائی کرو گے ؟ اس نے دریافت کیا : جب تم انہیں دیکھو گے تو کیا تم انہیں پہچان لو گے ؟ اس روایت میں یہ الفاظ بھی ہیں : نبی اکرم صلی اللہ علیہ وسلم نے کلام کیا ، اور قرآن کریم کی تلاوت کی اور اسلام کے بارے میں ترغیب دی تو ہم نے آپ پر ایمان لا کر اور آپ کی تصدیق کر کے آپ کی دعوت کو قبول کیا ۔ اس روایت میں یہ الفاظ بھی ہیں : نبی اکرم صلی اللہ علیہ وسلم نے ارشاد فرمایا : ” تم اپنے میں سے بارہ نقیب منتخب کرو ، تو انہوں نے ان کو منتخب کیا ، تو بنونجار کے نقیب سیدنا اسعد بن زرارہ رضی اللہ عنہ تھے ، بنوسلمہ کے نقیب سیدنا براء بن معرور رضی اللہ عنہ اور سیدنا عبداللہ بن عمرو بن حرام رضی اللہ عنہ تھے ، بنو ساعدہ کے نقیب سیدنا سعد بن عبادہ رضی اللہ عنہ اور سیدنا منذر بن عمرو رضی اللہ عنہ تھے ، بنوزریق کے نقیب سیدنا رافع بن مالک بن عجلان رضی اللہ عنہ تھے ، بنو حارث بن خزرج کے نقیب ، سیدنا عبداللہ بن رواحہ رضی اللہ عنہ اور سیدنا سعد بن ربیع رضی اللہ عنہ تھے ، بنو اوس بن خزرج کے نقیب سیدنا عبادہ بن صامت رضی اللہ عنہ تھے ، بنو عبداشہل کے نقیب سیدنا اسید بن حضیر رضی اللہ عنہ اور سیدنا ہیثم بن ابوتیہان رضی اللہ عنہ تھے ، بنو عمرو بن عوف کے نقیب سیدنا سعد بن ابوخثیمہ رضی اللہ عنہ تھے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم دس سال تک عکا ظاور مجنہ ( کے میلوں ) میں ، اور حج کے موقع پر منی میں ، لوگوں کے پاس ان کے رہائشی جگہوں پر تشریف لے جاتے رہے ، اور یہ فرماتے رہے : کون مجھے پناہ دے گا ؟ کون میری مدد کرے گا ؟ تاکہ میں اپنے پروردگار کی رسالت کی تبلیغ کروں ، اُسے جنت نصیب ہو گی ، یہاں تک کہ ایک شخص ، جو یمن سے یا فلاں جگہ کے مضر قبیلے سے چلتا ، تو اس کی قوم کے افراد اس کے پاس جا کر یہ کہتے : تم قریش کے اس نوجوان سے بچ کے رہنا ، کہیں وہ تمہیں آزمائش کا شکار نہ کر دے ، نبی اکرم صلی اللہ علیہ وسلم اُن لوگوں کی رہائشی جگہوں کے درمیان چلتے رہتے اور وہ لوگ انگلیوں کے ذریعے نبی اکرم صلی اللہ علیہ وسلم کی طرف اشارے کرتے رہتے ، یہاں تک کہ اللہ تعالیٰ نے ہمیں یثرت سے بھیجا ، ہم نے آپ کو پناہ دی اور ہم نے آپ کی تصدیق کی ، ہم میں سے ایک شخص نکلا ، وہ آپ پر ایمان لایا ، آپ نے اسے قرآن کی تعلیم دی ، وہ اپنے گھر والوں کے پاس واپس گیا ، اور اس کے اہل خانہ بھی اس کے اسلام کی بدولت مسلمان ہو گئے ، یہاں تک کہ انصار کے ہر ایک محلے میں کچھ مسلمان ہو گئے ، جو اپنے اسلام کا اظہار کرتے تھے ، پھر ان سب لوگوں نے مل کر یہ طے کیا اور یہ کہا: ہم کب تک اللہ کے رسول کو اس حالت میں رہنے دیں گے کہ آپ مکہ کے پہاڑوں کے درمیان رہیں اور اندیشے کا شکار رہیں ، تو ہم میں سے ستر افراد سوار ہو کر حج کے موقع پر نبی اکرم صلی اللہ علیہ وسلم کی خدمت میں حاضر ہوئے ، ہم نے یہ طے کیا کہ عقبہ کی گھاٹی میں ملیں گے ، وہاں ایک ، ایک دو ، دو کر کے افراد اکٹھے ہونا شروع ہوئے یہاں تک کہ ہم سب اکٹھے ہو گئے ، ہم نے عرض کی : یا رسول اللہ ! ہم کس بات پر آپ کی بیعت کریں ؟ نبی اکرم صلی اللہ علیہ وسلم نے فرمایا : تم چستی اور سستی ، ہر حال میں اطاعت و فرمانبرداری کرنے ، اور تنگی اور خوشحالی ہر حال میں خرچ کرنے ، نیکی کا حکم دینے ، برائی سے منع کرنے اللہ تعالیٰ کے حکم کے مطابق بات کرنے اور اللہ تعالیٰ کے حوالے سے کسی ملامت کرنے والے کی ملامت سے خوف زدہ نہ ہونے اور میری مدد کرنے ، اور جب میں تمہارے پاس آؤں ، تو جس طرح تم اپنی اور اپنے بال بچوں کی حفاظت کرتے ہو ، اس طرح میری حفاظت کرنے کی بیعت کرو ، تمہیں جنت نصیب ہو گی ، راوی کہتے ہیں : ہم اٹھ کر آپ کے پاس آئے اور آپ کی بیعت کر لی سیدنا اسعد بن زرارہ رضی اللہ عنہ نے اٹھ کر آپ کا ہاتھ پکڑا ، وہ ان لوگوں میں سب سے کمسن تھے ، انہوں نے کہا: اے اہل یثرب ٹھہر جاؤ ! ہم سفر کر کے ان کے پاس آئے ہیں ، صرف اس وجہ سے کہ ہم یہ بات جانتے ہیں کہ یہ اللہ کے رسول ہیں ، اور آج انہیں لے کر جانا ، تمام عربوں سے جدا ہونے کے مترادف ہے ، تمہارے بہترین لوگ قتل ہو جائیں گے ، تلواریں تمہیں کاٹ دیں گی ، اگر تو تم ایسے لوگ ہو کہ ایسی صورت حال پر صبر کرو گے ، تو تمہارا اجر اللہ تعالیٰ کے ذمہ ہو گا اور اگر تم ایسے لوگ ہو کہ تم اپنی ذات کے حوالے سے خوف رکھتے ہو ، تو تم اس چیز کو بیان کر دو ! اللہ تعالیٰ کی بارگاہ میں عذر پیش کرنے کے حوالے سے ، یہ تمہارے لئے زیادہ موزوں ہو گا ، تو اُن لوگوں نے کہا: اے اسعد ! تم ایک طرف ہٹ جاؤ ! اللہ کی قسم ! ہم اس بیعت کو کبھی نہیں چھوڑیں گے اور اسے کبھی ترک نہیں کریں گے ، تو ہم اُٹھ کر نبی اکرم صلی اللہ علیہ وسلم کی طرف بڑھے اور ہم نے آپ کی بیعت کر لی ، آپ صلی اللہ علیہ وسلم نے ہم سے بیعت لی اور یہ شرط عائد کی کہ اس کے بدلے میں ہمیں جنت نصیب ہو گی ۔ ( علامہ ہیثمی فرماتے ہیں : ) میں یہ کہتا ہوں : ” سنن “ کے مولفین نے اس روایت کا کچھ حصہ نقل کیا ہے ۔
یہ روایت امام أحمد اور امام بزار نے نقل کی ہے ، انہوں نے اپنی روایت میں یہ الفاظ نقل کیے ہیں : ” اللہ کی قسم ! ہم اس بیعت کو کبھی نہیں چھوڑیں گے اور ہم اسے کبھی واپس نہیں لیں گے “ ۔ امام أحمد کے رجال صحیح کے رجال ہیں ۔

امام أحمد کی ایک روایت میں یہ الفاظ ہیں : انہوں نے کہا: ” اگر تم اپنی ذات کے حوالے سے کوئی خوف رکھتے ہو ۔ ۔ ۔ ۔ ۔ ۔ ۔ ۔ ۔ “ ۔

ان کی ایک روایت میں یہ الفاظ بھی ہیں : ” یہاں تک کہ ایک شخص یمن کے علاقے ، مضر سے سوار ہوتا ۔ ۔ ۔ ۔ ۔ ۔ ۔ ۔ ۔ ۔ “ ۔

عروہ بیان کرتے ہیں : سب سے پہلے نبی اکرم صلی اللہ علیہ وسلم کی بیعت سیدنا ابوہیثم بن تیہان رضی اللہ عنہ نے کی تھی ، انہوں نے عرض کی : یا رسول اللہ ! ہمارے درمیان اور لوگوں کے درمیان کچھ معاہدے ہیں ، تو ہو سکتا ہے کہ ہمیں انہیں توڑنا پڑے ، لیکن ایسا نہ ہو ، کہ آپ واپس اپنی قوم کی طرف تشریف لے جائیں اور ہم لوگوں سے معاہدے توڑ کر ان کے ساتھ جنگ کر چکے ہوں ، تو نبی اکرم صلی اللہ علیہ وسلم ان کی بات پر ہنس پڑے ، آپ صلی اللہ علیہ وسلم نے ارشاد فرمایا : خون ، خون ہو گا اور ہدم ، ہدم ہو گا ۔ نبی اکرم صلی اللہ علیہ وسلم نے انہیں ان کی بات کا جو جواب دیا تھا ، جب سیدنا ابوہیثم رضی اللہ عنہ اس بات سے راضی ہوئے ، تو وہ اپنی قوم کی طرف متوجہ ہوئے اور بولے : اے قوم ! یہ اللہ کے رسول ہیں ، میں اس بات کی گواہی دیتا ہوں کہ یہ سچے ہیں ، آج یہ اللہ کے حرم میں اس کی امان میں ہیں ، اور اپنی قوم اور خاندان کے درمیان میں ہیں ، تم لوگ یہ بات جان لو ! کہ اگر تم انہیں یہاں سے نکال کر لے گئے تو عرب تمہارے خلاف متحد ہو جائیں گے ، اگر تم اللہ کی راہ میں جنگ کرنے کے حوالے سے مطمئن ہو ، اپنے اموال اور اولاد کے رخصت ہو جانے سے مطمئن ہو ، تو انہیں اپنے علاقے کی طرف آنے کی دعوت دے دو ، کیونکہ یہ اللہ کے حقیقی رسول ہیں ، اور اگر تمہیں رسوائی کا اندیشہ ہے ، تو پھر ابھی معذرت کر لو ، اس وقت ان لوگوں نے کہا: ہم اللہ اور اس کے رسول کی طرف سے اس چیز کو قبول کریں گے ، جو وہ ہمیں دیں گے اور ہم اپنا آپ ، آپ صلی اللہ علیہ وسلم کو دیتے ہیں ، یا رسول اللہ ! آپ صلی اللہ علیہ وسلم جو چاہیں وہ طے کر لیں ، اے ابوالہیثم ! ہمارے اور اللہ کے رسول کے درمیان سے ہٹ جاؤ ! ہم ان کی بیعت کریں گے ، تو سیدنا ابوالہیثم رضی اللہ عنہ نے فرمایا : میں سب سے پہلے بیعت کروں گا ، پھر باقی سب افراد نے بیعت کر لی ۔ پہاڑ کے سرے سے شیطان نے چیخ ماری اور کہا: اے قریش کے گروہ ! یہ خزرج اور اس قبیلے کے لوگ ، تم سے لڑائی کرنے کے لئے ” محمد “ کی بیعت کر رہے ہیں ، تو وہ لوگ اس بات پر پریشان اور خوف زدہ ہو گئے ، نبی اکرم صلی اللہ علیہ وسلم نے فرمایا : یہ آواز تمہیں پریشانی کا شکار نہ کرے ، کیونکہ یہ اللہ کا دشمن ابلیس ہے ، جن لوگوں کے بارے میں تمہیں اندیشہ ہے ، ان میں سے کسی نے بھی اس کی بات نہیں سنی ہے ، پھر نبی اکرم صلی اللہ علیہ وسلم کھڑے ہوئے ، آپ نے بلند آواز میں شیطان کو پکار کر کہا: اے سانپ کے بچے ! یہ تمہارا عمل ہے ، میں عنقریب فارغ ہو کر تمہاری طرف متوجہ ہوتا ہوں ۔
یہ روایت امام طبرانی نے اس طرح ” مرسل “ روایت کے طور پر نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے اور اس میں ضعف پایا جاتا ہے ۔

سیدنا ابومسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے عیدالاضحی کے دن ، عقبہ کی بنیاد کے پاس ، ہم سے ملنے کا وعدہ کیا ، ہم ستر افراد تھے ، سیدنا عقبہ رضی اللہ عنہ کہتے ہیں : میں ان سب سے کمسن تھا ، نبی اکرم صلی اللہ علیہ وسلم ہمارے پاس تشریف لائے آپ نے ارشاد فرمایا : تم مختصر بات چیت کرنا ، کیونکہ مجھے تمہارے حوالے سے قریش کے کفار کا اندیشہ ہے ، ہم نے عرض کی : یا رسول اللہ ! آپ ہمارے ساتھ اپنے پروردگار کے لئے اور اپنے لئے اور اپنے ساتھیوں کے لئے جو چاہیں طے کر لیں ، اور ہمیں یہ بتا دیں کہ اللہ تعالیٰ کی طرف سے اور آپ کی طرف سے ہمیں کیا اجر و ثواب ملے گا ؟ نبی اکرم صلی اللہ علیہ وسلم نے فرمایا : میں اپنے پروردگار کے حوالے سے یہ کہتا ہوں : تم اس پر ایمان لاؤ ، اور کسی کو اس کا شریک نہ ٹھہرانا ، جہاں تک میری اپنی ذات کا تعلق ہے تو میں تم سے کہتا ہوں کہ تم میری اطاعت کرنا میں سیدھے راستے کی طرف تمہاری رہنمائی کروں گا ، اور میں اپنے لئے اور اپنے ساتھیوں کے بارے میں تم سے یہ کہتا ہوں : تم نے اپنی طرف سے ہمارے ساتھ اچھا سلوک کرنا ہے اور ہماری اسی طرح حفاظت کرنی ہے ، جس طرح اپنی حفاظت کرتے ہو تم لوگ ایسا کر لو گے ، تو اللہ تعالیٰ کے ذمہ اور میرے ذمہ یہ بات ہے کہ تمہیں جنت نصیب ہو گی ، راوی کہتے ہیں : تو ہم نے اپنے ہاتھ بڑھائے اور آپ کی بیعت کر لی ۔
یہ روایت امام طبرانی نے نقل کی ہے ، اس کی سند میں ایک راوی مجالد بن سعید ہے ، اس کی نقل کردہ حدیث حسن ہے ، اس میں ضعف پایا جاتا ہے ، امام أحمد نے اسے ” مرسل “ روایت کی مانند نقل کیا ہے ، جو آگے چل کے آئے گی ، اس کی سند میں بھی ایک راوی مجالد ہے لیکن اس کے الفاظ انہوں نے نقل نہیں کیے ہیں ، انہوں نے اس کے بعد
یہ روایت ذکر کی ہے ، اور وہ ( روایت ) ، یہ ( یعنی درجہ ذیل ) ہے ۔

امام شعبی بیان کرتے ہیں : نبی اکرم صلی اللہ علیہ وسلم اپنے چچا سیدنا عباس رضی اللہ عنہ کے ساتھ انصار سے تعلق رکھنے والے اُن ستر افراد کی طرف تشریف لے گئے ، جو درخت کے نیچے عقبہ کے پاس موجود تھے ، آپ نے ارشاد فرمایا : تم میں سے ایک شخص بات چیت کرے اور طویل کلام نہ کرے ، کیونکہ تمہارے خلاف مشرکین کے جاسوس ہو سکتے ہیں ، اگر انہیں تمہارے بارے میں پتہ چل گیا ، تو وہ تمہیں پریشان کریں گے ، تو ان میں سے ایک صاحب نے یعنی سیدنا ابوامامہ رضی اللہ عنہ نے یہ کہا: اے سیدنا محمد ! آپ اپنے پروردگار کے لئے جو چاہیں طے کر لیں اور اپنے لئے اور اپنے ساتھیوں کے لئے جو چاہیں طے کر لیں ، اور پھر ہمیں یہ بتا دیں کہ ہمیں اللہ تعالیٰ کی طرف سے اور آپ کی طرف سے کیا اجر و ثواب ملے گا اگر ہم ایسا کر لیں گے ؟ تو نبی اکرم صلی اللہ علیہ وسلم نے فرمایا : میں اپنے پروردگار کے حوالے سے تم سے یہ کہتا ہوں : تم اس کی عبادت کرو اور کسی کو اس کا شریک نہ ٹھہراؤ ، اور اپنی ذات اور اپنے ساتھیوں کے حوالے سے تم سے یہ کہتا ہوں : تم نے ہمیں پناہ دینی ہے ہماری مدد کرنی ہے اور ہماری حفاظت کرنی ہے ، ہر اس چیز کے حوالے سے ، جس طرح تم اپنے آپ کی حفاظت کرتے ہو ، ان لوگوں نے دریافت کیا : اگر ہم ایسا کر لیں گے تو ہمیں کیا ملے گا ؟ نبی اکرم صلی اللہ علیہ وسلم نے فرمایا : تمہیں جنت ملے گی ، ان لوگوں نے کہا: تو پھر یہ بات طے ہے ۔
یہ روایت امام أحمد نے اسی طرح ” مرسل “ روایت کے طور پر نقل کی ہے اور اس کے رجال صحیح کے رجال ہیں ، امام أحمد نے اس کے بعد امام شعبی تک ایک سند نقل کی ہے ، جو سیدنا ابومسعود عقبہ بن عمرو رضی اللہ عنہ کے حوالے سے ہے ، پھر اس کی مانند روایت نقل کی ہے ۔ وہ بیان کرتے ہیں : سیدنا ابومسعود رضی اللہ عنہ ان میں سب سے کمسن تھے ۔ اس روایت کی سند میں ایک راوی مجالد ہے اس میں ضعف پایا جاتا ہے ، اگر اللہ نے چاہا ، تو اس کی نقل کردہ حدیث حسن ہو گی ۔

امام شعبی بیان کرتے ہیں : کسی بھی بوڑھے یا جوان نے اس کی مانند خطبہ نہیں سنا ہو گا ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابوزبیر بیان کرتے ہیں : میں نے سیدنا جابر رضی اللہ عنہ سے بیعت عقبہ کے بارے میں دریافت کیا ، تو انہوں نے بتایا کہ ستر افراد اس میں موجود تھے ، ان لوگوں نے نبی اکرم صلی اللہ علیہ وسلم کے ساتھ معاہدہ کیا تھا ، سیدنا عباس بن عبدالمطلب رضی اللہ عنہ نے نبی اکرم صلی اللہ علیہ وسلم کا ہاتھ پکڑا ہوا تھا ، تو نبی اکرم صلی اللہ علیہ وسلم نے فرمایا : میں نے لیا اور میں نے دیا ( یعنی یہ بات طے کر لی ) ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے اور اس میں ضعف پایا جاتا ہے ۔

سیدنا جابر بن عبداللہ رضی اللہ عنہ روایت کرتے ہیں : جب نبی اکرم صلی اللہ علیہ وسلم کے ساتھ انصار کے نقباء کی ملاقات ہوئی ، تو آپ صلی اللہ علیہ وسلم نے ان سے فرمایا : تم لوگ مجھے پناہ دو گے اور میری حفاظت کرو گئے ، انہوں نے عرض کی : ہمیں کیا ملے گا ؟ نبی اکرم صلی اللہ علیہ وسلم نے فرمایا تمہیں جنت ملے گی ۔
یہ روایت امام ابویعلیٰ نے نقل کی ہے ، امام بزار نے اس کی مانند نقل کی ہے ، امام ابویعلیٰ کے رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : سیدنا ثابت بن قیس رضی اللہ عنہ نے نبی اکرم صلی اللہ علیہ وسلم کی تشریف آوری پر خطبہ دیا اور یہ فرمایا : ہم آپ کی اُسی طرح حفاظت کریں گے ، جس طرح ہم اپنی حفاظت کرتے ہیں اور اپنی اولاد کی کرتے ہیں یا رسول اللہ ! ہمیں کیا ملے گا ؟ نبی اکرم صلی اللہ علیہ وسلم نے فرمایا : تمہیں جنت ملے گی ، انہوں نے عرض کی : ہم اس سے راضی ہیں ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا جابر بن عبداللہ رضی اللہ عنہ بیان کرتے ہیں : میرے ماموں سیدنا جد بن قیس رضی اللہ عنہ نے مجھے ستر افراد کے ساتھ شامل کیا جو سوار ہو کر وفد کی شکل میں ، انصار کی طرف سے نبی اکرم صلی اللہ علیہ وسلم کی خدمت میں بیعت عقبہ کی رات حاضر ہوئے تھے ، نبی اکرم صلی اللہ علیہ وسلم ہمارے پاس آئے ، آپ کے ساتھ آپ کے چچا سیدنا عباس بن عبدالمطلب رضی اللہ عنہ تھے ، نبی اکرم صلی اللہ علیہ وسلم نے فرمایا : اے چچا ! آپ اپنے ننھیالی رشتہ داروں سے عہد لے لیں ، ان ستر افراد نے آپ کی خدمت میں عرض کی : اے سیدنا محمد ! آپ اپنے پروردگار کے حوالے سے ، اپنی ذات کے حوالے سے ، جو آپ چاہیں وہ طے کر لیں ، نبی اکرم صلی اللہ علیہ وسلم نے فرمایا : جہاں تک پروردگار کا تعلق ہے ، تو میں یہ تلقین کرتا ہوں کہ تم اس کی عبادت کرو اور کسی کو اس کا شریک نہ ٹھہرانا ، جہاں تک میری اپنی ذات کا تعلق ہے ، تو میں تم سے یہ کہتا ہوں : تم ہر اس چیز کے حوالے سے میری حفاظت کرو ، جس کے حوالے سے تم اپنی حفاظت کرتے ہو ، ان لوگوں نے عرض کی : جب ہم ایسا کر لیں گے تو ہمیں کیا ملے گا ؟ نبی اکرم صلی اللہ علیہ وسلم نے ارشاد فرمایا : جنت ۔
یہ روایت امام طبرانی نے تینوں کتابوں میں نقل کی ہے اور اس کے رجال ثقہ ہیں ۔

سیدنا جابر بن عبداللہ رضی اللہ عنہ بیان کرتے ہیں : بیعت عقبہ کی رات ہم لوگ نبی اکرم صلی اللہ علیہ وسلم کے ساتھ تھے ، سیدنا جابر رضی اللہ عنہ کہتے ہیں : میرے دو ماموں مجھے لے کر گئے تھے ، حالانکہ میں ایک پتھر بھی پھینکنے کی استطاعت نہیں رکھتا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عروہ بیان کرتے ہیں : سیدنا عباس رضی اللہ عنہ نے کہا: اللہ کی قسم ! جب ستر افراد ، جن کا تعلق انصار سے تھا ، وہ بیعت عقبہ کی رات آئے تو سیدنا عباس رضی اللہ عنہ نے نبی اکرم صلی اللہ علیہ وسلم کا ہاتھ پکڑ لیا ، اور نبی اکرم صلی اللہ علیہ وسلم کے حوالے سے اُن کے ساتھ شرائط طے کیں اور یہ اسلام کے ابتدائی دور کی بات ہے ، اور اس سے پہلے کی بات ہے کہ کوئی اعلانیہ طور پر اللہ تعالیٰ کی عبادت کرتا ۔
یہ روایت امام ابویعلیٰ نے حدیث کے درمیان میں نقل کی ہے ، جسے سیدہ عائشہ رضی اللہ عنہا نے روایت کیا ہے ، اس کی سند میں ایک راوی عبدالرحمن بن ابوزناد ہے اور وہ ضعیف ہے ۔

سیدنا عبادہ بن صامت رضی اللہ عنہ بیان کرتے ہیں : سیدنا اسعد بن زرارہ رضی اللہ عنہ نے کہا: اے لوگو ! کیا تم یہ جانتے ہو ؟ کہ تم کس چیز پر سیدنا محمد صلی اللہ علیہ وسلم کی بیعت کر رہے ہو ؟ تم اس چیز پر ان کی بیعت کر رہے ہو کہ تم عربوں ، عجمیوں ، جنوں اور انسانوں کے ساتھ جنگ کرو گے اُن لوگوں نے کہا: یہ جس کے ساتھ جنگ کریں گے ہم اس کے ساتھ جنگ کریں گے یہ جس کے ساتھ سلامت رہیں گے ہم اس کے ساتھ سلامت رہیں گے ، لوگوں نے عرض کی : یا رسول اللہ ! آپ کوئی شرط طے کر دیں ، نبی اکرم صلی اللہ علیہ وسلم نے فرمایا : تم اس بات پر میری بیعت کرو کہ تم اس بات کی گواہی دو گے کہ اللہ تعالیٰ کے علاوہ اور کوئی معبود نہیں ہے اور میں اللہ کا رسول ہوں ، تم نماز قائم کرو گے اور تم زکوۃ دو گے ، اطاعت اور فرمانبرداری کرو گے ، اور حکومت کے معاملے میں اس کے اہل افراد سے جھگڑا نہیں کرو گے ، اور میری ان چیزوں کے حوالے سے حفاظت کرو گے ، جن کے حوالے سے تم اپنے آپ کی ، اور اپنے اہل خانہ کی حفاظت کرتے ہو “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ایک حصہ منقول ہے ۔
یہ روایت امام طبرانی نے معجم اوسط میں نقل کی ہے ، اس روایت کی سند میں ایک راوی علی بن زید ہے اور وہ ضعیف ہے ، ویسے اس راوی کی توثیق کی گئی ہے ۔

سیدنا امام حسین بن علی رضی اللہ عنہما بیان کرتے ہیں : عقبہ کی رات ، نبی اکرم صلی اللہ علیہ وسلم کی خدمت میں انصار بیعت کرنے کے لئے حاضر ہوئے ، تو نبی اکرم صلی اللہ علیہ وسلم نے فرمایا : اے علی ! تم اُٹھو ، اے علی ! ان سے بیعت لے لو ! انہوں نے عرض کی : یا رسول اللہ ! میں کس چیز پر ان سے بیعت لوں ؟ نبی اکرم صلی اللہ علیہ وسلم نے فرمایا : اس بات پر کہ اللہ تعالیٰ کی اطاعت کی جائے گی ، اس کی نافرمانی نہیں کی جائے گی اور اس بات پر کہ تم لوگ اللہ کے رسول اور ان کے اہل بیت اور ان کی ذریت کی اسی طرح حفاظت کرو گے ، جس طرح تم اپنے آپ کی اور اپنے بال بچوں کی حفاظت کرتے ہو“ ۔
یہ روایت امام طبرانی نے معجم اوسط میں ، عبداللہ بن مروان نامی راوی کے حوالے سے نقل کی ہے ، وہ ضعیف ہے ، ویسے اس کی توثیق کی گئی ہے ۔