مجمع الزوائد ومنبع الفوائد

سیدنا ابوثعلبہ خشنی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں نے عرض کی : یا رسول اللہ ! آپ میرے لئے فلاں فلاں جگہ کے لئے تحریر کروا دیں یہ شام میں موجود ایک جگہ تھی جس پر نبی اکرم صلی اللہ علیہ وسلم نے ابھی تک غلبہ حاصل نہیں کیا تھا ۔ نبی اکرم صلی اللہ علیہ وسلم نے فرمایا : کیا تم لوگ سن نہیں رہے ہو یہ کیا کہہ رہا ہے ؟ سیدنا ابوثعلبہ رضی اللہ عنہ نے عرض کی : اس ذات کی قسم جس کے دست قدرت میں میری جان ہے ( مسلمان ) اس پر ضرور غالب آئیں گے راوی کہتے ہیں : تو نبی اکرم صلی اللہ علیہ وسلم نے اس کے بارے میں میرے لئے تحریر لکھوا دی ۔ اس کے بعد راوی نے پوری حدیث ذکر کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا تمیم داری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے شام کے فتح ہونے سے پہلے شام میں موجود ایک زمین جاگیر کے طور پر مانگی تو وہ آپ نے مجھے عطا کر دی سیدنا عمر رضی اللہ عنہ کے عہد خلافت میں وہ زمین فتح ہوئی میں ان کے پاس آیا میں نے کہا: اللہ کے رسول نے مجھے فلاں جگہ سے لے کر فلاں تک کی جگہ عطا کی تھی تو سیدنا عمر رضی اللہ عنہ نے اس کا ایک تہائی حصہ مسافر کے لئے ایک تہائی حصہ وہاں کام کاج کرنے والوں کے لئے اور ایک تہائی حصہ ہمارے لئے مقرر کیا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عمرو بن عوف رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا بلال بن حارث مزنی رضی اللہ عنہ کو ” قبلیہ “ کی معدنیات ، وہاں کی بالائی اور نشیبی زمین سمیت جاگیر کے طور پر عطا کی تھیں اور وہ بھی جہاں قدس ( یعنی بالائی حصے ) کے علاقے میں کھیتی باڑی ہو سکے ۔
یہ روایت امام بزار نے نقل کی ہے ۔ اس کی سند میں ایک راوی کثیر بن عبداللہ ہے اور وہ انتہائی ضعیف ہے ۔ امام ترمذی نے اس کی نقل کردہ حدیث کو حسن قرار دیا ہے ۔

سیدنا بلال بن حارث رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں یہ قطع اراضی جاگیر کے طور پر دیا تھا ان کے لئے یہ تحریر لکھوائی تھی : ” اللہ تعالیٰ کے نام سے برکت حاصل کرتے ہوئے جو بڑا مہربان نہایت رحم کرنے والا ہے اللہ کے رسول نے یہ جگہ بلال بن حارث کو دی ہے ، جو ” قبلیہ “ ( نامی جگہ ) کی معدنیات ہے اور اس کے بالائی اور نشیبی حصے سمیت ہے ، وہاں کی گھاس پھوس ، اور وہ بالائی جگہ بھی جہاں کھیتی باڑی ہو سکے ، اگر یہ سچا ہے “ ۔ یہ تحریر سیدنا معاویہ رضی اللہ عنہ نے لکھ کر دی تھی ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن حسن بن زبالہ ہے اور وہ متروک ہے ۔

سیدنا بلال بن حارث رضی اللہ عنہ بیان کرتے ہیں : نبی اکرم صلی اللہ علیہ وسلم نے عقیق نامی جگہ ساری کی ساری انہیں جاگیر کے طور پر دے دی تھی ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن حسن بن زبالہ ہے اور وہ متروک ہے ۔

سیدنا ابوہند داری رضی اللہ عنہ بیان کرتے ہیں : وہ لوگ نبی اکرم صلی اللہ علیہ وسلم کی خدمت میں حاضر ہوئے وہ لوگ چھ افراد تھے اوس بن خارجہ بن سودان بن جذیمہ بن زار بن عدی بن دار ، ان کے بھائی تمیم بن اوس ، یزید بن قیس ، ابوہند بن عبداللہ ، ان کے بھائی طبیب بن عبداللہ نبی اکرم صلی اللہ علیہ وسلم نے ان کا نام عبدالرحمن رکھا تھا ، اور فاکہ بن نعمان ان حضرات نے اسلام قبول کر لیا انہوں نے نبی اکرم صلی اللہ علیہ وسلم سے یہ درخواست کی کہ وہ شام کی زمین میں سے ایک زمین انہیں عطا کر دیں ، تو نبی اکرم صلی اللہ علیہ وسلم نے فرمایا : تم جہاں کے بارے میں چاہو مانگ لو وہ لوگ نبی اکرم صلی اللہ علیہ وسلم کے پاس سے اٹھ کر گئے ، اور اس جگہ کے بارے میں باہمی مشورہ کرنے لگے ، جو وہ نبی اکرم صلی اللہ علیہ وسلم سے مانگیں گے تو سیدنا تمیم رضی اللہ عنہ نے کہا: میں یہ سمجھتا ہوں کہ ہم نبی اکرم صلی اللہ علیہ وسلم سے بیت المقدس اور اس کے آس پاس کا علاقہ مانگ لیتے ہیں ، تو سیدنا ابوہند رضی اللہ عنہ نے کہا: تمہارا کیا خیال ہے آج عجمیوں کی حکومت ، کیا وہ بیت المقدس میں نہیں ہے ، تو سیدنا تمیم رضی اللہ عنہ نے جواب دیا : جی ہاں ۔
یہ روایت امام طبرانی نے نقل کی ہے ۔ اس کی سند میں ایک راوی زیاد بن سعید ہے اور وہ متروک ہے ۔

سیدنا حصین بن مشمت رضی اللہ عنہ بیان کرتے ہیں : وہ ( لوگ ) نبی اکرم صلی اللہ علیہ وسلم کی خدمت میں وفد کی شکل میں آئے اور نبی اکرم صلی اللہ علیہ وسلم کے دست اقدس پر اسلام قبول کر لیا انہوں نے اپنے مال کی زکوۃ نبی اکرم صلی اللہ علیہ وسلم کی خدمت میں پیش کی تو نبی اکرم صلی اللہ علیہ وسلم نے مختلف پانیوں کو انہیں جاگیر کے طور پر دے دیا ، ” جو مروث “ میں تھے اور اسناد حراد میں تھے ، ان میں ایک ” اصیہب“ ہے ، ان میں سے ایک ” ماعزہ “ تھا ان میں سے ایک ” اہواد “ تھا ، ان میں سے ایک ” مہاد “ تھا ، ان میں سے ایک ” سدیرہ “ تھا ۔ نبی اکرم صلی اللہ علیہ وسلم نے سیدنا حصین بن مشمت رضی اللہ عنہ کو جو جاگیر تھی ، اس کے بارے میں ان پر یہ شرط عائد کی تھی کہ وہ وہاں کی چراگاہ کو ختم نہیں کریں گے ، اور وہاں کا پانی فروخت نہیں کریں گے ، اور وہاں کی اضافی چیز کو نہیں روکیں گے ۔ تو زہیر بن عاصم بن حصین نے یہ شعر کہے : میرا علاقہ ایسا نہیں ہے جہاں گھاس پھوس نہ ہو ، ان ( علاقوں ) کے بارے میں قلم کے ذریعے لکیریں لگائی گئی ہیں ( یعنی تحریر لکھی گئی ہے ) جو نبی اکرم صلی اللہ علیہ وسلم کی طرف سے ہے ، جب آپ نے لوگوں کو عطیات دیے ، تو کوئی الجھن اور التباس باقی نہیں رہنے دیا “
یہ روایت امام طبرانی نے نقل کی ہے اور اس کی سند میں ایسے راوی ہیں جن سے میں واقف نہیں ہوں ۔

سیدنا اوفی بن مولہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا تو آپ نے عمیم ( نامی جگہ ) مجھے جاگیر کے طور پر دے دی اور مجھ پر یہ شرط عائد کی کہ مسافر کو پہلی مرتبہ سیراب کرنا ہے ۔ آپ نے ہم میں سے ایک شخص ساعدہ کو بے آب و گیاہ جگہ میں ایک کنواں جاگیر کے طور پر دیا جس کا نام جعوبیہ تھا وہ ایک ایسا کنواں تھا ، جس میں مال چھپا کے رکھا گیا تھا وہ میٹھے پانی کا کنواں نہیں تھا آپ نے کچھ لوگوں کو معادہ العری جاگیر کے طور پر دیا تھا جو یمامہ سے پہلے ہے ہم سب وہاں آئے آپ نے ہم میں سے ہر ایک کے لئے چھڑے میں حکم تحریر کروایا تھا ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا رزین بن انس رضی اللہ عنہ بیان کرتے ہیں : جب اسلام غالب آ گیا تو دنینہ میں ہمارا ایک کنواں تھا ، ہمیں یہ اندیشہ ہوا کہ ہمارے اردگرد کے افراد اس پر قبضہ کر لیں گے راوی کہتے ہیں تو میں نبی اکرم صلی اللہ علیہ وسلم کی خدمت میں حاضر ہوا تو آپ نے ہمارے لئے یہ تحریر لکھوائی اللہ کے رسول سیدنا محمد صلی اللہ علیہ وسلم کی طرف سے اما بعد ! یہ ان لوگوں کا کنواں ہے اگر یہ سچے ہیں “ ۔ راوی بیان کرتے ہیں : اس کے بعد مدینہ منورہ کے جس بھی قاضی کے سامنے اس حوالے سے ہمارا مقدمہ پیش ہوا تو انہوں نے اس تحریر کی بنیاد پر ہمارے حق میں فیصلہ دیا ، کیونکہ نبی اکرم صلی اللہ علیہ وسلم کی تحریر موجود تھی اور ان لوگوں کا یہ کہنا تھا کہ یہ نبی اکرم صلی اللہ علیہ وسلم کی تحریر ہے ۔
یہ روایت امام طبرانی نے نقل کی ہے ۔ اس کی سند میں ایک راوی فہد بن عوف ابوربیعہ ہے اور وہ کذاب ہے ۔

ابوسائب اپنی دادی ، جو مہاجرین میں سے ایک ہیں ان کے حوالے سے یہ بات نقل کرتے ہیں : نبی اکرم صلی اللہ علیہ وسلم نے عقیق میں موجود ایک کنواں انہیں جاگیر کے طور پر دیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی ابوسائب ہے ۔ امام ذہبی کہتے ہیں : یہ مجہول ہے ۔

سیدنا عتیر عذری رضی اللہ عنہ کے بارے میں یہ بات منقول ہے کہ انہوں نے وادی قری میں موجود ایک زمین نبی اکرم صلی اللہ علیہ وسلم سے جاگیر کے طور پر مانگی آج اسے بویرہ عتیر کہا: جاتا ہے ۔ راوی کہتے ہیں : میں نے نبی اکرم صلی اللہ علیہ وسلم کو دیکھا کہ جب آپ نے تبوک میں پڑاؤ کیا ہوا تھا ، تو آپ نے وادی قریٰ میں نماز ادا کی تھی ۔
یہ روایت امام طبرانی نے نقل کی ہے ۔ اس کی سند میں ایک راوی سلیم بن مطیر ہے ۔ امام ابوحاتم اور ابن حبان نے اسے ضعیف قرار دیا ہے ۔

سیدنا مجاعہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا مجاعہ بن مرارہ رضی اللہ عنہ جن کا تعلق بنو سلمہ سے تھا انہیں یمامہ میں ایک زمین عطیہ کے طور پر دی جس کا نام عوزہ تھا ۔ راوی کہتے ہیں : نبی اکرم صلی اللہ علیہ وسلم نے اس کے بارے میں تحریر لکھوائی : یہ اللہ کے رسول سیدنا محمد صلی اللہ علیہ وسلم کی طرف سے مجاعہ بن مرارہ کے لئے ہے ، جو بنوسلمی سے تعلق رکھتا ہے میں تمہیں عوزہ دے رہا ہوں جو شخص اس بارے میں میرے حکم کی خلاف ورزی کرے گا ۔ تو اسے آگ نصیب ہو گی “ ۔ یہ تحریر یزید ( نامی صاحب ) نے لکھی تھی ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدہ قیلہ بنت مسلمہ رضی اللہ عنہا جو سیدنا حبیب بن ازہر رضی اللہ عنہ کی اہلیہ تھیں جن کا تعلق بنو خباب سے تھا ان کی بیٹیاں پیدا ہوئیں پھر ان صاحب کا انتقال ہو گیا ان بچیوں کے چچا ایوب بن ازہر نے اس خاتون کی بیٹیوں کو ان سے جدا کروا دیا ، تو وہ خاتون نبی اکرم صلی اللہ علیہ وسلم کی خدمت میں حاضر ہونے کے لئے نکلی یہ ابتداء اسلام کی بات ہے ان کی بیٹیوں میں سے ایک بچی جس کا نام حدیباء تھا ، وہ رونے لگی اس پر کپکپی طاری ہو گئی ، اور وہ ان میں سب سے کمسن تھی ۔ اس نے اونی لباس پہنا ہوا تھا اس خاتون نے اسے گود میں اٹھا لیا ، انہوں نے اس لڑکی کو بھی اپنے ساتھ سوار کر لیا ، وہ دونوں اونٹ پر سوار ہو کر جا رہی تھیں ، اسی دوران ایک خرگوش آیا ، تو حدیباء نے کہا: جی نہیں ! اللہ کی قسم ! اس بارے میں ہمیشہ تمہارا ٹخنہ ایوب کے ٹخنی سے بلند رہے گا ، پھر ایک لومڑی سامنے آئی ، تو اس نے اُس کے لئے مختلف نام استعمال کیا ، جو عبداللہ بن حسان نامی راوی بھول گئے ، پھر اس نے اس کے بارے میں بھی وہی بات کہی ، جو خرگوش کے بارے میں کہی تھی ، وہ دونوں جا رہے تھے اسی دوران اونٹ بیٹھ گیا اور اس پر کپکپی طاری ہو گئی ، تو حدیباء نے کہا: مجھے وہ صورت حال نصیب ہوئی ہے ، اللہ کی قسم ! جس نے ایوب کو گرفت میں لیا تھا ، میں نے کہا: یہ تو مضطرب ہو رہا ہے ، اب میں کیا کروں ؟ تمہارا ستیاناس ہو ، اس نے کہا: آپ اپنے کپڑے کو الٹ دیں اندر والے حصے کو باہر کر دیں اور پشت والے حصے کو پیٹ کی طرف کر دیں آپ اپنے اونٹ کی چادر کو پلٹ دیں ، پھر اس کے اوپر والے کپڑے کو اتار کر اسے پلٹ دیں ، اس کے اندرونی حصے کو باہر کی طرف کر دیں اس نے جو مجھے کہا: تھا ۔ جب میں نے ایسا کر دیا ، تو اونٹ ٹھیک ہو گیا اور کھڑا ہو گیا اور چل پڑا ، پھر حدبیاء نے کہا: آپ اپنے برتن دوبارہ استعمال کریں میں نے ایسا ہی کیا جو اس نے مجھے کہا: تھا ، پھر ہم لوگ روانہ ہو گئے ایوب تلوار نکال کر ہمارے پیچھے پیچھے دوڑتا ہوا آ رہا تھا ، ہم نے ایک بڑی آبادی کی پناہ لی اس کے بارے میں میرا یہ خیال تھا یہاں تک کہ میں نے اونٹ کو درمیان والے گھر میں ڈال دیا جو ایک کمزور اونٹ تھا میں لڑکی کو ساتھ لے کے اس کے اندر داخل ہو گئی وہ تلوار لے کے مجھ تک پہنچ گیا اس نے کچھ بکریوں کو نقصان پہنچایا اور بولا: تم میری بھتیجی میری طرف کر دو ، اے بو بدبو دار عورت ! تو وہ اس کے کندھے پر گئی ، وہ اسے لے کے چلا گیا میں اس کے بارے میں سب گھر والوں سے زیادہ بہتر جانتی تھی ۔ پھر میں اپنی بہن کے پاس آ گئی جس کی شادی بنو شیبان میں ہوئی تھی ، میں نبی اکرم صلی اللہ علیہ وسلم کی خدمت میں جانے کے لئے کسی ساتھی کی تلاش میں تھی ، یہ ابتدائے اسلام کی بات ہے ایک رات میں اپنی بہن کے پاس بیٹھی ہوئی تھی ، وہ یہ سمجھی کہ شاید میں سو چکی ہوں اس کا شوہر شام سے آیا تھا اس نے کہا: تمہارے باپ کی قسم میں نے قیلہ کے لئے ایک ساتھی کو پایا تھا جو سچا ساتھی تھا میری بہن نے دریافت کیا : وہ کون ہے ؟ اس نے جواب دیا : حریث بن حسان شیبانی جو بکر بن وائل کے سفیر کے طور پر آج صبح نبی اکرم صلی اللہ علیہ وسلم کی خدمت میں حاضر ہونے کے لیے گیا ہے ۔ میری بہن نے کہا: میرے لئے بربادی ہے تم میری بہن کو یہ بات نہ سنوانا کاش وہ بھی بکر بن وائل سے تعلق رکھنے والے فرد کے ساتھ روانہ ہو جاتی ، کیونکہ اس کے ساتھ قوم کا کوئی فرد نہیں ہے اس شخص نے کہا: تم اس کے سامنے اس کا ذکر نہ کرنا میں بھی اس کا ذکر نہیں کروں گا لیکن قیلہ نامی خاتون نے ان دونوں کی باتیں سن لیں تھیں وہ کہتی ہیں میں اگلے دن صبح اٹھی میں نے اپنے اونٹ پر پالان باندھا اور ان صاحب تک پہنچ گئی ، جو زیادہ دور تک نہیں گئے تھے میں نے ان کے ساتھ چلنے کا کہا: تو انہوں نے کہا: ٹھیک ہے یہ عزت افزائی کی بات ہے پھر میں ان کے ساتھ روانہ ہو گئی وہ ایک سچے ساتھی تھے ، یہاں تک کہ ہم لوگ نبی اکرم صلی اللہ علیہ وسلم کی خدمت میں حاضر ہو گئے ۔ نبی اکرم صلی اللہ علیہ وسلم لوگوں کو صبح کی نماز پڑھا رہے تھے جس کی اقامت اس وقت کہی تھی جب صبح صادق ہو گئی تھی اور آسمان میں ستارے چمک رہے تھے رات کی تاریکی کی وجہ سے افراد پہچانے نہیں جاتے تھے میں ایک ایسی عورت تھی جو زمانہ جاہلیت کے قریب تھی میں مردوں کی صف میں جا کے کھڑی ہو گئی صف میں جو شخص میرے ساتھ کھڑا ہوا تھا اس نے مجھ سے دریافت کیا : تم عورت ہو یا مرد ہو ؟ میں نے کہا: عورت ہوں اس نے کہا: تم نے مجھے آزمائش کا شکار کر دینا تھا تم اپنے پیچھے خواتین کی صف میں نماز ادا کرو خواتین کی صف حجروں کے قریب تھی جب میں اندر آئی تھی تو میں نے اسے نہیں دیکھا تھا میں اس میں آ گئی ، یہاں تک کہ جب سورج طلوع ہو گیا تو میں پاس آ گئی میں نے ایک صاحب کو دیکھا جو نمایاں حیثیت کے مالک تھے میری نگاہ ان پر جم گئی تاکہ لوگوں کے اوپر سے نبی اکرم صلی اللہ علیہ وسلم کو دیکھ سکوں سورج طلوع ہو جانے کے بعد ایک شخص آیا اور بولا: یا رسول اللہ آپ پر سلام ہو نبی اکرم صلی اللہ علیہ وسلم نے فرمایا : تم پر بھی سلام ہو اور اللہ کی رحمت ہو نبی اکرم صلی اللہ علیہ وسلم نے دو چادریں اوڑھی ہوئی تھیں جن پر زعفران لگا ہوا تھا ، جس کی خوشبو بھی آ رہی تھی آپ کے دست مبارک میں کھجور کی ایک چھڑی تھی جو صاف کی ہوئی تھی لیکن اس کے اوپر والے حصے کو اندر نہیں کیا گیا تھا ، اور آپ اکڑوں بیٹھے ہوئے تھے جب میں نے نبی اکرم صلی اللہ علیہ وسلم کو اس طرح عاجزی کے ساتھ بیٹھے ہوئے دیکھا تو مجھ پر رعب طاری ہو گیا آپ کے ساتھی نے آپ کی خدمت میں عرض کی : یا رسول اللہ ! یہ مسکین عورت پریشان ہے ۔ نبی اکرم صلی اللہ علیہ وسلم نے مجھ سے فرمایا حالانکہ آپ نے میری طرف دیکھا نہیں تھا ، کیونکہ میں آپ کی پشت کی طرف موجود تھی اے مسکین عورت تم پرسکون رہو جب نبی اکرم صلی اللہ علیہ وسلم نے یہ بات ارشاد فرمائی تو میرے دل میں جو رعب داخل ہوا تھا وہ اللہ تعالیٰ نے ختم کر دیا میرا ساتھی آگے بڑھا وہ پہلا فرد تھا اس کا نام حریث بن حسان تھا اس نے نبی اکرم صلی اللہ علیہ وسلم کے دست اقدس پر اپنی طرف سے بیعت کی پھر اس نے عرض کی : یا رسول اللہ ! آپ ہمارے اور بنو تمیم کے درمیان دہناء کو حد مقرر کر دیں کہ ان میں سے کوئی شخص مسافر کے طور پر یا گزرنے والے شخص کے طور پر ہی ہماری طرف آئے نبی اکرم صلی اللہ علیہ وسلم نے فرمایا : اے لڑکے ! اس کے لئے دہناء کے حوالے سے تحریر لکھ دو ۔ راوی خاتون کہتی ہیں : جب میں نے یہ بات دیکھی تو یہ بات میرے سامنے آئی کہ وہ تو میرا وطن اور میرا علاقہ ہے ۔ میں نے عرض کی : یا رسول اللہ ! اس شخص نے ٹھیک بات نہیں کی ہے دہناء نامی یہ جگہ اونٹوں کے آرام کی جگہ ہے بکریوں کے چرنے کی جگہ ہے بنو تمیم کے بچے اور عورتیں اس کے پاس رہتے ہیں نبی اکرم صلی اللہ علیہ وسلم نے فرمایا : اے لڑکے تم ٹھہر جاؤ مسکین عورت تم ٹھہر جاؤ مسلمان مسلمان کا بھائی ہوتا ہے پانی اور درخت ان دونوں کے لئے ہوتے ہیں اور وہ دونوں شیاطین کے خلاف ایک دوسرے کی مدد کرتے ہیں جب حریث نامی شخص نے یہ دیکھا کہ میری وجہ سے اس کے لئے تحریر لکھی نہیں جا رہی تو اس نے اپنا ایک ہاتھ دوسرے پر مارتے ہوئے کہا: میری اور تمہاری مثال یوں ہے کہ جیسے کوئی بکری اپنے پاؤں کے ذریعے زمین کھود کر چھری نکال کے خود کو ذبح کروا لیتی ہے اس خاتون نے کہا: اللہ کی قسم ! میں یہ جانتی ہوں کہ تم تاریکیوں میں راستہ بتانے والے ہو سواری کا ساتھ دینے والے ہو اپنی ساتھی خاتون کے ساتھ اچھا برتاؤ کرنے والے ہو یہاں تک کہ ہم لوگ نبی اکرم صلی اللہ علیہ وسلم کی خدمت میں حاضر ہو گئے لیکن تم مجھے اس چیز کے حوالے سے ملامت نہ کرو کہ میں اپنا وہ حصہ مانگوں جس طرح تم نے اپنا حصہ مانگا ہے اس نے کہا: دہناء میں تمہارا حصہ کیسے بنتا ہے ؟ تمہارا باپ نہ رہے میں نے کہا: وہ میرے اونٹوں کے باندھنے کی جگہ ہے جس کو تم اپنی بیوی کے اونٹ کے لئے مانگ رہے ہو اس نے کہا: اس میں کوئی شک نہیں ہے میں اللہ کے رسول کو گواہ بنا کر کہتا ہوں کہ جب تک میں زندہ رہوں گا میں تمہارا بھائی اور ساتھی بن کے رہوں گا ، تو نبی اکرم صلی اللہ علیہ وسلم نے ارشاد فرمایا : کیا اس عورت کے بیٹے کو اس بات پر ملامت کی جائے گی کہ وہ لکیر کے ذریعے فصل کر دے اور حجرے کے پیچھے سے مدد کرے وہ خاتون کہتی ہیں ، تو میں رونے لگی اور میں نے عرض کی : اللہ کی قسم ! یا رسول اللہ ! میں نے اسے حرام طور پر جنم دیا تھا اس نے ربذہ کے مقام پر آپ کے ساتھ جنگ میں حصہ لیا تھا پھر وہ خیبر چلا گیا تھا وہاں اسے بخار لاحق ہو گیا اور وہاں وہ مر گیا اور میرے پاس خواتین رہ گئی ہیں ، نبی اکرم صلی اللہ علیہ وسلم نے ارشاد فرمایا : جس کے دست قدرت میں میری جان ہے ، اگر تم مسکین عورت نہ ہوتی ، تو ہم نے تمہیں تمہارے چہرے کے بل گھسیٹنا تھا ، کیا تم خواتین میں سے کوئی عورت ایسا نہیں کر سکتی کہ وہ دنیا میں اپنی بیٹیوں کے ساتھ اچھے طریقے سے رہے اور جب اس کے اور اس کے درمیان وہ حائل ہو جائے ، جو ان کے بارے میں اس سے زیادہ حق رکھتا ہے ، تو پھر وہ انا للہ وانا الیہ راجعون پڑھے اور پھر یہ کہے : اے میرے پروردگار ! جو پہلے گزر گیا ہے اس کو میرے لئے اسوہ بنا دے اور جو باقی رہ گیا ہے اس کے بارے میں میری مدد فرما ، اس ذات کی قسم ! جس کے دست قدرت میں محمد صلی اللہ علیہ وسلم کی جان ہے تم میں سے کوئی ایک روتی ہے اور اپنی بیٹیوں کے حوالے سے پریشان ہوتی رہتی ہے ، اے اللہ کے بندو ! تم اپنے مرحومین کو عذاب نہ دو ، پھر نبی اکرم صلی اللہ علیہ وسلم نے اس خاتون کے لئے سرخ چمڑے پر ایک تحریر لکھوائی : ” یہ قیلہ اور قیلہ کی صاحبزادیوں میں سے دیگر خواتین کے لئے ہے کہ ان کے حق میں ظلم نہیں کیا جائے گا ، نکاح کرنے میں ان کے ساتھ زبردستی نہیں کی جائے گی ، ہر مومن اور ہر مسلمان اُن کا مددگار ہو گا ، تم لوگوں نے ان کے ساتھ اچھا سلوک کرنا ہے برا سلوک نہیں کرنا“ ۔ محمد بن ہشام نامی راوی کہتے ہیں : ابن عائشہ نے اس روایت کے مشکل الفاظ کی وضاحت ہمارے سامنے کی تھی ، وہ کہتے ہیں : فرصہ کا مطلب ابھری ہوئی چیز ہے ، اور ” فرصہ “ کا مطلب مشک کا ٹکڑا بھی ہے فرصہ کا مطلب دولہ بھی ہے ، لفظ انتہز فرصتک کا مطلب ، یعنی دولتک ہے ، سچ کا مطلب چادر کا پرانا ہوتا ہے ” تکان “ کا مطلب چلنے کی ایک قسم ہے ” انتفاج“ کا مطلب دوڑتا ہے لفظ ” شخ“ کا مطلب یہ ہے کہ اس نے وہاں کے دائیں حصے کا تمہیں والی بنایا ہے ، بعض عرب اسے بائیں حصے کے لئے بھی استعمال کرتے ہیں وہ ایک حصے کے ذریعے فال لیتے ہیں اور دوسرے حصے کے ذریعے بدشگونی لیتے ہیں ، لفظ ” تفاج“ کا مطلب کھلا کرنا ہے ، لفظ ” فوالنا “ یعنی ہم نے پناہ لی یادفار “” “” کا مطلب اے بد بودار عورت ! اسی لئے عرب دنیا کے بارے میں کہتے ہیں : ” اُم دفر “ کیونکہ اس کی بدبو ہوتی ہے ، ثم ” سدت عنہ “ یعنی اس کے بارے میں خبر طلب کی ، لفظ ” مقشو“ کا مطلب مقشور ہے ( یعنی جس کا چھلکا اترا ہوا ہو ) ” فتان“ کا مطلب شیاطین ہے ، اس کی واحد ” فاتن “ آتی ہے لفظ ” حتفھا تحمل ضان باظلافھا “ یہ عربوں کا ایک محاروہ ہے ایک ایسی بکری کے بارے میں جو اپنے پیروں کے ذریعے زمین کرید رہی ہوتی ہے اس میں سے چھری نکل آتی ہے اور اس کے ذریعے وہ بکری ذبح ہو جاتی ہے ، تو یہ چیز ضرب المثل بن گئی ( یعنی اپنا نقصان خود کرنا ) ۔ ” قضیہ “ یعنی امور کا ختم ہو جانا ” شخص “ یعنی میں نے اپنی نگاہ کو اٹھایا ، ” فکسرا “ یعنی اس نے جو سنا ہے اسے ختم کرنے کے لئے ” اسنی “ یعنی آپ مجھے اسوہ بنا دیں ، جس کے حوالے سے آپ مجھے نصیحت کریں ۔ متمم بن نویرہ نے کہا: ہے : ” جب اس نے مجھ سے ( حال ) دریافت کیا ، تو میں نے اس سے کہا: طویل اسوہ ہے ، غم کی جلن نے چہرے کو سیاہ کر دیا ہوا ہے “ ۔ لفظ ” اسفع“ کا مطلب سیاہ ہونا ہے ۔
یہ روایت امام طبرانی نے نقل کی ہے اور اس کے رجال ثقہ ہیں ۔